Ke ka Baka la’ng re Swanetše go Rapela ka go se Kgaotše?
Ke ka Baka la’ng re Swanetše go Rapela ka go se Kgaotše?
“Le se kxaotše xo rapêla. Mo xo tšohle Le leboxê.” —1 BA-THESALONIKA 5:17, 18.
1, 2. Daniele o ile a bontšha bjang gore o be a tšeela godimo tokelo ya thapelo, gomme seo se bile le mafelelo afe tswalanong ya gagwe le Modimo?
MOPOROFETA Daniele o be a tlwaetše go rapela Modimo gararo ka letšatši. O be a khunama lefasetereng la phapoši ya gagwe ya ka godimo ga tlhaka, leo le bego le lebeletše motseng wa Jerusalema, ke moka a rapela. (1 Dikxoši 8:46-49; Daniele 6:10) Gaešita le ge taelo ya bogošing e be e iletša gore dithapelo di se lebišwe go motho yo mongwe ka ntle le Dario, e lego kgoši ya ba-Meda, Daniele ga se a ka a nagana gabedi. Go sa šetšwe gore seo se be se bea bophelo bja gagwe kotsing goba go se bjalo, monna yo wa thapelo o ile a rapela Jehofa ka go se kgaotše.
2 Jehofa o ile a lebelela bjang Daniele? Ge morongwa Gabariele a be a tlile go tlo araba e nngwe ya dithapelo tša Daniele, o ile a hlalosa moporofeta e le “moratiwa.” (Daniele 9:20-23) Boporofeteng bja Hesekiele, Jehofa o ile a bolela ka Daniele e le monna wa moloki. (Hesekiele 14:14, 20) Go theoša le nywaga, go molaleng gore dithapelo tša Daniele di ile tša feleletša ka gore a be le tswalano ya kgaufsi le Modimo wa gagwe, therešo yeo e ilego ya lemogwa gaešita le ke Dario.—Daniele 6:17.
3. Go etša ge go bontšhitšwe ke phihlelo ya moromiwa yo mongwe, thapelo e ka re thuša bjang gore re dule re botega?
3 Go rapela ka mehla go ka re thuša gape go lebeletšana le diteko tše šoro. Ka mohlala, nagana ka taba ya Harold King, moromiwa kua China yo a ilego a lahlelwa kgolegong ya bodulanoši ka nywaga e mehlano. Ngwanabo rena King o bolela mabapi le phihlelo ya gagwe gore: “Nka fo ba ke arogantšwe le bana bešo, eupša ga go le o tee yo a ka nkaroganyago le Modimo. . . . Ka gona, ke dutše ke bonagala pele ga mang le mang yo a ka fetago pele ga sele ya-ka, ke be ke khunama gararo ka letšatši gomme ke rapelela godimo, ke gopola ka Daniele, yo Beibele e bolelago ka yena. . . . Go be go bonagala eka mabakeng ao moya wa Modimo o be o hlahla kgopolo ya-ka ditabeng tše di holago kudu gomme o nnea maikwelo a boiketlo. Ruri thapelo e ile ya ntlišetša matla le khomotšo tša moya!”
4. Ke dipotšišo dife tša mabapi le thapelo tšeo re tlago go di ela hloko sehlogong se?
4 Beibele e re: “Le se kxaotše xo rapêla. Mo xo tšohle Le leboxê.” (1 Ba-Thesalonika 5:17, 18) Ka go dumelelana le keletšo ye, anke re eleng hloko dipotšišo tše di latelago: Ke ka baka la’ng re swanetše go ela hloko dithapelo tša rena? Ke mabaka afe ao re nago le wona a go batamela Jehofa ka mehla? Le gona re swanetše go dira’ng ge e ba re ikwa re sa swanelegele go rapela Modimo ka baka la mafokodi a rena?
