Basadi ba ba Ilego ba Thabiša Pelo ya Jehofa

“Morêna a a Xo bušetšê tše O di dirilexo; moputsô o tletšexo O o fiwê ke Morêna.”​—Genesi 2:⁠12.

1, 2. Re ka holega bjang ka go ela hloko mehlala ya ka Beibeleng ya basadi ba ba ilego ba thabiša pelo ya Jehofa?

GO BOIFA Modimo go ile gwa tutueletša basadi ba babedi go nyatša Farao. Tumelo e ile ya tutueletša seotswa go bea bophelo bja sona kotsing e le gore se šireletše dihlodi tše pedi tša ba-Isiraele. Bohlale le boikokobetšo mathateng di ile tša thuša mosadi go phološa maphelo a mantši le go thibela motlotšwa wa Jehofa go ba le molato wa madi. Go ba le tumelo go Jehofa Modimo gotee le moya wa go amogela baeng di ile tša tutueletša mohlologadi yo e lego mma go nea moporofeta wa Modimo dijo tša gagwe tša mafelelo. Ye ke e mengwe ya mehlala e mentši ya ka Mangwalong ya basadi ba ba ilego ba thabiša pelo ya Jehofa.

² Boemo bja Jehofa bja kgopolo ka basadi ba bjalo le ditšhegofatšo tšeo a ilego a ba tšhollela tšona di bontšha gore seo se mo kgahlišago go feta dilo ka moka ke dika tša moya, tšeo di lego bohlokwa kudu go feta bong bja motho. Lefaseng la lehono, leo le swaregilego kudu ka dikganyogo tša nama, go etiša pele boemo bja motho bja moya ke tlhohlo. Eupša tlhohlo yeo e ka fenywa, bjalo ka ge go bontšhitšwe ke basadi ba dimilione ba ba boifago Modimo bao ba bopago karolo e kgolo ya batho ba Modimo lehono. Basadi ba bjalo ba Bakriste ba ekiša tumelo, bohlale, go amogela baeng le dika tše dingwe tše dibotse tše di bontšhitšwego ke basadi ba ba boifago Modimo bao go boletšwego ka bona ka Beibeleng. Ke therešo gore banna ba Bakriste le bona ba rata go ekiša dika tše di bontšhitšwego ke basadi ba bjalo ba ba beilego mohlala ba mehleng ya bogologolo. E le gore re bone kamoo re ka dirago bjalo ka botlalo, anke re ahla-ahleng ka botlalo dipego tša Beibele tša mabapi le basadi ba go boletšwego ka bona mathomong.​—Ba-Roma 15:⁠4; Jakobo 4:⁠8.

Basadi ba ba Ilego ba Nyatša Farao

3, 4. (a) Ke ka baka la’ng Sifira le Pua ba ile ba gana go kwa Farao ge a be a laela gore lesea le lengwe le le lengwe la mošemane la mo-Isiraele le bolawe? (b) Jehofa o ile a putsa bjang babelegiši ba babedi bakeng sa sebete sa bona le go boifa ga bona Modimo?

³ Ba bantši bao ba ilego ba bonwa molato wa polao ya lešaba ditshekong tša Nuremberg, tšeo di bego di swaretšwe kua Jeremane ka morago ga Ntwa ya II ya Lefase, ba ile ba leka go lokafatša melato yeo ba bego ba e dirile ka go bolela gore ba be ba fo latela ditaelo. Bjale bapiša batho ba le babelegiši ba babedi ba ba-Isiraele e lego Sifira le Pua, bao ba phetšego Egipita ya bogologolo nakong ya pušo ya Farao yo a sa bolelwego ka leina eupša yo e bego e le mogateledi. Ka go boifa go oketšega ka lebelo ga badudi ba ba-Hebere, Farao o ile a laela babelegiši ba ba babedi go kgonthišetša gore lesea le lengwe le le lengwe la mošemane la mo-Hebere le a bolawa. Basadi ba ba ile ba arabela bjang taelong yeo e šoro? “Ba se kê ba dira se se boletšwexo ke kxoši ya Egipita, ba lesa bašimanyana ba phela.” (Mongwalo o sekamego ke wa rena.) Ke ka baka la’ng basadi ba ba sa ka ba ineela go boifeng motho? Ka gobane “ba be ba boifa Modimo.”​—Ekisodo 1:​15, 17; Genesi 9:⁠6.

