Rutang ka Morero wa go Dira Barutiwa

“Akwila le Perisila xe ba [kwele Apollo], ba mmiletša xa-xabô, ba mo hlathollêla thutô ya Modimo xabotse.”​—Ditiro 18:⁠26.

1. Gaešita le ge a be a “fišêxa pelong,” Apollo o be a nyaka’ng?

PERISILA le Akwila e lego banyalani ba Bakriste ba lekgolong la pele la nywaga, ba ile ba lebeledišiša Apollo ge a be a nea polelo sinagogeng ya motseng wa kua Efeso. Ka mantšu a gagwe a matla le ka matla a go kgodiša, Apollo o ile a tanya tlhokomelo ya batheetši ba gagwe. O be a “fišêxa pelong,” gomme o be a ­“ruta batho ditaba tša Jesu ka . . . thlaoloxanyô.” Lega go le bjalo, go be go le molaleng gore Apollo o be a “tseba kolobetšô ya Johane fêla.” Seo Apollo a bego a ruta ka sona mabapi le Kriste e be e le sa therešo go fihla bokgoleng bjo itšego. Bothata e be e le gore se be se sa felela. Apollo o be a swanetše go oketša tsebo ya gagwe mabapi le tema ya Jesu Kriste go phethagatšweng ga morero wa Jehofa.​—Ditiro 18:​24-⁠26.

2. Perisila le Akwila ba ile ba amogela tlhohlo efe?

 ² Ka go se dika-dike, Perisila le Akwila ba ile ba ithapela go thuša Apollo gore a boloke dilo “tšohle” tšeo Kriste a di laetšego. (Mateo 28:​19, 20) Pego e re ba ile ba biletša Apollo “xa-xabô, ba mo hlathollêla thutô ya Modimo xabotse.” Lega go le bjalo, go be go e-⁠na le ditherešo tše itšego mabapi le Apollo tšeo di ka bago di dirile gore Bakriste ba bangwe ba dika-dike go mo ruta. Ke ditherešo dife? Le gona re ka ithuta’ng maitekong a Perisila le Akwila a go ahla-ahla Mangwalo le Apollo? Go ahla-ahla pego ye ya histori go ka re thuša bjang go lebiša tlhoko­melo go thomeng dithuto tša magae tša Beibele?

Lebišang Tlhokomelo Bathong

3. Ke ka baka la’ng setlogo sa Apollo se sa ka sa thibela Perisila le Akwila go mo ruta?

³ Ka ge e be e le wa lešika la ba-Juda, go molaleng gore Apollo o godišeditšwe motseng wa Alexandria. Ka nako yeo Alexandria e be e le motse-mošate wa Egipita e bile e le lefelo la tša thuto e phagamego, e tsebja ka bokgobapuku bja yona bjo bogolo. Motse o be o e-⁠na le badudi ba bantši ba ba-Juda go akaretša le diithuti. Ka lebaka leo, phetolelo ya Segerika ya Mangwalo a Sehebere yeo e tsebjago e le Septuagint e ile ya tšweletšwa fao. Ga go makatše gore Apollo e be e le “yo matla mangwalong”! Akwila le Perisila e be e le badiri ba ditente. Na go ba sekgwari polelong ga Apollo go ile gwa ba dira gore ba ikwe ba sa swanelege go mo thuša? Aowa. Ka lerato ba ile ba ela hloko motho yo, dinyakwa tša ­gagwe le kamoo ba bego ba ka mo thuša ka gona.

4. Apollo o ile a hwetša kae thušo yeo a bego a e nyaka, gomme bjang?

⁴ Go sa šetšwe gore Apollo e be e le sekgwari polelong gakaakang, o be a nyaka tlhahlo. Thušo yeo a bego a e nyaka e be e ka se hwetšwe yunibesithing le ge e le efe eupša e be e hwetšwa go ditho-gotee le yena tša phuthego ya Bokriste. Apollo o be a le kgaufsi le go holwa ke dintlha tšeo di bego di tla feleletša ka gore a be le kwešišo e nepagetšego kudu ka tokišetšo ya Modimo ya phološo. Perisila le Akwila ba ile “ba mmiletša xa-xabô, ba mo hlathollêla thutô ya Modimo xabotse.”

