Go Kgotlelela Diteko go Tliša Tumišo go Jehofa

“Fêla, xe Le kxôtlêlêla dithlokofatšô Lè le ba xo dira botse, xôna e ba mahlatse pele xa Modimo.”​—1 PETRO 2:⁠20.

1. Ka ge Bakriste ba therešo ba tshwenyegile ka go phelela boineelo bja bona, ke potšišo efe yeo e swanetšego go ahla-ahlwa?

BAKRISTE ba ineetše go Jehofa gomme ba nyaka go dira thato ya gagwe. E le gore ba phelele boineelo bja bona, ba dira sohle seo ba ka se kgonago go latela dikgatong tša Mohlala wa bona e lego Jesu Kriste, go nea bohlatse ka therešo. (Mateo 16:​24; Johane 18:​37; 1 Petro 2:​21) Lega go le bjalo, Jesu le ba bangwe bao ba botegago ba ile ba neela maphelo a bona gomme ba hwela go nea bohlatse ka tumelo ya bona. Na se se bolela gore Bakriste ka moka ba ka letela go hwela tumelo ya bona?

2. Bakriste ba lebelela bjang diteko le tlaišego?

² Ka ge re le Bakriste, re kgothaletšwa go botega go fihla lehung, e sego go hwela tumelo ya rena. (2 Timotheo 4:⁠7; Kutollo 2:​10) Se se bolela gore le ge re ikemišeditše go tlaišega​—le gona ge e ba go hlokagala, go hwa​—ka baka la tumelo ya rena, ga re nyake go dira bjalo. Ga re kgahlišwe ke go tlaišega le gona ga re thabišwe ke go kwa bohloko goba go goboga. Lega go le bjalo, ka ge diteko le tlaišo di swanetše go letelwa, re swanetše go ela hloko kamoo re ka arabelago ka gona ge di re wela.

Go Botega ka Tlase ga Teko

3. O ka laodiša mehlala efe e tšwago ka Beibeleng yeo e lego mabapi le tlaišo? (Bona lepokisi leo le rego “Kamoo ba Ilego ba Lebeletšana le Tlaišo ka Gona,” letlakaleng le le latelago.)

³ Ka Beibeleng re hwetša dipego tše mmalwa tšeo di bontšhago kamoo nakong e fetilego bahlanka ba Modimo ba ilego ba arabela ka gona ge ba be ba lebeletšane le maemo ao a beago bophelo kotsing. Ditsela tše di fapanego tšeo ba ilego ba arabela ka tšona di nea tlhahlo bakeng sa Bakriste lehono ge e ba ba ka swanela ke go lebeletšana le ditlhohlo tše di swanago. Ela hloko dipego tše di lego lepokising leo le rego “Kamoo ba Ilego ba Lebeletšana le Tlaišo ka Gona,” gomme o bone seo o ka ithutago sona go tšwa go tšona.

4. Go ka thwe’ng ka tsela yeo Jesu le bahlanka ba bangwe ba botegago ba ilego ba arabela ka yona ge ba be ba le ka tlase ga teko?

⁴ Gaešita le ge Jesu le bahlanka ba bangwe ba botegago ba Modimo ba ile ba arabela tlaišong ka ditsela tše di fapanego go ithekgilwe ka maemo, go molaleng gore ga se ba ka ba bea maphelo a bona kotsing ka mo go sa hlokagalego. Ge ba be ba ikhwetša ba le maemong a kotsi, ba be ba e-⁠ba le sebete eupša ba le šedi. (Mateo 10:​16, 23) Morero wa bona e be e le go tšwetša pele modiro wa boboledi le go kgomarela potego ya bona go Jehofa. Dikarabelo tša bona maemong a fapa-fapanego di nea mehlala go Bakriste bao lehono ba lebeletšanego le diteko le tlaišo.