⁴ Ee, babelegiši ba ile ba ithekga ka Jehofa gomme yena o ile a itlhatsela e le “kôtsê” ya bona, a ba šireletša kgalefong ya Farao. (2 Samuele 22:​31; Ekisodo 1:​18-20) Eupša ditšhegofatšo tša Jehofa ga se tša ka tša felela fao. O ile a putsa Sifira le Pua ka gore ba be le malapa a bona. Le gona o ile a hlompha basadi ba ka gore maina a bona le ditiro tša bona di begwe ka Lentšung la gagwe le le buduletšwego e le gore meloko e tlago e kgone  go bala ka bona, mola e le gore leina la Farao ga le sa gopolwa.​—Ekisodo 1:​21; 1 Samuele 2:​30b; Diema 10:⁠7.

5. Basadi ba bantši ba Bakriste lehono ba bontšha bjang boemo bja kgopolo bjo bo swanago le bja Sifira le Pua, gomme Jehofa o tla ba putsa bjang?

⁵ Na lehono go na le basadi ba ba swanago le Sifira le Pua? Ee, ba gona e le ka kgonthe! Ngwaga o mongwe le o mongwe, basadi ba bjalo ba dikete ba bolela molaetša o phološago maphelo wa Beibele ka go se boife dinageng tšeo go tšona “molaô wa kxoši” o thibelago seo, ka go rialo ba bea tokologo ya bona kotsing goba gaešita le maphelo a bona. (Ba-Hebere 11:​23; Ditiro 5:​28, 29) Ba tutuetšwa ke lerato la go rata Modimo le moagišani, basadi ba bjalo bao ba nago le sebete ga ba dumelele motho go ba thibela go boledišana le ba bangwe ka ditaba tše dibotse tša Mmušo wa Modimo. Ka baka leo, basadi ba bantši ba Bakriste ba lwantšhana le kganetšo le tlaišo. (Mareka 12:​30, 31; 13:​9-13) Bjalo ka ge a dirile ka Sifira le Pua, Jehofa o lemoga ka mo go tletšego ditiro tša basadi ba bjalo ba babotse bao ba nago le sebete, gomme o tla bontšha lerato la gagwe la go ba rata ka go boloka maina a bona ka ‘pukung ya gagwe ya bophelo,’ ge feela ba kgotlelela ka potego go fihla bofelong.​—Ba-Filipi 4:⁠3; Mateo 24:⁠13.

Mosadi yo e Bego e le Seotswa o Thabiša Pelo ya Jehofa

6, 7. (a) Rahaba o be a tseba’ng ka Jehofa le ka batho ba gagwe, gomme tsebo ye e ile ya mo kgoma bjang? (b) Lentšu la Modimo le hlompha bjang Rahaba?

⁶ Ka ngwaga wa 1473 B.C.E., seotswa se se bitšwago Rahaba se be se dula go o mongwe wa metse ya Kanana e lego Jeriko. Ka mo go lego molaleng, Rahaba e be e le mosadi yo a nago le tsebišo e tletšego. Ge dihlodi tše pedi tša ba-Isiraele di be di tšhabela ka legaeng la gagwe, o ile a kgona go di laodišetša ditaba ka botlalo mabapi le Khudugo ya ba-Isiraele ya go huduga Egipita ka mohlolo, gaešita le ge seo se be se diragetše nywaga e 40 pejana! Le gona o be a tseba gabotse ka diphenyo tšeo di bego di sa tšwa go direga tša ba-Isiraele tša go fenya Dikgoši tša ba-Amoro e lego Sihoni le Ogo. Ela hloko kamoo tsebo yeo e ilego ya mo kgoma ka gona. O ile a botša dihlodi gore: “Nna ke tseba xobane Morêna o Le neile naxa yé; . . . ka xobane Morêna Modimo wa lena ké Modimo wa kwa xodimo maxodimong, le wa mono fase lefaseng.” (Jošua 2:​1, 9-11) Ee, seo Rahaba a se kwelego ka Jehofa le ka ditiro tša gagwe tšeo a di diretšego Isiraele se ile sa kgoma pelo ya gagwe gomme sa dira gore a be le tumelo go yena.​—Ba-Roma 10:⁠10.

