“Le be Baleboxi”

“Mo dipelong tša lena xo bušê khutšô ya Modimo . . . Le bê baleboxi.”​—Ba-Kolose 3:⁠15.

1. Re bona phapano efe magareng ga phuthego ya Bokriste le lefase le le lego ka tlase ga taolo ya Sathane?

DIPHUTHEGONG tše 94 600 tša Dihlatse tša Jehofa lefaseng ka bophara, go na le moya wa go leboga. Seboka se sengwe le se sengwe se thoma le go fela ka thapelo yeo e akaretšago mantšu a go leboga Jehofa. Re kwa gantši dipolelwana tše di rego “re a leboga,” “le rena re a leboga” goba tše dingwe tše di swanago le tšona di bolelwa ke ba banyenyane le ba bagolo gotee le Dihlatse tše di sa tšwago go thoma go kopanela le tša nako e telele ge di dutše di kopanela borapeding le bogwereng bja lethabo. (Psalme 133:⁠1) Se se fapane gakaakang le boithati bjo bo lego gona gare ga ba bantši ‘bao ba sa tsebego Jehofa le bao ba sa kwego ebangedi’! (2 Ba-Thesalonika 1:⁠8) Re phela lefaseng leo le se nago tebogo. Ga go makatše ge re nagana gore ke mang e lego modimo wa lefase le​—Sathane Diabolo, mothekgi yo mogolo wa boithati, yoo boikgantšho bja gagwe le moya wa gagwe wa borabele di tseneletšego lekokong la batho!​—Johane 8:​44; 2 Ba-Korinthe 4:⁠4; 1 Johane 5:⁠19.

2. Ke temošo efe yeo re swanetšego go e ela hloko, gomme re tla ahla-ahla dipotšišo dife?

² Ka ge re dikologilwe ke lefase la Sathane, re swanetše go ba šedi gore re se ke ra senywa ke mekgwa ya lona. Lekgolong la pele la nywaga, moapostola Paulo o ile a gopotša Bakriste ba Efeso gore: “Le be Le ile le tšôna ka mokxwa wa lefase leno, Lè bušwa ke mmuši wa mmušô wa sebakeng, ke môya wo mehleng yeno o diraxo ka matla mo baneng ba xo se kwe. Le rena ka moka re be re ile le bôná ka dikxanyoxô tša nama ya rena, rè sa dira se se bexo se ratwa ke nama le maikwêlô a rena, rè sa le bana ba ba swanaxo le ba bangwê bao ba ba tswáletšwexo xo tlo xalefêlwa.” (Ba-Efeso 2:​2, 3) Seo ke sa therešo le ka ba bantši lehono. Ka gona, re ka kgomarela bjang moya wa go leboga? Jehofa o nea thušo efe? Ke ka ditsela dife tše di šomago tšeo ka tšona re ka bontšhago gore re na le tebogo e le ka kgonthe?

 Mabaka a go ba Bao ba Lebogago

3. Ke ka baka la’ng re leboga Jehofa?

³ Re swanetše go leboga Jehofa Modimo, Mmopi wa rena le Monei-Bophelo, kudu-kudu ge re ela hloko tše dingwe tša dimpho tše dintši tšeo a re neilego tšona ka seatla se se bulegilego. (Jakobo 1:​17) Letšatši le letšatši re leboga Jehofa gore re a phela. (Psalme 36:⁠9) Re bona bohlatse bjo bogolo bja mediro ya Jehofa go re dikologa, bjalo ka letšatši, ngwedi le dinaledi. Polokelo e humilego ya diminerale tše di phološago bophelo ya polanete ya rena, meoya e tswakanego gabotse ya legohleng le medikologo e raraganego ya tlhago ka moka di hlatsela tekanyo e tseneletšego yeo ka yona re swanetšego go leboga Tatago rena yo lerato wa legodimong. Kgoši Dafida o opetše ka gore: “Tše Wêna Morêna Modimo wa rena O re diretšexo tšôna ké tše ntši, ké mehlôlô, ké xo re setša. Mo-ka-Wêna xa’yô. Xe nka re ke a di bolêla, ka di anêxêla batho, di mpalêla xo di bala.”​—Psalme 40:⁠5.

