“Thuto ya Mohlale” ke Mothopo wa Bophelo

MOAPOSTOLA Paulo o itše: “A! Bodiba bya lehumô la Modimo, le bya bohlale bya xaxwe, bya tsebô ya xaxwe! A! Dikahlolô tša xaxwe di-hlaya-mohlathi; ditsela tša xaxwe xa di latišexe.” (Ba-Roma 11:​33) Le gona mopatriareka yo a botegago Jobo o itše: “[Jehofa] Modimo ké wa pelo e bohlale, ké Mo-kxôna-matla; ó kae e a phedilexo a ngangane naê’?” (Jobo 9:⁠4) Ee, bohlale bja Mmopi wa legodimo le lefase ga bo bapišwe le selo. Go ka thwe’ng ka molao goba Lentšu leo le ngwadilwego la Mmopi yo bjalo?

Mopsalme o opetše ka gore: “Molaô wa Morêna xa o na bosodi, o lapološa môya. Bohlatse bya Morêna bo a bôtêxa, bo hlalefiša a se naxo maanô. ’Taêlô tša Morêna di lokile, di thabiša pelo. Ditayô tša Morêna di sekile, di boniša mahlô.” (Psalme 19:​7, 8) Kgoši Salomo wa Isiraeleng ya bogologolo o swanetše go ba a ile a kwešiša therešo ya mantšu ao gakaakang! O itše: “Thutô ya mohlale ké mothopo wa bophelô; e Xo efoša morêô wa lehu.” (Diema 13:​14) Ditemaneng tše 13 tše di latelago tša Diema kgaolo 13, Salomo o bontšhitše kamoo keletšo yeo e hwetšwago ka Lentšung la Modimo e ka re thušago go kaonefatša boemo bja rena bja bophelo le go phema go bo bea kotsing.

E ba yo a Rutegago

Diema 13:⁠1 e re: “Ngwana yo bohlale ó laiwa ke tat’axwe; mokweri xa’kwe xe a kxalwa.” Tayo ye e tšwago go tate e ka ba e bonolo goba e thata. Mathomong e ka tla ka sebopego sa tlwaetšo, gomme ge e ba e ganwa, mafelelong e ka tla e le kotlo. Ngwana yo bohlale o amogela tayo ya tatagwe.

Beibele e re: “Xobane Morêna ó sôla moratwa wa xaxwe; ó ôtla ngwana ofe le ofe yo a mo amoxêlaxo.” (Ba-Hebere 12:⁠6) Tsela e nngwe yeo Tatago rena wa legodimong a re layago ka yona ke ka Lentšu la gagwe le le ngwadilwego, e lego Beibele. Ge re bala Beibele ka tlhompho gomme re arabela go seo re ithutago sona go yona, gona Lentšu la gagwe le tloga le re laya. Se ke go hola rena, ka gobane dilo tšohle tšeo Jehofa a di bolelago ke bakeng sa go re hola.​—Jesaya 48:⁠17.

Tayo gape e ka tla go rena e le phošollo yeo e tšwago go modumedi-gotee le rena yoo a kgahlegelago boemo bja rena bjo bobotse bja moya. Keletšo le ge e le efe e thušago yeo e dumelelanago le Lentšu la Modimo e ka lebelelwa e se ye e tšwago go motho yoo, eupša e le yeo e tšwago go Mothopo o mogolo wa therešo. Re ba bohlale ge re e amogela e le yeo e tšwago go Jehofa. Ge re dira bjalo gomme re e dumelela gore e bope tsela ya rena ya go nagana, go kaonefatša kwešišo ya rena ya Mangwalo le go phošolla ditsela tša rena, gona re holwa ke tayo yeo. Selo se se swanago ke sa therešo ka tayo yeo re e hwetšago dibokeng tša Bokriste le dikgatišong tšeo di theilwego Beibeleng. Go arabela go seo re ithutago sona mantšung a bjalo a ngwadilwego goba a boletšwego ke sebopego se sebotse kudu sa boitayo.

