Basadi ba Botegago ba Bakriste—Barapedi ba Bohlokwa Kudu ba Modimo
Basadi ba Botegago ba Bakriste—Barapedi ba Bohlokwa Kudu ba Modimo
“Botsôrô bo a fora, le botse ké lefêla; mosadi xo rêtwa mo-šia-Morêna.”—Diema 31:30.
1. Pono ya Jehofa ka botse e bapetšwa bjang le ya lefase?
LEFASE le gatelela kudu ponagalo ya ka ntle, kudu-kudu go basadi. Lega go le bjalo, Jehofa o kgomegile kudu ka motho wa ka gare, yoo a ka bago botse kudu ge motho a dutše a tšofala. (Diema 16:31) Ka baka leo, Beibele e kgothaletša basadi gore: “A ba lemoxê xore bothšepi bya lena xa se byoo bya ntlê bya xo loxa meriri le xo apara tša xauta le bothakxa bya mašela, Bothšepi e le motho wa xo ikuta wa pelong, bothšepi byo bo sa ônalexo bya môya wa bolêta le leaxô. Ké tšôna tše Modimo a bônaxo è le tše bohlôkwa.”—1 Petro 3:3, 4.
2, 3. Basadi ba ile ba kgatha tema bjang go tšwetšeng pele ditaba tše dibotse lekgolong la pele la nywaga, gomme se se ile sa bolelwa bjang e sa le pele?
2 Moya o bjalo o rategago o ile wa bontšhwa ke basadi ba bantši bao go boletšwego ka bona ka Beibeleng. Ba bangwe ba ba ba bile le tokelo ya go hlankela Jesu le baapostola ba gagwe lekgolong la pele la nywaga. (Luka 8:1-3) Ka morago, basadi ba Bakriste ba ile ba ba baebangedi ba mafolofolo; ba bangwe ba ile ba thekga ka mo go holago banna ba Bakriste bao ba bego ba etelela pele, go akaretša le moapostola Paulo; gomme ba bangwe ba ile ba bontšha go amogela baeng ka tsela e kgethegilego, gaešita le go bula magae a bona bakeng sa diboka tša phuthego.
3 Go ile gwa bolelwa e sa le pele ka Mangwalong gore Jehofa o tla diriša basadi ka tsela e kgolo go phethagatšeng morero wa gagwe. Ka mohlala, Joele 2:28, 29 e ile ya bolela e sa le pele gore banna le basadi, ba banyenyane le ba bagolo ba tla amogela moya o mokgethwa gomme ba tšea karolo go phatlalatšeng ditaba tše dibotse tša Mmušo. Boporofeta bjoo bo ile bja thoma go phethagatšwa ka Pentekoste ya 33 C.E. (Ditiro 2:1-4, 16-18) Basadi ba bangwe bao ba tloditšwego ka moya ba ile ba newa dimpho tša mohlolo, tše bjalo ka mpho ya go porofeta. (Ditiro 21:8, 9) Ka phišego ya bona bodireding, bahlabani ba ba bantši ba moya ba dikgaetšedi tše di botegago ba kgathile tema go phatlalaleng ka lebelo ga Bokriste lekgolong la pele la nywaga. Ge e le gabotse, mo e ka bago ka 60 C.E., moapostola Paulo o ngwadile gore ditaba tše dibotse di be di ‘anegetšwe babopša bohle ba tlase ga legodimo.’—Ba-Kolose 1:23.
Ba Ile ba Retwa ka Baka la go ba ga Bona le Sebete, Phišego le go Amogela Baeng
4. Ke ka baka la’ng Paulo a be a e-na le lebaka le le kwagalago la go reta basadi ba mmalwa phuthegong ya Bokriste ya lekgolong la pele la nywaga?
4 Ka mohlala, moapostola Paulo o be a leboga bodiredi bjo bo bego bo dirwa ke basadi ba itšego—bjalo ka ge balebeledi ba Bakriste lehono ba tšeela godimo bodiredi bja basadi ba mafolofolo. Gare ga basadi bao Paulo a ba boletšego ka maina e bile “Terefina le Terifosa [basadi, NW] ba ba itapišeditšexo Morêna,” le “Peresi moratexi e a itapišeditšexo Morêna xa-xolo.” (Ba-Roma 16:12) Paulo o ngwadile gore Ebodia le Sintike ba be ba ‘ema le yena ba mo thuša modirong wa ebangedi.’ (Ba-Filipi 4:2, 3) Perisila gotee le monna wa gagwe Akwila le bona ba ile ba hlankela gotee le Paulo. Yena le Akwila ba ile ba ba ba “neêla dihlôxô tša bôná” bakeng sa Paulo, ka go dira bjalo ba mo tutueletša go ngwala gore: “Xa se ba xo leboxwa ke nna fêla; ba leboxwa ke diphuthêxô tšohle tša ba-ntlê.”—Ba-Roma 16:3, 4; Ditiro 18:2.
