Re ka Letela Gore Modimo a Tsene Ditaba Gare ka Tsela Efe?

LEKGOLONG la seswai la nywaga B.C.E., Kgoši Hiskia wa Juda wa nywaga e 39 o ile a lemoga gore o na le bolwetši bjo bo bolayago. A tšhošitšwe ke ditaba tše, Hiskia o ile a kgopela Modimo ka thapelo gore a mo fodiše. Modimo o ile a araba ka moporofeta wa gagwe gore: “Thapêlô ya xaxo ke e kwile, le mexôkxô ya xaxo ke e bone. Byale ke tlo eketša nywaxa ya xaxo ka nywaxa e lesome le metšô e mehlano.”​—Jesaya 38:​1-⁠5.

Ke ka baka la’ng Modimo a ile a tsena ditaba gare nakong yona yeo? Nywaga-kgolong e mentši pejana, Modimo o be a holofeditše Kgoši Dafida wa go loka gore: “Ngwakô wa xaxo wôna o tlo tia, le mmušô wa xaxo ké wa neng le neng ò e-⁠ya; sedulô sa xaxo sa boxoši se tlo ba xôna ka  mehla le mehla.” Le gona Modimo o ile a utolla gore Mesia o be a tla belegelwa lešikeng la Dafida. (2 Samuele 7:​16; Psalme 89:​20, 26-29; Jesaya 11:⁠1) Ge Hiskia a be a thoma go babja, o be a se a hlwa a e-⁠ba le morwa. Ka gona, lešika la Dafida la bogoši le be le le kotsing ya go fedišwa. Go tsena ga Modimo ditaba gare tabeng ya Hiskia go bile le morero o kgethegilego wa go boloka lešika le le lebišago go Mesia.

E le gore a phethagatše dikholofetšo tša gagwe, Jehofa o ile a tutueletšega go tsena ditaba gare legatong la batho ba gagwe maemong a mantši nakong ka moka ya pele ga mehla ya Bokriste. Moše o ile a bolela mabapi le go lokollwa ga ba-Isiraele bokgobeng kua Egipita gore: “Morêna ó dirilwe ke leratô; ó be a rata xo phêtha kênô ye a e enetšexo bô-tata-weno, ’me a Le khuduša ka seatla se matla.”​—Doiteronomio 7:⁠8.

Lekgolong la pele la nywaga, go tsena ga Modimo ditaba gare ka mo go swanago go ile gwa tšwetša pele merero ya Modimo. Ka mohlala, ge a le tseleng ya go ya Damaseko, Mojuda yo a bitšwago Saulo o ile a bontšhwa pono ya mohlolo e le gore a tlogele go tlaiša barutiwa ba Kriste. Go sokollwa ga monna yo, yoo a ilego a fetoga moapostola Paulo, go bile le karolo e bohlokwa go phatlalatšweng ga ditaba tše dibotse ditšhabeng.​—Ditiro 9:​1-16; Ba-Roma 11:⁠13.

Na go Tsena Ditaba Gare e be e le mo go Tlwaelegilego?

Na go tsena ga Modimo ditaba gare e be e le molao goba go be go dirwa ka tlase ga mabaka a itšego? Mangwalo a bontšha gabotse gore e be e tloga e se mo go tlwaelegilego. Gaešita le ge Modimo a ile a phološa bafsa ba bararo ba ba-Hebere gore ba se bolawe kgabong e fišago ya mollo gotee le go phološa moporofeta Daniele moleteng wa ditau, ga se a ka a gata mogato bakeng sa go phološa baporofeta  ba bangwe lehung. (2 Koronika 24:​20, 21; Daniele 3:​21-27; 6:​16-22; Ba-Hebere 11:​37) Petro o ile a lokollwa ka mohlolo kgolegong yeo Herode Agaripa I a bego a mo golegile go yona. Lega go le bjalo, yona kgoši ye e ile ya dira gore moapostola Jakobo a bolawe, gomme Modimo ga se a ka a tsena ditaba gare bakeng sa go thibela bosenyi bjo. (Ditiro 12:​1-11) Gaešita le ge Modimo a ile a nea baapostola matla a go fodiša balwetši gotee le go tsoša bahu, ga se a ka a nyaka go tloša “phatša nameng” ye e bego e tlaiša moapostola Paulo, yeo mohlomongwe e bego e le bofokodi bja mmele.​—2 Ba-Korinthe 12:​7-⁠9; Ditiro 9:​32-41; 1 Ba-Korinthe 12:⁠28.