5. Ke tlaišo efe yeo e ilego ya tšwelela kua Malawi ka bo-1960, gomme Dihlatse tša fao di ile tša arabela bjang?

⁵ Mehleng yeno, gantši batho ba Jehofa ba ile ba ikhwetša ba le ka tlase ga maemo a thata kudu le go lahlegelwa ke dithoto ka baka la dintwa, dithibelo goba tlaišo e tlago ka go lebanya. Ka mohlala, ka bo-1960 Dihlatse tša Jehofa di ile tša tlaišwa o šoro kua Malawi. Diholo tša tšona tša Mmušo, magae, dijo le dikgwebo​—ge e le gabotse sohle seo di bego di e-⁠na le sona​—di ile tša fedišwa. Di ile tša bethwa le go lebeletšana le diphihlelo tše dingwe tše di gateletšago. Bana babo rena ba ile ba arabela bjang? Ba dikete ba ile ba swanela ke go tšhaba metsaneng ya gabo bona. Ba bantši ba ile ba tšhabela sethokgweng, mola ba bangwe ba ile ba tšhabela ka nakwana nageng e lego kgaufsi ya Mozambique. Gaešita le ge ba bantši bao ba botegago ba ile ba lahlegelwa ke maphelo a bona, ba bangwe ba ile ba kgetha go tšhaba lefelong la kotsi e lego seo go bego go bonagala e le phetho e kwagalago ka tlase  ga maemo a bjalo. Ka go dira bjalo, bana babo rena ba ile ba latela mohlala wo o beilwego ke Jesu le Paulo.

6. Ke’ng seo Dihlatse tša Malawi di sa kago tša kgaotša go se dira go sa šetšwe tlaišo e šoro?

⁶ Gaešita le ge bana babo rena ba Malawi ba ile ba swanela ke go tšhaba goba go yo khuta, ba ile ba tsoma le go latela tlhahlo ya pušo ya Modimo gomme ba tšwela pele kamoo ba bego ba ka kgona ka mediro ya bona ya Bokriste ka sephiring. Mafelelo e bile afe? Go be go sa tšwa go fihlelelwa tlhora ya bagoeledi ba Mmušo ba 18 519 pejana ga thibelo ka 1967. Gaešita le ge thibelo e be e sa dutše e tšwela pele gomme ba bantši ba tšhabetše Mozam­bique, ka 1972 go ile gwa begwa tlhora e mpsha ya bagoeledi ba 23 398. Kgwedi e nngwe le e nngwe ba be ba dira palo-gare ya diiri tše 16 bodireding. Ka ntle le pelaelo, ditiro tša bona di ile tša tliša tumišo go Jehofa gomme Jehofa o be a thekga bana babo rena bao ba botegago dinakong tšeo tše thata kudu. *

7, 8. Ke ka mabaka afe ao ka ona ba bangwe ba kgethago go se tšhabe gaešita le ge kganetšo e baka mathata?

 ⁷ Ka lehlakoreng le lengwe, dinageng tšeo kganetšo e bakago mathata, ba bangwe ba bana babo rena ba ka kgetha go se huduge, gaešita le ge ba ka kgona go dira bjalo. Go sepela go ka rarolla mathata a itšego, eupša go molaleng gore go tla tliša ditlhohlo tše dingwe. Ka mohlala, na ba tla kgona go dula ba kgokagane le borwarre bja Bokriste gomme ba se ke ba ba lekatana moyeng? Na ba tla kgona go kgomarela lenaneo la bona la moya ge ba dutše ba katana le go dudišega lefelong le lengwe, mohlomongwe nageng yeo e humilego kudu goba yeo e neago dibaka tše oketšegilego tša go ba le dilo tše dintši tše di bonagalago?​—1 Timotheo 6:⁠9.

⁸ Ba bangwe ba kgetha go se sepele ka gobane ba tshwenyegile ka katlego ya moya ya bana babo bona. Ba kgetha go dula gomme ba lebeletšane le boemo e le gore ba tšwele pele ba bolela tšhemong ya gabo bona le go ba mothopo wa kgothatšo go barapedi-gotee le bona. (Ba-Filipi 1:​14) Ka go dira kgetho e bjalo, ba bangwe ba kgonne le go tsenya letsogo diphenyong tša semolao nageng ya gabo bona. *

9. Ke dintlha dife tšeo motho a swanetšego go di ela hloko ge a dira phetho ya ge e ba o tla dula goba o tla huduga ka baka la tlaišo?

