Dipotšišo tše Tšwago go Babadi

Go ba le “bophelo ka go yena” go bolela’ng?

Beibele e bolela ka Jesu Kriste e le yo a nago le “bophelo ka go yena” gomme e bolela ka balatedi ba gagwe e le bao ba nago le ‘bophelo ka go bona.’ (Johane 5:​26; 6:​53, NW) Lega go le bjalo, mangwalo a a mabedi ga a bolele selo se se swanago.

Jesu o boletše gore, “Bjalo ka ge Tate a e-⁠na le bophelo ka go yena, o neile le Morwa gore a be le bophelo ka go yena.” Pele ga ge a ka bolela mantšu a a bohlokwa Jesu o itše: “Ruri, ruri ke a Le botša, e a kwaxo se ke se bolêlaxo a dumêla E a nthomilexo, ó na le bophelô byo bo sa felexo, . . . xo tla lebaka, le byale e šetše è le lôna, leo bahu ba tl’o xo kwa Lentšu la Morwa-Modimo; ’me ba ba le kwilexo ba tlo phela.” Mo Jesu o be a bolela ka matla a fetago a tlhago ao Tatagwe a mo neilego ona​—bokgoni bja go nea batho boemo bjo bobotse pele ga Modimo. Go oketša moo, Jesu o kgona go tsoša bao ba robetšego lehung le go ba nea bophelo. Go Jesu, go ba le “bophelo ka go yena” go bolela gore o neilwe matla a. Ka go swana le Tate, Morwa le yena o na le “mpho ya bophelo ka go yena.” (Johane 5:​24-26; mongwalo wa ka tlase wa NW) Go thwe’ng ka balatedi ba gagwe?

Mo e ka bago ngwaga ka morago, Jesu o ile a botša batheetši ba gagwe gore: “Ruri, ruri, ke a Le botša, xe Le sa je nama ya Morwa-motho la nwa madi a xaxwe, Le ka se bê le bophelô [ka go lena, NW.] E a naxo le bophelô byo bo sa felexo ké eo a jaxo nama ya-ka a nwa madi a-⁠ka ’me Nna ke tlo mo tsoša ka ’tšatši la mafêlêlô.” (Johane 6:​53, 54) Jesu mo o lekanya go ba le “bophelo ka go lena” le go hwetša “bophelo bjo bo sa felego.” Dipolelwana tšeo di hlamilwego ka popopolelo e swanago ya “go ba le bophelo ka go lena” di hwetšwa mafelong a mangwe ka Mangwalong a Segerika. Mehlala e mebedi ke “e-bang le letswai ka go lena” le “go hwetša moputso o tletšego ka go bona.” (Mareka 9:​50, NW; Ba-Roma 1:​27, NW) Maemong a, dipolelwana tše ga di bontšhe matla a go nea ba bangwe letswai goba go nea motho le ge e le ofe moputso. Go e na le moo, di bontšha pheletšo ya ka gare goba botlalo. Ka gona polelwana “bophelo ka go lena” yeo e dirišitšwego go Johane 6:​53 (NW) e fo ba e bolela ka go tsena bophelong bjo bo tletšego e le ka kgonthe.

 Ge a be a bolela ka barutiwa ba gagwe e le bao ba nago le bophelo ka go bona, Jesu o boletše ka nama ya gagwe le madi a gagwe. Ka morago, ge a be a hloma Sejo sa Morena sa Mantšiboa, Jesu gape o boletše ka nama le madi tša gagwe gomme a laela balatedi ba gagwe bao ba bego ba tla išwa kgweranong e mpsha gore ba je diswantšhetšo tša senkgwa seo se sa omelwago le go nwa beine. Na se se bolela gore ke Bakriste ba tloditšwego feela bao ba lego kgweranong e mpsha le Jehofa Modimo bao ba hwetšago bophelo bjo bjalo bjo bo tletšego? Aowa. Ditiragalo tše ka bobedi di be di fetana ka ngwaga. Bao ba kwelego mantšu a Jesu ao a begilwego go Johane 6:​53, 54 ba be ba sa tsebe selo mabapi le go binwa ga monyanya wa ngwaga le ngwaga le ka diswantšhetšo tšeo di emelago nama le madi tša Kriste.

Go ya ka Johane kgaolo 6, Jesu o thoma ka go bapiša nama ya gagwe le manna ka go bolela gore: “Bô-tata-weno ba lle Mana lešokeng, moka ba hwa. Boxôbê šo-bo byo bo foloxaxo lexodimong, byo motho a bo jaxo a se hlwê a e-⁠hwa. Boxôbê byoo bya xo phela, byo bo foloxilexo lexodimong, ké Nna. Xe motho a e-⁠ja boxôbê byó bya-ka, ó tlo phela xo ya xo ile.” Nama ya Jesu gotee le madi a gagwe di be di feta manna a kgonthe. Bjang? Ka gobane nama ya gagwe e be e neelwa gore “lefase le phelê,” e le gore bophelo bjo bo sa felego bo kgonege. * Ka baka leo, polelo e lego go Johane 6:​53 (NW) mabapi le “bophelo ka go lena” e šoma go bohle bao ba hwetšago bophelo bjo bo sa felego​—legodimong goba lefaseng.​—Johane 6:​48-⁠51.

Ke neng mo balatedi ba Kriste ba hwetšago bophelo ka go bona goba ba tsenago bophelong bjo bo tletšego? Bakeng sa batlotšwa bao e lego baja-bohwa Mmušong, se se direga tsogong ya bona ya go tsogela bophelong bja legodimong e le dibopiwa tša moya tšeo di sa hwego. (1 Ba-Korinthe 15:​52, 53; 1 Johane 3:⁠2) “Dinku tše dingwê” tša Jesu di tsena bophelong bjo bo tletšego ka morago ga bofelo bja Pušo ya Nywaga e Sekete. Ka nako yeo, ba tla be ba lekilwe, ba hweditšwe e le bao ba botegago gomme ba itlhatsetše e le baloki bakeng sa bophelo bjo bo sa felego Paradeiseng ya lefaseng.​—Johane 10:​16; Kutollo 20:​5, 7-⁠10.

Bakriste ka moka ba therešo ba ka ba le ‘bophelo ka go bona’