5. O ka bolela’ng ka boemo bja moya bja Perisila le Akwila?

⁵ Perisila le Akwila ba be ba tiile moyeng gomme ba tsemile medu tumelong. Go molaleng gore ba be ba ‘dula ba loketše go ipolela ka kholofelo ge ba fetola mang le mang e a ba sekišago,’ e ka ba e le mohumi, modiidi, seithuti goba lekgoba. (1 Petro 3:​15) Akwila le mosadi wa gagwe ba be ba kgona go ‘ratha lentšu la therešo ba sa kgopamiše.’ (2 Timotheo 2:​15) Go molaleng gore e be e le barutwana ba mafolofolo ba Mangwalo. Apollo o ile a kgongwa ka mo go tseneletšego ke tlhahlo yeo e theilwego ‘lentšung la Modimo le le phelago le le matla,’ leo le kgomago pelo.​—Ba-Hebere 4:⁠12.

6. Re tseba bjang gore Apollo o ile a kgahlišwa ke thušo yeo a ilego a e amogela?

⁶ Apollo o ile a kgahlišwa ke mohlala wa barutiši ba gagwe gomme a ba le bokgoni kudu go direng barutiwa. O ile a diriša tsebo ya gagwe ka botlalo modirong wa go tsebatša ditaba tše dibotse, kudu-kudu go badudi ba ba-Juda. Apollo o be a e-⁠na le thušo ka mo go kgethegilego go kgodišeng ba-Juda ka Kriste. Ka ge a be a le “matla mangwalong,” o ile a kgona go ba bontšha gore baporofeta ka moka ba kgale ba be ba lebeletše pele go tleng ga Kriste. (Ditiro 18:​24) Pego e oketša ka gore ka mo go latelago Apollo o ile a ya Akaya, “’me ba [ba] dumetšexo a ba tšweletša-pele xaxolo ka neô ya xaxwe. A phêxêlêla xo kxodiša Ba-Juda ka xo [ba] šupetša ka mangwalô xore Jesu ké Yêna Kriste.”​—Ditiro 18:​27, 28.

Ithuteng Mohlaleng wa Barutiši ba Bangwe

7. Go tlile bjang gore Akwila le Perisila e be barutiši ba ba nago le bokgoni?

⁷ Akwila le Perisila e ile ya ba barutiši ba ba nago le bokgoni ba Lentšu la Modimo bjang? Ka ntle le go ba ga bona le mafolofolo thutong ya motho ka noši le go ba gona dibokeng, go gwerana ga bona kgaufsi le moapostola Paulo go swanetše go ba go ba thušitše kudu. Paulo o ile a dula legaeng la Perisila le Akwila kua Korinthe  ka lebaka la dikgwedi tše 18. Ba ile ba šoma gotee ba dira le go lokiša ditente. (Ditiro 18:​2, 3) Nagana ka dipoledišano tše di tseneletšego tša Mangwalo tšeo ba swanetšego go ba ba bile le tšona. Le gona go gwerana le Paulo ka tsela yeo go tloga go ile gwa ba thuša gakaakang moyeng! Diema 13:​20 e re: “Šika le bahlale O hlalefê; mokxônana-le-mašilo ó tlo thsereana.” Bagwera ba babotse ba bile le mafelelo a kgahlišago ­mekgweng ya bona ya moya.​—1 Ba-Korinthe 15:⁠33.

8. Perisila le Akwila ba ile ba ithuta’ng ka go lebelela Paulo bodireding bja gagwe?

⁸ Ge Perisila le Akwila ba be ba lebeletše Paulo e le mogoeledi wa Mmušo, ba ile ba bona mohlala o kgahlišago kudu wa morutiši yo mobotse. Pego e lego go Ditiro e bolela gore Paulo “ka disabatha ó be a ruta diphuthexong [kua Korinthe], a kxodiša Ba-Juda le Ba-Gerika.” Ka morago, ge a be a e-⁠na le Silase le Timotheo, Paulo ‘o ile a fišegela go hlatsela go ba-Juda gore Jesu ke yena Kriste.’ Ge ditho tša kua sinagogeng di be di sa bontšhe kgahlego, Perisila le Akwila ba ile ba lemoga gore Paulo o ile a ya lefelong leo modiro wa gagwe wa boboledi o bego o tla amogelega, ntlong yeo e bego e le kgaufsi le sinagoge. Moo Paulo o ile a kgona go thuša Krispo, “moxolo wa phuthêxô,” gore e be morutiwa. Go tloga go le molaleng gore Perisila le Akwila ba ile ba lemoga gore go dirwa ga morutiwa yoo go bile le mafelelo a magolo le a enywago dienywa tšhemong yeo. Pego e re: “Krispo . . . a dumêla Morêna, le ba lapa la xabô ka moka. Ba-Korinthe ba bantši ba ba kwilexo Lentšu ba dumêla ba kolobetšwa.”​—Ditiro 18:​4-⁠8.

