PHIHLELO

Go Rutwa ke Jehofa go Tloga Bofseng bja-ka

KA GE GO ANEGA RICHARD ABRAHAMSON

“Modimo, O nthutile xo tloxa byaneng, xomme le byale ke sa fêla ke kwadiša mehlôlô ya xaxo.” E re ke hlaloseng lebaka leo ka lona mantšu ao a Psalme 71:​17 e lego a bohlokwa kudu go nna.

MMA e lego Fannie Abrahamson, o ile a kopana le Barutwana ba Beibele ka 1924, go etša ge Dihlatse tša Jehofa di be di bitšwa bjalo ka nako yeo. Ke be ke e-⁠na le ngwaga feela. Ge mma a be a dutše a rutwa ditherešo tša Beibele, o be a akgofela go yo botša baagišani ba gagwe dilo tšeo a ithutilego tšona, le gona o ile a ruta nna le mogolo’a-ka le kgaetšedi ya-ka. Pele ga ge nka kgona go bala, o be a šetše a nthušitše go tseba mangwalo a mantši ka hlogo a mabapi le ditšhegofatšo tša Mmušo wa Modimo.

Mafelelong a bo-1920, sehlopha sa rena sa Barutwana ba Beibele kua La Grande, yeo e lego seleteng sa Oregon, U.S.A., moo ke belegetšwego gotee le go godišetšwa gona, se be se e-⁠na le basadi ba sego kae le bana. Gaešita le ge re be re le lekatana, re be re etelwa gatee goba gabedi ka ngwaga ke badiredi ba basepedi bao ba bego ba tsebja e le basepedi ba bodumedi. Basepedi ba ba bodumedi ba be ba nea dipolelo tše kgothatšago, gomme ba e-⁠ya le rena bodireding bja ntlo le ntlo, le gona ba be ba bontšha kgahlego e botho go bana. Shield Toutjian, Gene Orrell le John Booth e be e le ba bangwe ba basepedi bao ba rategago.

Ka 1931 ga go le o tee go tšwa sehlopheng sa rena yo a ilego a kgona go ba gona kopanong kua Co­lum­bus, Ohio, moo Barutwana ba Beibele ba ilego ba amogela leina la Dihlatse tša Jehofa. Eupša dikhamphani, go etša ge diphuthego di be di bitšwa bjalo nakong yeo, gotee le dihlopha tše di lego lekatana tšeo di bego di sa emelwa kopanong di ile tša bokana lefelong la gabo tšona ka August yona yeo gore di dumelelane le setlamo sa go amogela leina. Sehlopha sa rena se senyenyane kua La Grande se ile sa dira se. Ke moka, lesolong la ngwageng wa 1933 la go aba pukwana ya The Crisis, ke ile ka swara  thero ya Beibele ka hlogo gomme ka lekga la pele, ke ile ka nea bohlatse ke le noši ka ntlo le ntlo.

Ka bo-1930, go ganetšwa ga mošomo wa rena go be go gola. E le gore re kgone go lebeletšana le se, dikhamphani di ile tša rulaganywa ka dihlopha tšeo di ilego tša swara dikopano tše dinyenyane, gomme di be di tšea karolo medirong ya boboledi yeo e bego e tsebja e le masolo a dihlopha, gatee goba gabedi ka ngwaga. Dikopanong tše re ile ra rutwa ka mekgwa ya boboledi gomme ra bontšhwa kamoo re swanetšego go dirišana ka tlhompho le maphodisa ao a bego a re šitiša. Ka ge Dihlatse di be di išwa leboelela ka pele ga moahlodi wa maphodisa goba kgorong ya tsheko e tlwaelegilego, re be re itlwaetša tsebišo yeo e tšwago letlakaleng la ditaelo e bitšwago Tshepedišo ya Tsheko. Se se ile sa re hlamela go lebeletšana le kganetšo.

Nywaga ya Pele ya go Gola Ga-ka Therešong ya Beibele

Kwešišo ya-ka le tebogo ka ditherešo tša Beibele le kholofelo yeo e bego e theilwe Beibeleng ya go phela ka mo go sa felego lefaseng ka tlase ga Mmušo wa Modimo wa legodimong e be e dutše e gola. Ka nako yeo, go kolobetšwa go be go sa gatelelwe kudu go bao ba bego ba se na kholofelo ya go buša legodimong le Kriste. (Kutollo 5:​10; 14:​1, 3) Go sa šetšwe seo, ke ile ka botšwa gore ge e ba ke ikemišeditše go tšwa pelong go dira thato ya Jehofa, e be e tla ba mo go swanetšego gore ke kolobetšwe. Ke ile ka dira se ka August 1933.

