Hlagolelang Moya wa go Nea

GA GO na motho yo a belegwego a na le moya wa go nea. Tshekamelo ya tlhago ya ngwana ke gore a kgotsofatše dinyakwa tša gagwe le dilo tšeo a di ratago, a hlokomologa dikgahlego tša bao ba mo hlokomelago. Lega go le bjalo, mafelelong ngwana o ithuta gore ga se yena feela a nago le dinyakwa. O swanetše go naganela ba bangwe, e bile o swanetše go ithuta e sego feela go amogela eupša gape le go nea gaešita le go abela. Moya wa go nea o swanetše go hlagolelwa.

Ga se batho bohle bao ba neago​—le ge e ka ba ka seatla se bulegilego​—ba nago le moya wa go nea. Ba bangwe ba ka neela ka ditšhelete bakeng sa go thekga mekgatlo e itšego e le gore ba godiše dikgahlego tša bona ka noši. Ba bangwe ba ka neela e le gore ba tumišwe ke batho. Lega go le bjalo, go nea mo go bontšhwago ke Bakriste ba kgonthe go fapane. Ka gona, dika tša go nea mo go kgothaletšwago ka Lentšung la Modimo ke dife? Go hlahloba ka bokopana go nea mo go bontšhitšwego ke Bakriste ba lekgolong la pele la nywaga go tla araba potšišo yeo.

 Mehlala ya go Nea ya Bokriste

Go nea ga Bokriste, ka ge go bontšhitšwe ka Beibeleng, ka kakaretšo e be e le “go nea ba bangwe” bao ba bego ba hloka e le ka kgonthe. (Ba-Hebere 13:​16; Ba-Roma 15:​26) Go be go se gwa swanelwa go dirwa ka kgapeletšo. Moapostola Paulo o ngwadile gore: “E mongwê le e mongwê a nthšê ka mo a kwanexo le pelo ya xaxwe; a se nthšê ka xo belaêla le ka xo xapeletšwa, xobane Mo-nea-à-thabile, Modimo ó a mo rata.” (2 Ba-Korinthe 9:⁠7) Le gona go nea go be go se gwa swanelwa go dirwa ka morero wa go nyaka go bonwa ke batho. Anania le Safira ba ile ba bontšha mokgwa woo gomme ba buna ditla-morago tše bohloko.​—Ditiro 5:​1-⁠10.

Go nyakega ga go nea go ile gwa bonagala ge ba-Juda le basokologi ba tšwago dinageng tša kgole ba kgobokana kua Jerusalema bakeng sa monyanya wa Pentekoste ka 33 C.E. Ke nakong yeo mo balatedi ba Jesu ba ilego ba “tlala Môya-mokxêthwa; ba thôma xo bolêla ka maleme a šele.” Lešaba le legolo le ile la ba kgobokanela gomme la kwa polelo e kgothatšago ya Petro mabapi le Jesu Kriste. Ka morago, lešaba le ile la bona kamoo Petro le Johane ba ilego ba fodiša monna wa segole mojakong wa tempele, gomme ba ile ba kwa Petro a bolela gape mabapi le Jesu le go nyakega ga tshokologo. Ba dikete ba ile ba sokologa gomme ba kolobetšwa e le gore e be balatedi ba Kriste.​—Ditiro, dikgaolo 2 le 3.

Basokologi ba bafsa ba be ba nyaka go šala Jerusalema gomme ba amogele tlhahlo e oketšegilego go tšwa go baapostola ba Jesu. Eupša ke bjang baapostola ba bego ba ka hlokomela dinyakwa tša baeti bao ka moka? Pego ya Beibele e re botša gore: “Bohle ba bexo ba na le naxa xoba ngwakô, ba di rekiša, ba tliša thekô ya thoto ye ba e rekišitšexo. Ba tla ba e bea fase pele xa baapostola, xomme motho a abêlwa ka mo a bexo a hlôka.” (Ditiro 4:​33-35) Ka kgonthe, phuthego e sa tšwago go hlongwa ya Jerusalema e be e e-⁠na le moya wa go nea!

Ka morago, diphuthego tše dingwe di ile tša bontšha moya o swanago wa go nea. Ka mohlala, Bakriste ba Matsedonia, le ge ba be ba diila ka bobona, ba ile ba neela go fetiša matla a bona bakeng sa bana babo bona ba hlokago kua Judea. (Ba-Roma 15:​26; 2 Ba-Korinthe 8:​1-⁠7) Phuthego ya ba-Filipi e be e kgatha tema e kgolo go thušeng Paulo bodireding bja gagwe. (Ba-Filipi 4:​15, 16) Phuthego ya Jerusalema ka boyona letšatši le letšatši e be e phatlalatša dijo go bahlologadi ba hlokago, gomme baapostola ba ile ba kgetha banna ba šupago ba swanelegago go hlokomela gore ga go bahlologadi ba swanetšego bao ba bego ba hlokomologwa.​—Ditiro 6:​1-⁠6.

