Bafsa, Sepelang ka Mokgwa wo o Amogelegago go Jehofa

BAFSA ba bangwe bao e lego Bakriste ba ile ba swanelwa ke go dula kgole le malapa a bobona le phuthego ya gabo bona ka nakwana. Ba bangwe ba ile ba dira bjalo e le gore ba katološe tirelo ya bona. Ba bangwe ba ile ba swanelwa ke go tloga magaeng a gabo bona ka baka la boema-gare bja bona ditabeng tša lefase le. (Jesaya 2:⁠4; Johane 17:​16) Dinageng tše dingwe, “Kesara” o ahloletše bafsa ba botegago kgolegong goba gore ba šomele setšhaba. *​—Mareka 12:​17; Tito 3:​1, 2.

Ge ba dutše ba hlankela kgolegong ka baka la boema-gare bja bona, bafsa ba ba ka golegwa ka nako e telele gotee le bafsa ba go se kwe. Go ba kgole le gae ka baka la mabaka a mangwe ka mo go swanago go gapeleditše bafsa gore ba šome tikologong e gobogilego. Bafsa ba bao e lego Bakriste goba ba bangwe bao ba gapeleditšwego go dula maemong a bjalo ba ka lebeletšana bjang ka katlego le dikgateletšo gotee le dilo tšeo di nyakwago go bona tšeo ba lebanago le tšona ge ba dutše ba katanela go ‘tšwela pele ba sepela ka tsela e amogelegago go Modimo?’ (1 Ba-Thesalonika 2:​12) Batswadi ba bona ba ka ba thuša bjang gore ba itokišeletše go lebeletšana le maemo le ge e le afe a sa thabišego ao a ka bago gona?​—Diema 22:⁠3.

Ditlhohlo tše di Kgethegilego

Tákis wa nywaga e 21, yo a ilego a gapeletšega go fetša dikgwedi tše 37 a le kgole le gae o re: “Go ba kgole le tlhokomelo e šireletšago ya batswadi ba-ka gotee le bolebeledi bjo lerato bja bagolo bao ba bego ba ntseba gabotse go be go le thata e bile go le kotsi.” * O oketša ka gore: “Ka dinako tše dingwe ke be ke ikwa ke le yo a hlaselegago gabonolo ka mo go feteletšego.” Pétros wa nywaga e 20 o ile a swanelwa ke go ba kgole le gae ka nywaga ya ka godimo ga e mebedi. O dumela ka gore: “Ka lekga la pele bophelong bja-ka, ke ile ka swanelwa ke go itirela diphetho ka mo go feletšego tša mabapi le boithabišo le bagwera, gomme diphetho tša-ka e be e se tše bohlale ka dinako tšohle.” Ke moka o re: “Ka dinako tše dingwe ke be ke ikwa ke tšhošwa ke boikarabelo bjo bogolo bjoo bo bego bo tlišwa ke tokologo e oketšegilego.” Tássos, e lego mogolo wa Mokriste yo a kopanago ka mehla le bafsa bao e lego Bakriste ba ba lego maemong a swanago le a o re: “Polelo e sa hlwekago, borabele le bošoro bja dithaka tša bona tšeo di sa dumelego bo ka tutuetša bafsa bao ba sa hlokomelego le bao ba hlaselegago gabonolo.”

Ge ba dutše ba phela le go šoma gare ga batho bao ba sa hlomphego melao ya motheo ya Beibele, bafsa ba bjalo bao e lego Bakriste ba swanetše go itiša malebana le teko ya go ekiša ditsela tše di gobogilego le tšeo di sa dumelelanego le Mangwalo tša dithaka tša bona. (Psalme 1:⁠1; 26:⁠4; 119:⁠9) Go boloka mokgwa o mobotse wa thuto ya motho ka noši, go ya dibokeng le tirelong ya tšhemo go ka bonagala go le thata. (Ba-Filipi 3:​16) Le gona go ipeela dipakane tša moya le go di šomela go ka no se be bonolo.