 Ka lehlakoreng le lengwe, mokweri ga a arabele tayong. Puku e nngwe ya ditšhupetšo e re: “Ka gobane a nagana gore o tseba seo se lego kaone, ga se yo a rutegago.” Ga a arabele gaešita le ge a kgalemelwa​—e lego sebopego se thata sa tayo. Eupša na le ka mohla a ka hlatsela gore tayo ya Tatagwe e fošagetše? Jehofa ga se a ka a foša gomme a ka se tsoge a fošitše. Ka go gana tayo, mokweri o fo itira sekwero. Ka mantšu a sego kae a kgethilwego gabotse, Salomo o bontšha gabotse gakaakang bohlokwa bja go ba bao ba rutegago!

Diša Leleme la Gago!

E le go bontšha bohlokwa bja go hlahlwa ke Lentšu la Modimo polelong ya rena, kgoši ya Isiraele e swantšha molomo le sehlare seo se enywago dienywa. O re: “Motho tše botse ó di ja è le kenyô tša molomo w’axwe; mohlanoxi ó kxanyoxa tša thlakolô.” (Diema 13:⁠2) Mantšu a bolelwago ke dienywa tša molomo. Le gona motho o buna seo a se bjetšego ka mantšu a gagwe. Seithuti se sengwe se re: “Ge e ba mantšu a gagwe a bolelwa ka botho gomme a lebišitšwe go ageng segwera se sebotse le baagišani ba gagwe, gona o tla ja tše botse le go thabela go ba gona ga gagwe mo go nago le lethabo le khutšo.” Boemo ke bjo bo fapanego bakeng sa mohlanogi. O nyaka go dira bošoro le go gobatša ba bangwe. O loga maano a bošoro gomme moputso e ba bošoro. Mereo ya lehu e mojakong wa gagwe.

Salomo o tšwela pele ka gore: “Mo-lôta-molomo ó diša bophelo; moahlami ó a ithsenyetša.” (Diema 13:⁠3) Botumo bjo bo senyegilego, maikwelo a bohloko, ditswalano tše di sentšwego gaešita le go gobala mmeleng ke mafelelo a ka bago gona a polelo yeo e se nago tlhaologanyo le ya bošilo. Le gona leleme leo le sa laolegego le ka tliša go se amogelwe ke Modimo, ka gobane go Modimo yo mongwe le yo mongwe o ikarabela bakeng sa mantšu a gagwe. (Mateo 12:​36, 37) Ka kgonthe, go laola melomo ya rena ka go tia go tla re phološa tshenyegong. Lega go le bjalo, re ka ithuta bjang go diša melomo ya rena?

Tsela e nngwe e bonolo ya go dira se ke ka go se bolele kudu. Beibele e re: “Boati bya phokô xa bo hloke diphapoxô; matsebe ó swara molomo.” (Diema 10:​19) Tsela e nngwe ke ka go nagana pele re ka bolela. Mongwadi yo a buduletšwego o re: “Xo na le babolabodi ba ma-hlaba-wa-lerumô.” (Diema 12:​18) Ge motho a sa nagane ka seo a tlago go se bolela pele a ka bolela, bobedi seboledi le batheetši ba gagwe ba ka kwa bohloko. Ka gona, Beibele e re nea keletšo ye e šomago e rego: “Pelo ya moloki e akanya diphetolô.” (Mongwalo o sekamego ke wa rena.)​—Diema 15:⁠28.

E ba Seroto

Salomo o re: “Mo-lla-à-hlôka, pelo ya sebodu; xo hora pelo ya serôtô.” (Diema 13:⁠4) Puku e nngwe ya ditšhupetšo e re: “Ntlha [ya seema se] ke gore go fo kganyoga e tloga e le ga lefeela, boroto ke bjona e tlogago e le bja bohlokwa.” Dibodu ke bahlaselwa ba dikganyogo . . . tšeo di ba jago, gomme ba tloga ba se na selo seo ba ka se tšweletšago ka dikganyogo tša bona tša bobodu.” Lega go le bjalo, moya goba kganyogo ya seroto e a kgotsofatšwa​—e a horišwa.