5, 6. Ke ka ditsela dife Perisila a ilego a bea mohlala o mobotse bakeng sa dikgaetšedi lehono?
5 Ke’ng seo se ilego sa tlaleletša go beng le mafolofolo le sebete ga Perisila? Pego yeo e lego go Ditiro 18:24-26 e re hlabišetša seetša, moo re balago gore o ile a thekga monna wa gagwe go thušeng Apollo, sekgwari polelong, gore a be le tsebišo e lego nakong ka therešo yeo e utollotšwego. Ka gona, go molaleng gore Perisila e be e le morutwana yo mafolofolo wa Lentšu la Modimo le wa dithuto tša baapostola. Ka baka leo, o ile a hlagolela dika tšeo di ilego tša mo dira yo bohlokwa go Modimo le go monna wa gagwe gotee le go ba setho se bohlokwa sa phuthego ya mathomong. Bao ba lego bohlokwa ka mo go swanago ke dikgaetšedi tše dintši tša Bakriste tšeo di šomago ka thata lehono, tšeo di ithutago Beibele ka mo go tseneletšego le go iphepa ka dijo tša moya tšeo Jehofa a di neago ka “molaki e a bôtêxaxo yo bohlale.”—Luka 12:42.
6 Akwila le Perisila ba be ba amogela baeng ka tsela e kgethegilego. Paulo o ile a dula legaeng la bona ge a be a šoma le bona kgwebong ya bona ya go dira ditente kua Korinthe. (Ditiro 18:1-3) Ge banyalani ba ba be ba hudugela Efeso gomme ka morago ba e-ya Roma, ba ile ba tšwela pele go bontšha go amogela baeng ga Bokriste, gaešita le go bula legae la bona bakeng sa diboka tša phuthego. (Ditiro 18:18, 19; 1 Ba-Korinthe 16:8, 19) Nimfa le Maria mmago Johane Mareka le bona ba ile ba bula magae a bona bakeng sa diboka tša phuthego.—Ditiro 12:12; Ba-Kolose 4:15.
Ke ba Bohlokwa Kudu Lehono
7, 8. Ke pego efe e retegago ya tirelo e kgethwa yeo basadi ba bantši ba Bakriste ba mehleng yeno ba nago le yona, gomme ba ka kgonthišega ka eng?
7 Ka go swana le lekgolong la pele la nywaga, lehono basadi ba botegago ba Bakriste ba kgatha tema e bohlokwa go phethagatšweng ga morero wa Modimo, kudu-kudu modirong wa boebangedi. Le gona dikgaetšedi tše di na le pego e botse gakaakang! Ela hloko mohlala wa Gwen, yo a ilego a hlankela Jehofa ka mafolofolo ka nywaga ya ka godimo ga e 50 go fihlela lehung la gagwe ka 2002. Monna wa gagwe o re: “Phišego ya Gwen e le moebangedi e be e tsebja motseng wa gabo rena. Go ya ka yena, motho yo mongwe le yo mongwe e be e le yo a ka amogelago lerato la Jehofa le dikholofetšo tša gagwe. Go botegela ga gagwe Modimo ka go se kwanantšhe, mokgatlo wa gagwe le lapa la rena—re sa bolele ka kgothatšo ya gagwe e lerato ge re be re nyamile—e bile thekgo e kgolo go nna le go bana ba rena bophelong bja rena ka moka bjo bo putsago re le gotee. Re mo hlologela kudu.” Gwen le monna wa gagwe ba be ba nyalane ka nywaga e 61.