⁹ Gore na motho o tla dula goba o tla huduga​—ka ntle le pelaelo yeo ke phetho ya motho ka noši. Go ba gona, diphetho tše bjalo di swanetše go dirwa feela ka morago ga go nyaka tlhahlo ya Jehofa ka thapelo. Lega go le bjalo, go sa šetšwe gore re tla kgetha tsela efe, re swanetše go dula re gopola mantšu a moapostola Paulo a rego: “Mang le mang wa rena ó tlo iphetolêla pele xa Modimo.” (Ba-Roma 14:​12) Bjalo ka ge re bone pejana, seo Jehofa a se nyakago ke gore yo mongwe le yo mongwe wa bahlanka ba gagwe a dule a botega ka tlase ga maemo ka moka. Ba bangwe ba bahlanka ba gagwe ba lebeletšane le diteko le tlaišo lehono; ba bangwe ba ka lebeletšana le tšona ka moragonyana. Ka moka ga rena re tla lekwa ka tsela e itšego,  gomme ga go na yo a swanetšego go letela gore a se lekwe. (Johane 15:​19, 20) Bjalo ka bahlanka ba ineetšego ba Jehofa, re ka se ke ra phema kgang ya legohle yeo e akaretšago go kgethagatšwa ga leina la Jehofa le go lwelwa ga bogoši bja gagwe.​—Hesekiele 38:​23; Mateo 6:​9, 10.

“Le se kê la Lefetša Motho Bobe ka Bobe”

10. Jesu le baapostola ba re beetše mohlala ofe o bohlokwa ge re lebeletšane le dikgateletšo le kganetšo?

¹⁰ Molao o mongwe o bohlokwa wa motheo woo re ka ithutago wona tseleng yeo Jesu le baapostola ba gagwe ba arabetšego ka yona ka tlase ga kgatelelo ke gore le ka mohla ga se ra swanela go itefeletša go batlaiši ba rena. Ga go na moo ka Beibeleng re hwetšago kgopolo le ge e le efe ya gore Jesu goba balatedi ba gagwe ba ile ba bopa mokgatlo o itšego wa kganetšo goba ba ineela bošorong e le gore ba lwantšhane le batlaiši ba bona. Ka mo go fapanego, moapostola Paulo o ile a eletša Bakriste ka gore: “Le se kê la lefetša motho bobe ka bobe. . . . Baratwa ba-ka! Le se kê la itefeletša; šuthêlang boxale bya Modimo; xobane xo ngwadilwe xwa thwe: Tefetšô ké ya-ka, le kôtlô ké ya-ka, O r’yalo Morêna.” Go feta moo, “se fenywê ke bobe; bobe bo fenyê ka boló.”​—Ba-Roma 12:​17-21; Psalme 37:​1-⁠4; Diema 20:⁠22.

11. Radihistori yo mongwe o re’ng mabapi le boemo bja kgopolo bja Bakriste ba pele ka Mmušo?

¹¹ Bakriste ba pele ba ile ba tšeela keletšo yeo godimo. Radihistori Cecil J. Cadoux ka pukung ya gagwe ya The Early Church and the World, o hlalosa boemo bja kgopolo bja Bakriste mabapi le Mmušo nywageng ya magareng ga 30-70 C.E. O ngwala gore: “Ga re na bohlatse bjo bo lebanyago bja gore Bakriste ba nakong ye ba ile ba dira boiteko bja go ganetšana le tlaišo ka ntwa. Seo ba bego ba se dira ke go ganetša babuši ba bona ka go tia goba ka go ba gakantšha ka go tšhaba. Lega go le bjalo, karabelo e tlwaelegilego ya Bakriste tlaišong e be e le e leka-lekanego eupša ba gana ka go tia go kwa ditaelo tše bjalo tša mmušo ka ge di be di tla thulana le go kwa Kriste.”