Go ka thwe’ng ka bao ba ganago go ineela go Jehofa ka gobane ba nyaka go phema boikarabelo? Ba ka ipontšha ba kganyoga go phela lefaseng le lefsa la Modimo, eupša na ba ikemišeditše go dira se sengwe mabapi le seo? Senyakwa bakeng sa bao ba “tšwaxo tlaišexong e kxolo” ke gore ba bontšhitše tumelo sehlabelong sa Jesu, ba ineetše go Jehofa, gomme  ba bontšhitše boineelo bja bona ka go kolobetšwa meetseng.​—Kutollo 7:​14, 15.

Nagana ka seo se akaretšwago go kataneleng maemo a go ba molebeledi ka phuthegong. Go kganyoga go katanela modiro wo o mobotse ka kgonthe ke mo go kgahlišago le mo go kgothaletšwago ka Mangwalong. (1 Timotheo 3:⁠1) Lega go le bjalo, go fo kganyoga maemo ga go a lekana. E le gore o swanelegele maemo o swanetše go hlagolela dika tšeo di nyakegago gotee le bokgoni. Seo se nyaka gore motho ka noši a dire boiteko ka phišego.

Go Loka​—Go a Šireletša

Motho yo a lokilego o hlagolela dika tša Modimo le go bolela therešo. O lemoga gore go bolela maaka go kgahlanong le molao wa Jehofa. (Diema 6:​16-19; Ba-Kolose 3:⁠9) Tabeng ye, Salomo o itše: “Moloki ó nyatša puô ya maaká; e mobe ó xoboxa a leša dihlong.” (Diema 13:⁠5) Moloki ga a fo efoga maaka; ge e le gabotse o a hloile. O tseba gore go sa šetšwe gore a ka bonagala a se na molato gakaakang, maaka a ka senya ditswalano tše dibotse tša batho. Go feta moo, potego ya motho yoo a bolelago maaka e a senyega. Yo mobe o dira dilo tša go leša dihlong ka go bolela maaka goba ka tsela le ge e le efe e nngwe, gomme ka go rialo a ikgoboša.

Go bontšha gore go dira seo se lokilego mahlong a Modimo go na le mohola, kgoši e bohlale e re: “Tokô e diša mo-loka-le-tsela; bobe bo uša mong wa byôna.” (Diema 13:⁠6) Go swana le setšhabelo, go loka go šireletša motho, mola bobe bo mo senya.

O se ke wa Ikgakanya

Ge e bontšha go kwešiša tlhago ya batho, kgoši ya Isiraele e re: “Xo na le ba-kxanthša-lehumô-lê-seo, le bô mmata-bo-diidi mola bà humile kudu.” (Diema 13:⁠7) Motho a ka ba a se seo a bonagalago a le sona. Batho ba bangwe bao ba diilago ba ka itira eka ke bahumi​—mohlomongwe ka go dira dipontšho tša bomponeng, gore ba nee batho kgopolo ya gore ba atlegile goba go fo itira ba hlomphegago. Motho yo a humilego a ka itira eka o a diila, e le go fo fihla lehumo la gagwe.

Go ikgakanya goba go itira seo o sego sona ga se gwa loka. Ge e ba dilo tša rena tše di bonagalago di se nene, go diriša tšhelete dilong tša matsaka e le gore re bonagale re humile go ka amoga rena gotee le malapa a rena dilo tše di nyakegago tša bophelo. Le gona ge motho a itira eka o a diila mola a e-⁠na le mahumo go ka mo dira gore e be moithati, gwa mo tima tlhompho yeo e mo swanetšego gotee le lethabo leo le tlišwago ke go ba le seatla se se  bulegilego. (Ditiro 20:​35) Go phela ka go botega go ka feleletša ka go phela bophelo bjo kaone.

Boloka Dikganyogo tša Gago di Lokile

Salomo o re: “Mohumi, selefa ké thoto; mmôtlana xa a kwe mokxoši.” (Diema 13:⁠8) Ke thuto efe yeo e fetišetšwago ke polelwana ye e bohlale?