Modimo ga se a ka a tsena ditaba gare bakeng sa go thibela lephoto la tlaišo leo le bego le tšwela pele malebana le barutiwa ba Kriste le le bego le tlišwa ke Mmušiši wa Roma e lego Nero. Bakriste ba be ba tlaišwa, ba fišwa ba phela gotee le go lahlelwa diphoofolong tša naga. Lega go le bjalo, kganetšo ye ga se ya ka ya tlaba Bakriste ba pele, gomme ka kgonthe ga se ya ka ya fokodiša tumelo ya bona ya gore Modimo o gona. Go feta moo, Jesu o be a lemošitše barutiwa ba gagwe gore ba be ba tla išwa pele ga dikgoro tša tsheko le gore ba swanetše go itokišeletša go tlaišwa gotee le go hwela tumelo ya bona.​—Mateo 10:​17-⁠22.

Go swana le ge a dirile bjalo nakong e fetilego, ka kgonthe Modimo lehono o kgona go phološa bahlanka ba gagwe maemong a kotsi, gomme bao ba naganago gore ba hotšwe ke tšhireletšo ya gagwe ga se ba swanela go ganetšwa. Lega go le bjalo, go thata go bolela ka kgodišego gore maemong a bjalo Modimo o ile a tsena ditaba gare goba ga se a dira bjalo. Bahlanka ba botegago ba Jehofa ba mmalwa ba ile ba gobatšwa ke go thuthupa moo go diregilego kua Toulouse, gomme Bakriste ba dikete ba botegago ba ile ba hwa dikampeng tša Nazi le tša Bokomanisi goba ka tlase ga maemo a mangwe a nyamišago ka ntle le gore Modimo a tsene ditaba gare gore a a thibele. Ke ka baka la’ng Modimo a sa tsene ditaba gare ka mo go feletšego legatong la bao a ba amogelago?​—Daniele 3:​17, 18.

“Nako le Ditiragalo tše di sa Letelwago”

Ge go e ba le masetlapelo, a ka kgoma motho le ge e le ofe, gomme go botegela Modimo ga se gore ke yona taba ya bohlokwa. Nakong ya go thuthupa mo go diregilego kua Toulouse, moo Alain le Liliane ba phologilego, batho ba 30 ba ile ba hwa gomme ba makgolo ba ile ba gobala, gaešita le ge e be e se phošo ya bona. Ka tekanyo e kgolo, batho ba dikete tše makgolo ke bahlaselwa ba bosenyi, go otlela ka go se šetše goba ntwa, gomme Modimo a ka se bewe molato bakeng sa madimabe a bona. Beibele e re gopotša gore “nako le ditiragalo tše di sa letelwago di ba wela” bohle.​—Mmoledi 9:​11, NW.

Go feta moo, batho ke bahlaselwa ba bolwetši, botšofadi le lehu. Gaešita le ba bangwe bao ba bego ba nagana gore Modimo o phološitše maphelo a bona ka mohlolo goba bao ba bego ba mo reta ka baka la go fola bolwetšing ka tsela e sa letelwago mafelelong ba ile ba hwa. Go fedišwa ga bolwetši le lehu le go ‘phumolwa ga megokgo ka moka’ mahlong a batho go tla direga nakong e tlago.​—Kutollo 21:​1-⁠4.

