Dipotšišo tše Tšwago go Babadi

Thapelong ya gagwe ya mohlala, na Jesu o be a bolela gore thato ya Modimo e be e dirwa legodimong gaešita le ge barongwa ba kgopo ba be ba sa hlwa ba rakwa?

Go etša ge go begilwe go Mateo 6:​10, Jesu o itše: “Thatô ya xaxo a e dirwê mono lefaseng byalo ka xe e dirwa lexodimong.” Kgopelo ye e be e ka kwešišwa ka tsela le ge e le efe go tše tše pedi. Ya pele, e le kgopelo ya gore thato ya Modimo e dirwe lefaseng go etša ge e be e šetše e dirwa legodimong goba ya bobedi, e le kgopelo ya gore e dirwe ka mo go feletšego bobedi legodimong le lefaseng. * Seo se bolelwago ke mantšu a Jesu ao a a boletšego pele ga ao a rego, “Mmušô wa xaxo a o tlê,” se bontšha gore kwešišo ya bobedi e dumelelana kudu le Mangwalo. Le gona se bontšha boemo bja nakong ya ge Jesu a be a le lefaseng le lebaka le letelele la ka morago ga moo. Ke bjang go ka bago bjalo?

Puku ya Kutollo e šupa go mafelelo a mabedi a sa swanego a go hlongwa ga Mmušo wa Modimo legodimong. A pele a kgoma legodimo ka bolona, a bobedi, a kgoma lefase. Kutollo 12:​7-9, 12 e re: “Kwa lexodimong xwa tsoxa ntwa ya xe Mikaele le Barongwa ba xaxwe bà e-⁠lwa le Nôxa, ’me Nôxa è e-⁠lwa è na le Barongwa ba yôna. Nôxa ya se kê ya fenya; kwa lexodimong xwa se kê xwa hlwa xò e-⁠ba le madulô a yôna. Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna. Thabang-xê, lena Maxodimo, le ba ba axilexo xôna. Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.”

Go rakwa ga Sathane le batemona legodimong ka morago ga 1914 go ile gwa fediša tikologo ya marabele ka moka a moya, gwa tliša lethabo le legolo go barwa ba Jehofa ba botegago ba barongwa, bao ba emelago dibopiwa tša gagwe tše dintši kudu tša moya. (Jobo 1:​6-12; 2:​1-⁠7; Kutollo 12:​10) Ka gona, ge e le mabapi le legodimo, kgopelo yeo e lego thapelong ya Jesu ya mohlala e be e phethagaditšwe. Bohle bao ba šetšego tikologong yeo ya legodimong ba be ba botegela Jehofa le go ikokobeletša bobuši bja gagwe ka mo go feletšego.

Go swanetšwe go gatelelwa gore gaešita le pele ga moo, ge barongwa ba kgopo ba be ba sa dutše ba kgona go tsena legodimong, e be e le balahlwa lapeng la Modimo e bile ba le tlase ga dithibelo tše di lebanyago. Ka mohlala, Juda 6 e utolla gore lekgolong la pele la nywaga C.E., ba be ba šetše ba ‘tlemilwe ka ditlemo tša neng le neng tša lefsifsing la moya, ba boloketšwe kahlolo ya mohla-mogolo.’ Ka mo go swanago, 2 Petro 2:⁠4 e re: “Le Barongwa ba ba kilexo ba senya, Modimo xa a ka a ba tsebafa; ó ba lahletše moleteng bà tlemilwe ka ditlêmô tša lefsifsi, a ba xafêla xo bolokêlwa thsêkô.” *

Seo se fapanego kudu ka boemo bja bona e le balahlwa ge ba be ba sa dutše ba le legodimong ke gore barongwa ba ba kgopo ba be ba diriša matla a magolo a taolo godimo ga lefase. Ge e le gabotse,  Lentšu la Modimo le bitša Sathane “mmuši wa lefase lé” gomme batemona le ba bitša “balaola-mafase ba lefsifsi.” (Johane 12:​31; Ba-Efeso 6:​11, 12; 1 Johane 5:​19) Ka baka la matla a gagwe a taolo, Diabolo o be a ka kgona go nea Jesu “mebušô ka moka ya lefase le letaxô la yona” ge a be a ka dira tiro e tee feela ya borapedi. (Mateo 4:​8, 9) Ka gona, ge e le mabapi le lefase, go molaleng gore ge Mmušo wa Modimo o ‘e-tla,’ o tla tliša diphetogo tše dikgolo.

Mo lefaseng, ‘go tla’ ga Mmušo wa Modimo go tla feleletša ka tshepedišo e mpsha ka mo go feletšego ya dilo. Mmušo wo o tla fediša mebušo ka moka ya batho gomme ya ba wona mmušo o nnoši wa lefase. Ka nako e swanago, balata ba wona bao e lego batho ba boifago Modimo e tla ba “lefase le lefsa.” (2 Petro 3:​13; Daniele 2:​44) Mmušo gape o tla fediša sebe bathong ba kwago gomme mafelelong wa fetola lefase gore e be paradeise ya lefase ka moka, ka go rialo wa fediša mohlala o mongwe le o mongwe wa pušo ya Sathane.​—Ba-Roma 8:​20, 21; Kutollo 19:​17-⁠21.

Bofelong bja Nywaga e Sekete, ge Mmušo wa Mesia o phethagaditše thato ya Modimo bakeng sa wona, “ké mo le Yêna Morwa a tl’o xo bewa ka tlase xa E a mmeilexo mmuši wa tšohle, xore Modimo e bê Yêna Mo-ba-tšohle-xo-bohle.” (1 Ba-Korinthe 15:​28) Ke moka go tla ba le teko ya mafelelo, yeo ka morago ga yona Sathane, batemona ba gagwe le marabele le ge e le afe a batho ao a forilwego ba tlago go fedišetšwa sa ruri ka “lehu la bobedi.” (Kutollo 20:​7-15) Ka morago ga moo, dibopiwa ka moka tše bohlale legodimong le lefaseng ka lethabo di tla ikokobeletša pušo ya Jehofa e lerato ka mo go sa felego. Dibopegong ka moka, seo e tla ba phethagatšo e feletšego ya mantšu a thapelo ya Jesu ya mohlala.​—1 Johane 4:⁠8.

[Mengwalo ya tlase]