Go ba mohumi go na le mehola, eupša go ba le mahumo ga se tšhegofatšo e feletšego. Dinakong tša mathata tšeo re phelago go tšona, bahumi gantši ba hwetša bona gotee le malapa a bona ba le kotsing ya go ka thopiwa gomme ba swarwa gore ba ntšhe thekollo. Ka dinako tše dingwe, motho yo a humilego a ka lefela thekollo ya go rekolla bophelo bja gagwe goba bja setho sa lapa la gagwe. Eupša gantši yo a thopilwego o a bolawa. Tšhošetšo e bjalo gantši ke kotsi yeo bahumi ba phelago le yona.

Motho yo a se nago selo ga a tshwenyege ka dilo tše bjalo. Gaešita le ge a ka ba a se na dilo tše dintši tša manobonobo le dilo tše di bonagalago tšeo batho ba humilego ba di thabelago, go bonagala a ka se be mohlaselwa wa bathopi. O ke o mongwe wa mehola ya go boloka dinyakwa tša rena e le tše bonolo gomme re sa oketše nako ya rena le matla bakeng sa go phegelela lehumo.​—2 Timotheo 2:⁠4.

Thabang ‘Seetšeng’

Salomo o tšwela pele go bontšha gore go dira dilo ka tsela ya Jehofa ke bakeng sa go re hola. “Seedi sa ba lokilego se a thabiša; eupša lebone la e mobe le tlo tima.”​—Diema 13:​9, PK.

Lebone le swantšhetša seo re ithekgilego ka sona bakeng sa go bonega tsela ya rena ya bophelo. ‘Lentšu la Modimo ke lebone dinaong tša moloki e bile ke seetša tseleng ya gagwe.’ (Psalme 119:​105) Le swere tsebo ya Mmopi ye e sa felego gotee le bohlale bja gagwe. Ge re dutše re kaonefatša kwešišo ya rena ka thato ya Modimo le merero ya gagwe, gona lebone la moya leo le re hlahlago e ba le bonegago le go feta. A mothopo o mokaakang wa lethabo! Ke ka baka la’ng re sa swanela go fapošwa ke bohlale bja lefase goba seo “ba aketšaxo ba re ké yôna tsebo”?​—1 Timotheo 6:​20; 1 Ba-Korinthe 1:​20; Ba-Kolose 2:⁠8.

Yo mobe yena, go sa šetšwe gore lebone la gagwe le bonagala e le le bonegago kudu gakaakang le gore o bonagala a atlegile gakaakang, lebone la gagwe le tla tima. O tla feleletša a le lefsifsing, moo maoto a gagwe a swanetšego go kgopša. Go feta moo, ‘ka moso a ka se tšwe le selo.’​—Diema 24:⁠20.

Lega go le bjalo, re swanetše go dira’ng ge e ba re sa kgonthišege gore re swanetše go gata mogato ofe boemong bjo itšego? Go thwe’ng ge e ba re sa kgonthišege gore a ruri re tloga re swanetše go gata mogato? Diema 13:​10 e lemoša ka gore: “Letšêkê le tsoša kxang fêla.” Go dira dilo re se na tsebo goba ka ntle le tumelelo ke go ikgodiša gomme go tla baka dikgohlano. Na go ka se be kaone go boledišana le ba bangwe bao ba nago le tsebo le temogo? Kgoši e bohlale Salomo e re: “Mohlale ké moeletšexi.”

 Hlokomela Ditebelelo tša Maaka

Tšhelete e ka dirišetšwa morero o holago. Go ba le tšhelete e lekanego go kaone go feta go phela ka thata goba go diila. (Mmoledi 7:​11, 12) Lega go le bjalo, seo mohlomongwe re ka naganago e le mehola ya lehumo leo le hweditšwego ka bomenetša e ka ba seo se forago. Salomo o lemoša ka gore: “Lehumô-le-tla-ka-lefêla le a nôtlêxa; xo ata la mo-kxoba-ka-diatla.”​—Diema 13:⁠11.