9. Perisila le Akwila ba ile ba arabela bjang mohlaleng wa Paulo?

⁹ Mohlala wa Paulo bodireding bja tšhemo o ile wa ekišwa ke bagoeledi ba bangwe ba Mmušo ba bjalo ka Perisila le Akwila. Moapostola o ile a kgothaletša Bakriste ba bangwe gore: “Bang baetši ba-ka byalo ka xe nna kè le mo-etša-Kriste.” (1 Ba-Korinthe 11:⁠1) Ka go dumelelana le mohlala wa Paulo, Perisila le Akwila ba ile ba thuša Apollo go kwešiša dithuto tša Bokriste ka mo go nepagetšego. Ka morago ga moo, o ile a thuša ba bangwe. Ka ntle le pelaelo Perisila le Akwila ba ile ba thuša go dira barutiwa kua Roma, Korinthe le Efeso.​—Ditiro 18:​1, 2, 18, 19; Ba-Roma 16:​3-⁠5.

10. O ithutile’ng go Ditiro kgaolo 18 seo se tlago go go thuša modirong wa go dira barutiwa?

¹⁰ Re ka ithuta’ng go hlahlobeng ga rena Ditiro kgaolo 18? Go ba gona, bjalo ka ge Akwila le Perisila ba ile ba ithuta go Paulo, re ka kaonefatša bokgoni bja rena bja go dira barutiwa ka go latela mohlala wa barutiši ba ba babotse ba Lentšu la Modimo. Re ka gwerana le bao ba ‘fišegelago go nea bohlatse’ le bao ba neago “bohlatse ka botlalo” go ba bangwe. (Ditiro 18:​5, Kingdom Interlinear Translation) Re ka lebelela kamoo ba fihlelelago dipelo tša batho ka go diriša bokgoni bja go ruta ka go kgodiša. Bokgoni bjo bo bjalo bo ka re thuša go dira barutiwa. Ge motho a ithuta Beibele le rena, re ka šišinya gore a laletše  ditho tše dingwe tša lapa goba baagišani go ba gona thutong. Goba mohlomongwe re ka mo kgopela gore a re tsebiše ka ba bangwe bao re ka ithutago Beibele le bona.​—Ditiro 18:​6-⁠8.

Bulang Dibaka tša go Dira Barutiwa

11. Barutiwa ba bafsa ba ka hwetšwa kae?

¹¹ Paulo le Bakriste-gotee le yena ba ile ba nyaka go dira barutiwa ka go bolela ka ntlo le ntlo, mmarakeng le maetong a bona​—ge e le gabotse, kae le kae. Bjalo ka mošomi wa Mmušo yo a fišegago yo a nyakago go dira barutiwa, na o ka katološa mediro ya gago ya tirelong ya tšhemo? Na o ka diriša ka mo go holago dibaka tša go tsoma bao ba swanelegago gomme o ba rute? Ke ka ditsela dife tše dingwe tšeo ka tšona bagoeledi-gotee le rena ba ditaba tše dibotse ba ilego ba hwetša barutiwa? Sa pele anke re lebeleleng sebopego sa go nea bohlatse ka mogala.

12-14. E le go bontšha mehola ya go nea bohlatse ka mogala, anega phihlelo ya gago ka noši goba yeo e lego mo dirapeng tše.

