Ba Lapa la Gabo Jesu e be e le Bomang?

DIKAROLONG tše dintši tša lefase, gantši ka December o bona diswantšho tša lesea Jesu le le tlhokomelong e lerato ya mmago lona e lego Maria le tatago lona wa mogodiši e lego Josefa. Diswantšho tše bjalo tša lapa di ka gogela gaešita le bao ba sa ipolelego gore ke bona Bakriste. Ka ge tlhokomelo e le go Jesu, Mangwalo a re botša’ng ka lapa la gabo Jesu la lefaseng?

Jesu o bile le setlogo se se kgahlišago kudu sa lapa. O belegwe ke kgarebe yeo e bitšwago Maria, ka go rialo a ba setho sa lapa la lefaseng. Go ya ka Beibele, ka moya o mokgethwa bophelo bja gagwe bo ile bja tlošwa legodimong gomme bja tsenywa ka popelong ya Maria. (Luka 1:​30-35) Pele ga ge go ingwa ga Jesu ka mohlolo go ka tsebatšwa, Maria o be a šetše a beeleditšwe ke monna yo a bitšwago Josefa, yoo ka go rialo a bego a tla ba tatago Jesu wa mogodiši.

Ka morago ga go belegwa ga Jesu, Josefa le Maria ba ile ba ba le bana ba bangwe, e lego bana babo Jesu le dikgaetšedi tša gagwe ka motswadi o tee. Seo se bonagatšwa ke potšišo yeo badudi ba Natsaretha ba ilego ba e botšiša ka morago ya mabapi le Jesu e rego: “A xa se yêna morwa wa mmetli yola? A mm’axwe xa ba re ké Maria? A bana babô xa se Jakobo le Jose le Simone le Juda? Le dikxaetšedi tša xaxwe, a xa di mo xo rena ka moka?” (Mateo 1:​25; 13:​55, 56; Mareka 6:⁠3) Go tšwa go se re ka phetha ka gore lapa la gabo Jesu la kgaufsi le be le bopša ke batswadi ba gagwe, bana babo ba bane le bonyenyane dikgaetšedi tše pedi.

Lega go le bjalo, ba bangwe lehono ga ba dumele gore bana babo Jesu le dikgaetšedi tša gagwe e be e le bana ba Josefa le Maria. Ka baka la’ng? New Catholic Encyclopedia e re: “Mehleng ya yona ya mathomo, Kereke e be e ruta gore Maria o ile a dula e le kgarebe. Ka gona, ka baka la se, ga go pelaelo gore Maria ga se a ka a ba le bana le ge e le bafe ba bangwe.” Puku yona ye ya ditšhupetšo e bolela gore dipolelwana “ngwanabo motho” le “kgaetšedi ya motho” di ka bolela ka “motho yo mongwe goba batho ba bangwe bao ba tswalanego bodumeding goba bao ba nago le tlemo e swanago” goba di ka bolela ka ba leloko, mohlomongwe bo-motswala’gwe.

Na ruri go bjalo? Gaešita le bo-rathutatumelo ba bangwe ba Katholika, ge ba ganetšana le thuto ye ya setšo, ba thekga kgopolo ya gore Jesu o be a e-⁠na le bana babo le dikgaetšedi ba kgonthe. John P. Meier, yoo pe­le e be­go e le mopresidente wa Lekgotla la Dibeibele la Katholika la Amerika, o ngwadile go­re: “[Testamenteng ya Kgale] adel­phos [ngwanabo motho], ge e dirišwa e sego feela ka tsela ya seswantšhetšo goba e le tshwantšhišo eupša e dirišetšwa go hlaola mohuta o itšego wa tswalano ya madi goba tswalano e lego molaong, e bolela feela ka ngwanabo motho ka mo go feletšego goba ngwanabo motho ka motswadi o tee, gomme ga go na tlhaloso e nngwe gape e ka dirišwago.” * Ee, Mangwalo a bontšha gore Jesu o be a e-⁠na le bana ba­bo le dikgaetšedi bao ba belegwego ke Josefa le Maria.

Diebangedi di bolela ka ba bangwe ba leloko la gabo Jesu, eupša mo nakong ye a re lebišeng tlhokomelo go ba lapa la gabo Jesu ba kgaufsi gomme re bone seo re ka ithutago sona go bona.