4. Ke ka baka la’ng re swanetše go leboga Jehofa bakeng sa bogwera bja lethabo bjo re nago le bjona ka diphuthegong tša gabo rena?

⁴ Gaešita le ge ba sa dule paradeiseng ya kgonthe, lehono bahlanka ba Jehofa ba thabela go dula paradeiseng ya moya. Diholong tša rena tša Mmušo le dikopanong tša rena tše dikgolo le tše dinyenyane, re bona go šoma ga dienywa tša moya wa Modimo go badumedi-gotee le rena. Ka kgonthe, ge di bolela le batho bao ba se nago setlogo sa bodumedi, Dihlatse tše dingwe di šupa go seo Paulo a se hlalositšego lengwalong la gagwe le le yago go ba-Galatia. Sa pele di lebiša tlhokomelo go “medirô ya nama” gomme tša botšiša batheetši ba tšona seo ba se lemogilego. (Ba-Galatia 5:​19-23) Ba bantši ba araba kapejana gore mediro ye e hlaola lekoko la batho lehono. Ge ba bontšhitšwe tlhaloso ya dienywa tša moya wa Modimo gomme ka morago ba laleditšwe Holong ya Mmušo ya lefelong leo gore ba tlo iponela bohlatse bja se, ba bantši ba dumela kapejana gore: “Ruri, Modimo ó na le lena.” (1 Ba-Korinthe 14:​25) Le gona se ga se felele feela Holong ya Mmušo ya lefelong leo. Le ge o ka ya kae, ge o kopana le yo mongwe wa Dihlatse tša Jehofa tša ka godimo ga dimilione tše tshela, o hwetša moya o swanago wa lethabo le tlhalalo. Ka kgonthe, bogwera bjo bjoo bo agago ke lebaka la go leboga Jehofa, yo a neago moya wa gagwe go dira gore bo kgonege.​—Tsefanya 3:⁠9; Ba-Efeso 3:​20, 21.

5, 6. Re ka ipontšha bjang re le ba ba nago le tebogo bakeng sa mpho e kgolo kudu ya Modimo e lego topollo?

 ⁵ Neo e kgolo kudu, mpho e phethagetšego ka go fetišiša yeo Jehofa a re neilego yona ke Morwa wa gagwe, Jesu, yoo ka yena go neilwego sehlabelo sa topollo. Moapostola Johane o ngwadile gore: “Xe Modimo a re ratile ka mokxwa woo, xôna xo swanetše xe re ratana.” (1 Johane 4:​11) Ee, re ipontšha re le bao ba lebogago topollo e sego feela ka go bontšha lerato le tebogo go Jehofa eupša gape le ka go phela maphelo a rena ka tsela yeo e bontšhago lerato la go rata ba bangwe.​—Mateo 22:​37-⁠39.

⁶ Re ka ithuta mo go oketšegilego ka go bontšha tebogo ka go ela hloko tsela yeo Jehofa a ilego a dirišana le Isiraele ya bogologolo. Ka Molao woo a o neilego setšhaba ka Moše, Jehofa o ile a ruta batho dithuto tše dintši. Ka ‘tsebo le ka therešo ya Molao,’ re ka ithuta mo gontši mo go tla re thušago go latela keletšo ya Paulo e rego: “Le bê baleboxi.”​—Ba-Roma 2:​20; Ba-Kolose 3:⁠15.

