Go Tlaišwa ka Baka la go Loka

“Ba lehlôxônôlô ké ba ba tlaišetšwaxo tokô.”​—Mateo 5:⁠10.

1. Ke ka baka la’ng Jesu a be a le ka pele ga Pontio Pilato, gomme o ile a re’ng?

“KÉ SE ke se tswáletšwexo; ke tletše sôna lefaseng xore ke bê hlatse ya therešô.” (Johane 18:​37) Ge Jesu a be a bolela mantšu ao o be a le ka pele ga Pontio Pilato, Mmušiši wa Roma wa Judea. Jesu o be a le fao e sego ka go rata goba ka gobane a laleditšwe ke Pilato. Go e na le moo, o be a le fao ka gobane baetapele ba bodumedi ba ba-Juda ba ile ba mo latofatša ka maaka ka gore ke sesenyi seo se swanelwago ke lehu.​—Johane 18:​29-⁠31.

2. Jesu o ile a gata mogato ofe gomme wa lebiša go ditla-morago dife?

² Jesu o be a tseba gabotse gore Pilato o be a e-⁠na le matla a go mo lokolla goba a go mmolaya. (Johane 19:​10) Eupša seo ga se sa ka sa mo šitiša go bolela le Pilato ka sebete mabapi le Mmušo. Gaešita le ge bophelo bja Jesu bo be bo le kotsing, o ile a diriša sebaka se go nea bohlatse go mmuši yo a phagamego kudu wa tikologo yeo. Go sa šetšwe bohlatse bjoo, Jesu o ile a bonwa molato gomme a ahlolwa, a hwa lehu le bohloko la mohwela-tumelo koteng ya tlhokofatšo.​—Mateo 27:​24-26; Mareka 15:​15; Luka 23:​24, 25; Johane 19:​13-⁠16.

Na e be e le Hlatse Goba Mohwela-tumelo?

3. Lentšu “mohwela-tumelo” le be le bolela’ng mehleng ya Beibele, eupša le bolela’ng lehono?

³ Go batho ba bantši lehono mohwela-tumelo o nyakile a swana le mofišegela-thoko, motho yo a dirago dilo ka tsela e feteletšego. Batho bao ba ikemišeditšego go hwela tumelo ya bona, kudu-kudu tumelo ya bodumedi, gantši ba belaelwa ka go ba batšhošetši goba bonyenyane ka go ba kotsi setšhabeng. Lega go le bjalo, lentšu mohwela-tumelo le tšwa lentšung la Segerika (marʹtys) leo mehleng ya Beibele le bego le bolela gore “hlatse,” motho yo a hlatselago therešo ya seo a se dumelago, mohlomongwe tshekong ya molato. Ke feela ka morago moo lentšu le le ilego la bolela gore “yo a neelago bophelo bja gagwe ka baka la go nea bohlatse,” goba gaešita le go nea bohlatse ka go neela bophelo bja motho.

4. Jesu e be e le mohwela-tumelo kudu-kudu ka kgopolo efe?

⁴ Jesu e be e le mohwela-tumelo kudu-kudu  ka kgopolo ya pejana ya lentšu le. Go etša ge a ile a botša Pilato, o be a tletše go ba “hlatse ya therešô.” Go nea bohlatse ga gagwe go ile gwa tsoša dikarabelo tše di fapanego kudu bathong. Ba bangwe gare ga batho feela ba be ba kgomilwe kudu ke seo ba se kwelego le go se bona, gomme ba ile ba ba le tumelo go Jesu. (Johane 2:​23; 8:​30) Mašaba ka kakaretšo le baetapele ba bodumedi ka mo go kgethegilego ba ile ba arabela ka matla​—eupša ka tsela ya go ganetša. Jesu o ile a botša ba leloko la gabo bao ba sa dumelego gore: “Lefase le ka se Le hlôye, mola Nna lè nthloile ka xe ke le hlatsêla ke re medirô ya lôna ké e mebe.” (Johane 7:⁠7) Ka baka la ge a be a hlatsela therešo, Jesu o ile a tsoša kgalefo ya baetapele ba ditšhaba, yeo e ilego ya lebiša lehung la gagwe. Ka kgonthe, e be e le “hlatse (marʹtys) ye e bôtêxaxo, Morereši.”​—Kutollo 3:⁠14.