Agang Segwera ka Thapelo
5. Thapelo e re thuša go thabela tswalano efe ya moswana-noši?
5 Na o ka rata gore Jehofa a nagane ka wena o le bjalo ka mogwera wa gagwe? O ile a bolela ka mopatriareka Aborahama ka tsela yeo. (Jesaya 41:8; Jakobo 2:23) Jehofa o nyaka gore re hlagolele tswalano ya mohuta woo le yena. Ge e le gabotse o re laletša gore re mmatamele kgaufsi. (Jakobo 4:8) Na taletšo yeo ga se ya swanela go re dira gore re naganišiše ka tokišetšo ya moswana-noši ya thapelo? Go tloga go le thata gakaakang go hwetša tumelelo ya go ka bolela le mohlankedi yo bohlokwa wa mmušong, re sa bolele ka go ba mogwera wa gagwe! Lega go le bjalo, Mmopi wa legohle o re kgothaletša go mmatamela ka bolokologi ka thapelo, neng le neng ge re nyaka goba re rata go dira bjalo. (Psalme 37:5) Dithapelo tša rena tša go se kgaotše di re thuša go ba le tswalano ya kgaufsi le Jehofa.
6. Mohlala wa Jesu o re ruta’ng mabapi le go nyakega ga gore re ‘rapele ka go se kgaotše’?
6 Lega go le bjalo, go tloga go le bonolo go hlokomologa thapelo! Go fo swaragana le dikgateletšo tša bophelo bja letšatši le letšatši go ka goga tlhokomelo ya rena e kgolo mo e lego gore ga re dire boiteko bja go bolela le Modimo. Jesu o ile a kgothaletša barutiwa ba gagwe gore ba “rapêlê [“ka go se kgaotše,” NW]” gomme yena ka noši o ile a dira seo. (Mateo 26:41) Gaešita le ge a ile a ikhwetša a swaregile ka dinako tšohle go tloga mesong go fihla bošego, o ile a beela nako ka thoko bakeng sa go boledišana le Tatagwe wa legodimong. Ka dinako tše dingwe Jesu o be a “tsoxa è sa le bošexo,” e le gore a rapele. (Mareka 1:35) Mabakeng a mangwe, o be a e-ya lefelong leo go sego batho bofelong bja letšatši e le gore a bolele le Jehofa. (Mateo 14:23) Jesu ka mehla o be a ipha nako ya go rapela, gomme le rena re swanetše go dira bjalo.—1 Petro 2:21.
7. Ke maemo afe ao a swanetšego go re šušumeletša go bolela le Tatago rena wa legodimong letšatši le letšatši?
7 Dibaka tše di swanetšego bakeng sa thapelo ya ka sephiring di itšweletša ka makga a mantši letšatši le letšatši ge re dutše re lebeletšana le mathata, re gahlana le diteko le ge re dira diphetho. (Ba-Efeso 6:18) Ge re nyaka tlhahlo ya Modimo dibopegong ka moka tša bophelo, tswalano ya rena le yena e tla gola e le ka kgonthe. Ge e ba bagwera ba babedi ba lebeletšana le mathata ba le gotee, na tswalano yeo e lego gona magareng ga bona ga e matlafale? (Diema 17:17) Selo se se swanago ke sa therešo ge re ithekga ka Jehofa gomme re thabela thušo ya gagwe.—2 Koronika 14:11.
8. Go tšwa mehlaleng ya Nehemia, Jesu le Hanna, re ithuta’ng mabapi le botelele bja dithapelo tša rena tša motho ka noši?
8 Re ka thabišwa kudu ke go tseba gore Modimo ga a bee mellwane ya gore re swanetše go bolela le yena nako e kaakang ka thapelo goba gore re swanetše go bolela le yena ka makga a makae! Nehemia o ile a rapela kapejana ka go se hlaboše pele ga ge a ka dira kgopelo go kgoši ya Peresia. (Nehemia 2:4, 5) Jesu le yena o ile a rapela thapelo e kopana ge a be a kgopela gore Jehofa a mo nee matla a go tsoša Latsaro. (Johane 11:41, 42) Ka lehlakoreng le lengwe, Hanna “o ile a lelefatša thapelo ya gagwe pele ga Jehofa” ge a be a mo tšhollela pelo ya gagwe. (1 Samuele 1:12, 15, 16, NW) Dithapelo tša rena tša motho ka noši e ka ba tše kopana goba tše telele go ithekgile ka senyakwa goba maemo.