Ge ke be ke e-⁠na le nywaga e 12, morutiši wa-ka o ile a lemoga gore ke be ke kgona go bolela phatlalatša, ka gona o ile a kgothaletša mma go rulaganyetša gore ke hwetše tlwaetšo e oketšegilego. Mma o ile a nagana gore se se ka nthuša go hlankela Jehofa gakaone. Ka go rialo o ile a lefela dithuto tša-ka ka go hlatswetša mohlahli diaparo ka lebaka la ngwaga. Tlwaetšo e ile ya ipontšha e le e thušago kudu bodireding bja-ka. Ge ke be ke e-⁠na le nywaga e 14, ke ile ka swarwa ke rheumatic fever, yeo e ilego ya ntlogediša sekolo ka lebaka la ka godimo ga ngwaga.

Ka 1939 modiredi wa nako e tletšego yo a bitšwago Warren Henschel o ile a tla tikologong ya rena. * E be e le mogolo’a-ka moyeng, a e-⁠ya le nna tirelong ya tšhemo letšatši ka moka. Go se go ye kae o ile a nthuša go thoma tirelo ya bobulamadibogo bja nakwana, e lego mohuta wa bodiredi bja nako e tletšego ka nakwana. Selemong seo, sehlopha sa rena se ile sa rulaganywa gore e be khamphani. Warren o ile a kgethwa gore e be mohlanka wa khamphani, gomme nna ke ile ka kgethwa gore ke be moswari wa Thuto ya Morokami. Ge Warren a be a tloga gore a yo hlankela Bethele, e lego ntlo-kgolo ya ditšhaba-tšhaba ya Dihlatse tša Jehofa kua Brooklyn, New York, ke ile ka ba mohlanka wa khamphani.

Go Thoma Bodiredi bja Nako e Tletšego

Boikarabelo bjo bo oketšegilego bja go hlankela ke le mohlanka wa khamphani bo ile bja matlafatša ka mo go oketšegilego kganyogo ya-ka ya go nyaka go tsenela bodiredi bja nako e tletšego, e lego seo ke se dirilego ke e-⁠na le nywaga e 17 ka morago ga go fetša ngwaga wa-ka wa boraro sekolong se se phagamego. Tate e be e se modumedi-gotee le rena, eupša o be a hlokomela lapa gabotse e bile e le monna yo a nago le melao e thata. O be a nyaka gore ke ye kholetšheng. Lega go le bjalo, o ile a bolela gore, ge feela ke be ke sa ithekge ka yena bakeng sa bodulo le dijo, gona ke be nka itirela boithatelo. Ka gona ke ile ka thoma go bula madibogo ka September 1, 1940.

 Ge ke tloga gae, mma o ile a mpadiša Diema 3:​5, 6: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Ka dinako tšohle go bea bophelo bja-ka diatleng tša Jehofa ruri go ile gwa nthuša kudu.

Go se go ye kae, ke ile ka tšea karolo gotee le Joe le Margaret Hart bodireding kua karolong ya ka leboa-bogareng bja Washington State. Tikologo ye e be e tswaka-tswakane​—go be go e-⁠na le meraka ya dikgomo, meraka ya dinku, mafelo a šireleditšwego a ma-India gotee le ditorotswana tše dintši le metsana. Ka seruthwane sa 1941, ke ile ka abelwa go ba mohlanka wa khamphani phuthegong ya Wenatchee, Washington.

Go e nngwe ya dikopano tša rena kua Walla ­Walla, Washington, ke ile ka hlankela ke le mohlokomedi, ke amogela bao ba bego ba tsena ka holong. Ke ile ka lemoga ngwanabo rena yo mofsa yoo a bego a leka ka thata go beakanya segodiša-modumo eupša a palelwa. Ka gona ke ile ka šišinya gore a tšee kabelo ya-ka, gomme nna ke tšee ya gagwe. Ge mohlanka wa tikologo Albert Hoffman a boa gomme a bona gore ke tlogetše kabelo ya-ka, o ile a ntlhalosetša ka go myemyela ka tsela ya bogwera bohlokwa bja gore motho a kgomarele kabelo ya gagwe go fihlela a laelwa gore a dire se se fapanego. Ke ile ka dula ke gopola keletšo ya gagwe ga e sa le go tloga ka yona nako yeo.