Dithuto tše Tharo go tšwa Molaong wa Moše

7. Tokišetšo ya go ntšha karolo ya lesome e ile ya nea bjang ba-Isiraele sebaka sa go bontšha tebogo ya bona go Jehofa?

⁷ Molaong wa Moše, Jehofa o ile a nea ditsela tše tharo tšeo ka tšona ba-Isiraele ba bego ba ka bontšha tebogo ya bona e le ka kgonthe bakeng sa go loka ga gagwe. Sa pele go be go e na le karolo ya lesome. Karolo ya lesome ya ditšweletšwa tša naga gotee le “sa-lesome sa dikxomo le dihufsane” e be e swanetše go ba selo se “sekxêthwa sa Morêna.” (Lefitiko 27:​30-32) Ge ba-Isiraele ba be ba e-⁠kwa, Jehofa o be a ba šegofatša kudu. “Tlišang karolô ya lesome la ruri ngwakong wa polokêlô, xore Ntlong ya-ka xo bê le diphepi. Napang Le ntekê ka xo dira byalo;​—ó r’yalo Morêna wa mašaba,​—Le bônê xe ke bula nthoba tša lexodimo ka Le thšollêla thšexofatšô wa xo tlo Le xolêla.”​—Maleaki 3:⁠10.

8. Meneelo ya boithatelo e be e fapane bjang le go ntšha karolo ya lesome?

⁸ Sa bobedi, go oketša go senyakwa sa go ntšha karolo ya lesome, Jehofa o ile a lokišeletša gore ba-Isiraele ba ntšhe meneelo ya boithatelo. O ile a laela Moše go botša ba-Isiraele gore: “Xe Le tsene mo naxeng ye Nna ke Le išaxo xo yôna, mohla le jaxo boxôbê bya naxa yeo, Le nthšetšeng Morêna neô.” Tše dingwe tša dienywa tša bona tša mathomo tša “senkxwa sa bupi bya mabêle” di be di swanetše go newa e le ‘neo ya Jehofa’ go theoša le meloko ya bona. Ela hloko gore go be go sa nyakege tekanyetšo e beilwego ka go lebanya ya dienywa tše tša mathomo. (Numeri 15:​18-21) Eupša ge ba-Isiraele ba be ba ntšha meneelo ya tebogo, ba be ba kgodišegile gore ba tla hwetša tšhegofatšo ya Jehofa. Tokišetšo e swanago e bonwa mabapi le pono ya Hesekiele ya tempele. Re bala gore: “Le di-thaka-ngwaxa, le tša maitšibulô a mehuta-huta, le diêkarô tša mehuta-huta, le tša didimo tša mehuta-huta;  ké tša bôná. Le ba neêlê dibexô tša maupi a pele a lena, xore Le išê dithšexofatšo malapeng a lena.”​—Hesekiele 44:⁠30.

9. Jehofa o ile a ruta’ng ka tokišetšo ya go budutša?

⁹ Sa boraro, Jehofa o ile a rulaganya gore go be le mokgwa wa go budutša. Modimo o ile a laela gore: “Xe Le buna mašemo a lena, Le šiê mathokong; O se kê wa budutša. Le mo serapeng sa xaxo sa merara O se kê wa budutša, O se kê wa kxobêla dipudutša; O di tloxêlêlê badiidi le baeti. Ké Nna Morêna Modimo wa xaxo.” (Lefitiko 19:​9, 10) Le gona mo, go be go sa nyakege tekanyetšo e beilwego ka go lebanya. Go be go ithekgile ka mo-Isiraele yo mongwe le yo mongwe gore o be a tla tlogelela bahloki tekanyo e kaakang. Kgoši e bohlale Salomo o hlalositše ka mo go swanetšego gore: “Thlalla-badiidi ó adima Morêna; ’me Yêna ó tlo mmušetša tše a di neilexo bála.” (Diema 19:​17) Ka go rialo Jehofa o ile a ba ruta kwelobohloko le go naganela bahloki.

10. Ditla-morago e bile dife bakeng sa batho ba Isiraele ge ba be ba palelwa ke go ipontšha e le bao ba lebogago?

¹⁰ Jehofa o ile a šegofatša ba-Isiraele ge ka go kwa ba be ba tliša dikarolo tša lesome, ba ntšha meneelo ya boithatelo le go tlogelela badiidi se se itšego. Eupša ge batho ba Isiraele ba be ba palelwa ke go ipontšha e le bao ba lebogago, ba ile ba se sa amogelwa ke Jehofa. Se se ile sa lebiša masetla-pelong gomme mafelelong ba ya bothopša. (2 Koronika 36:​17-21) Ka gona, re ka ithuta dithuto dife?

