Ge Dikholofetšo e tla ba e le tše di Kgonthišeditšwego

HISTORI e tletše ka dikholofetšo tše di sa phethagatšwego. Gantši ditšhaba di be di palelwa ke go boloka ditumelelano tše di saennwego ka molao e le gore di pheme dikgohlano le ditšhaba tše dingwe, ka go rialo tša lebiša batho ba tšona dintweng tše di šiišago. Lebakeng le lengwe Napoleon o ile a bolela gore: “Mebušo e boloka dikholofetšo tša yona ge e ba e gapeletšwa go dira bjalo, goba ge e ba go dira bjalo go tla e hola.”

Go thwe’ng ka dikholofetšo tše di dirwago ke batho ka o tee ka o tee? Ke mo go nyamišago gakaakang ge motho a sa kgomarele mantšu a gagwe! Se se bjalo kudu-kudu ge e ba e le motho yo o mo tsebago le yo o mmotago. Ke therešo gore batho ba ka ba ba palelwa goba ba sa rate go phethagatša dikholofetšo tša bona.

A phapano e kaakang ye e lego gona magareng ga dikholofetšo tša batho le dikholofetšo tša Modimo! Dikholofetšo tša Modimo ke tše di ka botwago le go holofelwa ka mo go feletšego. Kholofetšo le ge e le efe e dirwago ke Jehofa Modimo ke yeo e kgonthišeditšwego. Ke therešo gore e tla phethagala e le ka kgonthe. Ge e šupa lentšung la Modimo le le ka se palelwego, Jesaya 55:​11 e re: “Le Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo le tlo phêtha se ke le rometšexo sôna.”

Ka gona, re swanetše go lebelela bjang dikholofetšo tša Modimo tše di ngwadilwego ka Beibeleng? Re ka ithekga ka tšona e le ka kgonthe. Ka mohlala, moapostola Johane o ngwadile gore: “Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-⁠ba xôna; le xe e le manyami le dillô le bohloko, di ka se hlwê di e-⁠ba xôna; xobane tša pele di fetile.” (Kutollo 21:​3, 4) O ka thabela ditšhegofatšo tše bjalo ge e ba o dira dilo ka go dumelelana le mantšu a Jesu a rego: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.”​—Johane 17:⁠3.

Na o tla Amogela Ketelo?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org