Ka August 1941, Dihlatse tša Jehofa di ile tša rulaganya kopano e kgolo kua St. Louis, Missouri. Ba ga Hart ba ile ba bea seširo ka morago ga lori ya bona gomme ba tsenya dipanka. Ba senyane ba rena babulamadibogo re ile ra sepela leeto la dikhilomithara tše 2 400 go ya St. Louis ka lori yeo. Leeto le tšere mo e ka bago beke go ya le beke go boa. Kopanong maphodisa a akanyeditše palo-moka ya bao ba bilego gona go 115 000. Gaešita le ge bao ba bilego gona ba ka ba ba be ba le ka tlase ga moo, ka kgonthe ba bile ka godimo ga mo e ka bago Dihlatse tše 65 000 tšeo di bego di le gona United States ka nako yeo. Kopano e be e aga moyeng e le ka kgonthe.

Go Hlankela Bethele ya Brooklyn

Ka morago ga go boela Wenatchee, ke ile ka hwetša lengwalo leo le bego le nkgopela gore ke yo hlankela Bethele ya Brooklyn. Ge ke fihla ka October 27, 1941, ke ile ka išwa ofising ya Nathan H. Knorr, e lego molebeledi wa lefelo la go gatiša. Ka botho o ile a ntlhalosetša ka Bethele gomme a gatelela gore go kgomarela kgaufsi le Jehofa e be e le ga bohlokwa gore ke kgone go phela ka katlego moo. Ke moka ke ile ka išwa Lefapheng la tša Thomelo gomme ka newa mošomo wa go tlema mapokisi a dipuku ao a bego a tlo romelwa.

Ka January 8, 1942, Joseph Rutherford, yoo e bego e le moetapele wa Dihlatse tša Jehofa lefaseng ka bophara o ile a hwa. Matšatši a mahlano ka morago, balaodi ba Mokgatlo ba ile ba kgetha Ngwanabo rena Knorr gore e be mohlatlami wa gagwe. Ge W. E. Van Amburgh, e lego mongwaledi le ramatlotlo wa nako e telele wa Mokgatlo, a tsebiša se go lapa la Bethele, o itše: “Ke gopola ge C. T. Russell a be a e-⁠hwa [ka 1916] gomme a tšeelwa sebaka ke J. F. Rutherford. Morena o tšwetše pele go hlahla le go atlegiša modiro wa Gagwe. Mo nakong ye, ke letetše ka mo go feletšego gore modiro o tšwele pele Nathan H. Knorr e le mopresidente, ka gobane wo ke modiro wa Morena, e sego wa motho.”

 Ka February 1942, go ile gwa tsebišwa gore “Thuto e Tšwetšego Pele Bodireding bja Pušo ya Modimo” e be e tla thongwa. E be e hlametšwe go tlwaetša bao ba lego Bethele e le gore ba kaonefatše bokgoni bja bona bja go nyakišiša ditaba tša Beibele, go rulaganya tsebišo ka tsela e swanetšego le go e bolela ka tsela e atlegago. Ke thušitšwe ke tlwaetšo yeo ke e hweditšego pejana ya go bolela phatlalatša, ke ile ka kgona go tšwela pele ka lebelo lenaneong.

Go se go ye kae, ke ile ka abelwa go šoma Lefapheng la Tirelo, leo le hlokomelago bodiredi bja Dihlatse kua United States. Ka morago wona ngwageng woo, go ile gwa dirwa phetho ya gore go thongwe lenaneo bakeng sa gore badiredi ba etele dikhamphani tša Dihlatse. Ge nako e dutše e e-⁠ya, badiredi ba ba basepedi, bao ba bego ba bitšwa bahlanka go bana babo rena, ba ile ba thoma go bitšwa balebeledi ba tikologo. Selemong sa 1942, lenaneo-thuto le ile la rulaganywa kua Bethele e le go tlwaetša bana babo rena bakeng sa mohuta wo wa bodiredi, gomme ke ile ka newa tokelo ya go ba gare ga bao ba bego ba amogela tlwaetšo. Ka mo go kgethegilego ke gopola gore Ngwanabo rena Knorr, e lego yo mongwe wa bahlahli, o ile a gatelela ntlha ye go rena: “Le se ke la leka go thabiša batho. Le tla feleletša le sa thabiše motho. Thabišang Jehofa, gomme le tla thabiša le bohle bao ba ratago Jehofa.”