12. Ke ka baka la’ng go le kaone go kgotlelela tlaišego go e-⁠na le go itefeletša?

¹² Na tsela e bjalo yeo e bonagalago e sa re selo e tloga e le e bohlale? Na motho le ge e le ofe yo a arabelago ka tsela yeo e ka se be mohlaselwa yo bonolo wa bao ba ikemišeditšego go ba fediša? Na e ka se be ga bohlale go itwela? Go ya ka pono ya batho, seo se ka bonagala se le bjalo. Lega go le bjalo, ka ge re le bahlanka ba Jehofa re kgodišegile gore go latela tlhahlo ya Jehofa ditabeng ka moka ke tsela e kaone kudu. Re dula re gopola mantšu a Petro a rego: “Fêla, xe Le kxôtlêlêla dithlokofatšô Lè le ba xo dira botse, xôna e ba mahlatse pele xa Modimo.” (1 Petro 2:​20) Re kgodišegile gore Jehofa o lemoga boemo gomme a ka se dumelele ditaba go tšwela pele ka mo go sa felego. Re ka kgodišega bjang ka seo? Jehofa o ile a botša batho ba gagwe bao ba bego ba le bothopša kua Babele gore: “E a kgwathago lena, o kgwathiša thaka ya leihlo la-ka.” (Sakaria 2:​8, PK) Ke mang yo a ka dumelago gore thaka ya leihlo la gagwe e kgwathwe ka lebaka le letelele? Jehofa o tla nea kimollo ka nako e swanetšego. Ga go na  pelaelo le ge e le efe ka seo.​—2 Ba-Thesalonika 1:​5-⁠8.

13. Ke ka baka la’ng Jesu ka boikokobetšo a ile a dumelela manaba a mo swara?

¹³ Tabeng ye, re ka lebelela go Jesu e le mohlala wa rena. Ge a be a dumelela manaba a gagwe gore a mo sware kua serapeng sa Getsemane, e be e se ka gobane o be a sa kgone go itwela. Ge e le gabotse o ile a botša barutiwa ba gagwe gore: “A [le] re nka se kxône xo kxopêla Tate, a nthomêla Barongwa ba ba fetišaxo madirá a lesome le metšô e mebedi? Fêla, xe nka r’yalo, mangwalô a a rexo xo swanetše xo dirêxa tšôna-tšé a ka phêthêxa bya’ng?” (Mateo 26:​53, 54) Go phethagatšwa ga thato ya Jehofa e be e le selo sa bohlokwa kudu go Jesu, gaešita le ge seo se be se bolela gore o be a swanetše go tlaišega. O be a e-⁠na le kholofelo e feletšego mantšung a psalme ya boporofeta ya Dafida a rego: “Môya wa-ka O ka se kê wa o tloxêla ò le kwa bo-dula-bahu, O ka se kê wa lesa mokxêthwa wa xaxo à bôna lebitla.” (Psalme 16:​10) Nywaga ka morago moapostola Paulo o ile a bolela ka Jesu gore: “E a tiišitšego a rwala [kota ya tlhokofatšo, NW] ka baka la thabo ye a e beetšwego ka pele, a sa re selo ka hlong, gomme o dutše letsogong le letona go terone ya Modimo.”​—Ba-Hebere 12:​2, PK.

Lethabo la go Kgethagatša Leina la Jehofa

14. Ke lethabo lefe leo le ilego la thuša Jesu ditekong tša gagwe ka moka?

¹⁴ Ke lethabo lefe leo le ilego la thuša Jesu nakong ya teko e šoro kudu e ka naganwago? Gare ga bahlanka ba Jehofa ka moka, Morwa wa Modimo yo a rategago e lego Jesu, ka ntle le pelaelo e be e le mohlaselwa yo mogolo wa Sathane. Ka gona go kgomarela ga Jesu potego ya gagwe ka tlase ga teko e be e tla ba karabo tlhohlong ya lenyatšo ya Sathane go Jehofa. (Diema 27:​11) Na o ka nagana ka lethabo le kgotsofalo tšeo Jesu a swanetšego go ba a bile le tšona ka morago ga go  tsošwa ga gagwe? O swanetše go ba a be a thabile gakaakang ge a be a lemoga gore o phethagaditše tema yeo a bego a e neilwe gore a e kgathe e le motho yo a phethagetšego go lweleng bogoši bja Jehofa le go kgethagatšweng ga leina la Gagwe! Go oketša moo, go dula ka ‘letsogong le letona la terone ya Modimo’ e tloga e le tlhompho e kgahlišago le mothopo o mogolo kudu wa lethabo go Jesu.​—Psalme 110:​1, 2; 1 Timotheo 6:​15, 16.