Diphuthego tša pele tša Bokriste di be di le komana-madula-a-bapile go tšea kgato le ge go ka tšwelela dinako tše thata. Ka mohlala, ge moporofeta Agabo a be a porofeta ka go tla ga tlala e kgolo, barutiwa ka phuthegong ya Antokia ya Siria “ba [ile ba] kwana bohle xore ba romêlê bana babô ba ba axilexo naxeng ya Juda thušo, ka mo e mongwê le e mongwê a kxônaxo ka xona.” (Ditiro 11:​28, 29) A moya o mobotse gakaakang o ba ilego ba o bontšha ka go naganela dinyakwa tša ba bangwe!

Ke’ng seo se ilego sa tutuetša Bakriste ba pele gore e be ba neago ka seatla se bulegilego le go bontšha lerato? Ee, ke bjang motho a ka bago le moya wa go nea? Re ka ithuta mo gontši ka go hlahloba ka bokopana mohlala wa Kgoši Dafida.

Thekgo e Botse ya Dafida Bakeng sa Borapedi bja Therešo

Mo e ka bago nywaga e 500, areka ya kgwerano​—lefelo le lekgethwa leo le bego le emela go ba gona ga Jehofa​—e be e se na bodulo bja sa ruri bja khutšo. E be e bewa ka tenteng, goba ka tabarenakeleng, yeo e bego e rwalwa go ya kua le kua nakong ya go ralala ga ba-Isiraele kua lešokeng go ba go fihlela ba tsena Nageng ya Kholofetšo. Kgoši Dafida o ile a kganyoga kudu go tšea areka ka tenteng yeo e bego e bewa ka go yona gomme a age ngwako wo o swanelegago bakeng sa Jehofa wo o bego o tla ba le areka e kgethwa. Ge a be a bolela le moporofeta Nathane, Dafida o itše: “O k’O bônê, nna ke dutše ngwakong wa merôkwana, xomme polokêlô ya kxwêranô ya Morêna e ruleletšwe ke mašela.”​—1 Koronika 17:⁠1.

Lega go le bjalo, Dafida e be e le monna wa  ntwa. Ka gona Jehofa o laetše gore ke morwa wa gagwe Salomo yo nakong ya pušo ya khutšo, a bego a tla aga tempele ya go bolokela areka ya kgwerano. (1 Koronika 22:​7-10) Lega go le bjalo, se ga se sa ka sa thibela moya wa Dafida wa go nea. Ka go rulaganya sehlopha se segolo sa batho bao ka nako e lekaneditšwego ba bego ba tla mo thuša go phetha modiro, o ile a lokišeletša go nea ditlabakelo tšeo di bego di tla dirišwa modirong wa go aga tempele. Ka morago o ile a botša Salomo gore: “Ke lokišeditše Ngwakô wa Morêna dixauta tša ’Talente tše dikete tše lekxolo, le silifêra [ya] ’Talente tše dikete tše sekete, le mphiri le thsipi ye e sa lekanywexo; di xôna ké tše ntši; le dikwata le mafsika ke di lokišitše.” (1 Koronika 22:​14) Ka ge a be a se a kgotsofala ka seo, go tšwa mahumong a gagwe a motho ka noši, Dafida o ile a neela ka gauta le silifera tšeo mo nakong ye di ka bitšago diranta tše fetago 9 300 000 000. Go feta moo, barwa ba kgoši le bona ba ile ba neela ka go rata. (1 Koronika 29:​3-⁠9) Ka kgonthe, Dafida o bontšhitše moya o botho wa go nea!

Ke’ng seo se tutueditšego Dafida go nea ka seatla se bulegilego? O ile a lemoga gore dilo ka moka tšeo a bego a di hweditše le tšeo a bego a di phethagaditše e be e le ka  lebaka la ditšhegofatšo tša Jehofa. O ile a dumela thapelong ka gore: “Morêna Modimo wa rena! Lehumô lé ka moka le re le boloketšexo xo axêla Leina le lekxêthwa la xaxo Ngwakô, le re tletše lè e-⁠tšwa ’atleng sa xaxo; ké la xaxo ka moka. Modimo wa-ka; ke tseba xore O fenyêka pelo, ’me O kxahlwa ke boloki; ’me nna ka dira ka pelo-bolô ka nthša dilô tšé ka moka ka xo ithapa; byale ke thaba xe ke bôna sethšaba sa xaxo se se lexo fá, sè Xo nthšetša dineô ka xo ithapa.” (1 Koronika 29:​16, 17) Dafida o ile a tšeela godimo tswalano ya gagwe le Jehofa. O ile a lemoga go nyakega ga go hlankela Modimo “ka pelo yohle le ka môya wa mafolofolo,” gomme o ile a hwetša lethabo ka go dira bjalo. (1 Koronika 28:⁠9) Dika tše tše swanago gape di ile tša tutuetša Bakriste ba pele go bontšha moya wa go nea.