9. Ke ka baka la’ng dithapelo tša rena di swanetše go akaretša ditheto le ditebogo bakeng sa sohle seo Jehofa a re direlago sona?
9 Dithapelo tše dintši ka Beibeleng di bolela ka tebogo e tšwago pelong ya go leboga boemo bjo bo phagamego bja Jehofa gotee le mediro ya gagwe e makatšago. (Ekisodo 15:1-19; 1 Koronika 16:7-36; Psalme 145) Ponong, moapostola Johane o bona bagolo ba 24—palo e feletšego ya Bakriste ba tloditšwego ba le maemong a bona a legodimong—ba reta Jehofa ka gore: “E a swanetšwexo ke letaxô le thêtô le matla ke Wene Morêna Modimo wa rena, xobane ke Wene O hlodilexo dilô tšé; xe di tšwêlêla di hlolexile, ké ka xobane O ratile fao.” (Kutollo 4:10, 11) Le rena ka mo go swanago re na le lebaka la go reta Mmopi ka mehla. Batswadi ba thaba gakaakang ge ngwana wa bona a ba leboga go tšwa pelong ka baka la seo ba mo diretšego sona! Go lebelela botho bja Jehofa ka tebogo le go bontšha tebogo ya rena e tšwago pelong bakeng sa bjona ke tsela e botse ya go kaonefatša boemo bja dithapelo tša rena.
Ke ka Baka La’ng re Swanetše go ‘Rapela ka go se Kgaotše’?
10. Thapelo e kgatha tema efe go matlafatšeng tumelo ya rena?
10 Go rapela ka mehla go bohlokwa bakeng sa tumelo ya rena. Ka morago ga go bontšha bohlokwa bja go ‘rapela re sa lape,’ Jesu o botšišitše gore: “Morwa-motho mohla a tlaxo a Le re ó tlo hwetša lefaseng xò sa na le tumêlô?” (Luka 18:1-8) Thapelo ya phišego le e tšwago pelong e aga tumelo. Ge mopatriareka Aborahama a be a tšofala gomme a se a tšwa a tšweletša peu, o ile a bolela le Modimo mabapi le taba yeo. Ge Jehofa a be a mo araba, o ile a thoma pele ka go mo kgopela gore a lebelele legodimong gomme a bale dinaledi, ge e ba a be a ka kgona go di bala. Ke moka Modimo o ile a kgonthišetša Aborahama lefsa ka gore: “Bana ba xaxo ba tlo ata ba etša tšôna tšeo.” Mafelelo e bile afe? Aborahama o ile “a dumêla Morêna, ’me Morêna a mmalêla tumêlô yeo a re ké xôna xo loka.” (Genesi 15:5, 6) Ge e ba re bulela Jehofa dipelo tša rena ka thapelo, re amogela dikgonthišetšo tša gagwe tše tšwago ka Beibeleng gomme re mo kwa, o tla matlafatša tumelo ya rena.
11. Thapelo e ka re thuša bjang go lebeletšana ka katlego le mathata?
11 Thapelo e ka re thuša gape go swaragana le mathata. Na morwalo wa rena bophelong ke o robago gomme maemo ao re lebeletšanago le ona ke a thata? Beibele e re botša gore: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.” (Psalme 55:22) Ge re lebeletšane le diphetho tše thata, re ka latela mohlala wa Jesu. O ile a fetša bošego ka moka a rapela ka sephiring pele ga ge a kgetha baapostola ba gagwe ba 12. (Luka 6:12-16) Le gona bošegong bja pele ga ge a e-hwa, Jesu o ile a rapela kudu moo ‘dikudumela tša gagwe di ilego tša ba bjalo ka marotholodi a madi a rothelago fase.’ (Luka 22:44) Mafelelo e bile afe? “O ile a kwewa a hlakodišwa poifong.” (Ba-Hebere 5:7) Dithapelo tša rena tša phišego le tša go se kgaotše di tla re thuša go lebeletšana le maemo a gateletšago gotee le diteko tše thata.
