BAGOELEDI BA MMUŠO BA A BEGA

Lenaneo la Thelebišene le mo Dirile Gore a Tumiše Modimo

MOAPOSTOLA Paulo o boletše gore: “Ba bangwê xe ba dira ka moná le ka kxang, ba bangwê xôna ba kwatša tša Kriste ka pelo e boló.” (Ba-Filipi 1:​15) Ka dinako tše dingwe, gaešita le bao ba lekago go nyenyefatša batho ba Jehofa, ka go se tsebe ba ile ba dira gore batho ba dipelo tše di lokilego ba kgahlegele therešo.

Ka November 1998, lenaneo la thelebišene le ile la tšwelela thelebišeneng ya setšhaba ya Fora le bontšha diswantšho tša Bethele, e lego meago ya lekala la Dihlatse tša Jehofa kua Louviers, Fora. Go sa šetšwe dikarabelo tše fapa-fapanego tšeo di ilego tša ba gona, lenaneo le bile le mafelelo a mabotse ka ditsela tše di sa letelwago.

Anna-Paula yo a dulago dikhilomithara tše 60 go tloga Bethele, o be a le gare ga bao ba ilego ba lebelela lenaneo leo. Anna-Paula, e lego mma yo a hladilwego yo a nago le bana ba babedi, o be a nyaka mošomo. Ka gona letšatšing le le latelago, o ile a leletša Bethele mogala go botšiša mabapi le kamoo a ka hwetšago mošomo fao. O itše: “Ke bile le kgopolo ya gore e be e le lefelo le lebotse le gore mošomo wo o dirwago moo ke wa bohlokwa.” O be a maketše gakaakang ge a e-⁠kwa gore bašomi ka moka ba Bethele ke badiredi ba baithapi! Ka morago ga poledišano e kopana mabapi le modiro wa Dihlatse tša Jehofa, o ile a dumela gore Hlatse e mo etele.

Ge Léna, e lego modiredi wa nako e tletšego wa phuthego ya lefelong leo a be a mo etetše, Anna-Paula o ile a amogela puku ya Tsebo e Išago Bophelong bjo bo sa Felego * ka morago ga poledišano e telele. Ketelong e latelago, Anna-Paula o be a badile puku ka moka gomme a e-⁠na le dipotšišo tše dintši. O ile a amogela thuto ya Beibele gatee-tee. Anna-Paula o itše: “Go nna, e be e le sebaka sa go kwešiša Lentšu la Modimo. Ga se ka ka ka swara Beibele ka seatla sa-ka.”

Ka January, Anna-Paula o ile a etela Bethele, gomme beke e latelago a thoma go ya dibokeng tša Bokriste ka lekga la pele. Kapejana ka morago ga moo, o ile a thoma go swara thuto ya Beibele le bana ba gagwe le go nea bohlatse go bagwera ba gagwe. O re: “Ke be ke sa kgone go homola ka seo ke bego ke ithuta sona. Ke be ke nyaka go boledišana le batho le go ba homotša ka ditherešo tša Beibele.” Ka morago ga go katana le go fenya mathata a mmalwa a motho ka noši, Anna-Paula o ile a thoma go ba gona dibokeng ka mehla. O ile a dira tšwelopele ka lebelo gomme a kolobetšwa ka May 5, 2002.

Go oketša moo, e le mafelelo a mohlala o mobotse wa Anna-​Pa⁠ula le go fišegela go nea bohlatse, mmagwe o ile a thoma go ithuta Beibele gomme go se go ye kae o ile a kolobetšwa. Anna-Paula o re: “Ga ke na mantšu a go hlalosa lethabo leo ke le kwago. Ke leboga Jehofa letšatši le lengwe le le lengwe ka go ntumelela gore ke mo tsebe le go mo direla gotee le ka ditšhegofatšo ka moka tše a mphilego tšona.”

Ka godimo: Anna-Paula

Ka tlase: Kgoro ya go tsena ofising ya lekala ya Fora