‘Rathang Lentsu la Modimo le ga Kgopamiše’

“Se O swanetšexo xo se phêxêlêla ké xore Modimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.”​—2 TIMOTHEO 2:⁠15.

1, 2. (a) Ke ka baka la’ng bašomi ba nyaka didirišwa? (b) Bakriste ba swaregile modirong ofe, gomme ba bontšha bjang gore ba tsoma Mmušo pele?

BAŠOMI ba nyaka didirišwa go ba thuša go dira mediro ya bona. Lega go le bjalo, go fo ba le sedirišwa le ge e le sefe ga se mo go lekanego. Mošomi o nyaka sedirišwa se se swanetšego, le gona o swanetše go se diriša ka tsela e nepagetšego. Ka mohlala, ge o ka re o aga mokutwana gomme wa ba o nyaka go kgomaganya mapolanka a mabedi, o ka se nyake feela noto le dipikiri. O tla swanelwa ke go tseba kamoo o ka kokotelago sepikiri koteng ka ntle le go koba sepikiri. Go leka go kokotela sepikiri koteng o sa tsebe go diriša noto go tla ba thata kudu, gaešita le mo go ferekanyago. Eupša didirišwa tšeo di swarwago ka mo go nepagetšego di re thuša go phetha mediro ya rena gore re be le mafelelo a kgotsofatšago.

² Ka ge re le Bakriste, re na le modiro wo re swanetšego go o dira. Ke modiro wa bohlokwa bjo bogolo kudu. Jesu Kriste o ile a kgothaletša balatedi ba gagwe go ‘tsoma mmušo pele.’ (Mateo 6:​33) Re ka dira seo bjang? Tsela e nngwe ke ka go ba ba fišegago modirong wa go bolela ka Mmušo le wa go dira barutiwa. Tsela e nngwe gape ke ka go thea bodiredi bja rena ka go tia Lentšung la Modimo. Tsela ya boraro ke ka go ba le boitshwaro bjo bobotse. (Mateo 24:​14; 28:​19, 20; Ditiro 8:​25; 1 Petro 2:​12) Go ba bao ba atlegago le bao ba thabilego kabelong ye ya modiro wa Bokriste, re nyaka didirišwa tše di swanetšego le tsebo ya kamoo re ka di dirišago ka mo go nepagetšego. Moapostola Paulo o beile mohlala o mobotse kudu e le mošomi wa Mokriste tabeng ye, le gona o kgothaleditše badumedi-gotee le yena go mo ekiša. (1 Ba-Korinthe 11:⁠1; 15:​10) Ka gona, re ka ithuta’ng go Paulo, e lego mošomi-gotee le rena?

Paulo​—Mogoeledi yo a Fišegago wa Mmušo

3. Ke ka baka la’ng go ka thwe moapostola Paulo e be e le mošomi yo a fišegago wa Mmušo?

³ Paulo e be e le mošomi wa mohuta mang? Ka ntle le pelaelo o be a fišega. Paulo o ile a ineela ka matla, a phatlalatša ditaba tše dibotse tikologong e kgolo go dikologa karolo ya Mediterranean. Moapostola yo yo a fišegago, ge a be a nea lebaka la go tsebatša ga gagwe Mmušo ka phišego o itše: “Xobane xe ke ruta Ebangedi, xa ke dirêle xo tumišwa;  ke kwa kè xapeletšwa; ’me nka ba yo madi-mabe xe nka lesa xo bolêla Ebangedi.” (1 Ba-Korinthe 9:​16) Na Paulo o be a tshwenyegile ka go phološa bophelo bja gagwe feela? Aowa. E be e se moithati. Go e na le moo, o be a kganyoga gore ba bangwe le bona ba holwe ke ditaba tše dibotse. O ngwadile gore: “Tšé ka moka ke di dira ka ’baka la Ebangedi, xore le nna ke bê wa xabô-bao e lexo ba yôna.”​—1 Ba-Korinthe 9:⁠23.

4. Ke sedirišwa sefe seo bašomi ba Bakriste ba se tšeelago godimo kudu?

⁴ Moapostola Paulo e be e le mošomi yo a ikokobeditšego yo a ilego a lemoga gore a ka se ithekge feela ka bokgoni bja gagwe ka noši. Go fo swana le ge mmetli a nyaka noto, Paulo o be a nyaka sedirišwa se se swanetšego bakeng sa go tsenya therešo ya Modimo ka dipelong tša batheetši ba gagwe. Ke sedirišwa sefe seo a ilego a se diriša kudu? E be e le Lentšu la Modimo, Mangwalo a Makgethwa. Ka mo go swanago, Beibele ke sedirišwa sa motheo seo re se dirišago bakeng sa go re thuša go dira barutiwa.