Go Bontšha ga Rena go Leboga

11. Tsela e kgolo yeo ka yona re ka bontšhago tebogo ya rena go Jehofa ke efe?

¹¹ Tsela e kgolo yeo ka yona re ka tumišago Jehofa le go bontšha tebogo ya rena ka mo go swanago e akaretša “sehlabelo.” Ke therešo gore ka ge re le Bakriste, ga re ka tlase ga Molao wa Moše, ga re gapeletšege go nea dihlabelo tša diphoofolo goba dibjalo. (Ba-Kolose 2:​14) Lega go le bjalo, moapostola Paulo o kgothaleditše Bakriste ba ba-Hebere gore: “Ké xôna a re ipexeng xo Modimo ka sedimo sa thêtô, e lexo sôna seenywa sa melomo ye e ipolêlaxo ka Leina la xaxwe.” (Ba-Hebere 13:​15) Ka go diriša bokgoni le mahumo a rena go nea sehlabelo sa tebogo go Jehofa, go sa šetšwe gore ke bodireding bja phatlalatša goba ke “diphuthexong” tša Bakriste-gotee le rena, re ka bontšha tebogo e tšwago pelong go Tatago rena yo lerato wa legodimong, Jehofa Modimo. (Psalme 26:​12) Ka go dira bjalo, re ka ithuta’ng ditseleng tšeo ka tšona ba-Isiraele ba bego ba swanetše go bontšha tebogo ya bona go Jehofa?

12. Ge e le mabapi le boikarabelo bja rena bja Bokriste, re ka ithuta’ng thulaganyong ya go ntšha karolo ya lesome?

¹² Sa pele, bjalo ka ge re bone, tokišetšo ya go ntšha karolo ya lesome e be e se taba ya boikgethelo; mo-Isiraele yo mongwe le yo mongwe o be a swanetše go dira seo. Bjalo ka Bakriste, re na le boikarabelo bja go tšea karolo bodireding le go ba gona dibokeng tša Bokriste. Mediro ye ga se taba ya boikgethelo. Jesu o ile a bolela ka go lebanya boporofeteng bja gagwe bjo bogolo bja mabapi le mehla ya bofelo gore: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:​14, NW; 28:​19, 20) Moapostola Paulo o ile a budulelwa go ngwala mabapi le diboka tša Bokriste gore: “A re hlôkômêlaneng seng sa rena, re išanê leratong le medirong e botse. Re se ngalê phuthêxô ya xešo ka mokxwa wa ba bangwê; sa rena a e bê xo eletšana, xa-xolo ka xe letšatši le le kxaufsi; le lena Le a di bôna.” (Ba-Hebere 10:​24, 25) Re bontšha go leboga ga rena Jehofa ge ka lethabo re amogela boikarabelo bja rena bja go bolela le go ruta gotee le go bokana le bana babo rena ka mehla dibokeng tša phuthego, re lebelela dilo tše bjalo e le tokelo.

13. Ke thuto efe e hwetšwago dithulaganyong tša go ntšha meneelo ya boithatelo le go budutša?

¹³ Go oketša moo, re ka holwa ke go ela hloko ditokišetšo tše dingwe tše pedi tšeo ka tšona ba-Isiraele ba bego ba ka bontšha tebogo ya bona​—meneelo ya boithatelo le go budutša. Ka go fapana le go ntšha karolo ya lesome, moo e bego e le senyakwa seo se bego se e-⁠na le tekanyetšo e hlalositšwego ka go lebanya, meneelo ya boithatelo  le thulaganyo ya go budutša di be di se na tekanyo e beilwego ka go lebanya. Go e na le moo, di be di dumelela go tsenelela ga tebogo yeo mohlanka wa Jehofa a bego a e-⁠na le yona ka pelong go mo tutueletša go gata mogato. Ge re bapiša se, gaešita le ge re lemoga gore go tšea ga rena karolo bodireding le go ba gona dibokeng tša Bokriste ke boikarabelo bja motheo bja mohlanka yo mongwe le yo mongwe wa Jehofa, na re tšea karolo medirong ye ka pelo ka moka le ka moya wa go rata? Na re e lebelela e le sebaka sa go bontšha tebogo ya rena e tšwago pelong bakeng sa dilo ka moka tše Jehofa a re diretšego tšona? Na re tšea karolo medirong ye ka botlalo, go fihla bokgoleng bjoo maemo a rena a re dumelelago? Goba na re lebelela ye ka moka e le feela tlamo yeo re swanetšego go e dira? Go ba gona, tše ke dipotšišo tšeo re swanetšego go ikarabelela tšona. Moapostola Paulo o e beile ka tsela ye: “Motho a a šetšê modirô wa xaxwe; ké mo a tl’o xo rêtwa ka tša xaxwe, e sexo ka tša e mongwê.”​—Ba-Galatia 6:⁠4.