E le gore seo se direge, go nyakega selo se sengwe se segolo kudu le sa bohlokwa go feta go tsenwa ga ditaba gare ka sewelo. Beibele e bolela ka tiragalo yeo e bitšwago “’tšatši le lexolo la Morêna.” (Tsefanya 1:​14) Nakong ye ya go tsena ditaba gare ka tekanyo e kgolo, Modimo o tla fediša bokgopo ka moka. Batho ba tla newa sebaka sa go phela ka mo go sa felego maemong a phethagetšego, ao go ona ‘tša kgale di ka se hlwego di tsebja le mo pelong ya motho di ka se hlwego di rotoga.’ (Jesaya 65:​17) Gaešita le bahu ba tla tsošetšwa bophelong, ka go rialo gwa lokišwa seo ka kgonthe e lego masetlapelo a magolo ge go bapišwa le ao a kilego a tlaiša batho. (Johane 5:​28, 29) Ke moka Modimo ka lerato la gagwe le le sa felego gotee le go loka ga gagwe o tla be a rarollotše mathata a batho gatee ya ba moka.

Kamoo Modimo a Tsenago Ditaba Gare Lehono

Lega go le bjalo, se ga se bolele gore Modimo mo nakong ye o fo hlokomologa ge popo e tlaišega.  Lehono, Modimo o nea batho bohle, go sa šetšwe setlogo sa bona sa moloko goba sa tša leago, sebaka sa go mo tseba le go hlagolela tswalano ya motho ka noši le yena. (1 Timotheo 2:​3, 4) Jesu o hlalositše mogato wo ka mantšu a: “Xa xo motho e a kxônaxo xo tla xo Nna, xe a sa xôxwe ke Tate e a nthomilexo.” (Johane 6:​44) Modimo o gogela ba dipelo tše botegago go yena ka go diriša molaetša wa Mmušo woo bahlanka ba gagwe ba o tsebatšago lefaseng ka bophara.

Go oketša moo, Modimo o tutuetša ka go lebanya maphelo a bao ba ratago go hlahlwa ke yena. Ka go diriša moya wa gagwe o mokgethwa, Modimo o ‘bula dipelo tša bona’ gore ba kwešiše thato ya gagwe le go dira seo a se nyakago. (Ditiro 16:​14) Ee, ka go ba nea sebaka sa go mo tseba, go tseba Lentšu la gagwe le merero ya gagwe, Modimo o nea bohlatse bja gore o na le kgahlego e lerato go yo mongwe le yo mongwe wa rena.​—Johane 17:⁠3.

Sa mafelelo, Modimo o thuša bahlanka ba gagwe lehono, e sego ka go ba phološa ka mohlolo, eupša ka go ba nea moya o mokgethwa le “matla a fetišago a tlwaelegilego” gore ba kgone go lebeletšana ka katlego le boemo le ge e le bofe bjo bo ka tšwelelago. (2 Ba-Korinthe 4:⁠7, NW) Moapostola Paulo o ngwadile gore: “Ke kxôna tšohle ka Eo a mphaxo matla, Yêna [Jehofa Modimo].”​—Ba-Filipi 4:⁠13.

Ka gona re na le lebaka le le tiilego la go leboga Modimo letšatšing le lengwe le le lengwe bakeng sa bophelo le kholofelo yeo a re neago yona ya go phela ka mo go sa felego lefaseng leo le se nago tlaišego le ge e le efe. Mopsalme o ile a botšiša gore: “Morêna ke tlo mo leboxa ka’ng tše di botse tšohle tše a ntiretšexo tšôna? Ke tlo ipexa ka se-leboxa-topololô, ka bitša ’ina la Morêna.” ­(Psalme 116:​12, 13) Go bala makasine wo ka mehla go tla go thuša go kwešiša seo Modimo a se dirilego, seo a se dirago le seo a dutšego a tla se dira, seo se tla go tlišetšago lethabo gona bjale le ­kholofelo e tiilego ka bokamoso.​—1 Timotheo 4:⁠8.

Mehleng ya Beibele, Jehofa ga se a ka a thibela gore Sakaria a se thungwe ka mafsika . . . 

goba go bolaya ga Herode bao ba se nago molato

“Tša kxalê di ka se hlwê di tsebywa, le mo pelong ya motho di ka se hlwê di rotoxa.”​—Jesaya 65:⁠17

Nako yeo go yona tlaišego e tlago go fela e batametše; gaešita le bahu ba tla boela ba phela