¹² Ge a be a nea bohlatse ka ntlo le ntlo kua Brazil, Mokriste yo re tla mmitšago Maria o ile a nea mosadi yo mofsa yo a bego a e-⁠tšwa ka foleteng pampišana. A diriša sehlogo sa pampišana yeo e le matseno, Maria o ile a mmotšiša gore, “Na o tla rata go tseba mo go oketšegilego ka Beibele?” Mosadi o ile a araba ka gore: “Nka rata go tseba. Bothata ke gore ke morutiši, gomme go ruta go tšea nako ya-ka ka moka.” Maria o ile a hlalosa gore ba ka ahla-ahla dihlogo tša Beibele ka mogala. Mosadi yo o ile a nea Maria nomoro ya gagwe ya mogala gomme wona mantšiboa ao, o ile a thoma thuto ka mogala a diriša poroutšha ya Ke Eng Seo Modimo a se Nyakago go Rena?  *

¹³ Ge a be a nea bohlatse ka mogala, modiredi wa nako e tletšego wa kua Ethiopia o ile a makala nakong ya ge a be a bolela le monna eupša a e-⁠kwa go hlabilwe mašata. Monna yo o ile a mo kgopela gore a mo leletše mogala ka moragonyana. Ge mosadi yo a mo leleditše mogala gape, o ile a kgopela tshwarelo gomme a bolela gore ka nako ya ge a be a mo leleditše pejana, yena le mosadi wa gagwe ba be ba le gare ga ngangišano e šoro. Kgaetšedi yo o ile a diriša mantšu a e le sebaka sa go mmotša ka tlhahlo e bohlale yeo Beibele e e neago bakeng sa go rarolla mathata a lapa. O ile a mmotša gore malapa a mantši a thušitšwe ke puku ya Sephiri sa Lethabo la Lapa, yeo e gatišitšwego ke Dihlatse tša Jehofa. Matšatši a sego kae ka morago ga ge puku e fihlile, kgaetšedi yo o ile a leletša monna yoo mogala gape. O ile a goeletša ka gore: “Puku ye e phološitše lenyalo la-ka!” Ge e le gabotse, o ile a kgobokanya lapa e le gore a le botše dintlha tše dibotse tše a di badilego ka pukung. Go ile gwa thongwa thuto ya legae ya Beibele, gomme go se go ye kae monna yo o ile a thoma go ba gona dibokeng tša Bokriste ka mehla.

¹⁴ Mogoeledi wa Mmušo kua Denmark yo a ilego a thoma thuto ya Beibele ka go nea bohlatse ka mogala o re: “Molebeledi wa tirelo o ile a nkgothaletša go tšea karolo go neeng bohlatse ka mogala. Mathomong ke ile ka gogela morago ka gore: ‘Tšeo ga se dilo tša-ka.’ Lega go le bjalo, ka letšatši le lengwe ke ile ka rapa sebete gomme  ka thoma go leletša mong wa ntlo wa mathomo mogala. Sonja o ile a araba gomme ka morago ga poledišano e kopana, a dumela go amogela puku ye e theilwego Beibeleng. Bošegong bjo bongwe re ile ra ahla-ahla taba ya tlholo, gomme o ile a nyaka go bala puku ya Life​—How Did It Get Here? By Evolution or by Creation. * Ke ile ka mmotša gore go tla ba bose ge re ka kopana gomme ra ahla-ahla taba ye. O ile a dumela. Sonja o be a itokišeleditše thuto ge ke fihla, gomme ga e sa le go tloga ka nako yeo re ile ra ithuta beke e nngwe le e nngwe.” Kgaetšedi ya rena ya Mokriste e phetha ka gore: “Ke ile ka rapelela gore ke be le thuto ya Beibele ka nywaga e mentši, eupša ga se ka ka ka letela go e hwetša ka go nea bohlatse ka mogala.”

15, 16. Ke diphihlelo dife tše o ka di laodišago tše di bontšhago mohola wa go dula re phafogetše ditsela tše di fapa-fapanego tša go thoma dithuto tša Beibele?

¹⁵ Ba bantši ba atlega ka baka la go diriša ditšhišinyo tša go nea bohlatse bathong kae le kae moo ba lego gona. Mosadi wa Mokriste wa kua United States o ile a emiša koloi ya gagwe kgaufsi le bene ya kgwebo moo dikoloi di emago gona. Ge mosadi yo a lego ka beneng a mmona, kgaetšedi o ile a thoma go mo hlalosetša modiro wa rena wa go ruta wa Beibele. Mosadi yo o ile a theetša, a tšwa ka beneng ke moka a ya ka koloing ya kgaetšedi yoo. O itše: “Ke thabile kudu gore o ile wa ema gomme wa bolela le nna. Ga se ka ka ka hwetša le ge e le efe ya dikgatišo tša lena tša Beibele ka lebaka le letelele. Ka ntle le moo, ke nyaka go ithuta Beibele gape. Na o tla ithuta le nna?” Ka go rialo kgaetšedi ya rena e ile ya aga boemo bjo bobotse bakeng sa go boledišana ka ditaba tše dibotse le ba bangwe.