8 Basadi ba Bakriste ba dikete tše masome, ba sa nyalwago le bao ba nyetšwego, ba hlankela e le badiredi ba babulamadibogo le baromiwa, ba kgotsofetše ka dinyakwa tša motheo tša bophelo ge ba dutše ba phatlalatša molaetša wa Mmušo ditšhemong tša go tloga go tša metseng ya leema-ema go ya ditikologong tšeo di lego lekatana. (Ditiro 1:8) Ba bantši ba beetše ka thoko taba ya go ba le magae a bona goba go ba le bana e le gore ba hlankele Jehofa ka mo go tletšego. Go na le bao ba thekgago ka potego banna ba bona bao ba hlankelago e le balebeledi ba basepedi, gomme dikgaetšedi tše dikete di hlankela magaeng a Bethele lefaseng ka bophara. Ka ntle le pelaelo, basadi ba ba ikgafilego ba gare ga “matsaka a dithšaba ka moka” ao a tlatšago ngwako wa Jehofa ka letago.—Hagai 2:7.
9, 10. Ditho tše dingwe tša lapa di ile tša bontšha bjang go leboga mohlala o mobotse wo o beilwego ke basadi ba Bakriste le bo-mma?
9 Go ba gona, basadi ba bantši ba Bakriste ba na le boikarabelo bja lapa bjoo ba swanetšego go bo hlokomela; lega go le bjalo, ba etiša dikgahlego tša Mmušo pele. (Mateo 6:33) Kgaetšedi yo a sa nyalwago wa Mokriste o ngwadile gore: “Ka baka la tumelo ya gagwe e sa šišinyegego le mohlala o mobotse, mma o kgathile tema e bohlokwa go beng ga-ka mmulamadibogo wa ka mehla. Ge e le gabotse, e be e le yo mongwe wa badirišani-gotee le nna ba ba kaone ba babulamadibogo.” Monna o bolela ka mosadi wa gagwe yo e lego mmago banenyana ba bahlano ba ba godilego gore: “Legae la rena le be le dula le hlwekile gomme le phuthilwe gabotse. Bonnie o be a le boloka le le gabotse gomme le sa hlaka-hlakana e le gore lapa la rena le ka lebiša tlhokomelo medirong ya moya. Go tšea ga gagwe karolo ka go hlokomela tirišo ya rena ya ditšhelete ka kelohloko go dirile gore ke kgone go šoma ka nakwana ka nywaga e 32, gwa dira gore ke kgone go neela nako e oketšegilego lapeng la rena le ditabeng tša moya. Le gona mosadi wa-ka o ile a ruta bana bohlokwa bja go šoma ka thata. O swanetšwe ke gore ke mo rete.” Lehono bobedi mosadi yo le monna wa gagwe ba hlankela ntlong-kgolo ya lefase ya Dihlatse tša Jehofa.
10 Monna o ngwala mabapi le mosadi wa gagwe yo e lego mmago bana ba ba godilego gore: “Dika tše ke di ratago kudu go Susan ke lerato la gagwe le le tseneletšego la go rata Modimo le batho gotee le kwešišo, kwelobohloko le potego ya gagwe. Ka mehla o be a nagana gore Jehofa o swanelwa ke se se kaone kudu seo re ka mo neago—molao wa motheo woo a o dirišago go yena ka noši e le mohlanka wa Modimo e bile e le mma.” Ka thekgo ya mosadi wa gagwe, monna yo o kgonne go amogela ditokelo tše mmalwa tša moya, go akaretša go hlankela e le mogolo, mmulamadibogo, moemedi wa molebeledi wa tikologo le setho sa Komiti ya go Hloma Kwano le Sepetlele. Basadi ba bjalo ba bohlokwa kudu gakaakang go banna ba bona, go Bakriste-gotee le bona gomme ka godimo ga bohle, go Jehofa!—Diema 31:28, 30.
Basadi ba Bohlokwa Kudu ba ba se Nago Banna
11. (a) Jehofa o utollotše bjang go tshwenyega ga gagwe ka basadi ba botegago, kudu-kudu bahlologadi? (b) Bahlologadi ba Bakriste le dikgaetšedi tše dingwe tše di botegago tšeo di se nago banna di ka kgonthišega ka eng?
