Lebaka Leo ka Lona ba Yago Kerekeng

“REPABLIKI ya Korea mo nakong ye e na le ma-Presbyterian a fetago a Amerika ka makga a e nyakilego go ba a mane.” Mantšu ao a lego ka makasineng wa Newsweek a ka ba a ile a makatša babadi ba bantši, ka ge batho ba bantši ba lebelela Korea e le lekoko la badumedi ba Confucius goba ba ma-Buddha. Lehono, moeng o tla hwetša dikereke tše dintši moo tšeo di bitšwago tša Bokriste, tšeo gantši di hlaolwago ka difapano tšeo di tukago mabone a mahwibidu a neon. Ka Disontaga, go tlwaelegile go bona batho e le ba babedi goba e le ba bararo, ba swere Dibeibele ka diatleng, ba e-⁠ya kerekeng. Go ya ka nyakišišo ya 1998, mo e nyakilego go ba 30 lekgolong ya batho ba Korea ba tsena kereke ya Katholika goba ya Protestanta, gomme ba feta bao ba ipolelago gore ke bona ma-Buddha.

Mehleng ye, ke mo go sa tlwaelegago go bona batho ba bantši kudu gakaalo lefelong le ge e le lefe ba e-⁠ya kerekeng ka mehla. Lega go le bjalo, go sa dutše go direga e sego feela kua Korea eupša gape le dinageng tše dingwe tša Asia, gotee le Afrika le Latin America. Ke ka baka la’ng batho ba bantši gakaakaa ba sa dutše ba ipolela gore ba dumela go Modimo mola go se šetše le go se be le taba ka bodumedi go bonagala go aparetša lefase? Ke ka baka la’ng ba e-⁠ya kerekeng?

Nyakišišo ya Gallup e utollotše gore ba ka godimo ga seripa-gare sa batho bao ba tsenago kereke kua Korea ba tsoma khutšo ya monagano; ba ka bago tee-tharong ba na le kholofelo ya bophelo bjo bo sa felego ka morago ga lehu; gomme o tee go ba 10 o na le kholofelo ya boemo bjo bobotse bja maphelo, mahumo le katlego.

Batho ba bantši kua China ba kgeregela dikerekeng ka dikholofelo tša go hwetša selo se se ka kgotsofatšago senyakwa sa dilo tša moya seo se bakilwego ke ge dikganyogo tša bokapitalisi di tšeela legato ganyenyane-ganyenyane dikgopolo tša Bokomanisi. Ngwaga o mongwe le o mongwe, dikopi tša Beibele tše dimilione di a gatišwa le go abja kua China, gomme go bonagala batho ba di bala go fo etša ge ba be ba bala puku e nyenyane e khwibidu ya Mao.

Makatholika a mangwe kua Brazil, kudu-kudu moloko o mofsa, ga a kgotsofatšwe ke kholofetšo ya lethabo bophelong bjo bo tlago​—a nyaka e phethagatšwa gona bjale. Makasine wa ditaba wa Tudo o re: “Ge e ba e be e le  thutatumelo ya tokologo yeo e bego e tutuetša dipelo le menagano ya batho ka bo-1970, gona ke thutatumelo ya katlego yeo e ba tutuetšago lehono.” Nyakišišo ya kua Brithania e ile ya kgopela batho ba moo bao ba tsenago kereke gore ba bolele selo se setee feela seo ba bego ba se rata ka kereke ya bona. Bogwera e ile ya ba sona selo sa pele go ba bantši.

Tše ka moka di bontšha gore le ge batho ba bantši ba sa dutše ba dumela go Modimo, ba bantši ba bona ba tshwenyegile kudu ka seo ba ka se hwetšago gona bjale go e na le go tshwenyega ka seo ba ka se hwetšago nakong e tlago​—goba gaešita le go tshwenyega ka Modimo ka boyena. O nagana gore lebaka le le nepagetšego la go dumela go Modimo ke lefe? Beibele e re’ng ka taba ye? O tla hwetša dikarabo sehlogong se se latelago.