Beibele e ka Thuša Lenyalong la Gago

LENYALO​—lentšu le go ba bangwe le tsoša dikgopolo tše thabišago. Go ba bangwe, le tšweletša manyami. Mosadi yo mongwe yo a nyetšwego o lla ka gore: “Ke ikwa eka ke hladilwe. Ke ikwa ke lahlilwe e bile ke lewa ke bodutu ka dinako tšohle.”

Ke’ng seo se dirago batho ba babedi bao pele ba ilego ba ena gore ba tla ratana le go hlokomelana gore ba se sa ba le maikwelo a lerato? Lebaka le lengwe ke go se rutwe ka seo se akaretšwago lenyalong. Mongwadi yo mongwe wa ditaba tša tša kalafo o itše: “Re tsena lenyalong ka ntle le go newa tlwaetšo le ge e le efe.”

Nyakišišo yeo e dirilwego ke The National Marriage Project, e lego nyakišišo e tseneletšego ya Yunibesithing ya Rutgers yeo e lego New Jersey, U.S.A., e bontšhitše gore ba sego kae lehono ba na le tsebo mabapi le lenyalo. Balaodi ba nyakišišo ba ngwadile gore: “Batho ba bantši nyakišišong ye ba godišitšwe ke batswadi bao ba bego ba sa thaba lenyalong goba bao ba bego ba hlalane. Ba tseba gabotse-botse seo lenyalo leo le sa atlegago le lego sona, eupša ga ba kgonthišege gore lenyalo le le atlegilego le swanetše go ba bjang. Ba bangwe ba ka fo hlalosa lenyalo le le atlegilego ka gore ‘ke leo le fapanego le la batswadi ba-ka.’”

Na Bakriste ga ba kgongwe ke mathata a lenyalo? A a ba kgoma. Ge e le gabotse, lekgolong la pele la nywaga Bakriste ba bangwe ba be ba nyaka keletšo e lebanyago ya gore ‘ba tlogele go nyaka go tlemollwa’ manyalong a bona. (1 Ba-Korinthe 7:​27) Go molaleng gore lenyalo le ge e le lefe la batho ba babedi bao ba sa phethagalago le tla ba le mathata a lona, eupša re na le seo se ka re thušago. Basadi le banna bao ba nyalanego ba ka kaonefatša tswalano ya bona ka go diriša melao ya motheo ya Beibele.

Ke therešo gore Beibele ga se puku ya ditaelo ya lenyalo. Lega go le bjalo, ka ge e buduletšwe ke Yoo a thomilego tokišetšo ya lenyalo, re ka lebelela gore melao ya yona ya motheo e be e holago. Ka moporofeta Jesaya, Jehofa Modimo o itše: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara. Mola O ka be O theeditše xe ke Xo laêla, moláô wa xaxo o ka be o swana le noka, xo loka xa xaxo xo ka be xo etša maphoto a lewatlê.”​—Jesaya 48:​17, 18.

Na lerato leo le bego le le gona pele magareng ga gago le molekane wa gago le thomile go fela? Na o ikwa o tantšwe ka lenyalong leo le se nago lerato? Mosadi yo mongwe yo a bilego lenyalong ka nywaga e 26 o itše: “Bohloko bjoo bo tlišwago ke mohuta wo wa tswalano ga bo hlalosege le gatee. Ke bjo bo sa fetogego le bjo bo sa kgaotšego.” Go e na le gore o itlhoboge lenyalong leo le sa go kgotsofatšego, ke ka baka la’ng o sa ikemišetše go dira se sengwe mabapi le seo? Sehlogo se se latelago se tla bontšha banna le basadi bao ba nyalanego kamoo Beibele e ka ba thušago ka gona sebopegong se sengwe se se kgethegilego sa lenyalo​—e lego sa boitlamo.