11 Gantši Jehofa o ile a bontšha go tshwenyega ga gagwe ka katlego ya bahlologadi. (Doiteronomio 27:19; Psalme 68:5; Jesaya 10:1, 2) Ga se a fetoga. O tšwela pele go tshwenyega ka mo go tseneletšego e sego feela ka bahlologadi eupša gape le ka bo-mma ba ba se nago balekane gotee le ka basadi bao ba ikgethetšego go se nyalwe goba bao ba sa hwetšago banna ba ba swanetšego ba Bakriste. (Maleaki 3:6; Jakobo 1:27) Ge e ba o le gare ga bao ba hlankelago Jehofa ka potego ba se na thekgo ya molekane wa Mokriste, o ka kgonthišega gore o bohlokwa kudu mahlong a Modimo.
12. (a) Dikgaetšedi tše dingwe tša Bakriste di bontšha bjang go botegela Jehofa ka go se kwanantšhe? (b) Tše dingwe tša dikgaetšedi tša rena di lebeletšane le maikwelo afe?
12 Ka mohlala, ela hloko dikgaetšedi tša rena tša Bakriste tše di sa nyalwago ka baka la ge di e-kwa ka potego keletšo ya Jehofa ya go nyala “feela Moreneng.” (1 Ba-Korinthe 7:39, NW; Diema 3:1) Lentšu la Modimo le di kgonthišetša gore: “Yo botho [Jehofa] O mo kwiša botho.” (2 Samuele 22:26) Lega go le bjalo, go tše dintši tša tšona, go dula di sa nyalwa ke tlhohlo. Kgaetšedi yo mongwe o re: “Ke ikemišeditše go nyalwa feela Moreneng, eupša ke llile gantši ge ke dutše ke lebeletše bagwera ba-ka ba nyalwa ke banna ba kgahlišago ba Bakriste, mola nna ke tšwela pele ke nnoši.” Kgaetšedi yo mongwe o re: “Ke hlanketše Jehofa ka nywaga e 25. Ke ikemišeditše go dula ke mmotegela ka go se kwanantšhe, eupša gantši ke nyamišwa ke maikwelo a bodutu.” O oketša ka gore: “Dikgaetšedi tše di swanago le nna di nyaka kgothatšo.” Re ka thuša bjang dikgaetšedi tše bjalo tše di botegago ka go se kwanantšhe?
13. (a) Re ithuta’ng mohlaleng wo o beilwego ke bao ba ilego ba etela morwedi wa Jafeta? (b) Ke ka ditsela dife tše di oketšegilego tšeo ka tšona re ka bontšhago go tshwenyega ka dikgaetšedi tše di sa nyalwago ka phuthegong ya gabo rena?
13 Tsela e nngwe e bonwa mohlaleng wa bogologolo. Ge morwedi wa Jafeta a be a tlogela sebaka sa gagwe sa go ba le monna, batho ba ile ba lemoga gore o be a ikgafa. Go ile gwa dirwa’ng bakeng sa go mo kgothatša? “Ka ngwaxa o mongwe le o mongwê basetsana ba Isiraele ba ya ba fetša matšatši a manê ba tlotla morwedi wa Jefeta monna wa xa Gileada.” (Baahlodi 11:30-40, mongwalo o sekamego ke wa rena.) Ka mo go swanago, re swanetše go reta ka go tšwa pelong dikgaetšedi tše di sa nyalwago tšeo di kwago molao wa Modimo ka potego. * Ke ka tsela efe e nngwe yeo ka yona re ka bontšhago go ba ga rena le taba? Re swanetše go lopa Jehofa dithapelong tša rena gore a thekge dikgaetšedi tše bjalo tše rategago le tše di botegago gore di tšwele pele tirelong ya tšona ka potego e sa kwanantšhego. Di swanetše go kgonthišetšwa gore Jehofa le phuthego ka moka ya Bokriste ba di rata ka tsela e borutho le gore ba di tšeela godimo kudu.—Psalme 37:28.
^ ser. 13 Bona Morokami wa March 15, 2002, matlakala 26-8 bakeng sa kamoo theto e bjalo e ka newago ka gona.
Kamoo Batswadi ba ba se Nago Balekane ba Atlegago ka Gona
14, 15. (a) Ke ka baka la’ng Bakriste bao e lego bo-mma ba ba se nago balekane ba kgopela Jehofa thušo? (b) Batswadi ba ba se nago balekane ba ka dira dilo bjang ka go dumelelana le dithapelo tša bona?