5. E le gore re be badiredi ba atlegilego, ke’ng seo re swanetšego go se dira go tlaleletša go tsopoleng mangwalo?

⁵ Paulo o be a tseba gore go ratha Lentšu la Modimo ka mo go swanetšego go be go akaretša go feta go fo le tsopola. O be a “kxodiša.” (Ditiro 28:​23) Bjang? Paulo o ile a diriša ka katlego Lentšu la Modimo leo le ngwadilwego go kgodiša ba bantši go amogela therešo ya Mmušo. O ile a ba nea mabaka. Ka dikgwedi tše tharo sinagogeng ya kua Efeso, Paulo o be a “ba hlathollêla ditaba tša mmušô wa Modimo, à ba eletša [“kgodiša,” NW].” Le ge “ba bangwê ba [ile ba] ithatafatša ba xana xo dumêla,” ba bangwe ba ile ba theetša. Ka baka la bodiredi bja Paulo kua Efeso, “lentšu la Morena [le ile] la ênêla.”​—Ditiro 19:​8, 9, 20.

6, 7. Paulo o ile a tumiša bjang bodiredi bja gagwe, gomme re ka dira bjang se se swanago?

⁶ Ka ge e be e le mogoeledi yo a fišegago wa Mmušo, Paulo o ile a ‘tumiša bodiredi bja gagwe.’ (Ba-Roma 11:​13, bapiša le NW.) Bjang? O be a se na taba le go ikgodiša; le gona o be a se na dihlong tša go tsebja phatlalatša e le yo mongwe wa bašomi-gotee le Modimo. Go e-⁠na le moo, o ile a lebelela bodiredi bja gagwe e le tokelo e kgolo kudu. Paulo o ile a ratha Lentšu la Modimo ka bokgoni le ka tsela e atlegago. Modiro wa gagwe o nago le dienywa o ile wa hlohleletša ba bangwe, wa thuša go ba tutueletša go phetha bodiredi bja bona ka botlalo kudu. Le gona ka tsela ye, bodiredi bja gagwe bo ile bja tumišwa.

⁷ Ka go swana le Paulo, re ka tumiša modiro wa rena re le badiredi ka go diriša Lentšu la Modimo leboelela le ka tsela e atlegago. Dibopegong ka moka tša bodiredi bja rena bja tšhemo, pakane ya rena e swanetše go ba go boledišana ka selo se itšego go tšwa ka Mangwalong le batho ba bantši ka mo go ka kgonegago. Re ka dira bjang se ka go kgodiša? Ela hloko ditsela tše tharo tše bohlokwa: (1) Lebiša tlhokomelo Lentšung la Modimo ka tsela yeo e dirago gore le hlompšhe. (2) Ka bohlale hlalosa seo Beibele e se bolelago gomme o bontšhe kamoo se šomago ka gona. (3) Nea mabaka ka Mangwalo ka tsela yeo e kgodišago.

8. Ke didirišwa dife tša go bolela ka Mmušo tšeo re nago le tšona lehono, gomme o di dirišitše bjang?

⁸ Bagoeledi ba Mmušo ba mehleng yeno ba na le didirišwa tšeo Paulo a bego a se na tšona nakong ya bodiredi bja gagwe. Tše di akaretša dipuku, dimakasine, diporoutšha, dipampišana tša taletšo, dipampišana, dikhasete le dibidio. Ngwaga-kgolong o fetilego, go be go dirišwa gape le dikarata tša bohlatse, dikeramafomo, dikoloi tše di nago le digodiša-modumo le dikgašo tša radiong. Ke therešo gore sedirišwa sa rena se se kaone-kaone ke Beibele, gomme re swanetše go diriša sedirišwa se se bohlokwa gabotse le ka mo go nepagetšego.

Bodiredi bja Rena bo Swanetše go Thewa Lentšung la Modimo

9, 10. Re ka ithuta’ng go tšwa keletšong ya Paulo yeo a e neilego Timotheo mabapi le go dirišwa ga Lentšu la Modimo?

⁹ Re ka diriša bjang Lentšu la Modimo e le sedirišwa se se atlegago? Ka go ela hloko mantšu a a Paulo ao a bego a lebišitšwe go mošomi-gotee le yena Timotheo: “Se O swanetšexo xo se phêxêlêla ké xore Modimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la  therešô à sa kxopamiše.” (2 Timotheo 2:​15) Ke’ng seo se bolelwago ke ‘go ratha lentšu la therešo ka go se kgopamiše’?