¹⁶ Kgaetšedi ya kua United States e bile le phihlelo e latelago ge e be e etetše lefelo la go hlokomela batšofadi goba dikoka: O ile a boledišana le molaodi wa mediro e itšego moagong woo gomme a mmotša gore a ka rata go ithapela go thuša go kgotsofatša dinyakwa tša moya tša badudi ba fao. Kgaetšedi ya rena e ile ya tlaleletša ka gore e ka thabela go swara thuto e sa lefelelwego ya Beibele ya beke le beke le bohle bao ba tla ratago go ba gona. Molaodi o ile a mo nea tumelelo ya go etela diphapoši tša badudi ba fapa-fapanego. Go se go ye kae, o ile a kgona go swara thuto ya Beibele gararo ka beke le palo-moka ya badudi ba 26, bao yo mongwe wa bona a ­kgonago go ba gona dibokeng tša rena ka mehla.

17. Ke matseno afe ao gantši a atlegago go thomeng dithuto tša magae tša Beibele?

¹⁷ Go bagoeledi ba bangwe ba Mmušo, go ithapela ka go lebanya go swara thuto ya Beibele go tšweletša mafelelo a mabotse. Mesong e mengwe phuthego e nago le bagoeledi ba 105 e ile ya dira boiteko bjo bo kgethegilego bja go ithapela go swara thuto ya Beibele le beng ba dintlo ka moka bao ba kopanago le bona. Bagoeledi ba masome-seswai-tshela ba ile ba tšea karolo tirelong ya tšhemo, gomme ka morago ga go fetša diiri tše pedi modirong wa boboledi, ba ile ba hwetša gore bonyenyane go thomilwe dithuto tše difsa tša Beibele tše 15.

Tšwelang Pele le Tsoma ba ba Swanelegago

18, 19. Ke taelo efe e bohlokwa ya Jesu yeo re swanetšego go dula re e gopola, gomme re swanetše go ikemišetša go dira’ng go fihla bokgoleng bjoo?

¹⁸ Ka ge o le mogoeledi wa Mmušo, o ka rata go leka ditšhišinyo tše di boletšwego mo sehlogong se. Ke therešo gore e tla ba ga bohlale go ela hloko ditšo tša lefelong la geno ge o naganela mekgwa ya go nea bohlatse. Go feta tšohle,  a re duleng re gopola taelo ya Jesu ya go tsoma ba ba swanelegago gomme re thuše batho ba bjalo go ba barutiwa.​—Mateo 10:​11, NW; 28:⁠19.

¹⁹ E le gore re phethe morero woo, anke re ‘ratheng lentšu la therešo re sa kgopamiše.’ Re ka dira bjalo ka go diriša go kgodiša mo go theilwego ka go tia Mangwalong. Se se tla re thuša go kgoma dipelo tša bao ba bontšhago kgahlego gomme sa ba tutueletša go gata mogato. Ge re dutše re ithekga ka Jehofa ka thapelo, re ka tšea karolo go thušeng ba bangwe go ba barutiwa ba Jesu Kriste. Le gona modiro wo ke o putsago gakaakang! Ka go rialo anke re ‘phegeleleng gore Modimo a bone re le babotegi,’ ka mehla re tumiša Jehofa re le bagoeledi ba fišegago ba Mmušo, bao ba rutago ka morero wa go dira barutiwa.​—2 Timotheo 2:⁠15.

[Mengwalo ya tlase]

Perisila le Akwila ‘ba ile ba hlathollela Apollo thuto ya Modimo gabotse’

Apollo o ile a ba le bokgoni go direng barutiwa

Paulo o ile a ruta kae le kae moo a bego a e-⁠ya gona

Bulang dibaka tša go bolela

Na o a Gopola?

• Ke ka baka la’ng go be go nyakega gore Apollo a hlalosetšwe tsela ya Modimo ka mo go tletšego?

• Ke ka ditsela dife Perisila le Akwila ba ilego ba ithuta go moapostola Paulo?

• O ithutile’ng ka modiro wa go dira barutiwa go Ditiro kgaolo 18?

• O ka bula bjang dibaka tša go dira barutiwa?