Lebaka le le Nepagetšego la go Dumela go Modimo

PUKU ya kua Korea ya 31 Reasons Why Young People Leave the Church e bolela gore ba bantši ba tlogetše go ya kerekeng ka gobane ba sa kgone go hwetša dikarabo tše di kgotsofatšago tša dipotšišo tša bona. Ka mohlala, ba botšiša gore, ‘Ke ka baka la’ng batho bao ba dumelago go Modimo ba tlaišega?’ le gore ‘Ke ka baka la’ng re swanetše go amogela dilo ka moka tšeo di rutwago dikerekeng mola tše dintši tša dithuto tša tšona e le tše di gakantšhago le tše di ikganetšago?’

Ba nyamišitšwe ke dikarabo tšeo di newago ke baruti ba bona, ba bantši ba phetha ka gore ga go na karabo ka Beibeleng. Ge moruti a nea tlhaloso yeo e ithekgilego ka mo go feletšego kgopolong ya gagwe ka noši, mafelelo gantši e ba go se kwešiše, gaešita le go lahla Modimo le Beibele.

Yeo e be e le phihlelo ya Abel, yoo a godišitšwego e le mo-Lutere mo Afrika Borwa. O gopola gore: “Kereke e ruta gore motho yo mongwe le yo mongwe yo a hwago ‘o tšerwe’ ke Modimo. Eupša ke be ke sa kgone go kwešiša lebaka leo ka lona Modimo yo lerato a bego a ka ‘tšea’ batswadi go bana ba bona. Dinaga-magaeng tša Afrika moo ke goletšego gona, re be re ka se bolaye kgogo go ba go fihla ge matswiana a godile. Ge e ba re lemoga gore kgomo e be e duša, re be re diega go e bolaya go ba go fihla ge namane e tswetšwe e bile e se sa amušwa. Ke be ke sa kgone go kwešiša lebaka leo ka lona Modimo yo lerato a bego a sa bontšhe go naganela batho ka tsela e swanago.”

Aram, wa mo-Canada, o be a e-⁠na le dipelaelo tše swanago. O re: “Ge ke be ke e-⁠na le nywaga e 13, tate o ile a hwa. Tirelong ya poloko, moruti yo a tumilego o ile a hlalosa gore Modimo o be a nyaka gore tate a hwe e le gore a kgone go batamela kgaufsi le Modimo kua legodimong. O boletše gore, ‘Modimo o tšea batho ba go loka ka gobane Modimo o rata batho ba lokilego.’ Ke be  ke sa kwešiše gore ke bjang Modimo a ka bago moithati ka tsela ye.”

Mafelelong bobedi Abel le Aram ba ile ba kopana le Dihlatse tša Jehofa, ba ithuta le tšona Beibele gomme mafelelong ba hwetša dikarabo tša dipotšišo tša bona. Ba ile ba hlagolela lerato la go rata Modimo le tumelo e tiilego go yena. Mafelelong, ba ile ba neela maphelo a bona go Jehofa gomme ba fetoga bahlanka ba gagwe ba botegago.

Tsebo e Nepagetšego​—Senotlelo sa Bohlokwa sa go Dumela go Modimo

Re ka ithuta’ng diphihlelong tše? Di re botša gore ge e le mabapi le go dumela go Modimo, tsebo e nepagetšego ya Beibele ke ya bohlokwa. Moapostola Paulo o ile a botša Bakriste ba motseng wa bogologolo wa Filipi gore: “Se ke se kxopêlaxo ké xore leratô la lena le fêlê lè tlala lè e-⁠ya lè na le tsebô le temoxô ya ruri.” (Ba-Filipi 1:⁠9) Paulo mo o tswalanya lerato la go rata Modimo le badumedi-gotee le rena le tsebo e nepagetšego ya Modimo gotee le temogo ya seo e lego thato ya gagwe.