¹⁰ Lentšu la Segerika le le fetoletšwego e le “go ratha ka go se kgopamiše” ka go lebanya le bolela “go sega thwii” goba “go thula tsela yeo e lego thwii.” Ke feela keletšong ya Paulo e yago go Timotheo moo lentšu leo le dirišitšwego ka Mangwalong a Bakriste a Segerika. Lentšu lona leo le ka dirišwa go hlalosa go lema diforo tše di lego thwii ka terekere ka tšhemong. Ka ntle le pelaelo foro yeo e kgopamego e tla hlabiša molemi yo a nago le bokgoni dihlong. E le gore e be “modiri e a se naxo bosodi,” Timotheo o ile a gopotšwa gore go ka se dumelelwe go aroga le ge e le gofe dithutong tša therešo tša Lentšu la Modimo. Timotheo o be a sa swanela go dumelela dipono tša gagwe ka noši di tutuetša go ruta ga gagwe. O be a swanetše go thea boboledi bja gagwe le dithuto tša gagwe ka go lebanya ka Mangwalong. (2 Timotheo 4:​2-⁠4) Ka tsela ye, ba dipelo tše di botegago ba be ba tla lebišwa go beng le pono ya Jehofa ka ditaba, e sego go amogela filosofi ya lefase. (Ba-Kolose 2:​4, 8) Se se swanago ke sa therešo lehono.

Boitshwaro bja Rena e Swanetše go ba bjo Bobotse

11, 12. Boitshwaro bja rena bo na le mafelelo afe go ratheng ga rena Lentšu la Modimo re sa kgopamiše?

¹¹ Re swanetše go dira se se fetago go fo ratha Lentšu la Modimo ka mo go nepagetšego ka go tsebatša ditherešo tša lona. Boitshwaro bja rena bo swanetše go dumelelana le lona. “Re badirišani ba Modimo,” ka baka leo ga se ra swanela go ba bašomi ba baikaketši. (1 Ba-Korinthe 3:⁠9) Lentšu la Modimo le re: “Byale wene, O rutaxo ba bangwê, O re’ng Ò sa ithute? O iletša xo utswa, wa tla wa utswa. O iletša xo otswa, wa tla wa otswa. O hlaswa medimo ya diswanthšô, wa tla wa thopa tša nywakong ya medimo.” (Ba-Roma 2:​21, 22) Ka gona, ka ge re le badirišani ba Modimo ba mehleng yeno, tsela e nngwe yeo ka yona re rathago Lentšu  la Modimo re sa kgopamiše ke ka go ela hloko keletšo ye: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.”​—Diema 3:​5, 6.

¹² Re ka letela mafelelo afe ka go ratha Lentšu la Modimo re sa kgopamiše? Ela hloko matla ao Lentšu la Modimo le le ngwadilwego le ka bago le ona maphelong a batho ba dipelo tše di botegago.

Lentšu la Modimo le na le Matla a go Fetoša Maphelo

13. Go dirišwa ga Lentšu la Modimo go ka tšweletša’ng mothong?

¹³ Ge molaetša wa Lentšu la Modimo o amogelwa e le wo o ka botwago, o ba le tutuetšo e matla yeo e thušago batho go dira diphetogo tše dikgolo maphelong a bona. Paulo o be a bone go šoma ga lentšu la Modimo gomme o ile a hlatsela mafelelo a lona a mabotse go bao ba ilego ba fetoga Bakriste kua Thesalonika ya bogologolo. Ka go rialo o ile a ba botša gore: “[Ga re kgaotše] xo leboxa Modimo ka xe mola Lè tlêlwa ke Lentšu le le bexo le bolêlwa ke rena, Lè sa ka la le amoxêla boka lentšu la batho, la le amoxêla è le la Modimo, la therešô, ya tla ya ba lôna le le diraxo mo xo lena.” (1 Ba-Thesalonika 2:​13) Go Bakriste bao​—ge e le gabotse, go balatedi ba Kriste ka moka​—kgopolo ya motho e fokolago e ka se bapišwe le bohlale bjo bo phagamego bja Modimo. (Jesaya 55:⁠9) Ba-Thesalonika ba ile ba “amoxêla Lentšu ka lethabô la Môya-mokxêthwa mola ditlaišexo è le tše ntši” gomme ya ba mehlala go badumedi ba bangwe.​—1 Ba-Thesalonika 1:​5-⁠7.

14, 15. Molaetša wa Lentšu la Modimo o matla gakaaka’ng, gomme ka baka la’ng?