14 Basadi ba Bakriste bao e lego batswadi ba ba se nago balekane le bona ba lebeletšana le ditlhohlo tše mmalwa. Lega go le bjalo, ba ka retologela go Jehofa bakeng sa thušo ya go godiša bana ba bona ka go dumelelana le melao ya motheo ya Beibele. Ke therešo gore ge e ba o le motswadi yo a se nago molekane, o ka se be bobedi mma le tate ka dibopego ka moka. Lega go le bjalo, Jehofa o tla go thuša go hlokomela boikarabelo bja gago bjo bogolo ge e ba o mo kgopela ka tumelo. Ka mohlala: “Nagana o swere mokotla o boima wa korosari wo o swanetšego go o iša legaeng la gago. Na o be o tla hlaka ka gore o sepele lebaka le letelele ka maoto ge e ba o be o ka hwetša senamelwa kgaufsi? Ga go bjalo le gatee!” Ka mo go swanago, o se ke wa leka go rwala merwalo e boima ya maikwelo o nnoši mola o ka kgopela Jehofa gore a go thuše. Ge e le gabotse, o go laletša gore o mo kgopele thušo. Psalme 68:19 e re: “A xo rêtwê Morena Modimo, ó re rwala ka mehla.” (Mongwalo o sekamego ke wa rena.) Ka mo go swanago, 1 Petro 5:7 e go laletša go lahlela dipelaelo tša gago ka moka go Jehofa “xobane ké Yêna a [go] belaêlêlaxo.” Ka gona ge o imelwa ke mathata le dipelaelo, di tšhollele go Tatago wa legodimong, o dira bjalo ‘ka go se kgaotše.’—1 Ba-Thesalonika 5:17; Psalme 18:6; 55:22.
15 Ka mohlala, ge e ba o le mma, ka ntle le pelaelo o tshwenyegile ka tutuetšo yeo dithaka di ka bago le yona baneng ba gago sekolong goba diteko tša potego tšeo ba ka lebeletšanago le tšona. (1 Ba-Korinthe 15:33) Tše ke dilo tše di kwagalago gore o ka tshwenyega ka tšona. Eupša le gona ke ditaba tše o ka di rapelelago. Ge e le gabotse, ke ka baka la’ng o sa rapele mabapi le dilo tše bjalo le bana ba gago pele ba e-ya sekolong, mohlomongwe ka morago ga go hlahloba temana ya letšatši le le gotee? Dithapelo tše di tšwago pelong le tše di lebanyago di ka ba le tutuetšo e matla menaganong ya bana ba gago. Go feta tšohle, o laletša ditšhegofatšo tša Jehofa ge ka go se fele pelo o katanela go tsenya Lentšu la gagwe ka dipelong tša bana ba gago. (Doiteronomio 6:6, 7; Diema 22:6) Gopola gore, “mahlô a Morêna a bôna baloki; ’tsêbê tša xaxwe di kwa xe ba lla.”—1 Petro 3:12; Ba-Filipi 4:6, 7.
16, 17. (a) Ke’ng seo morwa yo mongwe a ilego a se bolela mabapi le lerato leo le bontšhitšwego ke mmagwe? (b) Boemo bja kgopolo bja moya bja mma yo mongwe bo ile bja kgoma bjang bana ba gagwe?
16 Ela hloko mohlala wa Olivia, mmago bana ba tshela. Monna wa gagwe yo a sa dumelego o ile a lahla lapa kapejana ka morago ga go belegwa ga ngwana wa mafelelo, eupša ka boikemišetšo o ile a rwala boikarabelo bja go tlwaetša bana ba gagwe ditseleng tša Modimo. Morwa wa Olivia e lego Darren, yoo ga bjale a nago le nywaga e 31 gomme a hlankelago e le mogolo wa Mokriste e bile e le mmulamadibogo, o be a e-na le nywaga e mehlano ka nako yeo. Go tlaleletša dipelaelong tša Olivia, Darren o ile a ba le bothata bjo bogolo bja tša maphelo bjoo bo sa dutšego bo mo tshwenya. Ge a gopola ka nywaga ya bjaneng bja gagwe, Darren o ngwala gore: “Ke sa dutše ke gopola ke dutše malaong a-ka a sepetlele ke letetše mma ka phišego. O be a tla dula kgaufsi le nna gomme a mpalela Beibele letšatši le lengwe le le lengwe. Ke moka o be a tla opela kopelo ya Mmušo e rego ‘Re a go Leboga, Jehofa.’ * Go fihlela le lehono, yeo ke kopelo ya-ka ya mmamoratwa.”