Se ke se se kwagalago, ka ge senyakwa sa pele sa go bota le go holofela motho yo mongwe e le go tseba motho yoo​—ge o mo tseba ka mo go feletšego kudu le ka mo go nepagetšego, o tla mmota gakaone. Ka mo go swanago, tsebo e nepagetšego e a nyakega gore o tutueletšege go dumela go Modimo. Paulo o itše: “Xe e le tumêlô ké kholofêlô ye e tiilexo ya xo holofêla tše di letetšwexo; ké xo bôta tše di sa bonwexo ka mahlô.” (Ba-Hebere 11:⁠1) Go dumela go Modimo o se na tsebo e nepagetšego ya Beibele go swana le ntlo yeo e agilwego ka dikarata tša go bapala. Go e budula gatee feela go ka e wiša.

Go ithuta Beibele go ka go thuša go hwetša dikarabo tša dipotšišo tše swanago le yeo e ilego ya gakantšha Abel le Aram ka nako e telele e rego, Ke ka baka la’ng batho ba e-⁠hwa? Beibele e hlalosa gore “ka xe sebe sè tsene lefaseng ka motho o tee, ’me lehu la tsêna ka sebe, lehu le aparetše batho bohle ka xe ba dirile dibe bohle.” (Ba-Roma 5:​12) Batho ba a tšofala le go hwa, e sego ka gobane Modimo a ba tšea gore ba yo dula le yena, eupša ka gobane Adama a dirile sebe. (Genesi 2:​16, 17; 3:​6, 17-19) Go oketša moo, Beibele e utolla kholofelo ya kgonthe yeo Jehofa Modimo a e neago. Ka Morwa wa gagwe, Jesu Kriste, o nea kholofelo ya go tsoša batho ba sebe.​—Johane 5:​28, 29; Ditiro 24:⁠15.

E le go re thuša go kwešiša therešo ya mabapi le tsogo, pego ya Beibele e na le mehlala e mmalwa ya batho bao Jesu a ilego a ba tsošetša bophelong. (Luka 7:​11-17; 8:​40-56; Johane 11:​17-45) Ge o bala dipego tše tša Beibele, ela hloko lethabo le tlhalalo tšeo bagwera le ba lapa ba ilego ba ba le tšona ka bao ba tsošitšwego. Ela hloko gape gore ba ile ba tutueletšega go tumiša Modimo le go ba le tumelo go Jesu.

Tsebo e nepagetšego mabapi le Modimo le merero ya gagwe e ka kgoma batho ba bangwe ka tsela e swanago lehono. Ba bantši ba kile ba gakanega, ba imelwa, gaešita le go dira diphošo ka baka la dipotšišo tše bohlokwa tšeo ba bego ba sa kgone go hwetša dikarabo tša tšona tše di kgotsofatšago. Eupša ge ba be ba ithuta Beibele, ba ile ba hwetša dikarabo, gomme seo se ile sa fetoša maphelo a bona ka mo go feletšego.

Go Rata Modimo​—Lebaka le Legolo Kudu la go mo Hlankela

Le ge tsebo e nepagetšego e le ya bohlokwa bakeng sa go ba le tumelo go Modimo, go nyakega mo gontši gore motho a tutueletšege go mo kwa le go mo hlankela. Ge a be a botšišwa gore molao o mogolo o tšwago go Modimo ke ofe, Jesu o itše: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka, le ka matla a xaxo ka moka.” (Mareka 12:​30) Ge e ba motho a rata Modimo ka tsela yeo Jesu a e bontšhitšego, o tla rata kudu go Mo kwa le go Mo hlankela. Na seo ke sa therešo ka wena?

Rachel, yo a hlanketšego e le moromiwa ka nywaga-some e mentši kua Korea, o nea lebaka la gagwe la go dumela go Modimo ka gore: “Ke nagana ka go ba ga Jehofa le letsogo le bulegilego go dibopiwa tša gagwe, go lebalela ga gagwe ge a dirišana le batho ba gagwe le kganyogo ya gagwe ya gore re ikhole ka go re tsebiša seo a se nyakago go rena. Dilo tše bjalo ka moka di dira gore lerato la-ka la go rata Modimo le gole. Le gona lerato leo le ntira gore ke nyake go mo hlankela.”

 Martha, e lego mohlologadi yo a tšwago Jeremane, o hlanketše Jehofa ka nywaga e 48. O re: “Ke ka baka la’ng ke hlankela Jehofa? Ke ka gobane ke mo rata. Bošego bjo bongwe le bjo bongwe ke bolela le Jehofa ka thapelo gomme ke mmotša kamoo ke mo lebogago kudu bakeng sa ditšhegofatšo tša gagwe ka moka, kudu-kudu bakeng sa sehlabelo sa topollo.”