“Le tlo ba ba ba Hloilwexo”

5. Jesu o ile a bolela’ng ka tlaišo mathomong a bodiredi bja gagwe?

⁵ Ga se feela gore Jesu ka boyena o ile a lebeletšana le tlaišo e šoro eupša o ile a ba a lemoša balatedi ba gagwe e sa le pele gore se se swanago se tla ba diragalela. Mathomong a bodiredi bja gagwe, Jesu o ile a botša batheetši ba gagwe Thutong ya gagwe ya Thabeng gore: “Ba lehlôxônôlô ké ba ba tlaišetšwaxo tokô, xobane mmušô wa maxodimo ké wa bôná-bao. Ba lehlôxônôlô ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka. Thabang Le hlalalê, xobane moputsô wa lena ké o moxolo maxodimong.”​—Mateo 5:​10-⁠12.

6. Jesu o neile temošo efe ge a be a roma baapostola ba 12?

⁶ Ka morago ge a be a roma baapostola ba 12, Jesu o ile a ba botša gore: “Le phafoxêlê batho, xobane ba tlo Le sekiša dikxorong, ’me ba tlo Le ôtla mo diphuthexong tša bôná. Ba tlo Le bexa xo babuši le dikxoši ka ’baka la-ka, ya tlo ba bohlatse xo bôná le xo ba dithšaba.” Eupša baetapele ba bodumedi e be e ka se be bona feela bao ba tlaišago barutiwa. Le gona Jesu o itše: “Ngwana-bô-motho ó tlo bolaiša ngwan’abô, ’me tata-xo-motho ó tlo  bolaiša ngwana wa xaxwe; ’me bana ba tlo tsoxêla batswadi matla ba ba bolaiša. Le tlo ba ba ba hloilwexo ke bohle ka ’baka la leina la-ka. Xomme e a tl’o xo kxôtlêlêla xo iša bofelong, ké yêna a tl’o xo phološwa.” (Mateo 10:​17, 18, 21, 22) Histori ya Bakriste ba lekgolong la pele la nywaga ke bohlatse bja go rereša ga mantšu ao.

Pego ya go Kgotlelela ka Potego

7. Ke’ng seo se dirilego gore Stefano e be mohwela-tumelo?

⁷ Kapejana ka morago ga lehu la Jesu, Stefano o ile a ba Mokriste wa mathomo wa go hwela go hlatsela therešo. O be a “[tletše] tumêlô le matla, a dira mehlôlô e mexolo le diká tša bohlatse mo sethšabeng.” Manaba a gagwe a bodumedi a ile a “šitwa xo fenya bohlale bya xaxwe le Môya wo a bexo a bolêla ka wôna.” (Ditiro 6:​8, 10) Ba tletše ka lehufa, ba ile ba gogela Stefano ka pele ga Sanhedrine, lekgotla le le phagamego la ba-Juda, moo a ilego a lebeletšana le bao ba bego ba mo latofatša ka maaka gomme a nea bohlatse bjo matla. Lega go le bjalo, mafelelong manaba a Stefano a ile a bolaya hlatse ye e botegago.​—Ditiro 7:​59, 60.

8. Barutiwa ba kua Jerusalema ba ile ba arabela bjang tlaišong yeo e ilego ya ba wela ka morago ga lehu la Stefano?

⁸ Ka morago ga go bolawa ga Stefano, “phuthêxô ya Jerusalêma ya na ya tsoxêlwa ke tlaišêxô e kxolo. Ka moka ba xašanywa ba ya dinaxeng tša Juda le tša Samaria, xwa šala baapostola fêla.” (Ditiro 8:⁠1) Na tlaišo e ile ya dira gore Bakriste ba kgaotše go nea bohlatse? Ka mo go fapanego, pego e re botša gore “ba ba xašantšwexo ba na ba sepela le naxa, ba bolêla Lentšu la Ebangedi.” (Ditiro 8:⁠4) Ba swanetše go ba ba ile ba ikwa ka tsela yeo moapostola Petro a ilego a ikwa ka yona ge pejana a be a bolela gore: “Mo xo batho le Modimo, wa xo kwešešwa ke Modimo.” (Ditiro 5:​29) Go sa šetšwe tlaišo, barutiwa bao ba botegago le bao ba nago le sebete ba ile ba kgomarela modiro wa go hlatsela therešo, gaešita le ge ba be ba tseba gore se se tla ­lebiša mathateng a oketšegilego.​—Ditiro 11:​19-⁠21.