¹⁴ Lentšu la Modimo ke le matla, go swana le Mothopo wa lona e lego Jehofa. Le tšwa go “Modimo e a phelaxo,” yoo ‘magodimo a dirilwego’ ka lentšu la gagwe gomme lentšu leo ka mehla ‘le phetha se a le rometšego sona.’ (Ba-Hebere 3:​12; Psalme 33:⁠6; Jesaya 55:​11) Seithuti se sengwe sa Beibele se itše: “Modimo ga a ikaroganye le Lentšu la gagwe. Ga a le latole bjalo ka ge eka ke selo se šele go yena. . . . Ka go rialo, ka mehla le kgongwa ke se se le diragalelago ka morago ga ge le boletšwe; ka gobane le tlemagane le Modimo yo a phelago.”

¹⁵ Molaetša o tšwago ka Lentšung la Modimo ke o matla gakaaka’ng? O na le matla a magolo. Paulo o ngwadile ka mo go swanetšego gore: “Lentšu la Modimo ké le le phelaxo, ké le matla; ka boxale le phala thšoša efe le efe ya maxale a mabedi; xomme le phololetša la bá la aroxanya pelo le môya, le malokololô le môkô; ’me le tseba xo fênyêka diakanyô le kxopolô tša pelo.”​—Ba-Hebere 4:⁠12.

16. Lentšu la Modimo le ka fetoša motho ka mo go feletšego gakaaka’ng?

¹⁶ Molaetša o lego ka Lentšung la Modimo le le ngwadilwego “ka boxale [o] phala thšoša efe le efe ya maxale a mabedi.” Ka gona, o na le matla a bjalo a magolo ao a tseneletšego ao a fetago setlabakelo goba sedirišwa le ge e le sefe se se dirilwego ke motho. Lentšu la Modimo le phuleletša dikarolo tša ka gare tša motho gomme le ka mo fetoša ka gare, la kgoma kamoo a naganago ka gona le seo a se ratago, la mo dira mošomi yo a amogelegago le yo a boifago Modimo. A sedirišwa se matla gakaakang!

17. Hlalosa matla a fetošago maphelo a Lentšu la Modimo.

¹⁷ Lentšu la Modimo le bontšha seo motho a lego sona ka gare-gare ge go bapetšwa le seo a naganago gore ke sona goba seo a dumelelago ba bangwe go se bona. (1 Samuele 16:⁠7) Gaešita le motho yo kgopo ka dinako tše dingwe a ka uta bokagare bja gagwe ka go bo šira ka botho goba go ineela bodumeding. Batho ba babe ba ikaketša ka mabaka a bokgopo. Baikgogomoši ba ikgakanya ka go itira baikokobetši mola ba nyaka go tšeelwa godimo ke batho. Lega go le bjalo, ka go ntšhetša nyanyeng seo se lego ka pelong e le ka kgonthe, matla a Lentšu la Modimo a ka tutueletša motho yo a ikokobeditšego go apola motho wa kgale gomme a “aparê motho e mofsa, e a bopetšwexo xo etša Modimo xo lokeng le kxethexong ya makxonthe.” (Ba-Efeso 4:​22-24) Le gona dithuto tša Lentšu la Modimo di ka fetoša batho ba dihlong gore e be Dihlatse tša Jehofa tše di nago le sebete le bagoeledi ba fišegago ba Mmušo.​—Jeremia 1:​6-⁠9.

18, 19. Bontšha kamoo therešo ya Mangwalo e ka fetošago boemo bja kgopolo bja motho go ya ka dirapa tše goba go tšwa phihlelong yeo o bilego le yona tirelong ya tšhemo.

¹⁸ Matla a fetošago maphelo a Lentšu la Modimo a na le mafelelo a mabotse bathong kae le kae. Ka mohlala, bagoeledi ba Mmušo go tšwa Phnom  Penh, Cambodia, ba be ba dira boboledi profenseng ya Kompong Cham gabedi ka kgwedi. Ka morago ga go kwa baruti ba bangwe ba bolela gampe ka Dihlatse tša Jehofa, moruti wa mosadi wa lefelong leo o ile a rulaganya go kopana le Dihlatse nakong e latelago ge di be di etetše profenseng yeo. O ile a di hloma ka dipotšišo tša mabapi le go bina matšatši a maikhutšo gomme a theetša ka kelohloko ge di dutše di mo nea mabaka ka Mangwalo. Ke moka o ile a bolela gore: “Ga bjale ke a tseba gore seo baruti-gotee le nna ba se boletšego ka lena ga se therešo! Ba boletše gore ga le diriše Beibele, eupša mesong ye le dirišitše yona feela!”

