“BATAMELANG KGAUFSI LE MODIMO, GOMME O TLA BATAMELA KGAUFSI LE LENA”

Pele le ka Morago Melao ya Motheo ya Beibele e mo Thušitše Gore a Fetoge

GE E be e sa le mofsa, Adrian o be a le bogale e bile a e-⁠na le lehloyo. Go galefa ga gagwe ga kapejana go be go lebiša bogaleng bjo bogolo. O be a e-⁠nwa, a kgoga a bile a phela bophelo bjo bo gobogilego. Adrian o be a tsebja bjalo ka le-punk a bile a e-⁠na le mokgwailo wo o bego o bontšha tumelo ya gagwe ya bohloka-pušo. Ge a hlalosa nywaga yeo o re: “Ke be ke kota moriri wa-ka ka tsela ya se-punk, ke o kgomaretša ka sekgomaretši se se thata gore o emelele gomme ka dinako tše dingwe ke o fetola o mohwibidu goba wa mmala o mongwe.” Adrian o be a bile a phutše nko.

Adrian o ile a dula ka ntlong ya go hlagala le bagwera ba gagwe ba bangwe ba mmalwa ba marabele. Ba be ba e-⁠nwa le go kgoga dihlare-tagi moo. Adrian o gopola gore, “ke be ke diriša sehlare-tagi seo se bitšwago speed gomme ka nako e swanago ke itlhabela ka Valium le selo le ge e le sefe seo ke bego nka kgona go se hwetša. Ge dihlare-tagi goba sekgomaretši di be di se gona, ke be ke ntšha peterole ka dikoloing tša batho gomme ke e diriša gore e ntage.” Adrian o be a le kotsi le go ba yo šoro ka mo go feteletšego ka baka la go phela bophelo bja setarateng bja bošoro. Batho ka kakaretšo ba be ba sa mo nyake. Ka nako e swanago, botumo bja gagwe bo be bo gogela bagwera ba babe.

Ganyenyane-ganyenyane, Adrian o ile a lemoga gore bao ba bego ba ipitša bagwera ba gagwe ba be ba gwerana le yena ka mabaka a boithati. Go feta moo, o ile a phetha ka gore “pefelo ka moka gotee le bošoro ga se tša ntlišetša selo.” A ikwa a se na morero e bile a gakanegile, o ile a tlogela bagwera ba gagwe. Ge a be a hwetša kopi ya Morokami mo go bego go agwa gona, o ile a kgahlwa ke molaetša wa yona wo o theilwego Beibeleng, gomme se se ile sa lebiša thutong ya Beibele le Dihlatse tša Jehofa. ­Adrian o ile a arabela taletšong e rego: “Batamelang kgaufsi le Modimo, gomme o tla batamela kgaufsi le lena.” (Jakobo 4:⁠8, NW) E le mafelelo a se, Adrian o ile a bona go nyakega gore a thome go diriša melao ya motheo yeo e hwetšwago ka Mangwalong a Makgethwa.

Tsebo e oketšegago ya Beibele e bile le mafelelo a mabotse letswalong la Adrian gomme ya dira gore a fetole tsela ya gagwe ya go phela. O ile a thušwa gore a fenye go galefa ga gagwe ga kapejana le go hlagolela boitshwaro. Ka baka la matla a Lentšu la Modimo, semelo sa Adrian se ile sa fetoga ka mo go feletšego.​—Ba-Hebere 4:⁠12.

Lega go le bjalo, ke bjang Beibele e ka bago le mafelelo a bjalo a matla? Tsebo ya Mangwalo e re thuša go ‘apara motho e mofsa.’ (Ba-Efeso 4:​24) Ee, semelo sa rena se fetošwa ke ge re šomiša tsebo e nepagetšego yeo e hwetšwago ka Beibeleng. Eupša tsebo e bjalo e fetola batho bjang?

