Go Ithuta go Lapa la Gabo Jesu la Lefaseng

OTSEBA’NG ka ba lapa la gabo Jesu ba kgaufsi, bao a phetšego le bona go ba go fihla ge a kolobetšwa, ka nywaga e 30 ya mathomo ya bophelo bja gagwe bja lefaseng? Dipego tša Ebangedi di re botša’ng? Re ka ithuta’ng ka go hlahloba lapa la gabo? O ka holwa ke dikarabo tša dipotšišo tše.

Ge re bolela ka tsela ya seswantšhetšo, na Jesu o belegetšwe makhureng? Josefa e lego tatagwe wa mogodiši, o be a šoma e le mmetli. Seo se be se nyaka gore motho a šome mošomo o thata le o lapišago, woo gantši o bego o akaretša go rema dihlare bakeng sa go dira lepolanka. Ge batswadi ba Jesu ba lefaseng ba be ba e-⁠ya Jerusalema matšatšing a 40 ka morago ga ge a belegwe, ba ile ba iša neo ya sehlabelo yeo e bego e laetšwe ke Molao. Na ba ile ba neela ka kgapa gotee le leeba goba mokurwanyana, go etša ge Molao o be o laela? Aowa. Go bonagala ba ile ba palelwa ke go fihlelela dihlabelo tše bjalo. Lega go le bjalo, Molao o be o e-⁠na le tokišetšo bakeng sa badiidi. Ka go dumelelana le tokišetšo yeo, Josefa le Maria ba ile ba neela ka “maebana a mabedi, le xe e le mekurwanyana e mebedi.” Go kgetha diphoofolo tšeo di bego di bitša tšhelete ya tlase go be go bontšha gore e be e le lapa le le diilago.​—Luka 2:​22-24; Lefitiko 12:​6, 9.

O ka kgona go bona gore Jesu Kriste, e lego Mmuši wa nakong e tlago wa batho ka moka, o belegetšwe bathong ba maemo a tlasana, gare ga  bao ba bego ba swanetše go šoma ka thata gore ba iphediše. Ge a gola o ile a ba mmetli, go fo swana le tatagwe wa mogodiši. (Mateo 13:​55; Mareka 6:⁠3) ‘Gaešita le ge Jesu e be e le mohumi’ bjalo ka sebopiwa se matla sa moya legodimong, Beibele e bolela gore o ile “a ba modiidi” ka baka la rena. O ile a tšea boemo bja tlasana e le motho gomme a golela lapeng la batho ba tlwaelegilego. (2 Ba-Korinthe 8:⁠9; Ba-Filipi 2:​5-⁠9; Ba-Hebere 2:⁠9) Jesu ga se a ka belegelwa lapeng la bahumi, gomme se se ka ba se thušitše batho ba bangwe gore ba ikwe ba lokologile ge ba e na le yena. Ba be ba sa šitišwe ke maemo a gagwe. Ba be ba ka kgona go mo tšeela godimo ka baka la dithuto tša gagwe, dika tša gagwe tše di ipiletšago le mediro ya gagwe e kgahlišago. (Mateo 7:​28, 29; 9:​19-33; 11:​28, 29) Re kgona go bona bohlale bja Jehofa Modimo ka go dumelela Jesu gore a belegelwe lapeng leo le tlwaelegilego.

Bjale anke re eleng hloko ditho tša lapa la gabo Jesu gomme re bone seo re ka ithutago sona go tšona.

Josefa​—Monna wa go Loka

Ge Josefa a be a lemoga gore mmeeletšwa wa gagwe o imile “bà sešo ba kôpana,” o swanetše go ba a ile a se tsebe mo a emego gona magareng ga lerato la gagwe go Maria le go hlaswa ga gagwe seo se bego se bonagala e le boitshwaro bjo bo gobogilego. Boemo bjo ka moka bo be bo bonagala e le go šwahlelwa ga tshwanelo ya gagwe e le monna yo a mmeeleditšego. Mehleng ya gagwe, mosadi yo a beeleditšwego o be a lebelelwa go swana le mosadi yo a nyetšwego. Ka morago ga go naganišiša gabotse, Josefa o ile a dira phetho ya go hlala Maria ka sephiring e le gore a se ke a thungwa ka mafsika bjalo ka seotswa.​—Mateo 1:​18; Doiteronomio 22:​23, 24.