 ⁷ Tumelo ya Rahaba e ile ya mo tutueletša go gata mogato. O ile a amogela dihlodi tša ba-Isiraele “ka khutšo,” gomme o ile a latela ditaelo tša tšona tše di phološago bophelo ge Isiraele e be e hlasela Jeriko. (Ba-Hebere 11:​31; Jošua 2:​18-21) Ga go na pelaelo gore mediro ya Rahaba ya tumelo e ile ya thabiša pelo ya Jehofa, ka gobane o ile a budulela morutiwa wa Mokriste Jakobo go ngwala leina la gagwe kgaufsi le la Aborahama yo e lego mogwera wa Modimo, e le mohlala woo Bakriste ba swanetšego go o ekiša. Jakobo o ngwadile gore: “Le xo Rahaba mosadi yola wa seotswa xo dutše byalo. A xa a ka a lokafala ka modirô xe a amoxêla batseta bála, ’me a ba ngwexiša ka tsela e šele?”​—Jakobo 2:⁠25.

8. Jehofa o ile a putsa Rahaba bjang ka baka la tumelo le go kwa ga gagwe?

⁸ Jehofa o ile a putsa Rahaba ka ditsela tše dintši. Tsela e nngwe yeo a ilego a mo putsa ka yona e bile ka go phološa bophelo bja gagwe ka mohlolo le maphelo a bohle bao ba ilego ba tšhabela ka legaeng la gagwe​—e lego “ba leloko la tat’axwe, le bohle ba ba bexo ba na naê.” Ke moka o ile a ba dumelela go dula le “ba-Isiraele,” moo ba bego ba swanetše go swarwa bjalo ka badudi ba fao. (Jošua 2:​13; 6:​22-25; Lefitiko 19:​33, 34) Eupša ga go felele fao. Le gona Jehofa o ile a nea Rahaba tokelo ya go ba makgolo-khukhu wa Jesu Kriste. A pontšho e kgolo gakaakang ya botho bjo lerato bjo bo bontšhitšwego mosadi yo a kilego a ba morapedi wa diswantšho wa mo-Kanana! *​—Psalme 130:​3, 4.

9. Boemo bja kgopolo bja Jehofa ka Rahaba le ka basadi ba bangwe ba Bakriste ba lekgolong la pele la nywaga bo ka kgothatša bjang basadi ba bangwe lehono? O Ile a Putswa ka Baka la Bohlale bja Gagwe

⁹ Go tloga lekgolong la pele la nywaga go ba go fihla lehono, basadi ba bangwe ba Bakriste ka go swana le Rahaba ba tlogetše tsela ya bophelo ya boitshwaro bjo bo gobogilego e le gore ba thabiše Modimo. (1 Ba-Korinthe 6:​9-11) Ka ntle le pelaelo ba bangwe ba bona ba goletše tikologong e swanago le ya Kanana ya bogologolo, moo boitshwaro bjo bo gobogilego bo bego ba atile gomme e bile bo lebelelwa e le setlwaedi. Lega go le bjalo, ba tutuetšwa ke tumelo e theilwego tsebong e nepagetšego ya Mangwalo, ba ile ba fetoša ditsela tša bona. (Ba-Roma 10:​17) Le gona, go ka bolelwa ka basadi ba bjalo gore “Modimo ga a na dihlong ka bona, go bitšwa Modimo wa bona.” (Ba-Hebere 11:​16, PK) A tokelo e kaakang!

10, 11. Ke maemo afe ao a akaretšago Nabala le Dafida ao a ilego a tutueletša Abigaile go gata mogato?

¹⁰ Basadi ba bantši ba ba botegago ba bogologolo ba ile ba bontšha seka sa go ba bohlale ka tsela e bonagalago kudu, se sa ba dira ba bohlokwa bathong ba Jehofa. Yo mongwe wa basadi ba bjalo e bile Abigaile, mosadi wa mohumi wa mo-Isiraele e lego Nabala yo e bego e le mong wa naga. Bohlale bja Abigaile bo ile bja tsenya letsogo go phološeng maphelo le go thibela Dafida yo e bego e tla ba kgoši ya Isiraele go ba le molato wa madi. Re ka bala mabapi le Abigaile pegong e begilwego go 1 Samuele kgaolo 25.

