Dipotšišo tše Tšwago go Babadi

Ke ka kgopolo efe Hesekiele a ilego a ba “semuma” goba a ilego a “homola,” nakong ya go hlaselwa le go senywa ga Jerusalema?

Ge e le gabotse, se se bolela gore o be a se na seo a ka se tlaleletšago go molaetša wa diporofeto tša Jehofa woo a bego a setše a o boletše.

Moporofeta Hesekiele o thomile tirelo ya gagwe e le mohlapetši yo a botegago wa ba-Isiraele bao ba bego ba le bothopša Babele “ka ngwaxa [wa bohlano] wo kxoši Joyakini a išitšwexo bothopya ka wôna,” ka 613 B.C.E. (Hesekiele 1:​2, 3) Ka letšatši la lesome la kgwedi ya lesome ya modikologo wa go dula ga kgwedi la 609 B.C.E., o ile a tsebišwa ka pudulelo ya Modimo mabapi le go hlaselwa ga Jerusalema ke ba-Babele. (Hesekiele 24:​1, 2) Na ditla-morago tša tlhaselo e be e tla ba dife? Na Jerusalema le badudi ba yona bao ba hlokago tumelo ba be ba tla phonyokga? Bjalo ka mohlapetši, Hesekiele o be a setše a fetišeditše molaetša wa Jehofa o sa ganetšegego wa kahlolo, gomme go be go sa hlokagale gore Hesekiele a tlaleletše ka se sengwe, e le bjalo ka ge eka o dira molaetša woo gore o be o kgodišago kudu. Hesekiele o ile a ba semuma mabapi le go tlaleletša ka tsela le ge e le efe tabeng ya tlhaselo ya Jerusalema.​—Hesekiele 24:​25-⁠27.

Dikgweding tše sego kae ka morago ga go senywa ga Jerusalema ka 607 B.C.E., mophonyokgi o ile a tliša ditaba tša tshenyo ya motse o mokgethwa go Hesekiele kua Babele. Bošegong bja pele ga ge mophonyokgi a fihla, Jehofa ‘o ile a bula Hesekiele molomo, a se sa hlwa e le semuma.’ (Hesekiele 33:​22) Seo se ile sa fediša go homola ga Hesekiele.

Na Hesekiele o be a homotše e le ka kgonthe nakong yeo? Ga go bjalo le gatee, ka gobane gaešita le ka morago ga go “homola” moo, o ile a bolela diporofeto tšeo di bego di lebišitšwe ka go lebanya dinageng tša tikologong tšeo di ilego tša thabela go wa ga Jerusalema. (Hesekiele, dikgaolo 25-32) Pejana nakong ya tirelo ya Hesekiele e le moporofeta le mohlapetši, Jehofa o be a mmoditše gore: “Leleme la xaxo ke tlo le xomaretša maxalapeng, O tlê O bê semuma, wa se hlwê Ò e-⁠ba mokxalemi wa bôná, xobane ké moloko wa dinganga. E tlo re xe ke bolêla naxô’, ké mo ke tl’o xo Xo bula molomo.” (Hesekiele 3:​26, 27) Ge Jehofa a be a se na molaetša bakeng sa go botša ba-Isiraele, Hesekiele o be a tla dula e le semuma ge e le mabapi le setšhaba seo. Hesekiele o be a swanetše go bolela seo Jehofa a bego a nyaka gore a se bolele ka nako yeo Jehofa a bego a nyaka gore a dire bjalo. Go homola ga Hesekiele go bolela gore e be e le semuma ge e le mabapi le go bolela mantšu a tlhaloso ya boporofeta go ba-Isiraele.

Sehlopha sa mohlapetši sa mehleng yeno, Bakriste ba tloditšwego, se be se dutše se lemoša ka kahlolo ya Bojakane, Jerusalema ya seswantšhetšo. Ge “ma-setla-pelo” a phulega gomme a senya “Babele o moxolo,” e lego mmušo o mogolo wa bodumedi bja maaka, ba tloditšwego ba sehlopha sa Hesekiele ba ka se sa bolela selo ka go fedišwa ga Bojakane, bjo bo bopago karolo e kgolo ya mmušo woo.​—Mateo 24:​21; Kutollo 17:​1, 2, 5.

Ee, letšatši le tlo tla leo ba mašaledi a tloditšwego gotee le bagwera ba bona ba tlago go homola, go se na se sengwe se oketšegilego seo ba ka se bolelago go Bojakane. Seo e tla ba ge “dinaka” le “sebata” di senya le go hlobodiša Babele o Mogolo. (Kutollo 17:​16) Ke therešo gore se ga se bolele gore Bakriste ba tla ba dimuma ka tsela ya kgonthe. Go etša ge ba dira gabjale, ba tla tumiša Jehofa gomme ba bolela ka yena letšatši le letšatši le “go ditlogolo ka moka go iša ditlogolong.”​—Psalme 45:​18, PK; 145:⁠2.