Ke moka morongwa o ile a iponagatša go Josefa torong gomme a re: “Se boifê xo beka Maria mosadi wa xaxo, xobane se a se imilexo ké se se tšwaxo xo Môya-mokxêthwa. O tlo bêlêxa morwa, wa tlo mo rea leina la Jesu, xobane ké Yêna a tl’o xo phološa sethšaba sa xaxwe dibeng tša sôna.” Ka morago ga go amogela tlhahlo yeo e tšwago go Modimo, Josefa o ile a gata mogato ka go dumelelana le yona gomme a beka Maria.​—Mateo 1:​20-⁠24.

Ka go dira phetho ye, monna yoo wa go loka le wa go botega o ile a ba le karolo go phethagatšweng ga seo Jehofa a ilego a se bolela ka moporofeta wa gagwe Jesaya ge a re: “Bônang, kxarebe e tlo ima, ya bêlêxa morwa, ’me O mo reê ’ina la Imanuele.” (Jesaya 7:​14) Josefa e be e tloga e le monna yo a sekametšego dilong tša moya yoo a bego a tšeela godimo tokelo ya go ba tatago Mesia wa mogodiši, go sa šetšwe therešo ya gore morwa wa Maria wa leitšibolo e be e ka se be wa gagwe.

Josefa o ile a phema go ba le dikopano tša botona le botshadi le Maria go ba go fihla ge a šetše a belege morwa wa gagwe. (Mateo 1:​25) Go banyalani ba ba bafsa, go se be le dikopano tša botona le botshadi e swanetše go ba e ile ya ba tlhohlo, eupša go bonagala ba be ba sa nyake go ba le kgakanego le ge e le efe ka yoo e bego e le tatago ngwana. A mohlala o kgahlišago gakaakang wa boitshwaro! Josefa o ile a etiša ditekanyetšo tša moya pele ga dikganyogo tša gagwe tša tlhago.

Mabakeng a mane, Josefa o ile a amogela tlhahlo ya morongwa ya mabapi le go godiša morwa wa gagwe wa mothwalwa. Go a mararo a mabaka ao e be e le mabapi le moo a swanetšego go godišetša mošemane gona. Go kwa ka go akgofa e be e le ga bohlokwa gore ngwana a tšwele pele a phela. Mabakeng ka moka, Josefa o ile a gata mogato ka go akgofa, a tšea ngwana ka lekga la pele a mo iša Egipita ke moka ka morago a mmušetša Isiraele. Se se ile sa šireletša Jesu yo monyenyane go bolaweng ga bana ka bontši ke Heroda. Le gona, go kwa ga Josefa go ile gwa feleletša ka go phethagatšwa ga diporofeto tše dintši tša mabapi le Mesia.​—Mateo 2:​13-⁠23.

Josefa o ile a ruta Jesu mošomo e le gore a kgone go iphediša. Ka gona, Jesu o be a sa tsebje feela e le “morwa wa mmetli” eupša o be a tsebja gape e le “mmetli.” (Mateo 13:​55; Mareka 6:⁠3)  Moapostola Paulo o ngwadile gore Jesu o ‘lekilwe mo go tšohle bjalo ka rena.’ Se ge e le gabotse se be se tla akaretša go šoma ka thata bakeng sa go thuša go hlokomela lapa.​—Ba-Hebere 4:⁠15.

