“Le se kê la ba ba xo Ikxokêla Jokong e Šele”

BJALO ka ge o ka bona mo, kamela le pholo tše di lemago mmogo di lebelelega di sa iketla. Joko yeo e di kopantšego gammogo​—yeo e diretšwego diphoofolo tše pedi tša go lekana ka bogolo le matla​—e dira gore ka bobedi di kwe bohloko. A tshwenyegile ka bophelo bjo bobotse bja diphoofolo tše bjalo tšeo di gogago merwalo, Modimo o ile a botša ba-Isiraele gore: “O se kê wa tlêma pholo le pôkôlô xotee wa lema ka tšôna.” (Doiteronomio 22:​10) Molao wa motheo o swanago o be o tla šoma le go pholo le kamela.

Ka mo go tlwaelegilego, molemi a ka se rweše diphoofolo tša gagwe boima bjo bo bjalo. Eupša ge a be a se na dipholo tše pedi, o be a ka pana diphoofolo tšeo a bego a na le tšona. Ka mo go swanago, se ke seo molemi wa lekgolong la bo-19 la nywaga mo seswantšhong a ilego a phetha ka go se dira. Ka baka la go fapana ka bogolo le boima, phoofolo e fokolago e tla swanela ke go goga ka kgara gore e gate ka mošito o tee le e nngwe, gomme e matla e tla rwala boima bjo bogolo.

Moapostola Paulo o dirišitše seswantšho sa joko e sa leka-lekanego go re ruta thuto ya bohlokwa. O ngwadile gore: “Le se kê la ba ba xo ikxokêla jokong e šele ya ba ba sa dumelexo; tokô e ka amana bya’ng le bokxôpô? Seetša se ka amana bya’ng le lefsifsi?” (2 Ba-Korinthe 6:​14) Mokriste a ka ikgokela jokong e sa leka-lekanego bjang?

Tsela e nngwe ke ka gore Mokriste a kgethe molekane wa lenyalo yo e sego wa bodumedi bja gagwe. Kopano e bjalo e tla ba ya go se iketle go bona ka bobedi, gwa ba le go se dumelelane ditabeng tša bohlokwa.

Ge Jehofa a be a thea lenyalo, o ile a nea mosadi karolo ya go ba “motlatši” goba “modirišani.” (Genesi 2:​18, NW) Ka mo go swanago, ka moporofeta Maleaki, Modimo o ile a bolela ka mosadi e le “molekane.” (Maleaki 2:​14, NW) Mmopi wa rena o nyaka gore banyalani ba šome ka go dumelelana ka tsela e tee ya moya, ba rwadišane merwalo le go buna moputso ka go lekana.

Ka go nyala “feela Moreneng,” Mokriste o bontšha tlhompho tayong ya Tatago rena wa legodimong. (1 Ba-Korinthe 7:​39, NW) Se se thea motheo bakeng sa lenyalo le le kopanego, le le ka tlišago theto le tlhompho go Modimo ge bobedi banyalani ba mo hlankela e le ‘badirišani ba makgonthe’ ka tsela e kgethegilego.​—Ba-Filipi 4:⁠3.

Camel and ox: From the book La Tierra Santa, Volume 1, 1830

NA O TLA AMOGELA KETELO?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org