Didiba tše di se Nago Meetse

MEHLENG ya Beibele, batho ba be ba itirela didiba ka go epa fase, kudu-kudu e le bakeng sa go boloka meetse. Ka dinako tše dingwe, didiba e be e le tsela e nnoši ya go boloka kabo ya meetse a bohlokwa Nageng ya Kholofetšo.

Ge moporofeta Jeremia a be a ngwala mantšu a Modimo, o ile a šupa didiba ka tsela ya seswantšhetšo ge a be a re: “Xobane sethšaba sa-ka se dirile masenyi a mabedi: Ba lahlile Nna sediba sa meetse a phelaxo, ba fata tša bôná didiba, didiba tša xo xôpa, di se naxo meetse.”​—Jeremia 2:⁠13.

Ka morago ga ge ba lahlile Modimo wa bona, Jehofa​—“sediba sa meetse a phelaxo”⁠—​ba-Isiraele ba ile ba retologela dikgweranong tša tša bohlabani le ditšhaba tša boheitene le borapeding bjo bo se nago matla bja medimo ya maaka. Ge re diriša papišo ya Jeremia, mafelo a bjalo a holofetšwego a botšhabelo a ile a ba didiba tše di se nago matla a go šireletša goba a go phološa.​—Doiteronomio 28:⁠20.

Na go na le seo re ithutago sona mohlaleng wo wa histori lehono? Go etša ge go be go le bjalo mehleng ya Jeremia, Modimo wa ka mo go sa felego Jehofa, e sa dutše e le Mothopo wa meetse a bophelo. (Psalme 36:⁠9; Kutollo 4:​11) Ke go yena feela moo batho ba ka hwetšago bophelo bjo bo sa felego ka Morwa wa gagwe Jesu Kriste. (Johane 4:​14; 17:⁠3) Lega go le bjalo, go swana le batho ba mehleng ya Jeremia, lešaba la batho lehono le kgetha go gana gaešita le go tšeela fase lentšu la Modimo bjalo ka ge le hlaloswa ka Beibeleng. Go e-⁠na le moo, le beile kholofelo ya lona ditharollong tše di lekanyeditšwego tša tša dipolitiki, go nea mabaka ka tsela e sa kwagalego ga batho le dikgopolong tša lefeela tša go hlompholla Modimo gotee le difilosofing. (1 Ba-Korinthe 3:​18-20; Ba-Kolose 2:⁠8) Kgetho e molaleng. O tla holofela mang? Na o tla holofela “sediba sa meetse a phelaxo” e lego Jehofa, goba na o tla holofela “didiba tša xo xôpa, [tše] di se naxo meetse”?

Seswantšho se se dirilwego ka letsopa sa mma wa modimogadi seo se hweditšwego lebitleng la mo-Isiraele

Photograph taken by courtesy of the British Museum

NA O TLA AMOGELA KETELO?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org