Jehofa​—Monei yo Mogolo

Ke go Jehofa mo re hwetšago mohlala o mobotse wa go nea. Yo lerato le yo a hlokomelago ke yena “xobane Yêna, letšatši la xaxwe ó le hlabišetša ba babe le ba boló; le pula ya xaxwe ó e nešetša baloki le bakxôpô.” (Mateo 5:​45) O nea batho ka moka “bophelô, le môya, le tšohle.” (Ditiro 17:​25) Ke therešo, bjalo ka ge morutiwa Jakobo a bontšha, “’Neô tšohle tše botse, le  ’mphô tšôhle di tletšexo, di tšwa xodimo xo Ra-dietša.”​—Jakobo 1:⁠17.

Mpho e kgolo ya Jehofa go rena ke ya go romela morwa wa gagwe “e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:​16) Ga go motho yo a ka bolelago gore mpho e bjalo e mo swanetše, “[gobane] ba dirile dibe bohle, ba hlaya letaxô la Modimo.” (Ba-Roma 3:​23, 24; 1 Johane 4:​9, 10) Topollo ya Kriste ke motheo le mokero bakeng sa ge Modimo “a nea ka mokxwa wó wa xo pala polêlô,” e lego, “kxauxêlô ya Modimo.” (2 Ba-Korinthe 9:​14, 15) Bakeng sa go leboga mpho ya Modimo, Paulo o ile a dira modiro wa go ‘tiiša bohlatse bja ebangedi ya kgaugelo ya Modimo’ gore e be wa bophelo bja gagwe ka moka. (Ditiro 20:​24) O ile a lemoga gore e be e le thato ya Modimo gore “batho bohle ba phološwê ba fihlêlê tsebô Ya therešô.”​—1 Timotheo 2:⁠4.

Lehono, se se phethagatšwa ka go bolela mo gogolo le modiro wa go ruta wo mo nakong ye o katološitšwego go fihla dinageng tše 234 lefaseng ka bophara. Jesu o ile a bolela e sa le pele ka katološo ye ge a be a re: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:​14, NW) Ee, “ebangedi e swanetše xo kwatšwa pele dithšabeng ka moka.” (Mareka 13:​10) Ngwageng o fetilego bagoeledi ba ka godimo ga dimilione tše tshelelago ba ditaba tše dibotse ba neetše diiri tše 1 202 381 302 modirong wo gomme ba swara dithuto tša Beibele tša ka godimo ga 5 300 000. Ka ge maphelo a le kotsing, thuto ye e bohlokwa kudu.​—Ba-Roma 10:​13-15; 1 Ba-Korinthe 1:⁠21.

Dikgatišo tše dimilione​—go akaretša Dibeibele, dipuku le diporoutšha​—di gatišwa ngwaga o mongwe le mongwe bakeng sa go thuša bao ba swerwego ke tlala ya therešo ya Beibele. Go oketša moo, mo e ka bago dikopi tše dimilione tše dikete tša dimakasine tša Morokami le Phafoga! di a tšweletšwa. Ka ge batho ba arabela ditabeng tše dibotse, Diholo tša Mmušo le Diholo tša Kopano tša Dihlatse tša Jehofa tšeo di šomago e le mafelo a tlhahlo ya Beibele di a agwa. Ngwaga o mongwe le o mongwe go rulaganywa dikopano tša tikologo le tša matšatši a kgethegilego gotee le dikopano tša selete. Tlwaetšo ya baromiwa, balebeledi ba basepedi, bagolo le bahlanka ba bodiredi le yona e sa dutše e tšwela pele. Re leboga Jehofa ka go dira gore ditokišetšo tše ka moka di hwetšagale ka “molaki e a bôtêxaxo yo bohlale.” (Mateo 24:​45-47) Re rata gakaakang go bontšha tebogo go Yena!

Go Bontšha Tebogo go Jehofa

Go swana le go agwa ga tempele le go swaragana le dinyakwa tša diphuthego tša Bakriste ba pele, thekgo ya tša ditšhelete bakeng sa ditokišetšo tše ka moka e tšwa ka mo go feletšego meneelong ya boithatelo. Lega go le bjalo, go swanetše go gopolwa gore ga go yo a ka humišago Jehofa, Mong wa dilo ka moka. (1 Koronika 29:​14; Hagai 2:⁠8) Ka gona, meneelo ke bohlatse bja go bontšha go rata Jehofa le kganyogo ya rena ya go tšwetša pele borapedi bja therešo. Paulo o re dika tše tša go nea ka seatla se bulegilego, di bontšha gore ‘re leboga Modimo.’ (2 Ba-Korinthe 9:​8-13) Jehofa o kgothaletša moya o bjalo ka gobane o bontšha gore re na le moya o swanetšego le pelo e botse go yena. Bao ba nago le seatla se bulegilego gomme ba ithekga ka Jehofa ba tla šegofatšwa ke yena gomme ba tla šegofala moyeng. (Doiteronomio 11:​13-15; Diema 3:​9, 10; 11:​25) Jesu o re kgonthišetša gore mafelelo e tla ba a lethabo, ge a re: “Lešexo la monei le phala la monewa.”​—Ditiro 20:⁠35.