Modiro wa bosepedi o ile wa thongwa ka October 1942. Ba bangwe ba rena kua Bethele re ile ra tšea karolo go wona mafelo-bekeng a itšego, re etela diphuthego tšeo di lego kgole le New York City ka dikhilomithara tše 400. Re ile ra ngwala dipego ka modiro wa boboledi wa phuthego le go ba gona dibokeng, ra swara seboka le bao ba hlokomelago boikarabelo bja phuthego, ra nea polelo e tee goba tše pedi gomme ra šoma bodireding le Dihlatse tša tikologong.

Ka 1944, ke be ke le gare ga bao Lefapha la Tirelo le ilego la ba romela modirong wa bosepedi mo e ka bago ka lebaka la dikgwedi tše tshela, ke hlankela Delaware, Maryland, Pennsylvania le Vir­gin­ia. Ka morago, ka dikgwedi tše sego kae, ke ile ka etela diphuthego tša kua Connecticut, Massachusetts le Sehlakahlakeng sa Rhode. Ge ke boela Bethele, ke ile ka šoma ka nakwana ofising le Ngwanabo rena Knorr gotee le mongwaledi wa gagwe Milton Henschel, moo ke ilego ka tlwaelana le mošomo wa rena wa lefase ka bophara. Le gona ke ile ka hlankela ka nakwana Ofising ya Matlotlo ka tlase ga bolebeledi bja W. E. Van Amburgh le mothuši wa gagwe, Grant Suiter. Ke moka, ka 1946, ke ile ka dirwa molebeledi wa diofisi tše mmalwa tša Bethele.

Diphetogo tše Dikgolo Bophelong Bja-⁠ka

Ge ke dutše ke hlankela diphuthego ka 1945, ke ile ka tlwaelana le Julia Charnauskas kua Prov­i­dence, Sehlakahlakeng sa Rhode. Bogareng bja 1947 re be re nagana go nyalana. Ke be ke rata tirelo ya Bethele kudu, lega go le bjalo ka nako yeo, go be go se na tokišetšo ya go tliša molekane wa lenyalo gore a tlo hlankela moo. Ka gona ka January 1948, ke ile ka tloga Bethele, gomme nna le Julia (Julie) re ile ra nyalana. Ke ile ka hwetša mošomo wa nakwana lebenkeleng le legolo kua Providence, gomme re ile ra thoma bodiredi bja rena bja bobulamadibogo re le gotee.

Ka September 1949, ke ile ka laletšwa go dira modiro wa tikologo kua tikologong ya ka leboa-bodikela bja Wisconsin. E be e le phetogo e kgolo go nna le Julie go dira boboledi kudu-kudu ditorotswaneng le dinaga-magaeng tša ditšweletšwa tša lebese. Marega e be e le a matelele e bile a tonya, a e-⁠na le dibeke tše dintši tša dithemperetšha tše lego go –20°C goba ka tlase gotee le lehlwa le lentši. Re be re se na koloi. Lega go le bjalo, ka dinako tšohle go be go e-⁠na le motho yo mongwe yoo a re išago phuthegong e latelago.

Go se go ye kae ka morago ga ge ke thomile modiro wa tikologo, re ile ra ba le kopano ya tikologo. Ke gopola ke hlahloba dilo ka mo go tseneletšego go bona gore ditshepedišo ka moka di be di hlokometšwe e lego seo se ilego sa tšhoša ba bangwe. Ka gona molebeledi wa selete, Nicholas Kovalak, o ile a ntlhalosetša ka botho gore bana babo rena ba tikologong yeo ba be ba tlwaetše go hlokomela dilo ka tsela ya bona ka noši le gore ke se ke ka leka go laola dilo ka mo go tseneletšego kudu. Keletšo yeo e ile ya nthuša go lebeletšana le dikabelo tše dintši ga e sa le go tloga ka nako yeo.