15, 16. Ke tlaišo efe e sehlogo yeo Dihlatse tša kua Sach­sen­hausen di ilego tša e kgotlelela, gomme ke’ng seo se di neilego matla a go dira bjalo?

¹⁵ Ka mo go swanago, ke lethabo go Bakriste go tšea karolo go kgethagatšeng leina la Jehofa ka go kgotlelela diteko le tlaišo, e le go latela mohlala wa Jesu. Mohlala o mongwe o swanelago e be e le phihlelo ya Dihlatse tšeo di ilego tša tlaišega kampeng e tumilego ya tshwenyo ya kua Sach­sen­hausen gomme tša phologa mogwanto wa lehu o thata kudu mafelelong a Ntwa ya II ya Lefase. Nakong ya mogwanto, bagolegwa ba dikete ba ile ba bolawa ke phefo, bolwetši goba tlala goba ba ile ba bolawa ka sehlogo tseleng ke baleti ba ma-SS. Dihlatse ka moka tše 230 di ile tša phologa ka baka la go kgomarelana ka go tia le go thušana gaešita le ge se se be se bea maphelo a tšona kotsing.

¹⁶ Ke’ng seo se neilego Dihlatse tše matla a go kgotlelela tlaišo e bjalo e šoro? Gatee-tee ge di fihlile lefelong leo le šireletšegilego, di ile tša bontšha lethabo la tšona le tebogo go Jehofa ka lengwalo leo le bitšwago “Setlamo sa Dihlatse tša Jehofa tše 230 go tšwa ditšhabeng tše tshelelago, di bokane lešokeng kgaufsi le Schwerin kua Meck­len­burg.” Setlamong seo ba itše: “Re šetše re fetile lebaka le letelele la go lekwa gomme bao ba phologilego go bjalo ka ge eka ba phologile leubeng la mollo, ga ba na le ka monkgo wa kgabo ya mollo. (Bona Daniele 3:​27.) Ka mo go fapanego, ba tletše matla a tšwago go Jehofa gomme ba letetše ka phagahlo ditaelo tše difsa tša go tšwetša pele dikgahlego tša Pušo ya Modimo go tšwa go Kgoši.” *

17. Ke diteko tša mohuta ofe tšeo batho ba Modimo ba lebeletšanego le tšona ga bjale?

¹⁷ Ka go swana le batho bao ba 230 ba botegago, le rena re ka lekwa tumelo, gaešita le ge re se ra tšwa re ‘e-lwa ntwa ya madi.’ (Ba-Hebere 12:⁠4) Eupša teko e ka tla ka dibopego tše dintši. E ka ba go kwerwa ke bao o tsenago le bona ka klaseng goba e ka ba kgatelelo ya dithaka ya go tšea karolo boitshwarong bjo bo gobogilego le go dira diphošo tše dingwe. Go oketša moo, boikemišetšo bja go ila madi, go nyala feela Moreneng goba go godišetša bana tumelong lapeng leo le aroganego bodumeding ka dinako tše dingwe go ka tliša dikgateletšo tše kgolo le diteko.​—Ditiro 15:​29; 1 Ba-Korinthe 7:​39; Ba-Efeso 6:⁠4; 1 Petro 3:​1, 2.