Bakriste bao ba nago le moya wa go nea ga ba letele feela go fihlela nakong ya tlhokagalo. Eupša, ba tsoma dibaka tša gore ba ‘dire botse; ba bo direle batho bohle, gagolo ba bo direle batho babo bona ba tumelo.’ (Ba-Galatia 6:​10) Ge a ba kgothaletša mokgwa wa Modimo wa go nea ka seatla se bulegilego, Paulo o ngwadile gore: “Le se kê le lebala xo dira batho xa-botse le xo ba nea; xobane Modimo ó kxahlwa ke didimo tše byalo.” (Ba-Hebere 13:​16) Go šomiša matlotlo a rena​—nako, matla le ditšhelete​—go thuša ba bangwe le go tšwetša pele borapedi bjo bo sekilego go thabiša Jehofa Modimo kudu. Ka kgonthe, o rata moya wa go nea.

[Lepokisi/Seswantšho go letlakala 28, 29]

Ditsela Tšeo ka Tšona ba Bangwe ba Kgethago go Nea

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo ya tšhelete yeo ba e tsenyago ka mapokising ao a ngwadilwego “Meneelo Bakeng sa Modiro wa Lefase ka Bophara​—Mateo 24:​14.”

Kgweding e nngwe le e nngwe, diphuthego di romela ditšhelete tše ofising ya Dihlatse tša Jehofa yeo e hlankelago naga ya gabo tšona. Meneelo ya boithatelo ya ditšhelete e ka romelwa ka go lebanya go Accounting ­Office, Private Bag X2067, Krugersdorp, 1740, South Africa, goba ofising ya lekala yeo e hlankelago naga ya geno. Ditšheke di swanetše go lefelelwa go “Watch Tower.” Mabenyabje le dilo tše dingwe tše bohlokwa le tšona di ka neelwa. Lengwalo le lekopana leo le bolelago gore selo se se bjalo ke mpho e neelwago ka go lebanya le swanetše go sepela le meneelo ye.

THULAGANYO YA MENEELO YEO E ITHEKGILEGO KA MAEMO

Tšhelete e ka neelwa ka tlase ga thulaganyo e kgethegilego yeo go yona ge e ba monei a ka e kgopela, moneelo o tla bušetšwa go yena. Bakeng sa tsebišo e oketšegilego, hle ikopanye le Accounting Office ya ofisi ya lekala ya lefelong la geno atereseng e bontšhitšwego ka mo godimo.

GO NEA MO GO RULAGANYEDITŠWEGO

Go tlaleletša go dimpho tša ditšhelete tše di newago ka go lebanya le meneelo ya tša ditšhelete yeo e ithekgilego ka maemo, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Phemelo: Mokgatlo wa Watch Tower o ka ngwadišwa e le moja-bohwa wa thulaganyo ya tša phemelo ya bophelo goba thulaganyo ya go rola modiro/phenšene.

Di-Stock le di-Bond: Di-Stock le di-bond di ka neelwa go Mokgatlo wa Watch Tower e le mpho e neelwago ka go lebanya goba ka go boloka thoto e le go monei.

Dintlo le Mafelo ao e Lego Dithoto: Dintlo le mafelo ao e lego dithoto tšeo di ka rekišwago di ka neelwa e le mpho e neelwago ka go lebanya goba ge e ba e le lefelo la bodulo, ka go boloka thoto e le go monei, yo a ka tšwelago pele a dula go yona ge a sa dutše a phela. Ikopanye le ofisi ya lekala ya nageng ya geno pele o fetiša ka molao ntlo le ge e le efe goba lefelo leo e lego thoto.

Dikeno: Dithoto goba ­tšhelete di ka tlogelelwa Mokgatlo wa Watch Tower e le bohwa ka go dirišwa ga keno e dirilwego ka molao.

Bakeng sa tsebišo e oketšegilego, o ka ikopanya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba ofising ya lekala yeo e hlankelago naga ya geno.

Accounting Office

Watch Tower Bible and Tract Society of Pennsylvania

Private Bag X2067,

Krugersdorp, 1740

Mogala: (011) 761-1000

Ke’ng seo se ilego sa tutuetša Bakriste ba pele go nea ka seatla se bulegilego?