BAGOELEDI BA MMUŠO BA A BEGA

“Se ke Tshedimošo!”

DOROTA, modiredi wa nako e tletšego wa Dihlatse tša Jehofa kua Poland, o ile a felegetša morwa wa gagwe wa nywaga e 14 go ya go hlahlobja kliniking ya sekolo moo a bego a e-⁠ya ka mehla. Nakong ya tlhahlobo, ngaka e lego Janina, * e ile ya botšiša Dorota ka mediro ya morwa wa gagwe ya ka gae.

Dorota o ile a araba ka gore: “Morwa wa-ka o lokiša dijo tša mantšibua bakeng sa rena ba tshela ka lapeng, ge ke sa kgone go dira seo. Le gona o hlwekiša ntlo le go thuša go lokiša dilo tše di senyegilego ka ntlong. O rata go bala. Ke morutwana yo mobotse.”

Janina o itše: “Seo se a makatša. Ke šomile mo nywaga e 12, gomme ga se ka ka ka kwa selo sa go swana le se.”

Ka ge a be a lemoga sebaka sa go nea bohlatse, Dorota o ile a hlalosa gore: “Batswadi ba bantši lehono ba palelwa ke go nea bana ba bona tlhahlo ya kgonthe. Ke ka baka leo bana ba bona ba nago le boitlhompho bjo bo nyenyane.”

Janina o ile a botšiša gore: “Tše ka moka o di tseba bjang? Batswadi ba bantši ga ba na tsebo ka dilo tše.”

Dorota o ile a araba ka gore: “Beibele ke mothopo wa bohlokwa wa tsebišo e bjalo. Ka mohlala, go ya ka Doiteronomio 6:​6-⁠9, go ruta bana go thoma ka gore re ithute pele. Na ga se ra swanelwa ke go tsenya ka pelong le kgopolong ya rena ditekanyetšo tšeo re ratago go di nweletša baneng ba rena?”

Janina o ile a kgotsa ka gore: “Seo se a makatša. Seo se a makatša!” Ke moka o ile a botšiša Dorota gore Beibele e mo thušitše bjang go godiša le go ruta bana ba gagwe.

Dorota o ile a araba ka gore: “Re ithuta Beibele beke le beke le bana ba rena. Re diriša puku e nago le sehlogo se se rego, Dipotšišo tša Bafsa le Dikarabo tše Šomago.” * Ke moka o ile a tšwela pele a hlalosa puku le go bolela tše dingwe tša dihlogo tšeo di e hlahlobago.

Janina o ile a kgotsa ka gore: “Se ke tshedimošo! Na nka e bona puku yeo?”

Ka morago ga iri, Dorota o ile a tla le puku.

“O wa bodumedi bofe?” Janina o ile a botšiša ge a hlahloba puku.

“Ke yo mongwe wa Dihlatse tša Jehofa.”

“Dihlatse tša Jehofa di swara batho ba tumelo e nngwe bjang?”

Dorota o ile a araba ka gore: “Go swana le ka tsela ye ke go swarago ka yona​—ka tlhompho,” a tlaleletša: “Ge e le gabotse, re rata ge le bona ba ka ithuta therešo ya Beibele.”

Janina o ile a ipobola ka gore: “Ke ikwa kaone kudu ga bjale.”

Mafelelong a leeto la gagwe, Dorota o ile a kgothaletša Janina go bala Beibele. “E tla go nea morero bophelong bja gago le go go thuša mošomong wa gago.”

Janina o ile a dumela ka gore: “O šetše o ntutueleditše go dira bjalo.”

Ka bohlale le ka maikemišetšo, Dorota o ile a fetola leeto la ka mehla ngakeng go ba la go nea bohlatse bjo bobotse.​—1 Petro 3:​15.

[Mengwalo ya tlase]