Mafelelong, re bona bohlatse bja go ineela ga Josefa borapeding bja therešo tiragalong ya mafelelo yeo a tšwelelago go yona ka Mangwalong a Bakriste a Segerika. Josefa o ile a tšea lapa la gagwe go le iša Jerusalema bakeng sa Paseka. E be e le banna feela bao ba bego ba swanetše go ya, eupša Josefa o ile a go dira tlwaelo go tšea lapa la gagwe go le iša Jerusalema gatee ‘ka ngwaga.’ O ile a dira boikgafo bjo bogolo, ka gobane ba be ba swanetše go sepela dikhilomithara tše 100 go tloga Natsaretha go ya Jerusalema. Lega go le bjalo, tiragalong yeo go begilwego ka yona ka Mangwalong, Jesu o ile a arogana le sehlopha. O ile a hwetšwa ka tempeleng, a theeditše gotee le go botšiša barutiši ba Molao dipotšišo. Gaešita le ge a be a e-⁠na le nywaga e 12 feela, Jesu o ile a bontšha bohlale bjo bogolo le tsebo ya Lentšu la Modimo. Go tšwa tiragalong yona ye, re bona gore batswadi ba Jesu ba swanetše go ba ba mo rutile gabotse, ka go mo godiša gore e be mošemane yo a sekametšego dilong tša moya. (Luka 2:​41-50) Go bonagala Josefa a ile a hwa nakong e nngwe ka morago ga tiragalo ye, ka ge go se na mo go bolelwago ka yena dipegong tšeo di latetšego tša ka Mangwalong.

Ee, Josefa e be e le monna wa go loka yo a ilego a hlokomela lapa la gagwe gabotse, bobedi moyeng le nameng. Na wena, go etša Josefa, o etiša dilo tša moya pele bophelong bja gago ge o lemoga seo e lego thato ya Modimo bakeng sa rena lehono? (1 Timotheo 2:​4, 5) Na o kwa seo Modimo a se bolelago ka go rata go etša ge se bolelwa ka Lentšung la Modimo, ka go rialo wa bontšha boikokobetšo bjo bo swanago le bja Josefa? Na o ruta bana ba gago gore ba kgone go boledišana le ba bangwe ka dilo tša moya tšeo di nago le morero?

Maria​—Mohlanka wa Modimo yo a se Nago Boithati

Maria e lego mmago Jesu, e be e le mohlanka yo mobotse wa Modimo. Ge morongwa Gabariele a be a tsebatša gore o be a tla belega, o ile a bonagala a maketše. Ka ge e be e le kgarebe, o be a se a ka a ‘tseba monna.’ Ge a e-⁠kwa gore o tla belega ka moya o mokgethwa, o ile a amogela molaetša ka boikokobetšo gomme a re: “Ké nna é, ke molata wa Yêna Morêna; tše O di boletšexo a di ntirêxêlê.” (Luka 1:​30-38) O be a tšeela tokelo ya moya godimo kudu moo a bego a ikemišeditše go kgotlelela maemo le ge e le afe a thata ao a bego a tla tlišwa ke phetho ya gagwe.

Ka kgonthe, go amogela taelo ye go ile gwa fetola bophelo bja gagwe ka moka bjalo ka mosadi. Ge a be a e-⁠ya Jerusalema go yo thakgafatšwa, mokgalabje yo a boifago Modimo yo a bitšwago Simeone o ile a mmotša gore: “Wêna pelo ya xaxo e tlo phuloletšwa ke lerumô.” (Luka 2:​25-35)  Go molaleng gore o be a bolela kamoo Maria a bego a tla ikwa ka gona ge a bona Jesu a ganwa ke ba bantši gomme mafelelong a kokotelwa koteng ya tlhokofatšo.