Ka ntle le pelaelo bafsa ba botegago bao e lego Bakriste ba nyaka go thabiša Jehofa ka boitshwaro bja bona le polelo ya bona. Ka potego ba leka go ela hloko kgopelo e ipiletšago ya Tatago bona wa legodimong e rego: “Ngwan’a-ka! Hlalefa, O nthabiše pelo, ke tsebê se nkaxo fetola sôna xe ba nnyatša.” (Diema 27:​11) Ba lemoga gore  boitshwaro bja bona bjo bobotse le mekgwa ya bona di tutuetša tsela yeo ka yona ba bangwe ba lebelelago Jehofa le batho ba gagwe.​—1 Petro 2:⁠12.

Ke mo go retwago kudu gore bafsa ba bantši ba bjalo ba dira seo ba ka se kgonago gore ba swane le bana babo bona ba lekgolong la pele la nywaga bao moapostola Paulo a ba rapeletšego ka gore: “Le swarê ka tsela ye e loketšexo ba Morêna [e amogelegago go Jehofa, NW], e bê xo mo kxahla xohle, le xo enywa dienywa ka medirô e botse yohle, . . . la tlo kxôna xo kxôtlêlêla xohle, Le se fêlê pelo.” (Ba-Kolose 1:​9-11) Beibele e re nea mehlala e mmalwa ya bafsa bao ba boifago Modimo bao ka katlego ba ilego ba sepela ka mokgwa wo o amogelegago go Modimo tikologong e šele, ya bonaba le ya borapedi bja medimo ya diswantšho.​—Ba-Filipi 2:⁠15.

“[Jehofa] ó be a na le Josefa”

Ge a be a sa le yo monyenyane kudu, Josefa, e lego morwa yo a rategago kudu wa Jakobo le Ragele, o ile a ikhwetša a le kgole le lapa leo le šireletšago la tatagwe yo a bego a boifa Modimo. O be a rekišeditšwe bokgobeng kua Egipita. Josefa o ile a bea mohlala wo o rategago e le mofsa wa seroto, yo a botegago le yo a itshwerego gabotse. Go sa šetšwe gore e be e le lekgoba la Potifara​—e lego motho yo e bego e se morapedi wa Jehofa​—Josefa e be e le sethakga e bile a le mafolofolo, moo e lego gore mong wa gagwe mafelelong o ile a mo nea boikarabelo bja gore a hlokomele ditaba ka moka tša ka ngwakong wa gagwe. (Genesi 39:​2-⁠6) Josefa o ile a dula a botegela Jehofa, gomme ge se mafelelong se dira gore a lahlelwe kgolegong, ga se a ka a phetha ka gore: “Go kgomarela potego ya-ka go thuša’ng?” Le ge a le kgolegong o ile a bontšha dika tše dibotse, gomme go se go ye kae o be a šetše a hlokomela ditaba tše dintši tša mabapi le tshepedišo ya kgolego. (Genesi 39:​17-22) Modimo o ile a mo šegofatša, gomme bjalo ka ge go boletšwe go Genesi 39:​23, “[Jehofa] ó be a na le yêna.”

Go ka ba go ile gwa ba bonolo gakaakang go Josefa, yo a bego a le kgole le lapa la gabo leo le boifago Modimo, gore a dumelelanye boitshwaro bja gagwe le bja baheitene bao ba bego ba mo dikologile gotee le go ekiša tsela e gobogilego ya go phela ya ba-Egipita! Go e na le moo, o ile a kgomarela melao ya motheo ya Modimo gotee le go boloka boemo bja gagwe bjo bo hlwekilego go sa šetšwe diteko tše matla. Ge mosadi wa Potifara a be a mo kgothaletša leboelela gore a be le dikopano tša botona le botshadi le yena, o ile a araba ka go tia gore: “Nka dira bya’ng bobe byo boxolo byoo ka senya pele xa Modimo?”​—Genesi 39:​7-⁠9.