14. Jehofa o letetše’ng go rena tirelong ya rena go yena?

¹⁴ Jehofa Modimo o tseba maemo a rena gabotse. O lemoga mafokodi a rena. O tšeela godimo boikgafo bjoo bahlanka ba gagwe ba bo dirago ka go rata, e ka ba e le bjo bonyenyane goba bjo bogolo. Ga se a letela gore ka moka ga rena re tla neela ka tekanyo e lekanago, goba gore re ka kgona go dira bjalo. Ge a be a bolela ka go fana ka dilo tše di bonagalago, moapostola Paulo o ile a botša Bakriste ba Korinthe gore: “Xobane xe thatô e botse è le xôna, xo tlo thabêlwa se motho a se swerexo; xe a hlaêlwa, xa xo taba.” (2 Ba-Korinthe 8:​12) Molao wo wa motheo o šoma ka mo go swanago le tirelong ya rena go Modimo. Seo se dirago gore tirelo ya rena e amogelege go Jehofa ga se hlaolwe ka tekanyo yeo re se dirago ka yona eupša se hlaolwa ka tsela yeo re se dirago ka yona​—ka lethabo le ka pelo ka moka.​—Psalme 100:​1-⁠5; Ba-Kolose 3:⁠23.

Hlagolelang Gomme le Kgomareleng Moya wa Bobulamadibogo

15, 16. (a) Go na le tswalano efe magareng ga bodiredi bja bobulamadibogo le go leboga? (b) Bao ba sa kgonego go tšea bobulamadibogo ba ka bontšha bjang moya wa bobulamadibogo?

¹⁵ Tsela e putsago ya go bontšha tebogo ya  rena go Jehofa ke go tsenela bodiredi bja nako e tletšego. Ba tutuetšwa ke lerato la go rata Jehofa le tebogo ya go leboga botho bja gagwe bjo bo sa swanelago, bahlanka ba bantši ba ba ineetšego ba dirile diphetogo tše dikgolo maphelong a bona e le gore ba bule nako e oketšegilego bakeng sa go hlankela Jehofa. Ba bangwe ba kgona go hlankela e le babulamadibogo ba ka mehla, ba fetša palo-gare ya diiri tše 70 kgwedi e nngwe le e nngwe ba bolela ditaba tše dibotse le go ruta batho therešo. Ba bangwe, bao ba ka bago ba lekanyetšwa ke maemo a fapa-fapanego, ka dinako tše dingwe ba rulaganya go fetša diiri tše 50 ka kgwedi ba bolela e le babulamadibogo ba go thuša.

¹⁶ Eupša go thwe’ng ka bahlanka ba Jehofa ba bantši bao ba ka se kgonego go hlankela e le babulamadibogo ba ka mehla goba ba go thuša? Ba ka bontšha tebogo ka go hlagolela le go kgomarela moya wa bobulamadibogo. Bjang? Ka go kgothatša bao ba kgonago go tšea bobulamadibogo, ka go bjala ka baneng ba bona kganyogo ya go phegelela modiro wa tirelo ya nako e tletšego le ka go tšea karolo ka mafolofolo modirong wa boboledi go ya ka maemo a bona. Seo re se neago bodireding bja rena se ithekgile kudu ka go tsenelela ga tebogo yeo e lego ka dipelong tša rena bakeng sa seo Jehofa a se dirilego, seo a se dirago le seo a sa dutšego a tlo re direla sona.