18. Ke kgonthišetšo efe yeo re nago le yona ya gore re ka kgotlelela gaešita le teko e kgolo kudu?

¹⁸ Lega go le bjalo, go sa šetšwe gore re tla lebeletšana le teko ya mohuta ofe, re a tseba gore re tlaišega ka gobane re bea Jehofa le Mmušo wa gagwe pele, gomme re go lebelela e le tokelo ya kgonthe le lethabo go dira bjalo. Re hwetša kgothatšo mantšung a Petro ao a kgothatšago a rego: “Xe Le xobošwa ka ’baka la Leina la Kriste, xôna Le ba lehlôxônôlô, xobane ké xôna Lè okametšwe ke Môya wa letaxô le matla, Môya wa Modimo, wo bôná ba o xobošaxo, wo lena Le o rêtaxo.” (1 Petro 4:​14) Ka matla a moya wa Jehofa, re na le matla a go kgotlelela gaešita le diteko tše thata kudu, e le bakeng sa go mo tumiša le go mo reta.​—2 Ba-Korinthe 4:⁠7; Ba-Efeso 3:​16; Ba-Filipi 4:⁠13.

[Mengwalo ya tlase]

[Lepokisi/Diswantšho go letlakala 15]

Kamoo ba Ilego ba Lebeletšana le Tlaišo ka Gona

• Pele ga ge mašole a Herode a ka fihla Betlelehema go tlo bolaya bana ba bašemane ba nywaga e mebedi le ka tlase ga fao, Josefa le Maria ba ile ba tšea ngwana Jesu gomme ba tšhabela Egipita ka taelo ya morongwa.​—Mateo 2:​13-⁠16.

• Ka makga a mmalwa nakong ya bodiredi bja Jesu, manaba a gagwe a ile a nyaka go mmolaya ka baka la bohlatse bja gagwe bjo matla. Lebakeng le lengwe le le lengwe Jesu o ile a ba tšhabela.​—Mateo 21:​45, 46; Luka 4:​28-30; Johane 8:​57-⁠59.

• Ge mašole le balaodi ba be ba e-⁠tla serapeng sa Getsemane go tlo golega Jesu, o ile a ipolela ka bolokologi gabedi ka go ba botša gore: “Ké Nna é!” O ile a ba a ganetša balatedi ba gagwe go itwela gomme a dumelela lešaba le mo tšea.​—Johane 18:​3-⁠12.

• Kua Jerusalema, Petro le ba bangwe ba ile ba golegwa, ba bethwa gomme ba laelwa go tlogela go bolela ka Jesu. Lega go le bjalo, ka morago ga go lokollwa ba ile “ba tloxa . . . ’me ba se kxaotše xo hlwa bà ruta Ntlong-kxêthwa le mo malapeng, bà fêla ba kwatša Ebangedi ya xore Jesu ké Yêna Kriste.”​—Ditiro 5:​40-⁠42.

• Ge Saulo yoo ka morago a ilego a ba moapostola Paulo a be a lemoga leano la ba-Juda la go mo fediša kua Damaseko, bana babo ba ile ba mo tsenya ka sešegong gomme ba mo theoša ka lešoba morakong wa motse bošego, ke moka a tšhaba.​—Ditiro 9:​22-⁠25.

• Nywaga ka morago, Paulo o ile a kgetha go ahlolelwa ke Kesara, gaešita le ge Mmušiši Fesito le Kgoši Agaripa ba ‘hweditše a se na molato.’​—Ditiro 25:​10-12, 24-27; 26:​30-⁠32.

Gaešita le ge di ile tša gapeletšwa ke tlaišo e šoro go tšhaba, Dihlatse tše di botegago tše dikete tša kua Malawi di ile tša tšwela pele ka tirelo ya Mmušo ka lethabo

Lethabo la go kgethagatša leina la Jehofa le ile la thuša batho ba ba botegago nakong ya mogwanto wa lehu wa Nazi le dikampeng tša tlaišo

Death march: KZ-Gedenkstätte Dachau, courtesy of the USHMM Photo Archives

Diteko le dikgateletšo di ka tla ka dibopego tše dintši

Na o ka Hlalosa?

• Bakriste ba lebelela bjang go tlaišega le tlaišo?

• Re ka ithuta’ng tseleng yeo Jesu le batho ba bangwe ba botegago ba ilego ba arabela ka yona ka tlase ga teko?

• Ke ka baka la’ng e se ga bohlale go itefeletša ge re tlaišwa?

• Ke lethabo lefe leo le ilego la thuša Jesu ditekong tša gagwe, gomme re ka ithuta’ng go se?