Lehono, bafsa bao e lego Dihlatse ba swanetše go ela hloko ditemošo tše di theilwego Beibeleng tša malebana le segwera seo se sa swanelago, boithabišo bjo bo gobogilego, diswantšho tše di kgothaletšago bootswa le mmino wo o gobogilego. Ba lemoga gore “mahlô a Morêna; a okametše ba babe le ba bolo.”​—Diema 15:⁠3.

 Moše o Ile a Phema “go Thabela Sebe”

Moše o goletše tikologong ya borapedi bja medimo ya diswantšho le ya go rata boithabišo ya ngwakong wa Farao. Beibele e bolela ka yena gore: “Ké ka tumêlô xe Mošê mola à xodile à xana xo bitšwa morwa wa morwedi wa Farao; A ikxêthêla xo thatafalêlwa le sethšaba sa Modimo, a nyatša maiphsinô a lebaka leno [go thabela sebe ka lebakanyana, NW].”​—Ba-Hebere 11:​24, 25.

Go gwerana le lefase go ka feleletša ka mehola e itšego, eupša ke ya nakwana. Go ya ka tekanyetšo, e ka tšea feela nako e lekanyeditšwego yeo e sa šaletšego lefase le. (1 Johane 2:​15-17) Na go be go tla se be kaone go latela mohlala wa Moše? Beibele e bolela gore o ile “a xomarêla Eo a sa bonwexo byalo ka e ke ó a mmôna.” (Ba-Hebere 11:​27) O ile a boloka monagano wa gagwe o lebišitšwe bo­hweng bja moya bjoo bo tlogetšwego ke bagologolo ba gagwe bao ba bego ba boifa Modimo. O ile a dira gore merero ya Jehofa e be merero ya gagwe bophelong, a ipeela pakane ya go dira thato ya Modimo.​—Ekisodo 2:​11; Ditiro 7:​23, 25.

Ge bafsa bao ba boifago Modimo ba ikhwetša ba le tikologong ya batho bao ba sa boifego Modimo le bao ba se nago bogwera, ba ka matlafatša tswalano ya bona le Jehofa ka thuto ya motho ka noši, gomme ba tseba “Eo a sa bonwexo” gakaone. Lenaneo le le feletšego la mediro ya Bokriste, yeo e akaretšago go ba gona ka mehla dibokeng le tirelong ya tšhemo, le tla thuša bafsa ba go boloka menagano ya bona e lebišitšwe dilong tša moya. (Psalme 63:⁠6; 77:​12) Ba swanetše go katanela go hlagolela tumelo gotee le kholofelo e matla e swanago le ya Moše. Ba swanetše go katanela go thekga megopolo ya bona le mediro ya bona ka Jehofa, ba thabele go ba bagwera ba gagwe.

O Ile a Diriša Leleme la Gagwe go Reta Modimo

Mofsa yo mongwe yo a ilego a ipontšha e le mohlala ge a be a le kgole le gae e bile mosetsana wa mo-Isiraele yo a bego a thopilwe ke ba-Siria mehleng ya moporofeta wa Modimo Elisa. O ile a ba molata wa mosadi wa molaodi wa madira a Siria yo a nago le lephera, e lego Naemane. Mosetsana yo o ile a botša mohumagadi wa gagwe gore: “Xe mong wa-ka a ka bê a e-⁠ya xo moporofeta wa Samaria, a ka bê a mo fodiša lephêra lé.” Ka baka la bohlatse bja gagwe, Naemane o ile a ya go Elisa kua Isiraele gomme a fodišwa lephera. Go feta moo, Naemane o ile a fetoga morapedi wa Jehofa.​—2 Dikxoši 5:​1-3, 13-⁠19.