12. Ke bjang thapelo e bontšhago gore Jehofa o a re kgahlegela?
12 Lebaka le lengwe gape la gore re batamele kgaufsi-ufsi le Jehofa ka thapelo ke gore, le yena o feleletša a re batamela kgaufsi-ufsi. (Jakobo 4:8) Ge re bulela Jehofa pelo ya rena ka thapelo, na ga re ikwe a kgahlegela dinyakwa tša rena gomme a re hlokomela ka lerato? Re thabela lerato la Modimo re le motho ka o tee ka o tee. Jehofa ga se a nea motho le ge e le ofe boikarabelo bja go theetša thapelo le ge e le efe yeo bahlanka ba gagwe ba e lebišago go yena bjalo ka Tatago bona wa legodimong. (Psalme 66:19, 20; Luka 11:2) Le gona o re laletša gore re ‘lahleleng dipelaelo ka moka tša rena godimo ga gagwe ka gobane o a re belaelela.’—1 Petro 5:6, 7.
13, 14. Ke mabaka afe ao re nago le wona a go rapela ka go se kgaotše?
13 Thapelo e dira gore re be le phišego e kgolo ka bodiredi bja phatlalatša gomme e a re matlafatša ge go se thabele goba kganetšo di re dira gore re ikwe re nyaka go tlogela. (Ditiro 4:23-31) Le gona thapelo e ka re šireletša malebana le “dipoxo tša Diabolo.” (Ba-Efeso 6:11, 17, 18) Ge re katana le go lebeletšana ka katlego le diteko tša letšatši le letšatši, re ka kgopela Modimo ka go se kgaotše gore a re matlafatše. Thapelo ya Jesu ya mohlala e akaretša kgopelo ya gore Jehofa a “re phološe go yo mobe,” e lego Sathane Diabolo.—Mateo 6:13, NW.
14 Ge e ba re tšwela pele re rapelela thušo bakeng sa go laola ditshekamelo tša rena tša sebe, re tla thabela thušo ya Jehofa. Re na le kgonthišetšo ye: “Modimo ke Mmotexi; a ka se kê a lesa la lekwa ka tše di kaxo Le palêla; xotee le molekô ó tlo fêla a bea sebaka sa xo tlo efoxa, xore Le kxônê xo kxôtlêlêla.” (1 Ba-Korinthe 10:13) Moapostola Paulo ka noši o ile a thabela tlhokomelo e matlafatšago ya Jehofa maemong a bego a tloga a sa swane. O itše: “Ke kxôna tšohle ka Eo a mphaxo matla.”—Ba-Filipi 4:13; 2 Ba-Korinthe 11:23-29.
