Dipotšišo tše Tšwago go Babadi

Jehofa o be a bolela ka mang ge a be a re “e mongwê wa rena” go Genesi 3:⁠22?

Go bonagala Jehofa Modimo a be a bolela ka yena le Morwa wa gagwe yo a tswetšwego a nnoši ge a be a re: “Motho ó bile byalo ka e mongwê wa rena, a tseba botse le bobe.” (Genesi 3:​22) Anke re ahla-ahleng lebaka.

Jehofa o boletše mantšu a ka morago ga go tsebatša kahlolo go banyalani ba pele ba batho. Ba bangwe ba kwešišitše polelwana “e mongwê wa rena” e le go dirišwa ga bontši ka tsela ya go hlompha go swana le ge Kgoši yeo e lego motho e ka bolela gore “re manyami” mola e šupa go yona e nnoši. Lega go le bjalo, mabapi le Genesi 1:​26 le 3:​22, seithuti sa Beibele Donald E. Gowan se re: “Ga go na bohlatse ka [Testamenteng ya Kgale] bjoo bo hlatselago ditlhaloso tše dintši tšeo di šišintšwego tše bjalo ka: lentšu la bontši ‘re’ leo le bonagatšago tlhompho . . . goba ponagatšo ya batho ba bantši go Modimo wa Boraro botee. . . . Ga go le e tee ya ditlhaloso tše yeo e kwagalago go Genesi 3:​22, yeo e bolelago ka ‘e mongwê wa rena.’”

Na Jehofa a ka ba a be a bolela ka Sathane Diabolo, yo a bego a thomile go ikgethela “botse le bobe” le yoo a ilego a tutueletša batho ba pele gore ba dire se se swanago? Seo ga se kwagale. Mo Jehofa o dirišitše polelwana “e mongwê wa rena.” (Mongwalo o sekamego ke wa rena.) Sathane o be a se sa hlwa a le gare ga lešaba la barongwa ba botegago ba Jehofa, ka gona o be a ka se ke a akaretšwa le bao ba bego ba le ka lehlakoreng la Jehofa.

Na Modimo o be a bolela ka barongwa ba botegago? Re ka se bolele ka go tia gore go bjalo. Lega go le bjalo, go swana ga dipolelwana tšeo di lego go Genesi 1:​26 le 3:​22 go re hlabišetša seetša. Go Genesi 1:​26, re bala gore Jehofa o itše: “A re direng motho ka xo swanthša ka rena, a swanê le rena.” (Mongwalo o sekamego ke wa rena.) O be a lebišitše mantšu a go mang? Ge a bolela ka sebopiwa sa moya seo se ilego sa fetoga motho yo a phethagetšego e lego Jesu, moapostola Paulo o itše: “Ké Yêna seswanthšô sa Modimo e a sa bonwexo, tháka-letswálô yá dibopya tšohle. Ka xobane tšohle tša kwa maxodimong le mo ’faseng di hlodilwe ka Yêna.” (Ba-Kolose 1:​15, 16) Ee, go bonagala e le mo go kwagalago gore go Genesi 1:​26, Jehofa o be a bolela le Morwa wa gagwe yo a tswetšwego a nnoši, e lego “mošomedi yo a nago le bokgoni,” yo a bego a le kgaufsi le yena nakong ya ge go hlolwa magodimo le lefase. (Diema 8:​22-31, NW) Go swana ga yona le polelwana yeo e lego go Genesi 3:​22 go bontšha gore mo le gona Jehofa o be a bolela le motho yo a lego kgaufsi-ufsi le yena, e lego Morwa wa gagwe yo a tswetšwego a nnoši.

Go bonagala Morwa wa Modimo yo a tswetšwego a nnoši a be a e-⁠na le tsebo ya “botse le bobe.” Tswalanong ya gagwe ya nako e telele le ya kgaufsi-ufsi le Jehofa, o ile a tloga a ithuta gabotse tsela ya Tatagwe ya go nagana, melao ya gagwe ya motheo le ditekanyetšo tša gagwe. A kgodišegile gore Morwa wa gagwe o tlwaelane le dilo tše le go di botegela, mohlomongwe Jehofa a ka ba a ile a mo nea tokologo ya go rarolla ditaba ka ntle le gore a kgopele tumelelo ya Tatagwe boemong bjo bongwe le bjo bongwe. Ka gona go fihla bokgoleng bjo, Morwa a ka ba a be a e-⁠na le bokgoni le tumelelo ya go hlaola se sebotse le se sebe. Lega go le bjalo, ka go fapana le Sathane, Adama le Efa, ga se a ka a bea tekanyetšo ya se sebotse le se sebe yeo e bego e sa dumelelane le ya Jehofa.