Ka 1950, ke ile ka amogela kabelo ya nakwana​—ya go hlokomela mafelo a madulo bakeng sa batla-kopanong ya rena ya pele e kgolo go dikopano tša rena tše dintši kua Lepatlelong la Yankee leo le lego New York City. Kopano e be e le e kgahlišago go thoma mathomong go fihla mafelelong, e e-⁠na  le baemedi ba tšwago dinageng tše 67 le palo-moka ya ba 123 707 ba bilego gona! Ka morago ga kopano, nna le Julie re ile ra thomološa bodiredi bja rena bja bosepedi. Re be re thabela kudu modiro wa tikologo. Lega go le bjalo, re ile ra nagana gore re swanetše go tšwela pele re ithapela tirelo le ge e le efe ya nako e tletšego. Ka gona, ngwaga o mongwe le o mongwe re be re tlatša kgopelo bakeng sa bobedi tirelo ya Bethele le ya boromiwa. Ka 1952 re ile ra thabela kudu go amogela taletšo ya gore re be gona sehlopheng sa bo-20 sa Sekolo sa Beibele sa Watchtower sa Gilead, moo re ilego ra tlwaeletšwa modiro wa boromiwa.

Go Hlankela Dinageng di Šele

Ge re aloga ka 1953, re ile ra abelwa go ya Brithania, moo ke ilego ka hlankela modirong wa selete ka borwa bja Engelane. Ka morago ga mo e ka bago ka tlase ga ngwaga re le modirong wo, woo nna le Julie re ilego ra o thabela kudu, re ile ra makatšwa ke kabelo yeo re ilego ra e newa ya gore re ye Denmark. Go be go nyakega molebeledi yo mofsa ofising ya lekala kua Denmark. Ka ge ke be ke le kgaufsi, le gona ke tlwaeleditšwe modiro o bjalo kua Brooklyn, ke ile ka romelwa go yo thuša. Re ile ra sepela ka seketswana go ya Netherlands, gomme go tloga moo ra namela setimela go ya Copenhagen, Denmark. Re ile ra fihla ka August 9, 1954.

Bjo bongwe bja mathata ao re ilego ra lebeletšana le ona e be e le gore ba sego kae bao ba bego ba le maemong a boikarabelo ba ile ba gana go amogela tlhahlo e tšwago ntlong-kgolo kua Brooklyn. Le gona, ba bararo go ba bane bao ba bego ba fetolela dikgatišo ka se-Denmark ba ile ba tloga Bethele gomme mafelelong ba se sa hlwa ba kopanela le Dihlatse tša Jehofa. Eupša Jehofa o ile a araba dithapelo tša rena. Babulamadibogo ba babedi, Jørgen le Anna Larsen, bao ba bego ba šoma mošomo wa go fetolela ka nakwana, ba ile ba ithapela go šoma ka mehla. Ka gona go fetolelwa ga  dimakasine tša rena ka se-Denmark go ile gwa tšwela pele gomme ga go le tokollo le e tee yeo e ilego ya se ke ya tšwa. Ba ga Larsen ba sa dutše ba le Bethele kua Denmark, gomme Jørgen ke molomaganyi wa Komiti ya Lekala.

Mothopo wa kgonthe wa kgothatšo nywageng yeo ya pele e be e le diketelo tša ka mehla tša Ngwanabo rena Knorr. O be a ipha nako ya go dula le go bolela, gomme a hlalosa diphihlelo tšeo di bego di nea temogo ya kamoo go ka lebeletšanwago le mathata. Nakong ya ketelo ka 1955, go ile gwa dirwa phetho ya gore re swanetše go aga lekala le lefsa leo le nago le ditlabakelo tša go gatiša e le gore re kgone go tšweletša dimakasine bakeng sa Denmark. Lefelo le ile la hwetšwa lefelong la bodulo la ka ntle ga toropo la ka leboa la Copenhagen, gomme ka selemo sa 1957, re ile ra hudugela meagong yeo e bego e sa tšwa go agwa. Harry John­son, yoo yena le mosadi wa gagwe Karin ba bego ba sa tšwa go goroga Denmark ka morago ga go aloga sehlopheng sa bo-26 sa Gilead, o ile a re thuša go momaganya motšhene wa go gatiša le go o dira gore o šome.