¹⁹ Mosadi yo o ile a tšwetša pele dipoledišano tša gagwe tša Beibele le Dihlatse gomme ga se a ka a dumelela ditšhošetšo tša go mo theoša boruting di mo dira gore a kgaotše. O ile a botša mogwera wa gagwe ka dipoledišano tša Mangwalo tšeo a bago le tšona, yoo ka morago ga moo a ilego a thoma go ithuta Beibele le Dihlatse. Mogwera yo wa gagwe o ile a ba le mafolofolo kudu mabapi le seo a bego a ithuta sona moo e lego gore go e nngwe ya ditirelo tša ka kerekeng yeo a bego a e tsena o ile a tutueletšega go bolela gore, “E-tlang le ithute Beibele le Dihlatse tša Jehofa!” Kapejana ka morago ga moo, yo e bego e le moruti gotee le ba bangwe ba ile ba thoma go ithuta Beibele le Dihlatse tša Jehofa.

20. Phihlelo ya mosadi wa kua Ghana e bontšha bjang matla a Lentšu la Modimo?

²⁰ Le gona matla a Lentšu la Modimo a bontšhwa tabeng ya Paulina, mosadi wa kua Ghana. Mogoeledi wa Mmušo wa nako e tletšego o ile a swara thuto ya Beibele le yena ka puku ya Tsebo e Išago Bophelong bjo bo sa Felego. * Paulina o be a nyetšwe segadikane gomme o ile a bona go nyakega gore a dire diphetogo, eupša monna wa gagwe le bohle ba leloko la gabo ba ile ba mo ganetša o šoro. Rakgolo’agwe e lego moahlodi yo mogolo kgorong e bile e le mogolo wa kereke, o ile a leka go mo gokeletša ka go diriša gampe lengwalo la Mateo 19:​4-⁠6. Moahlodi o ile a kwagala a kgodišegile, eupša kapejana Paulina o ile a lemoga gore se se be se swana le go kgopamiša Mangwalo ga Sathane nakong ya ge a be a leka Jesu Kriste. (Mateo 4:​5-⁠7) O ile a gopola mantšu a kwagalago a Jesu ka lenyalo, a bolela ka go lebanya gore Modimo o bopile batho e le monna le mosadi, e sego monna le basadi, le gore bobedi bja bona, e sego boraro bja bona, e be e tla ba nama e tee. O ile a kgomarela phethong ya gagwe gomme mafelelong o ile a newa tumelelo ya go hlala ka setšo lenyalong la segadikane. Go se go ye kae, e be e le mogoeledi wa Mmušo yo a thabilego le yo a kolobeditšwego.

Tšwelang Pele le Ratha Lentšu la Modimo le sa Kgopamiše

21, 22. (a) Ka ge re le bagoeledi ba Mmušo, re nyaka go ba le boikemišetšo bofe? (b) Ke’ng seo re tla se ahla-ahlago sehlogong se se latelago?

²¹ Ka ntle le pelaelo Lentšu la Modimo le le ngwadilwego ke sedirišwa se matla seo re ka se dirišago go thuša ba bangwe go dira diphetogo maphelong a bona e le gore ba batamele kgaufsi le Jehofa. (Jakobo 4:⁠8) Go etša ge bašomi bao ba nago le bokgoni ba diriša didirišwa tša bona e le gore ba be le mafelelo a mabotse, eka re ka ikemišetša go dira boiteko bjo bo tseneletšego bja go diriša Lentšu la Modimo e lego Beibele ka bokgoni modirong wa rena wo re o neilwego ke Modimo re le bagoeledi ba Mmušo.

²² Re ka diriša bjang Mangwalo ka mo go atlegilego modirong wa rena wa go dira barutiwa? Tsela e nngwe ke ka go hlagolela bokgoni bja rena bja go ba barutiši ba kgodišago. Hle lebišang tlhokomelo sehlogong se se latelago, ka gobane se šišinya ditsela tša go ruta le go thuša ba bangwe go amogela molaetša wa Mmušo.

Tše dingwe tša didirišwa tšeo Bakriste ba di dirišago modirong wa go tsebatša Mmušo

Na o a Gopola?

• Ke didirišwa dife tšeo bagoeledi ba Mmušo ba nago le tšona?

• Ke ka ditsela dife Paulo e bego e le mohlala bjalo ka mošomi wa Mmušo?

• Ke’ng seo se akaretšwago go ratheng Lentšu la Modimo ka mo go nepagetšego?

• Lentšu la Jehofa le le ngwadilego ke sedirišwa se matla gakaaka’ng?