Sa pele, Beibele e bontšha mekgwa e sa nyakegego ya motho yeo e swanetšwego go tlogelwa. (Diema 6:​16-19) Sa bobedi, Mangwalo a re kgothaletša go bontšha dika tše dibotse tšeo di tšweletšwago ke moya o mokgethwa wa Modimo. Tše di akaretša “leratô, le lethabô, le moláô; . . . xo se fêle pelo, le botho, le bonôlô, le pôtêxô le bolêta, le boithswarô.”​—Ba-Galatia 5:​22, 23.

Tsebo e tseneletšego ka dinyakwa tša Modimo e thušitše Adrian go itlhahloba le go hlaola mekgwa  ya semelo yeo e swanetšwego go hlagolelwa le yeo e swanetšego go tlošwa. (Jakobo 1:​22-25) Eupša seo e be e le mathomo-mayo. Go tlaleletša tsebong, go be go nyakega maikemišetšo​—selo se se bego se tla tutuetša Adrian go dira phetogo.

Adrian o ithutile gore semelo se sefsa seo se kgahlišago se bopša ‘go ya ka seswantšho sa Eo a se hlodilego.’ (Ba-Kolose 3:​10) O ile a lemoga gore semelo sa Mokriste se swanetše go swana le semelo sa Modimo ka noši. (Ba-Efeso 5:⁠1) Go ya ka thuto ya Beibele, Adrian o ithutile ka ditirišano tša Jehofa le batho gomme a bona dika tša Modimo tše dibotse, tša go swana le lerato, botho, go loka, kgaugelo le toko. Tsebo e bjalo e ile ya šušumeletša Adrian gore a rate Modimo le go katanela go ba mohuta wa motho yo Jehofa a mo amogelago.​—Mateo 22:⁠37.

Ge nako e dutše e tšwela pele, ka thušo ya moya o mokgethwa wa Modimo, Adrian o ile a kgona go laola go galefa ga gagwe mo go šoro. Yena le mosadi wa gagwe gabjale ba swaregile ka go thuša ba bangwe go hlwekiša maphelo a bona ka thušo ya tsebo ya Beibele. Adrian o re: “Go fapana le bagwera ba-ka ba kgale bao ba hwilego, ke a phela le go thabela bophelo bja lapa bjo bo thabilego.” Adrian ke bohlatse bjo bo phelago bja gore matla a Beibele a ka fetola bophelo gore e be bjo bobotse.

[Lepokisi go letlakala 25]

Melao ya Motheo ya Beibele e a Šoma

Ye e latelago ke melao ya motheo ya Beibele yeo e thušitšego bontši bja batho ba bogale le ba bašoro gore ba be le khutšo:

“Le phedišanê xa-botse le batho ka moka. Le se kê la itefeletša; šuthêlang boxale bya Modimo.” (Ba-Roma 12:​18, 19) Anke Modimo a dire phetho ya gore tefetšo e tla tla neng le gore e tla tlela bomang. A ka dira bjalo ka tsebo e feletšego ya ditherešo, gomme tefetšo le ge e le efe yeo a tla e dirago e tla bontšha toka ya gagwe e phethagetšego.

“Xe Le xalefa Le se kê la senya; a letšatši le se dikêlê Lè sa xalefile. ’Me Le se kê la šuthêla Diabolo sebaka.” (Ba-Efeso 4:​26, 27) Ka dinako tše dingwe, motho a ka galefa ka lebaka le le kwagalago. Ge e ba seo se direga, ga se a swanela go dula a “xalefile.” Ka baka la’ng? Ka gobane seo se ka mo hlohleletša gore a dire se sebe, ka gona a bulela “Diabolo sebaka,” se sa feleletša ka go se sa amogelwa ke Jehofa Modimo.

“Lesa xo xalefa, O ilê lehlôyô; xe O ka selekêxa O tlo bá wa senya.” (Psalme 37:⁠8) Maikwelo a sa laolegego a ka lebiša ditirong tše di sa laolegego. Ge e ba motho a galefa, a ka bolela goba go dira dilo tše di ka kwešago ba bangwe bohloko.

“Pefelo ka moka gotee le bošoro ga se tša ntlišetša selo”