Se Kgaotšeng go Rapela go sa Šetšwe Mafokodi
15. Ke’ng seo se ka diregago ge e ba boitshwaro bja rena bo palelwa ke go dumelelana le ditekanyetšo tša Modimo?
15 Gore dithapelo tša rena di kwewe, ga se ra swanela go gana keletšo ya Lentšu la Modimo. Moapostola Johane o ngwadile gore: “Se re kaxo se kxopêla, re tla se amoxêla xo Modimo, xobane re tlo ba rè e-ya ka melaô ya xaxwe, rè dira se se Mo kxahlaxo.” (1 Johane 3:22) Lega go le bjalo, ke’ng seo se ka diregago ge e ba boitshwaro bja rena bo palelwa ke go dumelelana le ditekanyetšo tša Modimo? Adama le Efa ba ile ba utama ka morago ga go dira sebe kua tšhemong ya Edene. Le rena re ka sekamela mokgweng wa go utamela “sefahloxô sa Morêna Modimo” gomme ra kgaotša go rapela. (Genesi 3:8) Klaus yo e lego molebeledi wa mosepedi yo a nago le phihlelo o bolela gore: “Ke lemogile gore mabakeng a mantši mogato wa pele o fošagetšego woo o tšewago ke bao ba tlogelago Jehofa le mokgatlo wa gagwe ke wa go kgaotša go rapela.” (Ba-Hebere 2:1) Se e bile sa therešo ka José Ángel. O re: “Mo e ka bago ka nywaga e seswai, ke be ke rapela Jehofa ka sewelo. Ke be ke ikwa ke sa swanelegela go bolela le yena, gaešita le ge ke be ke dutše ke mo lebelela e le Tate wa-ka wa legodimong.”
16, 17. Nea mehlala e bontšhago gore go rapela ka mehla go ka re thuša go fenya mafokodi a moya.
16 Ba bangwe ba rena re ka ikwa re sa swanelegela go rapela ka baka la go fokola moyeng goba ka baka la ge re wetše tirong ya bobe. Eupša ye ke nako yeo gabotse re swanetšego go ikhola ka tokišetšo ya thapelo. Jona o ile a tšhabela kabelo ya gagwe. Eupša ‘ge a le tlalelong, Jona o ile a bitša Jehofa, gomme a mo araba. O ile a hlaba mokgoši a le ka teng ga lefelo la bahu gomme Jehofa a kwa lentšu la gagwe.’ (Jona 2:2) Jona o ile a rapela gomme Jehofa a kwa thapelo ya gagwe, ke moka Jona a kaonefala moyeng.
17 José Ángel le yena o ile a rapelela thušo ka phišego. O a gopola: “Ke ile ka bula pelo ya-ka gomme ka kgopela Modimo gore a ntebalele. O ile a tloga a nthuša. Ga ke nagane gore nkabe ke ile ka boela therešong ka ntle le thušo ya thapelo. Ga bjale ke rapela letšatši le lengwe le le lengwe, gomme ke lebelela pele dinakong tše bjalo.” Re swanetše go ikwa re lokologile ka mehla go bolela le Modimo ka bolokologi mabapi le diphošo tša rena gomme re mo kgopele tebalelo ka boikokobetšo. Ge Kgoši Dafida a be a ipobola melato ya gagwe, Jehofa o ile a mo lebalela dibe tša gagwe. (Psalme 32:3-5) Jehofa o nyaka go re thuša, e sego go re ahlola. (1 Johane 3:19, 20) Le gona dithapelo tša banna ba godilego ka phuthegong di ka re thuša moyeng, ka baka la gore dithapelo tša bona di “dira tše kxolo.”—Jakobo 5:13-16.
18. Ke kholofelo efe yeo bahlanka ba Modimo ba nago le yona go sa šetšwe gore ba sentše gakaaka’ng?
18 Ke tate ofe yoo a ka gerulago morwa wa gagwe yoo ka boikokobetšo a tlago go yena bakeng sa thušo le keletšo ka morago ga gore a dire phošo? Seswantšho sa morwa wa lehlaswa se bontšha gore go sa šetšwe gore re ka ba re sentše gakaakang, Tatago rena wa legodimong o a thaba ge re boela go yena. (Luka 15:21, 22, 32) Jehofa o kgothaletša bohle bao ba fošago gore ba mmitše, “xobane ké wa tebalèlô e nntši.” (Jesaya 55:6, 7) Gaešita le ge Dafida a ile a dira dibe tše mmalwa tše dikgolo, o ile a bitša Jehofa ka gore: “Modimo, theetša xe ke rapêla. Se nkxerulê xe ke Xo llêla.” O ile a bolela gape gore: “Mantšibua le bosasa le mosexare ke mo llêla kè bobola; ’me [Jehofa] lentšu la-ka ó le kwile.” (Psalme 55:1, 17) Seo ke se se kgonthišetšago gakaakang!