9. Ke tlaišo efe yeo e ilego ya tšwela pele go wela balatedi ba Jesu?

⁹ Ka kgonthe, mathata ga se a ka a fokotšega. Sa pele, re ithuta gore Saulo​—monna yo a ilego a dumela go kgatlwa ga Stefano ka mafsika a dutše a lebeletše​—“ó be a sa fêla à xalefile, à rata xo thšošetša le xo bolaya barutiwa ba Morêna. A ya xo moperisita e moxolo. A mo kxopêla a fiwa mangwalô a xo ya diphuthexong tša Damaseko, xore xe a ka hwetša ba bangwê ba e lexo ba thutô yé, xoba banna, xoba basadi, a ba tlêmê a ba tlišê Jerusalêma.” (Ditiro 9:​1, 2) Ke moka, mo e ka bago ka ngwaga wa 44 C.E., “kxoši Herode [o ile] a iša matsoxô xo ba bangwê ba phuthêxô, a ba kwiša bohloko. A bolaya Jakobo ngwan’a bô-Johane ka thšoša.”​—Ditiro 12:​1, 2.

10. Re hwetša pego efe ya tlaišo ka pukung ya Ditiro le ya Kutollo?

¹⁰ Puku ka moka ya Ditiro e na le pego e sa phumolegego ya diteko, go golegwa le tlaišo yeo e ilego ya kgotlelelwa ke batho ba botegago ba bjalo ka Paulo, e lego motlaiši yo ka morago a ilego a ba moapostola, yoo ka ntle le pelaelo le yena a ilego a hwela tumelo ka diatleng tša Mmušiši wa Roma e lego Nero mo e ka bago ka 65 C.E. (2 Ba-Korinthe 11:​23-27; 2 Timotheo 4:​6-⁠8) Mafelelong, ka pukung ya Kutollo yeo e ngwadilwego go ya bofelong bja ngwaga-kgolo wa pele, re hwetša gore moapostola Johane yo a tšofetšego o golegilwe sehlakahlakeng sa dikotlo sa kua Patimo “molato è le Lentšu la Modimo è le xo hlatsêla Jesu Kriste.” Le gona puku ya Kutollo e bolela ka “Antipa hlatse yeo ya xo mpôtêxêla [yo a ilego] à bolawa” kua Peragamo.​—Kutollo 1:⁠9; 2:⁠13.

11. Tsela ya Bakriste ba pele e ile ya hlatsela bjang mantšu a Jesu mabapi le tlaišo e le a therešo?

 ¹¹ Tše ka moka di ile tša hlatsela mantšu a Jesu go barutiwa ba gagwe e le a therešo: “Xe Nna ba nthlomere, le lena ba tlo Le hlômara.” (Johane 15:​20) Bakriste ba pele bao ba botegago ba be ba ikemišeditše go lebeletšana le teko e kgolo kudu, lehu​—ka go tlaišwa, ka go lahlelwa dibateng tša naga goba ka mokgwa o mongwe​—e le gore ba phethe taelo e tšwago go Morena Jesu Kriste e rego: “La tlo ba dihlatse tša-ka motseng wa Jerusalêma le naxeng ka moka ya Juda le ya Samaria, xo fihla maxomong a lefase.”​—Ditiro 1:⁠8.

12. Ke ka baka la’ng go tlaišega ga Bakriste e se feela taba ya histori?

¹² Ge e ba motho le ge e le ofe a ka nagana gore ke balatedi ba Jesu ba nakong e fetilego feela bao ba ilego ba swarwa ka tsela e bjalo e sehlogo, o tla ba a fošitše e le ruri. Paulo yoo bjalo ka ge re bone a ilego a kgotlelela mathata a magolo, o ngwadile gore: “Ké tše di tl’o xo dirêxêla bohle ba ba rataxo xo phela ka borapedi ka Kriste Jesu; le bôná ba tlo hlomarêlwa.” (2 Timotheo 3:​12) Petro o boletše mabapi le tlaišo gore: “Ké sôna se Le bileditšwexo sôna; xobane le Kriste ó tlaišitšwe ka ’baka la lena, a ba kêta-pele ya lena, xore Le tšeê ka mohlala wa xaxwe.” (1 Petro 2:​21) Go fihla le mo “mehleng ya bofêlô” bja tshepedišo ye ya dilo, batho ba Jehofa ba tšwela pele go ba bahlaselwa ba lehloyo le bonaba. (2 Timotheo 3:⁠1) Ka dinako tše dingwe Dihlatse tša Jehofa lefaseng ka bophara di ile tša tlaišega ka tlase ga dipušo tša pušo ya bogateledi goba dinageng tša pušo ka batho, e le motho ka o tee ka o tee le ge e le sehlopha.

Ke ka Baka La’ng ba Hloilwe le go Tlaišwa?