 Mohlala wa mosetsana yo o gatelela go nyakega ga gore bafsa ba diriše maleme a bona ka tsela yeo e godišago Modimo, gaešita le ge ba le kgole le batswadi ba bona. Ge nkabe mosetsana yola a be a e-⁠na le mokgwa wa go diriša “dipolelo tša bošilo” goba “metlae e sa lokago,” na a ka ba a ile a ikwa a lokologile go diriša leleme la gagwe ka tsela e atlegago go swana le ge a ile a dira ge sebaka se be se bulega? (Ba-Efeso 5:⁠4; Diema 15:⁠2) Níkos, e lego mofsa yo a lego nywageng ya gagwe ya mathomo ya bo-20 yoo a bego a golegilwe ka baka la boema-gare bja gagwe o gopola gore: “Ge ke be ke e-⁠na le bana babo rena ba bangwe ba bafsa kgolegong ya tša temo, kgole le taolo ya batswadi le ya phuthego, ke ile ka lemoga gore polelo ya rena e be e thoma go bola. Ka kgonthe e be e sa tlišetše Jehofa tumišo.” Ka mo go thabišago, Níkos le ba bangwe ba ile ba thušwa gore ba ele hloko keletšo ya Paulo tabeng ye: “Xe e le bootswa, le dithšila ka moka, le mexabaru, tše byalo le xo bolêla di se kê tša bolêlwa mo xo lena.”​—Ba-Efeso 5:⁠3.

Jehofa e be e le wa Kgonthe go Bona

Phihlelo ya bagwera ba Daniele ba bararo ba ba-Hebere kua Babele ya bogologolo e hlatsela go rereša ga molao wa motheo wo o boletšwego ke Jesu wa gore go botega dilong tše dinyenyane go feleletša ka go botega dilong tše dikgolo. (Luka 16:​10) Ge ba be ba lebeletšane le bothata bja go ja dijo tšeo di ileditšwego ke Molao wa Moše, ba ka ba ba ile ba itokafatša ka gore e be e le mathopša nageng e šele gomme ka go rialo ba be ba se na kgetho tabeng ye. Eupša ba ile ba šegofatšwa gakaakang ka gore ba ile ba tšeela godimo seo se bego se bonagala e le se senyenyane! Ba ile ba ipontšha e le ba phetšego gabotse mmeleng le ba bohlale go feta mathopša a mangwe ka moka ao a ilego a tšwela pele a e-⁠ja dijo tša kgoši tša moseo. Ka ntle le pelaelo go botega dilong tše tše dinyenyane go ile gwa ba matlafatša, moo e lego gore ge ba be ba lebeletšane le teko e kgolo ya go khunamela modimo wa seswantšho, ba ile ba gana go kwanantšha.​—Daniele 1:​3-21; 3:​1-⁠30.

Jehofa e be e tloga e le wa kgonthe go bafsa ba ba bararo. Go sa šetšwe go ba kgole le gagabo bona gotee le lefelo la go rapela Modimo, ba be ba ikemišeditše go tšwela pele ba sa šilafatšwa ke lefase. (2 Petro 3:​14) Tswalano ya bona le Jehofa e be e le ya bohlokwa kudu go bona moo ba bego ba ikemišeditše go gafa maphelo a bona bakeng sa yona.

Jehofa a ka se go Lahle

Ge bafsa ba le kgole le bao ba ba ratago le go ba bota, ke mo go kwešišegago gore ba ka ikwa ba sa  šireletšega, ba na le dipelaelo e bile ba tšhogile. Lega go le bjalo, ba ka lebeletšana le diteko ka kholofelo e tiilego ya gore ‘Jehofa a ka se ba lahle.’ (Psalme 94:​14) Ge e ba bafsa ba bjalo ba “hlokofatšwa molato è le tokô,” Jehofa o tla ba thuša go tšwela pele ba sepela “ka mmila wa tokô.”​—1 Petro 3:​14; Diema 8:⁠20.