^ ser. 16 Kopelo 212 ka kopelong ya Opelelang Jehofa Ditumišo yeo e gatišitšwego ke Dihlatse tša Jehofa.
17 Go bota ga Olivia Jehofa le go mo rata go ile gwa mo dira mma yo a atlegilego yo a se nago molekane. (Diema 3:5, 6) Boemo bja gagwe bjo bobotse bja kgopolo bo ile bja bonagala dipakaneng tše a ilego a di beela bana ba gagwe. Darren o re: “Ka mehla mma o be a re kgothaletša go phegelela pakane ya bodiredi bja nako e tletšego. Ka baka leo, nna gotee le dikgaetšedi tša-ka tše nne re tsenetše bodiredi bja nako e tletšego. Lega go le bjalo, le ka mohla mma ga se a ka a ikgantšha ka dilo tše bathong ba bangwe. Ke leka ka matla go ekiša dika tša gagwe tše di kgahlišago.” Ke therešo gore ga se bana ka moka bao ba golago gomme ba hlankela Modimo go swana le ba Olivia. Eupša ge mma a dira se a ka se kgonago go phela ka go dumelelana le melao ya motheo ya Beibele, a ka kgonthišega gore o tla hwetša tlhahlo ya Jehofa le thekgo ya gagwe e lerato.—Psalme 32:8.
18. Re ka bontšha bjang gore re tšeela godimo tokišetšo ya Jehofa ya phuthego ya Bokriste?
18 Thekgo e kgolo ya Modimo e newa ka phuthego ya Bokriste, ka lenaneo la yona la ka mehla la go fepa la moya, borwarre bja yona bja Bokriste le ka ‘dimpho tša yona tšeo e lego banna’ bao ba godilego tsebong. (Ba-Efeso 4:8, bapiša le NW.) Bagolo ba botegago ba šoma ka thata go aga bohle ka phuthegong, ba nea tlhokomelo e kgethegilego go dinyakwa tša “dišuana le bahlôlôxadi mahlokong a bôná.” (Jakobo 1:27) Ka gona dula o le kgaufsi le batho ba Modimo, le ka mohla o se ke wa ipea lekatana.—Diema 18:1; Ba-Roma 14:7.
Seka se se Kgahlišago sa Boikokobetšo
19. Ke ka baka la’ng go ikokobetša ga mosadi go sa bolele go nyatšega, gomme ke mehlala efe ya Beibele yeo e thekgago se?
19 Jehofa o bopile mosadi e le motlatši wa monna. (Genesi 2:18) Lega go le bjalo, go ikokobeletša ga mosadi monna wa gagwe ga go bolele go nyatšega le gatee. Go e na le moo, go nea mosadi seriti, go mo dumelela go diriša dimpho tša gagwe tše dintši le ditalente ka go dumelelana le thato ya Modimo. Diema kgaolo 31 e hlalosa mediro e fapa-fapanego ya mosadi yo a nago le bokgoni wa Isiraeleng ya bogologolo. O be a thuša bahloki, a bjala dirapa tša merara le go reka naga. Ee, “pelo ya mong wa xaxwe e dula è mmotile; monna wa xaxwe [o be a sa] hloke thuô.”—Ditemana 11, 16, 20.
20. (a) Mosadi wa Mokriste o swanetše go lebelela bjang bokgoni bja gagwe goba dimpho tše a di neilwego ke Modimo? (b) Ke dika dife tše dibotse tšeo Esitere a di bontšhitšego, gomme ka baka la seo, Jehofa o ile a kgona go mo diriša bjang?