Ee, lerato la go rata Modimo le re dira gore re nyake go mo hlankela go tšwa pelong. Eupša go tla bjang gore motho a be le lerato le bjalo? Tutuetšo e matla kudu ya go hlagolela lerato la go rata Modimo ke go ba le tebogo e tseneletšego bakeng sa lerato leo a re bontšhitšego lona. Ela hloko kgopotšo e ruthetšago pelo e tšwago ka Beibeleng: “E a se naxo leratô xa a tsebe Modimo, xobane Modimo ké Yêna leratô. Leratô la Modimo le a re ratilexo ka lôna, le bônaxetše ka xe a roma Morwa wa xaxwe Mo-tswalwa-eši, a tla lefaseng xore re phelê ka yêna. Leratô xe le le xôna xa se ka xore ké rena re ratilexo Modimo; ké ka xe Yêna a re ratile a roma Morwa wa xaxwe, a ba seloba sa dibe tša rena.”​—1 Johane 4:​8-⁠10.

Na o lemoga kamoo lerato le e lego le legolo ka gona? Akanya feela o be o kgangwa ke meetse ka nokaneng yeo e elago ka lebelo gomme monna a bea bophelo bja gagwe kotsing gore a go phološe. Na o be o ka mo lebala, goba na o be o ka se mo leboge kudu? Na o be o ka se rate go mo direla dilo ka moka tšeo o ka di kgonago? Lerato leo Modimo a le bontšhitšego ka go neela Morwa wa gagwe e lego Jesu Kriste, e le sehlabelo sa topollo ke le legolo ka mo go sa bapišwego. (Johane 3:​16; Ba-Roma 8:​38, 39) Ge pelo ya gago e kgongwa ke lerato la Modimo, o tla tutueletšega go mo rata le go mo hlankela ka pelo ka moka.

Ditšhegofatšo tša Gona Bjale le tša Nakong e Tlago

Gaešita le ge lerato la rena la go rata Modimo e swanetše go ba lona lebaka le legolo la go dira thato ya gagwe, ke mo go ruthetšago pelo go tseba gore Modimo o putsa bao ba mo hlankelago. Moapostola Paulo o bontšha gore: “Xomme xo kxahla Modimo xa xo kxônexe xe xo se tumêlô. E a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.”​—Ba-Hebere 11:⁠6.

 Modimo o tloga a šegofatša bao ba mo ratago le go mo kwa. Ba bantši ba thabela boemo bjo bokaone bja maphelo ka baka la go latela melao ya motheo ya Beibele. (Diema 23:​20, 21; 2 Ba-Korinthe 7:⁠1) Bao ba dirišago melao ya motheo ya Beibele ya mabapi le go botega le go šoma ka thata ka kakaretšo ba botwa ke bathwadi ba bona gomme ka go rialo ba thabela tšhireletšego e kgolo ya tša boiphedišo. (Ba-Kolose 3:​23) Ka go bota ga bona Jehofa, bahlanka ba Modimo ba šegofaditšwe ka khutšo ya monagano gaešita le ka tlase ga maemo a lekago. (Diema 28:​25; Ba-Filipi 4:​6, 7) Go feta tšohle, ba lebeletše pele ka kgodišego tšhegofatšong ya bophelo bjo bo sa felego lefaseng la Paradeise leo le tlago.​—Psalme 37:​11, 29.

Bao ba thabelago ditšhegofatšo tše bjalo tše tšwago go Jehofa ba ikwa bjang ka yena? Jacque­line, e lego Mokriste wa kua Canada, o hlalosa tebogo ya gagwe go Modimo ka gore: “Ka dinako tšohle o re nea dimpho tše bjalo tše di kgahlišago kudu, gomme o re nea kholofetšo e kgonthišeditšwego ya bophelo bjo bo sa felego.” Abel, yoo go boletšwego ka yena pejana, o hlalosa maikwelo a gagwe ka tsela ye: “Tebelelo ya go phela ka mo go sa felego lefaseng la paradeise e be e le selo se sefsa go nna, gomme ke lebeletše pele go yona. Lega go le bjalo, gaešita le ge go be go se na Paradeise, e be e sa dutše e tla ba mo go thabišago go nna go bontšha lerato la-ka go Modimo ka go mo hlankela.”