Jehofa ka dinako tšohle o ile a matlafatša le go putsa ka mo go humilego Josefa, Moše, mosetsana wa lethopša wa mo-Isiraele le bafsa ba bararo ba ba-Hebere. Lehono, o diriša moya wa gagwe o mokgethwa, Lentšu la gagwe le mokgatlo wa gagwe go šireletša bao ba ‘hlabanago tlhabano e botse ya tumelo,’ ka go bea ka pele ga bona moputso wa “bophelô byo bo sa felexo.” (1 Timotheo 6:​11, 12) Ka kgonthe, go sepela ka mokgwa wo o amogelegago go Jehofa go a kgonega, le gona ke selo sa bohlale go se dira.​—Diema 23:​15, 19.

[Mengwalo ya tlase]

[Lepokisi go letlakala 25]

BATSWADI HLAMANG BANA BA LENA!

“Ba etša mesêbê ’atleng tša moxale; ba byalo bana ba ba tswáletšwexo motho à sa le e mofsa.” (Psalme 127:⁠4) Mosebe o ka se fihle ka phošo lefelong leo o reretšwego gore o fihle go lona. O swanetše gore o lebantšhwe ka bokgoni. Ka mo go swanago, bana ba ka se itlhamele go lebeletšana le ditherešo tša go dula kgole le gae ka ntle le tlhahlo e swanetšego ya batswadi.​—Diema 22:⁠6.

Bafsa ba na le tshekamelo ya go dira dilo ka go tšewa ke maikwelo goba go ineela go “dikxanyoxô tša bosoxana.” (2 Timotheo 2:​22) Beibele e lemoša ka gore: “Kxati le thsôlô di a hlalefiša; mošemana-moipuši o leša mm’axwe dihlong.” (Diema 29:​15) Go palelwa ke go ba le mellwane mekgweng ya bofsa go tlogela ngwana a sa itlhamela dinyakwa le dikgateletšo tša go dula kgole le gae.

Ka tsela e kwagalago le ya boikarabelo, batswadi ba Bakriste ba swanetše go hlalosetša bana ba bona ka mathata, dikgateletšo le ditherešo tša bophelo tshepedišong ye ya dilo. Ka ntle le go bontšha moya wa go se holofele tše botse goba go ba nyamiša, ba ka hlalosa maemo a sa thabišego ao mofsa a ka lebeletšanago le ona ge e ba a swanetšwe ke go dula ­kgole le gae. Tlwaetšo ye, gotee le bohlale bjoo ba bo neilwego ke Modimo, e tla ‘nea mo-hloka-tsebo maano gomme ya nea lesogana tsebo le kelelo.’​—Diema 1:⁠4.

Batswadi bao ba tsenyago ditekanyetšo tša go boifa Modimo le melao ya motheo ya boitshwaro ka dipelong tša bana ba bona ba ba dira gore ba kgone go lebeletšana ka katlego le ditlhohlo tša bophelo. Thuto ya lapa ya ka mehla ya Beibele, go boledišana ka bolokologi le go kgahlegela e le ka kgonthe bophelo bjo bobotse bja bana ba bona, di ka ba le tutuetšo tabeng ya ge e ba go ba le katlego goba go palelwa. Batswadi ba swanetše go nea tlwaetšo ya go boifa Modimo ka tsela e leka-lekanego eupša e le e nepagetšego le e kwagalago, e le go hlama bana ba bona gore ba kgone go ikemela ka morago bophelong. Ka mohlala wa bona ka noši, batswadi ba ka ruta bana ba bona gore go a kgonega go ba lefaseng eupša wa se be karolo ya lona.​—Johane 17:​15, 16.

Bafsa ba bangwe ba Bakriste ba ile ba swanela ke go tloga magaeng a gabo bona

Ka go ganetša diteko, bafsa ba ka ekiša Josefa gomme ba dula ba hlwekile boitshwarong

Ekišang mosetsana wa lethopša wa mo-Isiraele, yo a ilego a diriša leleme la gagwe go tlišetša Jehofa letago