Ka mohlala, nagana ka molaba wa go petšha. Mopetšhi a ka diriša tšhelete ya gagwe yeo a e hweditšego ka thata a holofetše go thopa tšhelete e ntši. Eupša ke gakae a dira seo a se na taba le lapa la gagwe! Le gona go direga’ng ge mopetšhi a thopa tšhelete? Ka ge tšhelete e tlile gabonolo, a ka ba le tebogo e nyenyane kudu bakeng sa bohlokwa bja yona. Go feta moo, a ka fo hloka bokgoni bja go laola tšhelete ya gagwe yeo a sa tšwago go e hwetša. Na ga go bonagale mahumo a gagwe a tla nyamelela ka pela go feta kamoo a a hweditšego ka gona? Ka lehlakoreng le lengwe, mahumo ao a kgoboketšwago ka go iketla​—ganyenyane-ganyenyane ka go dira modiro o mobotse​—a oketšega a iketlile gomme a ka dirišwa gabotse.

Salomo o itše: “Sellêlwa-seletetši se lwadiša pelo; seletêlwa sà fihla, ké sehlare sa bophelô.” (Diema 13:​12) Ditebelelo tšeo di sa phethagatšwego ka ntle le pelaelo di tla lebiša manyaming ao a lwatšago pelo. Se se direga bophelong bja letšatši le lengwe le le lengwe. Lega go le bjalo, ga go bjalo ka ditebelelo tšeo ka go tia di theilwego Lentšung la Modimo. Re ka ba le kholofelo e feletšego ya gore di tla phethagala. Gaešita le ge seo se bonagalago e le go diega e ka ba seo se nyamišago.

Ka mohlala, re tseba gore lefase le lefsa la Modimo le kgaufsi. (2 Petro 3:​13) Ka tetelo-kgolo re thabela go emela go phethega ga dikholofetšo tša Modimo. Go direga’ng ge re diriša nako ya go leta ka go dula re swaregile “modirong wa Morêna,” go kgothatšeng badumedi-gotee le rena le go ageng tswalano ya kgaufsi kudu le Jehofa? Go e na le go ‘lwala pelong,’ re tletše lethabo. (1 Ba-Korinthe 15:​58; Ba-Hebere 10:​24, 25; Jakobo 4:⁠8) Ge go phethagatšwa ga dikganyogo tšeo di bego di letetšwe ka nako e telele go fihla, go swana le sehlare sa bophelo​—ke mo go matlafatšago e le ka kgonthe le mo go lapološago.

Molao wa Modimo​—Ke Mothopo wa Bophelo

Ge e swantšhetša senyakwa sa go theetša Modimo, Diema 13:​13 e re: “Nyatša-’ntšu ó a itahla; moifamolaô ó fiwa moputsô.” Ge e ba motho yo a kolotago a nyatša kholofetšo ya gagwe ya go lefela tšhelete yeo a e adimilego, o be a tla loba seo a ennego gore o tla neelana ka sona. Ka mo go swanago, re tla loba ge e ba re paletšwe ke go theetša melao ya Modimo. Go loba ga mohuta ofe?

“Thutô ya mohlale ké mothopo wa bophelô; e Xo efoša morêô wa lehu.” (Diema 13:​14) Go phela ka ntle le molao wa Modimo yo bohlale kudu Jehofa, ke go tingwa tlhahlo yeo e ka re thušago go phela bophelo bjo bokaone le bjo botelele. Seo e be e tla ba go loba mo gogolo gakaakang! Ka gona, tsela e bohlale bakeng sa rena ke go lebiša tlhokomelo Lentšung la Modimo gotee le go le dumelela gore le tutuetše dikgopolo tša rena, dipolelo le ditiro.​—2 Ba-Korinthe 10:⁠5; Ba-Kolose 1:⁠10.

Go arabela keletšong ya Mangwalo ke sebopego se sebotse kudu sa boitayo

“Pelo ya moloki e akanya diphetolô”

Go dula re swaregile “modirong wa Morêna” go re tlatša lethabo