¹¹ Ge pego e thoma, Dafida le balatedi ba gagwe ba hlomile mešaša kgaufsi le mehlape ya Nabala, yeo ba bego ba e šireletša bošego le mosegare ntle le tefo ka ge ba direla ngwanabo bona wa mo-Isiraele e  lego Nabala botho. Ge dijo tša Dafida di fela, o romela masogana a lesome go yo kgopela dijo go Nabala. Nabala gabjale o be a bulegetšwe ke sebaka sa go bontšha tebogo ya gagwe ya go leboga Dafida le go mo hlompha bjalo ka motlotšwa wa Jehofa. Eupša Nabala o dira se se fapanego. A galefile kudu, o roga Dafida gomme o gomiša masogana a lekeleditše diatla. Ge Dafida a e-⁠kwa ka se, o bokanya banna ba 400 bao ba itlhamilego gomme o nyaka go yo itefeletša. Abigaile o lemoga karabelo ya monna wa gagwe e šoro gomme o gata mogato kapejana le ka bohlale gore a iše maswafo a Dafida fase ka go romela ka seatla se se bulegilego karolo e itšego ya dijo. Ke moka yena ka noši o ya go Dafida.​—Ditemana 2-⁠20.

12, 13. (a) Abigaile o ile a itlhatsela bjang e le yo bohlale le yo a botegelago Jehofa le motlotšwa wa gagwe ka go se kwanantšhe? (b) Abigaile o ile a dira’ng ge a fihla gae, gomme go ile gwa feleletša go diragetše’ng ka yena?

¹² Ge Abigaile a gahlana le Dafida, kgopelo ya gagwe ya boikokobetšo ya go kgopela kgaugelo e utolla tlhompho ya gagwe e tseneletšego ya go hlompha motlotšwa wa Jehofa. O re: “Morêna ó tlo Xo axêla ngwakô o tl’o xo tia, xe wene Mong wa-ka Ò e-⁠lwa dintwa tša Morêna,” a oketša ka gore Jehofa o tla bea Dafida go ba moetapele wa Isiraele. (Ditemana 28-30) Ka nako e swanago, Abigaile o bontšha sebete kudu ka go botša Dafida gore ge a ka se hlokomele go phegelela ga gagwe go itefeletša, go tla mo lebiša go beng le molato wa madi. (Ditemana 26, 31) Boikokobetšo bja Abigaile, tlhompho ya gagwe e tseneletšego le go nagana ga gagwe ka tsela e nepagetšego go ile gwa dira gore Dafida a inagane gabotse. O araba ka gore: “A Morêna Modimo wa Isiraele a leboxwê, xe a Xo romile wa xahlana le nna lehono. A xo leboxwê le kêlêlô ya xaxo, xo leboxwê wêna xe O nthšexetše lehono ka se ôbê molato wa madi.”​—Ditemana 32, 33.

¹³ Ge a boile gae, ka sebete Abigaile o ile a nyaka go tsebiša monna wa gagwe ka mpho ye a e filego Dafida. Lega go le bjalo, o mo hwetša “à taxilwe xa-xolo.” Ka gona o ile a leta go fihlela a hlaphogetšwe ke moka a mmotša. Nabala o arabela bjang? O tšhogile kudu moo e lego gore o welwa ke seo e ka bago e be e le mohuta o itšego wa go repha ditho. Matšatši a lesome ka morago o ile a hwela diatleng tša Modimo. Ge Dafida a e-⁠kwa ka lehu la Nabala, o ile a kgopela go nyala Abigaile, yoo ka ntle le pelaelo a mo ratago le go mo hlompha ka mo go tseneletšego. Abigaile o ile a amogela kgopelo ya Dafida.​—Ditemana 34-⁠42.

Na o ka ba Bjalo ka Abigaile?