Re ile ra kaonefatša tsela ya rena ya go rulaganya go swarwa ga dikopano tše dikgolo kua Denmark, gomme phihlelo yeo ke e kgobokeditšego ge ke be ke šoma ka dikopano kua United States e ile ya ipontšha e le e thušago. Ka 1961 kopano ya rena e kgolo ya ditšhaba-tšhaba kua Copenhagen e ile ya amogela baemedi ba tšwago dinageng tša ka godimo ga tše 30. Palo-moka ya ba bilego gona e bile ba 33 513. Ka 1969, re ile ra swara yeo e ilego ya ipontšha e le kopano e kgolo go dikopano ka moka tšeo di ilego tša swarelwa kua Scandinavia, ya palo-moka ya ba bilego gona ba 42 073!

Ka 1963, ke ile ka laletšwa go ba gona sehlopheng sa bo-38 sa Gilead. Le e be e le lenaneo-thuto leo le fetotšwego la dikgwedi tše lesome leo le hlametšwego ka mo go kgethegilego go tlwaetša bašomi ba lekaleng. E be e le mo go thabišago go ba le lapa la Bethele ya Brooklyn gape le go holwa ke diphihlelo tša bao ba bego ba dutše ba šoma ka nywaga e mentši ba hlokometše ditshepedišo tša ntlong-kgolo.

Ka morago ga lenaneo-thuto le la tlwaetšo, ke ile ka boela Denmark go yo tšwela pele ke phetha boikarabelo bja-ka moo. Go oketša moo, ke ile ka hwetša tokelo ya go hlankela ke le molebeledi wa mafelo, ke etela makala a ka bodikela le a ka leboa a Yuropa go yo kgothatša bašomi ba moo le go ba thuša go phethagatša boikarabelo bja bona. Morago-rago bjale ke dirile modiro wo ka Afrika Bodikela le Caribbean.

Mafelelong a bo-1970, bana babo rena kua Den­mark ba ile ba thoma go nyaka lefelo leo go lona go bego go ka agwa moago o mogolo ka baka la modiro o oketšegago wa bofetoledi le wa go gatiša. Lefelo le lebotse le ile la hwetšwa mo e ka bago dikhilomithara tše 60 ka bodikela bja Copenhagen. Ke ile ka šoma gotee le ba bangwe go rulaganya le go hlama moago wo o mofsa, gomme nna le Julie re be re lebeletše pele go yo dula le lapa la Bethele legaeng la lona le lefsa le lebotse. Lega go le bjalo, dilo ga se tša ka tša direga ka mo go bego go lebeletšwe.

Go Boela Brooklyn

Ka November 1980, nna le Julie re ile ra laletšwa go yo hlankela Bethele ya Brooklyn, moo re ilego ra fihla mathomong a January 1981. Ka nako yeo re be re le mafelelong a nywaga ya rena ya bo-50, gomme ka morago ga go hlankela mo e ka bago seripa-gare sa bophelo bja rena gotee le bana babo rena le dikgaetšedi kua Denmark, go be go se bonolo go rena go boela United States. Lega go le bjalo, ga se ra ka ra lebiša tlhokomelo moo re bego re ka rata go ba gona eupša re ile ra leka go lebiša tlhokomelo ya rena go dikabelo tša rena tša nakong yeo le ditlhohlo le ge e le dife tšeo di nago le tšona.

Re ile ra fihla Brooklyn gomme ra dula gona. Julie o ile a abelwa go ya ofising ya go bala matlotlo, a šoma mošomo wo o swanago le wo a bego a o dira kua Denmark. Ke ile ka abelwa go ya Lefapheng  la Bongwadi go yo thuša go rulaganya tshepedišo ya dikgatišo tša rena. Mathomong a bo-1980 e be e le nako ya phetogo ditshepedišong tša Brooklyn, ka ge re ile ra tlogela go diriša motšhene wa go tlanya le go beakanya mongwalo ka morodi o fišago gomme ra diriša tshepedišo ya computer le motšhene wa go gatiša wa offset. Ke be ke sa tsebe selo ka di-computer eupša ke be ke e-⁠na le kwešišo e itšego ka ditshepedišo tša mokgatlo le go dirišana le batho.

Go se go ya kae ka morago, go be go nyakega gore Lefapha la tša Bokgabo la mokgatlo le matlafatšwe ge re thoma go diriša motšhene wa go gatiša wa offset wo o dirišago mebala ka moka gotee le go diriša diswantšho tša mebala. Gaešita le ge ke be ke se na phihlelo ya go ba rabokgabo, ke be ke kgona go thuša ka go rulaganya. Ka gona ke ile ka hwetša tokelo ya go hlokomela lefapha leo ka nywaga e senyane.

