Na o “Raxa Seotledi”?

MEHLENG ya Beibele, seotledi​—e lego thupa e telele, yeo gantši e bego e e-⁠na le sepikiri sa ntlha ya bogale mo mafelelong a yona​—se be se dirišetšwa go gapa le go hlahla diphoofolo tšeo di dirišetšwago go goga merwalo e boima. Mafelelo e be e le afe ge e ba phoofolo ka mereba e be e gana go hlabja ka seotledi ka go se lwantšha? Go e na le gore e imologe, e be e ikweša bohloko ka noši.

Jesu Kriste yo a tsošitšwego o boletše ka seotledi ge a be a tšwelela go monna yo a bitšwago Saulo, yo a bego a le tseleng ya go yo swara barutiwa ba bangwe ba Jesu. Seetšeng se se foufatšago, Saulo o ile a kwa Jesu a re: “Saulo! Saulo! O nthlomaretše’ng? Xo raxa seotledi xo tlo Xo thatafalêla.” Ka go swara Bakriste gampe, Saulo ge e le gabotse o be a e-⁠lwa le Modimo, a phegelela tsela yeo e bego e tla feleletša feela ka go mo ntšha kotsi.​—Ditiro 26:⁠14.

Na le rena re ka ba re “raxa seotledi” e se ka maikemišetšo? Beibele e swantšha “mantšu a bahlale” le seotledi seo se ka re hlahlago gore re sepele tseleng ya go loka. (Mmoledi 12:​11) Keletšo e buduletšwego ka Lentšung la Modimo e ka re tutuetša le go re hlahla ka mo go nepagetšego​—ge e ba re e dumelela. (2 Timotheo 3:​16) Go gana tutuetšo ya lona go ka re ntšha kotsi.

Saulo o ile a naganišiša ka mantšu a Jesu, a fetola bophelo bja gagwe, gomme ya ba moapostola Paulo wa Mokriste yo a rategago. Go ela ga rena hloko keletšo ya Modimo go tla re tlišetša ditšhegofatšo tša ka mo go sa felego.​—Diema 3:​1-⁠6.

NA O TLA AMOGELA KETELO?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org

L. Chapons/Illustrirte Familien-Bibel nach der deutschen Uebersetzung Dr. Martin Luthers