Ge Jesu a dutše a gola, Maria o ile a dula a gopola tše di diregilego bophelong bja Jesu, “a di akanya pelong ya xaxwe.” (Luka 2:​19, 51) Go etša Josefa, Maria e be e le motho yo a sekametšego dilong tša moya gomme o ile a lebelela ditiragalo tše gotee le dipolelo tšeo di bego di phethagatša boporofeta e le tša bohlokwa. Seo morongwa Gabariele a mmoditšego sona se swanetše go ba se ile sa tsema medu monaganong wa gagwe: “Yêna-eo e tlo ba e moxolo, ó tlo bitšwa Morwa wa Yo-xodimo-dimo; ’me Morêna ó tlo mo nea sedulô sa Dafida tat’axwe. O tlo buša moloko wa Jakobo xo iša mehleng ya neng le neng; ’me boxoši bya xaxwe bo ka se ke bya ba le bofêlô.” (Luka 1:​32, 33) Ee, o ile a tšeela godimo tokelo ya go ba mma yo e lego motho wa Mesia.

Le gona boemo bja Maria bja moya bo ile bja bonagala ge a be a gahlana le Elisabetha, e lego wa leloko la gabo yoo le yena a bego a imile ka mohlolo. Ge a mmona, Maria o ile a reta Jehofa gomme a utolla lerato la gagwe la go rata Lentšu la Modimo. O ile a šupa go thapelo ya Hanna yeo e begilwego go 1 Samuele kgaolo 2 gomme a ­akaretša le dikgopolo tšeo di tšwago dipukung tše ­dingwe tša Mangwalo a Sehebere. Tsebo e ­bjalo ya Mangwalo e bontšha gore o be a swanelegela go ba mma yo a ineetšego le yo a ­boifago Modimo. O be a tla swarišana le Josefa go godišeng morwa wa gagwe moyeng.​—Genesi 30:​13; 1 Samuele 2:​1-10; Maleaki 3:​12; Luka 1:​46-⁠55.

Maria o be a e-⁠na le tumelo e tiilego go morwa wa gagwe e le Mesia, gomme seo ga se sa ka sa nyamelela gaešita le ka morago ga lehu la Jesu. Kapejana ka morago ga tsogo ya gagwe, Maria o be a le gare ga barutiwa ba botegago bao ba ilego ba kopana gore ba yo rapela gotee le baapostola. (Ditiro 1:​13, 14) O ile a kgomarela potego ya gagwe, go sa šetšwe bohloko bjoo a bego a tla bo kwa bja go bona morwa wa gagwe yo a rategago a hwela koteng ya tlhokofatšo.

O ka holwa bjang ke go ithuta ka bophelo bja Maria? Na o amogela tokelo ya go hlankela Modimo go sa šetšwe boikgafo bjoo bo akaretšwago? Na o tshwenyegile ka go ba bohlokwa ga tokelo yeo lehono? Na o tšwela pele o gopola tšeo Jesu a di boletšego e sa le pele le go di bapetša le tšeo di diregago lehono, gomme wa di ‘akanya pelong ya gago’? (Mateo, dikgaolo 24 le 25; Mareka, kgaolo 13; Luka, kgaolo 21) Na o ekiša Maria ka go tseba ditemana tšeo di lego ka Lentšung la Modimo gabotse, gomme wa le diriša ka bolokologi poledišanong ya gago? Na o tla kgomarela tumelo ya gago go Jesu go sa šetšwe tlalelo ya monagano yeo o ka lebeletšanago le yona ka baka la go ba molatedi wa gagwe?

 Bana Babo Jesu ba Bontšha Gore go Fetoga go a Kgonega

Go bonagala bana babo Jesu ba be ba sa bontšhe tumelo go Jesu go ba go fihla ka morago ga lehu la gagwe. Go bonagala le e le lebaka leo ka lona ba bego ba se gona ge a be a hwela koteng ya tlhokofatšo gotee le lebaka leo ka lona a ilego a šia mmagwe ka tlase ga tlhokomelo ya moapostola Johane. Ba leloko la gabo Jesu ba ile ba bontšha gore ba be ba sa mo tšeele godimo, gomme ka nako e nngwe ba ile ba bolela gore Jesu “xa a sa tseba se a se diraxo.” (Mareka 3:​21) Ka ge Jesu a be a e-⁠na le ditho tša lapa la gabo tšeo e bego e se badumedi, bao lehono ba nago le ba e sego badumedi ka lapeng ba ka kgonthišega gore Jesu o kwešiša kamoo ba ikwago ka gona ge ba leloko ba ba kwera ka baka la tumelo ya bona.