Go Bontšha Tebogo ka ‘Lehumo la Rena’

17, 18. (a) Re ka bontšha tebogo bjang ka ‘lehumo la rena’? (b) Ke’ng seo Jesu a ilego a se lemoga ka moneelo wa mohlologadi, gomme ka baka la’ng?

¹⁷ Diema 3:⁠9 e re: “Loba Morêna ka khumô ya xaxo, le ka di-thaka-ngwaxa tša punô ya xaxo ka moka.” Ga go sa nyakega gore bahlanka ba Jehofa ba ntšhe karolo ya lesome. Go e na le moo, Paulo o ile a ngwalela phuthego ya Korinthe gore: “E mongwê le e mongwê a nthšê ka mo a kwanexo le pelo ya xaxwe; a se nthšê ka xo belaêla le ka xo xapeletšwa, xobane Mo-nea-à-thabile, Modimo ó a mo rata.” (2 Ba-Korinthe 9:⁠7) Go ntšha meneelo bakeng sa go thekga modiro wa go bolela ka Mmušo wa lefaseng ka bophara le gona go bontšha tebogo ya rena. Tebogo e tšwago pelong e re tutueletša go dira se ka mehla, mohlomongwe ra beela ka thoko se itšego beke e nngwe le e nngwe, bjalo ka ge Bakriste ba pele ba ile ba dira.​—1 Ba-Korinthe 16:​1, 2.

¹⁸ Ga se tekanyo ya seo re se ntšhago seo se bontšhago tebogo ya rena ya go leboga Jehofa. Go e na le moo, ke moya woo re neago ka wona. Se ke seo Jesu a ilego a se lemoga ge a be a bona batho ba lahlela dimpho tša bona ka polokelong kua tempeleng. Ge Jesu a be a bona mohlologadi wa mohloki a lahlela “dithšêlêtyana tše pedi,” o ile a re: “Ruri, ke a Le botša, mohlôlôxadi yó wa modiitšana ó thšetše se se fetišaxo sa ba bangwê ka moka. Xobane bao ka moka ba ba thšetšexo moo xo yaxo dineô, ba di nthšitše xo tše di ba tlaletšexo; ’me yêna ó nthšitše bohumanexing bya xaxwe, a thšela tšohle tše a bexo a tlo phela ka tšôna.”​—Luka 21:​1-⁠4.

19. Ke ka baka la’ng e le mo gobotse go hlahloba lefsa ditsela tšeo ka tšona re bontšhago tebogo ya rena?

¹⁹ Anke thuto ye ya kamoo re ka ipontšhago re e-⁠na le tebogo e re tutueletše go hlahloba lefsa ditsela tšeo ka tšona re bontšhago tebogo ya rena. Na mohlomongwe re ka oketša sehlabelo sa rena sa tebogo go Jehofa, gotee le go thekga ga rena modiro wa lefaseng ka bophara ka dilo tše di bonagalago? Go fihla bokgoleng bjoo re dirago bjalo, re ka kgonthišega gore Tatago rena yo lerato yo a nago le seatla se se bulegilego Jehofa, o tla thaba kudu gore re ipontšha re e-⁠na le tebogo.

“’Neô tšohle tše botse, le ’mphô tšôhle di tletšexo, di tšwa xodimo”

Ke dithuto dife tše tharo go tšwa Molaong tšeo di bontšhitšwego mo?

Re ka dira boikgafo bofe?

Na o a Gopola?

• Re swanetše go bontšha tebogo go Jehofa ka mabaka afe?

• Re ithuta dithuto dife tabeng ya go ntšha karolo ya lesome, meneelo ya boithatelo le go budutša?

• Re hlagolela bjang moya wa bobulamadibogo?

• Re ka diriša bjang ‘lehumo la rena’ bakeng sa go leboga Jehofa?