19. Ke ka baka la’ng re sa swanela go phetha ka gore dithapelo tšeo di bonalago di sa arabja ke bohlatse bja gore Modimo ga a di amogele?
19 Go thwe’ng ge e ba thapelo ya rena e sa arabje le semeetseng? Gona re swanetše go kgonthišetša gore kgopelo ya rena e dumelelana le thato ya Jehofa gomme e dirwa leineng la Jesu. (Johane 16:23; 1 Johane 5:14) Morutiwa Jakobo o ile a bolela ka Bakriste ba bangwe bao dithapelo tša bona di bego di sa kwewe ka baka la ge ba be ba “rapêla ka mokxwa o mobe.” (Jakobo 4:3) Ka lehlakoreng le lengwe, ga se ra swanela go kitimela go phetha ka gore ka mehla dithapelo tšeo di bonagalago di sa arabja ke bohlatse bja gore Modimo ga a di amogele. Ka dinako tše dingwe Jehofa a ka dumelela barapedi ba gagwe ba botegago go tšwela pele ba rapela ka taba e itšego ka nakwana pele ga ge a ka ba araba. Jesu o itše: “Tšwelang pele le kgopela, gomme le tlo fiwa.” (Mateo 7:7, NW) Ka gona, re swanetše ‘go rapela ka go se kgaotše.’—Ba-Roma 12:12.
Rapelang ka Mehla
20, 21. (a) Ke ka baka la’ng re swanetše go rapela ka go se kgaotše mo ‘mehleng ye ya bofelo’? (b) Re tla amogela’ng ge e ba re batamela sedulo sa Jehofa sa bogoši sa botho bjo bo sa swanelago?
20 Dikgateletšo le mathata di a oketšega mo ‘mehleng ye ya bofelo’ yeo e swawago ka “dinako tše hlobaetšago tšeo go lego thata go lebeletšana le tšona.” (2 Timotheo 3:1, NW) Le gona go bonolo gore re nagane kudu ka diteko. Lega go le bjalo, dithapelo tša rena tša go se kgaotše di tla re thuša go boloka maphelo a rena a tsepame tseleng ya moya go sa šetšwe mathata a tšwelago pele, diteko le go nyama. Dithapelo tša rena tša letšatši le letšatši tšeo di yago go Jehofa di ka nea thekgo e bohlokwa yeo re e nyakago.
21 Jehofa, “Mokwi wa dithapêlô,” le ka mohla ga a swarega kudu mo e lego gore a ka se re theetše. (Psalme 65:2) Anke re se ke ra swarega kudu mo e lego gore ga re bolele le yena. Tswalano ya rena le Modimo ke selo sa bohlokwa kudu seo re nago le sona. Anke re se e tšeeleng fase le ka mohla. “Ké xôna, a re batameleng rè holofetše, re tlê madulong ao a kxauxêlô [“sedulong sa bogoši sa botho bjo bo sa swanelago,” NW], re tle re amoxêlê thšôkêlô, re hwetše kxauxêlô ya xo hlakodišwa lebakeng la xôna.”—Ba-Hebere 4:16.
Nehemia o ile a rapela thapelo e kopana, a sa hlaboše lentšu pele ga ge a bolela le kgoši
Hanna “o ile a lelefatša thapelo ya gagwe pele ga Jehofa”
Jesu o ile a rapela bošego ka moka pele ga ge a kgetha baapostola ba gagwe ba 12
Dibaka tša thapelo di a itšweletša mo letšatšing
O be o ka Araba Bjang?
• Re ithuta’ng go moporofeta Daniele mabapi le bohlokwa bja thapelo?
• Re ka matlafatša bjang segwera sa rena le Jehofa?
• Ke ka baka la’ng re swanetše go rapela ka go se kgaotše?
• Ke ka baka la’ng maikwelo a go ikwa re sa swanelege a sa swanela go re thibela go rapela Jehofa?