Lega go le bjalo, ka morago ga go tsošwa ga Jesu, go bonagala bana babo ba ile ba thoma go bontšha tumelo go yena. Ba be ba le sehlopheng sa bao ba ilego ba gahlana Jerusalema pele ga Pentekoste ya 33 C.E. gomme ba rapela ka phišego gotee le baapostola. (Ditiro 1:​14) Go molaleng gore go tsošwa ga ngwanabo bona ka motswadi o tee go ile gwa ba tutueletša go fetola dipelo, go fihla bokgoleng bja gore ba fetoge barutiwa ba gagwe. Ga se ra swanela go lahlegelwa ke kholofelo ka ba leloko bao ba sego tumelong e swanago le ya rena.

Jakobo, e lego ngwanabo Jesu ka motswadi o tee yo A ilego a iponagatša go yena, o bolelwa ka Mangwalong e le yo a nago le karolo e bohlokwa ka phuthegong ya Bokriste. O ngwadile lengwalo le le buduletšwego ke Modimo leo le yago go Bakriste-gotee le yena, a ba eletša gore ba kgomarele tumelo ya bona. (Ditiro 15:​6-29; 1 Ba-Korinthe 15:⁠7; Ba-Galatia 1:​18, 19; 2:⁠9; Jakobo 1:⁠1) Ngwanabo yo mongwe ka motswadi o tee e lego Juda, o ngwadile lengwalo le le buduletšwego la go kgothaletša badumedi-gotee le yena gore ba tšwele pele ba e-⁠lwa ntwa ya tumelo. (Juda 1) Ke mo go lemogegago gore Jakobo le Juda ga se ba ka ba bontšha ka mangwalong a bona gore ba be ba tswalane le Jesu e le go kgahliša Bakriste-gotee le bona. A thuto e kgahlišago gakaakang ya boipoetšo yeo re ka ithutago yona go bona!

Ka gona, ke dilo dife tšeo re ka ithutago tšona go lapa la gabo Jesu? Ka kgonthe, dithuto tša boineelo tšeo di ka bontšhwago ka ditsela tše swanago le tšeo ke tše: (1) Ikokobeletšeng thato ya Modimo bjalo ka ge e boletšwe le go lebeletšana le diteko ka moka tšeo di tlišwago ke go dira bjalo. (2) Etišang ditekanyetšo tša moya pele, gaešita le ge seo se bolela go dira boikgafo. (3) Tlwaetšang bana ba lena ka go dumelelana le Mangwalo. (4) Le se ke la lahlegelwa ke kholofelo ka ditho tša lapa tšeo di sego tumelong e swanago le ya lena. (5) Le se ke la ikgantšha ka tswalano yeo le ka bago le e-⁠na le yona le bao ba tumilego ka phuthegong ya Bokriste. Ee, go ithuta ka lapa la gabo Jesu la lefaseng go re batametša kgaufsi le yena le go godiša tebogo ya rena ya go leboga ge Jehofa a kgethile lapa le le tlwaelegilego gore le godiše Jesu nakong ya gagwe ya bjana.

Josefa o ile a nyala Maria gore e be mosadi wa gagwe gomme a ba le karolo go phethagatšweng ga diporofeto tša mabapi le Mesia

Josefa le Maria ba ile ba ruta bana ba bona ditekanyetšo tša moya le karolo yeo e kgathwago ke mošomo

Gaešita le ge ba godišeditšwe lapeng leo le sekametšego dilong tša moya, bana babo Jesu ga se ba ka ba bontšha tumelo go yena go ba go fihla lehung la gagwe

Bana babo Jesu ka motswadi o tee e lego Jakobo le Juda ba ile ba kgothatša Bakriste-gotee le bona