Le Wena o ka ba le Tumelo ya Kgonthe

Beibele e re: “Morêna wa mašaba, Moahlodi wa xo se hlaole motho, Mo-fenyêka-’tswalô-le-dipelo.” (Jeremia 11:​20) Ee, Jehofa o fenyeka seo se utegilego ka gare go rena. Yo mongwe le yo mongwe o swanetše go hlahloba mabaka a gagwe ka noši a go dumela go Modimo. Ditumelo le dikgopolo tše di fošagetšego ka Modimo di ka ba di ile tša tlaleletša ditirong tše fošagetšego tša nakong e fetilego. Eupša tsebo e nepagetšego ya Beibele e ka lebiša tswalanong e swanetšego le Mmopi, Jehofa Modimo.​—1 Timotheo 2:​3, 4.

Ka thulaganyo ya tšona ya thuto e sa lefelelwego ya legae ya Beibele, Dihlatse tša Jehofa di thuša batho go hwetša tsebo e nepagetšego ka Modimo. (Mateo 28:​20) Ba bantši bao ba amogetšego thušo e bjalo ba rata Modimo gomme ba hlagoletše tumelo ya kgonthe go yena. Ka go ithuta Beibele, ba hweditše “thlaloxanyó le pelokeledi,” tšeo di ba thušago go ‘sepela ka tsela ya bona ba iketlile’ mehleng ye e kotsi. (Diema 3:​21-23) Go feta tšohle, mo nakong ye ba na le kholofelo ‘e tiilego le e sa tomogego’ bakeng sa bokamoso. (Ba-Hebere 6:​19) Le wena o ka ba le tumelo ya kgonthe gomme wa thabela ditšhegofatšo tše.

Dipotšišo tše di Gakantšhago Tšeo di Bego di Nyaka Dikarabo

“Ge ke be ke tlwaetšwa sepetlele ke le morutwana wa tša kalafo, ke ile ka bona batho ba lokilego ba tsetla ba le bohlokong ka baka la malwetši le dikotsi. Ge e ba Modimo a le gona, ke ka baka la’ng dilo tše di direga? Na bodumedi ke feela tsela ya go hwetša khutšo ya monagano?”​—Yoo pele e bego e le mo-Presbyterian kua Korea.

“Gantši ke be ke ipotšiša ge e ba tate, yo e bego e le molemaledi wa dino-tagi, a be a ile diheleng goba legodimong. Ke be ke tšhošwa ke bahu le ke kgopolo ya mollo wa dihele. Ke be ke sa kgone go kwešiša lebaka leo ka lona Modimo yo lerato a bego a ka romela motho gore a yo tlaišega ka mo go sa felego diheleng.”​—Yoo pele e bego e le Mokatholika kua Brazil.

“Bokamoso bo swere’ng bakeng sa lefase le batho? Batho ba be ba ka kgona bjang go phela ka mo go sa felego? Batho ba ka hwetša bjang khutšo ya kgonthe?”​—Yoo pele e bego e le Mokatholika kua Jeremane.

“Ke be ke sa kwešiše thuto ya go tswalwa gape ka mmele o mongwe. Diphoofolo ga di rapele Modimo, ka gona ge e ba ka lebaka le itšego o tswalwa gape o le phoofolo gore o lefelele dibe tša gago, o tla lokiša ditaba bjang le go tšwela pele o le boemong bjoo?”​—Yoo pele e bego e le mo-Hindu wa mo Afrika Borwa.

“Ke goletše lapeng la badumedi ba Con­fucius, gomme ke be ke tlwaetše go tšea karolo moletlong wa go robatša bagologolo ba rena ka khutšo. Ge ke dutše ke thuša go lokiša tafola ya dihlabelo le go khunama, ke be ke ipotšiša ge e ba bagologolo ba ile ba tla go ja dijo le go re bona ge re ba khunamela.”​—Yoo pele e bego e le morapedi wa Confucius kua Korea.

Batho ba ka moka ba hweditše dikarabo tša dipotšišo tša bona ge ba be ba bala Beibele le Dihlatse tša Jehofa.