14. Ke dika dife tša Abigaile tšeo re ka nyakago go di hlagolela ka tekanyo e kgolo?

¹⁴ Na o bona dika tše itšego tša Abigaile​—go sa šetšwe gore o monna goba o mosadi​—tšeo o ka ratago go di hlagolela ka tekanyo e kgolo? Mohlomongwe o kganyoga go dira dilo ka bohlale le ka tlhaologanyo ge go tšwelela mathata. Goba mohlomongwe o nyaka go bolela ka mokgwa o fodilego le o kwagalago ge maikwelo a ba bangwe bao o nago le bona a rotoga. Ge e ba go le bjalo, ke ka baka la’ng o sa rapele Jehofa ka taba ye? O holofetša go nea bohlale, temogo le bokgoni bja go nagana go bohle bao ba ‘mo kgopelago ka tumelo.’​—Jakobo 1:​5, 6; Diema 2:​1-6, 10, 11.

15. Ke ka tlase ga maemo afe moo go lego bohlokwa kudu gore basadi ba Bakriste ba bontšhe dika tše di bontšhitšwego ke Abigaile?

¹⁵ Dika tše bjalo tše dibotse ke tša bohlokwa kudu go mosadi yo a nago le monna yo a sa dumelego yo a sa elego hloko melao ya motheo ya Beibele. Mohlomongwe o nwa ka mo go feteletšego. Re holofela gore banna ba bjalo ba tla fetoša ditsela tša bona. Ba bantši ba dirile bjalo​—gantši ba arabela moyeng o fodilego, tlhomphong e tseneletšego le boitshwarong bjo bo hlwekilego bja basadi ba bona.​—1 Petro 3:​1, 2, 4.

16. Go sa šetšwe gore maemo a gagwe ke afe ka gae, kgaetšedi wa Mokriste o swanetše go bontšha bjang gore o tšeela godimo tswalano ya gagwe le Jehofa go feta dilo ka moka?

¹⁶ Gopola gore ka mehla Jehofa o tla go thekga mathateng le ge e le afe ao o ka swanelwago ke go a kgotlelela ka gae. (1 Petro 3:​12) Ka gona katanela go imatlafatša moyeng. Rapelela bohlale le pelo e fodilego. Ee, batamela kgaufsi le Jehofa ka thuto ya ka mehla ya Beibele, thapelo, go naganišiša le ka go gwerana le Bakriste-gotee le wena. Lerato la Abigaile la go rata Modimo le boemo bja gagwe bja kgopolo ka mohlanka wa gagwe yo a tloditšwego di be di sa kgongwe ke boemo bja  kgopolo bjo e sego bja moya bja monna wa gagwe. O ile a dira dilo motheong wa melao ya motheo ya go loka. Gaešita le ka legaeng leo monna e lego mohlanka yo a beago mohlala wa Modimo, mosadi wa Mokriste o lemoga gore o swanetše go tšwela pele a šoma ka thata go aga le go kgomarela boemo bja gagwe bja moya. Ke therešo gore monna wa gagwe o na le boikarabelo bja Mangwalo bja go mo hlokomela moyeng le nameng, eupša mafelelong o swanetše go šomela ‘phološo ya gagwe ka go phegelela ka poifo le ka letšhogo.’​—Ba-Filipi 2:​12; 1 Timotheo 5:⁠8.

O Ile a Amogela “Moputso wa Moporofeta”

17, 18. (a) Mohlologadi wa Tsarepata o ile a lekwa ka teko efe e sa tlwaelegago ya tumelo? (b) Mohlologadi o ile a arabela bjang kgopelong ya Eliya, gomme Jehofa o ile a mo putsa bjang bakeng sa se?