13. Ke’ng seo bahlanka ba Jehofa ba mehleng yeno ba swanetšego go dula ba se gopola mabapi le tlaišo?

¹³ Gaešita le ge bontši bja rena lehono re thabela tokologo e itšego ya go bolela le go bokana gotee ka khutšo, re swanetše go kwa keletšo ya Beibele e rego “sebopêxô sa lefase leno se a lôba.” (1 Ba-Korinthe 7:​31) Dilo di ka fetoga ka go ponya ga leihlo moo e lego gore ka ntle le ge re itokišitše monaganong, maikwelong le moyeng, re ka wa gabonolo. Ka gona, re ka dira’ng e le gore re itšhireletše? Sešireletši se matla ke go dula re gopola gabotse lebaka leo ka lona Bakriste bao ba ratago khutšo le bao ba kwago molao ba hloilwego le go tlaišwa.

14. Petro o ile a šupa’ng e le lebaka leo ka lona Bakriste ba bego ba tlaišwa?

¹⁴ Moapostola Petro o ile a bolela ka taba ye lengwalong la gagwe la mathomo leo a le ngwadilego mo e ka bago ka 62-64 C.E., ge Bakriste Mmušong wa Roma ka moka ba be ba lekwa le go tlaišwa. O itše: “Baratexi, Le se kê la tlabya ke phišô ye e Le wetšexô xore Le lekwê ka yôna; e se kê ya Le tlaba bo-ka selô se Le sa se tsebexo.” E le go hlalosa seo a bego a se naganne, Petro o ile a tšwela pele ka gore: “Mo xo lena xo se kê xwa ba le e a hlokofatšwaxo è le mmolai xoba lehodu, xoba sesenyi xoba sehwirihwiri. Xe motho a ka hlokofatšwa ka xore e le Mokriste, a se kê a kwa dihlong; a a retišê Modimo ka lôna ’ina leo.” Petro o ile a bontšha gore ba be ba sa tlaišetšwe go dira melato, eupša ba be ba tlaišetšwa go ba Bakriste. Ge nkabe ba ile ba itahlela ‘bohloleng’ bjalo ka batho bao ba ba dikologilego, nkabe batho bao ba ile ba ba amogela. Eupša ge e le gabotse ba ile ba tlaišega ka gobane ba ile ba phelela go phethagatša tema ya bona bjalo ka balatedi ba Kriste. Boemo ke bjo bo swanago go Bakriste ba therešo lehono.​—1 Petro 4:​4, 12, 15, 16.

15. Ke phapano efe yeo e bonwago tseleng yeo Dihlatse tša Jehofa di swarwago ka yona lehono?

¹⁵ Dikarolong tše dintši tša lefase, Dihlatse tša Jehofa di tumišwa phatlalatša ka baka la botee le tirišano yeo di e bontšhago dikopanong tša tšona le medirong ya go aga, ka go botega ga tšona le go šoma ka thata, ka boitshwaro bja tšona bjo bo beago mohlala o mobotse le bophelo bja lapa gotee le ka ponagalo le boitshwaro bja tšona bjo bobotse. * Ka lehlakoreng le lengwe, ge sehlogo se se be se ngwalwa modiro wa tšona o be o thibetšwe bonyenyane dinageng tše 28, gomme  bontši bja Dihlatse bo tlaišwa mmeleng le go lahlegelwa ke maphelo ka baka la tumelo ya tšona. Ke ka baka la’ng go e-⁠na le phapano e bjalo e bonagalago? Le gona ke ka baka la’ng Modimo a e dumelela?

16. Ke ka lebaka lefe le legolo leo ka lona Modimo a dumelelago batho ba gagwe go tlaišega?

¹⁶ Selo sa pele le sa bohlokwa, re swanetše go gopola mantšu a Diema 27:​11: “Ngwan’a-ka! Hlalefa, O nthabiše pelo, ke tsebê se nkaxo fetola sôna xe ba nnyatša.” Ee, ke ka baka la kgang ya bogoši bja legohle yeo e lego kgale e le gona. Go sa šetšwe bohlatse bjo bogolo bjoo bo neilwego ke bohle bao ba ilego ba hlatsela potego ya bona go Jehofa go theoša le nywaga-kgolo, Sathane ga se a kgaotša go nyatša Jehofa go swana le ge a ile a dira mehleng ya monna wa moloki e lego Jobo. (Jobo 1:​9-11; 2:​4, 5) Ka ntle le pelaelo, gona bjale ka ge Mmušo wa Modimo o hlomilwe ka go tia, o e-⁠na le balata bao ba botegago ka go se kwanantšhe le baemedi lefaseng ka bophara, Sathane o galefile kudu maitekong a gagwe a mafelelo a go hlatsela boipolelo bja gagwe. Na ba ba tla dula ba botegela Modimo go sa šetšwe mathata le tlaišego tšeo di ka ba welago? Ye ke potšišo yeo mohlanka yo mongwe le yo mongwe wa Jehofa a swanetšego go e araba ka noši.​—Kutollo 12:​12, 17.