Ka 1992, ke ile ka abelwa go thuša Komiti ya Kgatišo ya Sehlopha se Bušago gomme ka romelwa Ofising ya Matlotlo. Mo ke tšwela pele go hlankela medirong ya tša ditšhelete ya Dihlatse tša Jehofa.

Go Hlankela go Tloga Bofseng Bja-ka go ya Pele

Go tloga mathomong a bofsa bja-ka le nywageng e 70 ya tirelo ya boineelo, Jehofa ka go se fele pelo o ile a nthuta ka Lentšu la gagwe e lego Beibele le ka thušo ya bana babo rena bao ba lego ka mokgatlong wa gagwe o kgahlišago. Ke thabetše bodiredi bja nako e tletšego mo e ka bago ka godimo ga nywaga e 63, gomme ya ka godimo ga e 55 ya yona nywaga yeo ke e thabetše le mosadi wa-ka yo a botegago, Julie. Ka kgonthe ke ikwa ke šegofaditšwe ka mo go humilego ke Jehofa.

Morago kua ka 1940 ge ke be ke tloga gae go yo tsenela tirelo ya bobulamadibogo, tate o ile a sega phetho ya-ka gomme a re: “Morwa, ge o tloga gae go yo dira se, o se ke wa nagana gore o tla kgona go boa go tlo nyaka thušo le ge e le efe go nna.” Go theoša le nywaga, ga se ka ka ka swanelwa ke go dira seo. Jehofa ka letsogo la gagwe le bulegilego o ile a hlokomela dinyakwa tša-ka, gantši ka go diriša thušo ya Bakriste-gotee le nna. Ka morago tate o ile a thoma go hlompha mošomo wa rena, gomme o ile a ba a dira tšwelopele e itšego go ithuteng therešo ya Beibele pele a e-⁠hwa ka 1972. Mma yoo a bego a e-⁠na le kholofelo ya go phela legodimong o ile a tšwela pele a hlankela Jehofa ka potego go ba go fihla lehung la gagwe ka 1985, a e-⁠na le nywaga e 102.

Gaešita le ge mathata a tšwelela bodireding bja nako e tletšego, nna le Julie le ka mohla ga se ra ka ra nagana go tlogela kabelo ya rena. Jehofa ka dinako tšohle o ile a re thekga morerong wo. Gaešita le ge batswadi ba-ka ba be ba tšofala e bile ba nyaka thušo, kgaetšedi’a-ka yo mogolo, Victoria Marlin, o ile a ithapela go thuša gomme ka botho a ba hlokomela. Re leboga kudu thušo ya gagwe e lerato yeo e ilego ya re thuša go tšwela pele bodireding bja nako e tletšego.

Julie o ile a nthekga ka potego dikabelong tša rena ka moka, a lebelela se e le karolo ya boineelo bja gagwe ka noši go Jehofa. Gaešita le ge bjale ke e-⁠na le nywaga e 80 e bile ke e-⁠na le mathata a itšego a tša maphelo, ke ikwa ke šegofaditšwe ka mo go humilego ke Jehofa. Ke hwetša kgothatšo e kgolo go mopsalme, yoo ka morago ga go tsebatša gore Modimo o mo rutile go tloga bofseng bja gagwe a ilego a kgopela ka gore: “’Me byale xe ke tšofala, kè le wa hlôxô-pududu, O se ntloxêlê, ke bê ke anêxêlê ditloxolo tša ’tsôxô la xaxo; le meloko e tl’o xo tla yohle ke e anêxelê ditirô tša xaxo tše matla.”​—Psalme 71:​17, 18.

Ke e-⁠na le mma ka 1940, ge ke be ke thoma bobulamadibogo

Ke e-⁠na le babulamadibogo-gotee le nna e lego Joe le Margaret Hart

Letšatšing la rena la lenyalo ka January 1948

Ka 1953, ke e-⁠na le barutwana-gotee le nna ba Gilead. Go tloga go le letshadi go ya go le letona: Don le Virginia Ward, Geertruida Stegenga, Julie le nna

Ke e-⁠na le Frederick W. Franz le Nathan H. Knorr kua Copenhagen, Denmark ka 1961

Ke e-⁠na le Julie lehono