¹⁷ Tsela yeo Jehofa a ilego a hlokomela mohlologadi wa modiidi nakong ya moporofeta Eliya e bontšha gore o tšeela godimo kudu bao ba thekgago borapedi bja therešo ka go ineela le ka go neela ka dithoto tša bona. Ka baka la komelelo yeo e tšerego nako e telele mehleng ya Eliya, ba bantši ba ile ba lebeletšana le tlala go akaretša le mohlologadi gotee le morwa wa gagwe yo monyenyane bao ba bego ba dula Tsarepata. Ge ba be ba šaletšwe feela ke dijo tša bona tša mafelelo, go ile gwa tsena moeng​—moporofeta Eliya. O ile a kgopela selo se se sa tlwaelegago kudu. Gaešita le ge a be a tseba ka mathata a mosadi yo, o ile a mo kgopela gore a mo direle “senkxwanyana,” a diriša makhura le bupi bja gagwe bja mafelelo. Eupša o okeditše ka gore: “Xobane Morêna Modimo wa Isiraele ó re: Bupi bo lexo pitšeng bo ka se kê bya fêla, le makhura ka lexapeng a ka se kê a hlôkwa, xo bê xo tlê ’tšatši le Morêna a tl’o xo neša pula ka lôna lefaseng.”​—1 Dikxoši 17:​8-⁠14.

¹⁸ O be o tla arabela bjang kgopelong e bjalo e sa tlwaelegago? Ka go lemoga gore Eliya e be e le moporofeta wa Jehofa, mohlologadi wa Tsarepata o ile “a dira ka mo Eliya a mmoditšexo” ka gona. Jehofa o ile a arabela bjang tirong ya gagwe ya go amogela baeng? Ka mohlolo o ile a nea mosadi, morwa wa gagwe gotee le Eliya dijo nakong ya komelelo. (1 Dikxoši 17:​15, 16) Ee, Jehofa o ile a nea mohlologadi wa Tsarepata “moputso wa moporofeta,” gaešita le ge e be e se mo-Isiraele. (Mateo 10:​41, PK) Morwa wa Modimo le yena o ile a bolela gabotse ka mohlologadi yo ge a be a bolela ka yena e le mohlala go batho bao ba se nago tumelo ba motseng wa gabo wa Natsaretha.​—Luka 4:​24-⁠26.

19. Ke ka ditsela dife basadi ba bantši ba Bakriste lehono ba bontšhago moya wa mohlologadi wa Tsarepata, gomme Jehofa o ikwa bjang ka bona?

¹⁹ Lehono basadi ba bantši ba Bakriste ba bontšha moya wa mohlologadi wa Tsarepata. Ka mohlala, beke e nngwe le e nngwe, dikgaetšedi tša Bakriste tšeo di se nago boithati​—tšeo bontši bja tšona di diilago gomme di e-⁠na le malapa ao di swanetšego go a hlokomela​—di amogela balebeledi ba basepedi le basadi ba  bona. Tše dingwe di abelana dijo le badiredi ba nako e tletšego ba lefelong la gabo tšona, di thuša bahloki goba di ineela ka ditsela tše dingwe le go neela ka dithoto tša tšona go thekga modiro wa Mmušo. (Luka 21:⁠4) Na Jehofa o lemoga boikgafo bjo bjalo? Ruri o a bo lemoga! “Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe mola Lè dirêla bakxêthwa, Lè ba dirêla le byale.”​—Ba-Hebere 6:⁠10.

20. Ke’ng seo se tlago go ahla-ahlwa sehlogong se se latelago?

²⁰ Lekgolong la pele la nywaga, basadi ba mmalwa bao ba boifago Modimo ba bile le tokelo ya go hlankela Jesu le baapostola ba gagwe. Sehlogong se se latelago, re tla ahla-ahla kamoo basadi ba ba ilego ba thabiša pelo ya Jehofa, gotee le go ahla-ahla mehlala ya basadi ba mehleng yeno bao ba hlankelago Jehofa ka pelo ka moka gaešita le maemong a thata.

E le go Boeletša

• Basadi ba ba latelago ba ile ba thabiša bjang pelo ya Jehofa?

• Sifira le Pua

• Rahaba

• Abigaile

• Mohlologadi wa Tsarepata

• Go naganišiša ka mehlala e beilwego ke basadi ba go ka re thuša bjang rena ka noši? Bontšha.

Basadi ba bantši ba ba botegago ba hlanketše Modimo go sa šetšwe “molaô wa kxoši”

Ke ka baka la’ng Rahaba e le mohlala o mobotse wa motho yo a nago le tumelo?

Ke dika dife tše di bontšhitšwego ke Abigaile tšeo o nyakago go di ekiša?

Basadi ba bantši ba Bakriste lehono ba bontšha moya wa mohlogadi wa kua Tsarepata