17. Jesu o be a bolela’ng ka mantšu a rego “tšeo di tlo le dirêxêla xore le beê bohlatse”?

¹⁷ Ge a be a botša barutiwa ba gagwe mabapi le ditiragalo tšeo di tlago go direga ‘bofelong bja mabaka a,’ Jesu o ile a bolela lebaka le lengwe leo ka lona Jehofa a dumelelago tlaišo go wela bahlanka ba gagwe. O ile a ba botša gore: “[Le tlo] xôxêlwa pele xa dikxoši le babuši, ka ’baka la Leina la-ka. Fêla, tšeo di tlo le dirêxêla xore le beê bohlatse.” (Mateo 24:​3, 9; Luka 21:​12, 13) Jesu ka noši o ile a nea bohlatse ka pele ga Herode le Pontio Pilato. Moapostola Paulo le yena o ile a “xôxêlwa pele xa dikxoši le babuši.” A hlahlwa ke Morena Jesu Kriste, Paulo o ile a nyaka go nea bohlatse go mmuši yo matla kudu wa mehleng ya gagwe ge a be a bolela gore: “Nna ke wa xo ahlolêlwa ke Kesara.” (Ditiro 23:​11; 25:​8-12) Ka mo go swanago lehono, maemo a lekago gantši a ile a feleletša ka gore bohlatse ­bjo bo⁠botse bo newe go bobedi babuši le setšhaba. *

18, 19. (a) Go lebeletšana le diteko ka katlego go tla re hola bjang? (b) Ke dipotšišo dife tšeo di tlago go ahla-ahlwa sehlogong se se latelago?

¹⁸ Sa mafelelo, go lebeletšana ka katlego le diteko go hola rena ka noši. Ka tsela efe? Morutiwa Jakobo o ile a gopotša Bakriste-gotee le yena gore: “Xe Le wêla melekong ya mehuta-huta, Le re: ké lethabô fêla. Le fêlê Le tseba xore xo lekwa xa tumêlô xo tšweletša kxôtlêlêlô.” Ee, tlaišo e ka sekiša tumelo ya rena gomme ya matlafatša kgotlelelo ya rena. Ka gona, ga re dika-dike go lebeletšana le tlaišo goba go nyaka tsela yeo e sa dumelelanego le mangwalo ya go e široga goba go e fediša. Go e na le moo, re ela hloko keletšo ya Jakobo e rego: “Kxôtlêlêlô yôna a e bê le modirô wo o tletšexo, xore Le bê ba-boló-ka-tlalô ba ba se naxo senyalô, Le se bê le mo Le hlaetšaxo.”​—Jakobo 1:​2-⁠4.

¹⁹ Gaešita le ge Lentšu la Modimo le re thuša go kwešiša lebaka leo bahlanka ba Modimo ba ba botegago ba tlaišwago ka lona le lebaka leo Jehofa a dumelelago se, seo ga se dire gore go be bonolo go lebeletšana le tlaišo. Ke’ng seo se ka re matlafaletšago go lebeletšana le yona? Re ka dira’ng ge re lebeletšane le tlaišo? Sehlogong se se latelago re tla ahla-ahla dintlha tše tše bohlokwa.

[Diswantšho go letlakala 10, 11]

Bakriste ba lekgolong la pele la nywaga ba be ba sa tlaišetšwe go dira melato, eupša ba be ba tlaišetšwa go ba Bakriste

PAULO

JAKOBO

JOHANE

ANTIPASE

STEFANO

Na o ka Hlalosa?

• Jesu e be e le mohwela-tumelo kudu-kudu ka kgopolo efe?

• Tlaišo e bile le mafelelo afe go Bakriste ba lekgolong la pele la nywaga?

• Bjalo ka ge Petro a hlalositše, ke ka baka la’ng Bakriste ba pele ba ile ba tlaišwa?

• Ke ka mabaka afe ao ka ona Jehofa a dumelelago tlaišo go wela bahlanka ba gagwe?