20 Mosadi yo a ipoeditšego, yo a boifago Modimo ga a ikgodiše ka boikgantšho goba go phadišana le monna wa gagwe. (Diema 16:18, PK) Ga a phegelele go ikgotsofatša kudu-kudu ka go phegelela mediro ya boiphedišo eupša o diriša dimpho tša gagwe tše a di neilwego ke Modimo e le gore a hlankele ba bangwe—lapa la gagwe, Bakriste-gotee le yena, baagišani gomme ka godimo ga bohle, Jehofa. (Ba-Galatia 6:10; Tito 2:3-5) Ela hloko mohlala wa ka Beibeleng wa Mohumagadi Esitere. Gaešita le ge e be e le yo mobotse, o be a ipoeditše e bile a ikokobeditše. (Esitere 2:13, 15) Ge a nyetšwe, o ile a bontšha tlhompho e tseneletšego go monna wa gagwe e lego Kgoši Ahasiwerosi, ka go se swane le mosadi wa pele wa kgoši e lego Wasithi. (Esitere 1:10-12; 2:16, 17) Le gona ka tlhompho Esitere o ile a dumelelana le motswala’gwe yo mogolo e lego Morodekai, ditabeng tše di swanetšego—gaešita le ka morago ga ge e bile mohumagadi. Eupša e be e se mofokodi! Ka sebete o ile a pepentšha Hamane, monna yo matla le yo šoro yo a ilego a loga leano la go fediša ba-Juda. Jehofa o ile a diriša Esitere ka tsela e matla e le gore a boloke batho ba gagwe ba phela.—Esitere 3:8–4:17; 7:1-10; 9:13.
21. Ke bjang mosadi wa Mokriste a ka bago bohlokwa kudu go Jehofa?
21 Ka mo go kwagalago, nakong e fetilego le lehono, basadi ba ba boifago Modimo ba bontšhitše boineelo bja bona bjo bo feletšego go Jehofa le borapeding bja gagwe. Ka baka leo, basadi ba ba boifago Modimo ke ba bohlokwa kudu mahlong a Jehofa. Dikgaetšedi tša Bakriste, dumelelang Jehofa go le bopa ka mo go tšwelago pele ka moya wa gagwe gore le be ‘dibja’ tše di rategago, tše ‘di tlo go dirišetšwa modiro o mobotse.’ (2 Timotheo 2:21; Ba-Roma 12:2) Lentšu la Modimo le bolela mabapi le barapedi ba bjalo ba bohlokwa gore: “Mo neeng matšô a diatla tš’axwe; medirô ya xaxwe e rêtwê kxorong.” (Diema 31:31) Anke seo e be sa therešo ka yo mongwe le yo mongwe wa lena.
Na o a Gopola?
• Basadi ba bangwe ba Bakriste ba lekgolong la pele la nywaga ba ile ba itlhatsela bjang ba le bohlokwa kudu mahlong a Jehofa?
• Ke bjang dikgaetšedi tše dintši mehleng ya rena di ilego tša itira tše bohlokwa kudu go Modimo?
• Ke ka ditsela dife Jehofa a thekgago bo-mma le dikgaetšedi tšeo di se nago banna?
• Mosadi a ka bontšha bjang tlhompho e tšwago pelong ya go hlompha thulaganyo ya bohlogo?
[Lepokisi go letlakala 17]
MEHLALA YEO RE KA NAGANIŠIŠAGO KA YONA
Na o ka rata go ela hloko e mengwe ya mehlala e oketšegilego ya basadi ba botegago bao go boletšwego ka bona ka Beibeleng? Ge e ba go le bjalo, hle bala mangwalo a bontšhitšwego ka mo tlase. Ge o dutše o naganišiša ka batho ba fapa-fapanego bao ba lokeleditšwego, leka go lemoga melao ya motheo yeo o ka kgonago go e diriša ka tekanyo e kgolo bophelong bja gago.—Ba-Roma 15:4. ◆ ◆ ◆ Sara: Genesi 12:1, 5; 13:18a, PK; 21:9-12; 1 Petro 3:5, 6. ◆ Mosadi wa seatla se se bulegilego wa mo-Isiraele: Ekisodo 35:5, 22, 25, 26; 36:3-7; Luka 21:1-4.
◆ Debora: Baahlodi 4:1–5:31.
◆ Ruthe: Ruthe 1:4, 5, 16, 17; 2:2, 3, 11-13; 4:15.
◆ Mosadi wa Sunema: 2 Dikxoši 4:8-37.
◆ Mosadi wa mo-Kanana: Mateo 15:22-28.
◆ Mareta le Maria: Mareka 14:3-9; Luka 10:38-42; Johane 11:17-29; 12:1-8.
◆ Thabitha: Ditiro 9:36-41.
◆ Barwedi ba bane ba Filipi: Ditiro 21:9.
◆ Foibe: Ba-Roma 16:1, 2.
Na o reta dikgaetšedi tše di sa nyalwago tšeo di kwago molao wa Modimo ka potego e sa kwanantšhego?
Ke dikgopelo dife tše di ka bolelwago ka go lebanya thapelong pele bana ba ka ya sekolong?