Go Dira Diphetho ke Tlhohlo e sa Phemegego

NAPOLEON BONAPARTE, yoo e bego e le mmušiši wa Fora lekgolong la bo-19 la nywaga, ka nako e nngwe o ile a bolela gore: “Ga go na selo se thata le seo e lego sa bohlokwa kudu go swana le go kgona go dira phetho.” O ka dumelelana le maemo a ka bobedi, ka ge batho ka kakaretšo ba lebelela go laola maphelo a bona ka noši e le ga bohlokwa. Ka nako e swanago, ba ithutile gore ka dinako tše dingwe go dira diphetho ke selo se thata kudu.

Go sa šetšwe gore go bonolo goba go thata, go dira diphetho ga go phemege. Re lebeletšana le tlhohlo ye letšatšing le lengwe le le lengwe. Ka morago ga go tsoga mesong, re swanetše go dira phetho ya gore re tla apara eng, re tla fihlola ka eng le gore re swanetše go lebeletšana bjang le dilo tše dingwe mosegare. Bontši bja diphetho tše ga se tša bohlokwa. Ga se gantši re naganišišago ka tšona. Ke ka sewelo re hloregago boroko ka gobane re naganišiša ge e ba e be e le tša bohlale goba go se bjalo.

Ka lehlakoreng le lengwe, diphetho tše dingwe ke tše dikgolo kudu. Bafsa ba bantši lefaseng la lehono ba swanetše go dira phetho ya gore ba nyaka go phegelela dipakane dife. Ba ka swanela ke go dira phetho ya gore ba nyaka go ithutela eng le gore ka nako e kaakang. Mafelelong ba bantši ba bona ba tla dira phetho ya ge e ba ba nyaka go ba lenyalong goba ba nyaka go tšwela pele ba se lenyalong. Bao ba kgethago go ba lenyalong ba swanetše go dira phetho ya gore: ‘Na ke yo a godilego ka mo go lekanego le yo a gotšego ka tsebo go ka tsena lenyalong? Ke molekane wa mohuta ofe yo a nkgahlago, goba sa bohlokwa le go feta, ke molekane wa mohuta ofe yo ke mo ratago?’ Go kgetha molekane go re kgoma kudu go feta diphetho tše sego kae tšeo re di dirago bophelong.

Ditabeng tšeo e lego tša bohlokwa kudu, ke ga bohlokwa go dira diphetho tše bohlale, ka ge lethabo la rena le ithekgile kudu ka seo. Batho ba bangwe ba ka nagana gore ba na le bokgoni bja go dira diphetho tše di bjalo gomme mohlomongwe ba ka gana go amogela thušo ge e newa. Na seo se bontšha bohlale? Anke re boneng.

Napoleon: From the book The Pictorial History of the World