Dipotšišo tše Tšwago go Babadi

Bakriste ba swanetše go lebelela bjang go dirišwa ga magakabje a matswalo (birthstones)?

Ditšong tše dingwe, magakabje a matswalo a tswalanywa le kgwedi ya motho ya matswalo. Taba ya ge e ba Mokriste a tla rwala palamonwana yeo e nago le legakabje le itšego la matswalo ke phetho ya motho ka noši. (Ba-Galatia 6:⁠5) Ge go dirwa phetho yeo, go na le dilo tša bohlokwa tšeo go swanetšwego go naganwa ka tšona.

Encyclopaedia Britannica e bolela gore legakabje la matswalo ke “lefsika la bohlokwa leo le tswalanywago le letšatši-kgwedi la matswalo a motho, leo ka mo go tlwaelegilego go naganwago gore go le rwala go tliša mahlatse goba boemo bjo bobotse bja bophelo.” Puku ye ya nyakišišo e oketša ka gore: “Balepi ba bantši ba dinaledi ba be ba dutše ba lebelela mafsika a itšego a bohlokwa e le ao a nago le matla a phagametšego a tlhago.”

Ka mo go kgethegilego mehleng ya bogologolo ba bantši ba be ba dumela gore legakabje la matswalo le be le tlišetša yo a le rwalago mahlatse. Na Mokriste wa therešo o dumela se? Aowa, ka gobane a tseba gore Jehofa o ile a sola bao ba ilego ba mo tlogela le bao ba bego ba bota “modimo wa Mahlatse.”​—Jesaya 65:​11, NW.

Mehleng ya Magareng, didupe di ile tša kgetha legakabje bakeng sa kgwedi e nngwe le e nngwe ya ngwaga. Di ile tša kgothaletša batho go rwala legakabje la kgwedi ya bona ya matswalo, mohlomongwe e le go šireletša yo a le rwalago kotsing. Eupša go ya ka Mangwalo e be e tla ba mo go fošagetšego gore Bakriste ba latele tlhahlo ya didupe, ka gobane di solwa ke Beibele.​—Doiteronomio 18:​9-⁠12.

E be e tla ba mo go sa swanelago go Bakriste go lebelela palamonwana e le ya bohlokwa ka mo go kgethegilego ka gobane e e-⁠na le legakabje la matswalo. Dihlatse tša Jehofa ga di keteke matšatši a matswalo. Se ke ka gobane meletlo e bjalo e lebiša tlhokomelo e kgolo kudu mothong gomme matšatši a matswalo ao a ilego a begwa ka Beibeleng ke feela a babuši bao ba bego ba sa hlankele Modimo.​—Genesi 40:​20; Mateo 14:​6-⁠10.

Batho ba bangwe ba nagana gore go rwala dipalamonwana tšeo di nago le legakabje la matswalo go na le tutuetšo e botse semelong sa yo a di rwalago. Lega go le bjalo, Bakriste ba therešo ga ba dumele se, ka gobane ba tseba gore “motho e mofsa” o aparwa ka tlase ga tutuetšo ya moya o mokgethwa wa Modimo le ka go diriša melao ya motheo ya Mangwalo.​—Ba-Efeso 4:​22-⁠24.

Selo sa bohlokwa kudu ke gore o e rwalela eng. Ge a dira phetho ya ge e ba o tla rwala palamonwana yeo e nago le legakabje la matswalo, Mokriste a ka ipotšiša gore, ‘Na ke nyaka go rwala palamonwana ye feela ka gobane ke kgahlwa ke legakabje, gaešita le ge le tswalanywa le kgwedi ya-ka ya matswalo? Goba na ke tutueditšwe ka tsela e itšego ke dikgopolo tša ditumela-khwele tšeo batho ba bangwe ba ilego ba di tswalanya le magakabje a bjalo?’

Mokriste o swanetše go hlahloba pelo ya gagwe e le gore a tsebe gore boikemišetšo bja gagwe ke bofe. Mangwalo a re: “Mo xo tšohle di dišwaxo, diša pelo y’axo; xobane bophelô bo hlaxa xo yona.” (Diema 4:​23) Ge a dira phetho mabapi le magakabje a matswalo, Mokriste yo mongwe le yo mongwe o swanetše go naganišiša ka boikemišetšo bja gagwe le kamoo phetho ya gagwe e ka kgomago yena le ba bangwe.​—Ba-Roma 14:​13.