Go tla ga Lefase Leo le se Nago Bosenyi

GE E ba o ka kgona, nagana ka lefase le le se nago disenyi! Go ka se sa nyakega maphodisa, dikgolego goba ditshepedišo tše bitšago kudu le tše di raraganego tšeo di dirišwago go otla disenyi. E tla ba lefase leo go lona motho yo mongwe le yo mongwe a tlago go hlompha bophelo le dithoto tša ba bangwe. Na seo se kwagala e le toro feela? O ka nagana bjalo, eupša phetogo ye e makatšago ke yeo Beibele e e holofetšago. Ke ka baka la’ng o sa hlahlobe seo Mangwalo a se bolelago ka bosenyi le bošoro bjo bongwe bja lefase le?

Pukung ya Psalme re bala gore: “Se jê pelo xe O bôna [ba] babe; se hufêxêlê ba diraxo tše di sa lokaxo, Xobane ba tlo etša byang bò se thata xo ôma; ba tlo pôna bo-ka matlakala a matalá. Ba bolêta e tlo ba bôná beng ba naxa; ba tlo thaba ka botlalô bya moláô.” (Psalme 37:​1, 2, 11) Ka kgonthe, ga go motho yo a ka thibelago Modimo go phethagatša kholofetšo ye le dikholofetšo tše dingwe tša gagwe ka moka tšeo di thabišago pelo.

Tsela ya Modimo ya go tliša ditšhegofatšo tše ke ka Mmušo wa gagwe. Thapelong ya Morena, Jesu Kriste o rutile balatedi ba gagwe go rapelela Mmušo wo gore o tle le gore thato ya Modimo e dirwe “mono lefaseng byalo ka xe e dirwa ­lexodimong.” (Mateo 6:​9, 10) Go se go ye kae, ka tlase ga Mmušo woo, ga go motho lefaseng yo a tlago go tutueletšega go dira bosenyi ka baka la bodiidi, kgatelelo goba boithati. Go e na le moo, Lentšu la Modimo le re: “Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.” (Psalme 72:​16) Ka kgonthe, Jehofa Modimo o tla nea yo mongwe le yo mongwe lefaseng dilo tše dibotse tše di sa felego. Sa bohlokwa kudu, lekoko la batho le tla tutueletšega go rata Modimo le baagišani, ­gomme le ka mohla le ka se sa ferekanywa ke bosenyi.

NA O TLA AMOGELA KETELO?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org