Anke Bohle Ba Tsebatše Letago La Jehofa
Anke Bohle Ba Tsebatše Letago La Jehofa
“Lobang Morêna ka dirêtô le ka xo re: Matla ké a xaxwe. Lobang ka xo rêta ’ina la Morêna.”—PSALME 96:7, 8.
1, 2. Ke go tšwa mothopong ofe moo Jehofa a tumišwago, gomme ke bomang bao ba kgothaletšwago go tsenya letsogo tabeng ye?
MORWA wa Isai e lego Dafida, o gotše e le mošemane wa modiši tikologong ya Betlelehema. O swanetše go ba a ile a lebelela gantši gakaakang legodimong le le tletšego dinaledi bošegong bja setu, nakong ya ge a be a dišitše mehlape ya tatagwe mafulong a dinku ao a homotšego! Ka ntle le pelaelo, o ile a gopola gabotse dilo tše bjalo nakong ya ge a be a budulelwa ke moya o mokgethwa wa Modimo gomme a ngwala le go opela mantšu a mabotse a Psalme ya bo-19 ao a rego: “Maxodimo a re anêxêla boxolo bya Modimo; medirô ya ’atla tša xaxwe e rêtwa ke leratadima. Lešika la tšôna le tšwetše lefase ka moka; le kwa mafelelong a lôna xo kwala polêlô ya tšôna.”—Psalme 19:1, 4.
2 Magodimo ao a kgahlišago kudu ao a bopilwego ke Jehofa a tsebatša letago la gagwe ntle le polelo, ntle le mantšu le ntle le modumo, letšatši le letšatši gotee le bošego bjo bongwe le bjo bongwe. Le ka mohla tlholo ga e kgaotše go tsebatša letago la Modimo, le gona ke mo go kokobetšago go naganišiša ka bohlatse bjo bjo bo homotšego bjo bo iponagatšago ‘lefaseng ka moka’ gore badudi ba lona ba bo bone. Lega go le bjalo, bohlatse bjo bo homotšego bja tlholo ga se bjo bo lekanego. Batho bao ba botegago ba kgothaletšwa go e tlatša ka go hlaboša mantšu. Mopsalme yo a sa bolelwago ka leina o ile a bolela le barapedi ba botegago ka mantšu a ao a buduletšwego: “Lobang Morêna ka dirêtô le ka xo re: Matla ké a xaxwe. Lobang ka xo rêta ’ina la Morêna.” (Psalme 96:7, 8) Bao ba nago le tswalano ya kgaufsi le Jehofa ba thabela go arabela kgothatšong yeo. Lega go le bjalo, ke’ng seo se akaretšwago go neeng Modimo letago?
3. Ke ka baka la’ng batho ba nea Modimo letago?
3 Go nyakega mo gontši go feta mantšu feela. Ba-Isiraele ba mehleng ya Jesaya ba ile ba nea Modimo letago ka melomo ya bona, eupša ba bantši ba be ba sa botege. Jehofa o ile a bolela ka Jesaya gore: “Sethšaba sé se mpatamêla ka lexano, sè nthêta ka melomo; mola dipelo tša bôná di le kxolê le Nna.” (Jesaya 29:13) Tumišo le ge e le efe yeo e ilego ya bolelwa ke batho ba bjalo e be e se na morero. E le gore e be le morero, tumišo e swanetše go tšwa pelong yeo e tletšego lerato la go rata Jehofa le go lemoga e le ka kgonthe letago la gagwe la moswana-noši. Ke Jehofa a nnoši e lego Mmopi. Ke yo Matla ohle, Yo a nago le Toka le mothofatšo wa lerato. Ke mothopo wa phološo ya rena e bile ke Mmuši yo a swanetšego yoo sebopiwa se sengwe le se sengwe se se phelago legodimong le mo lefaseng se swanetšego go ikokobeletša yena. (Kutollo 4:11; 19:1) Ge e ba re dumela dilo tše e le ka kgonthe, anke re mo tumišeng ka dipelo tša rena ka moka.
4. Jesu o neile ditaelo dife mabapi le kamoo re ka tumišago Modimo ka gona, gomme re ka di phethagatša bjang?
4 Jesu Kriste o re boditše kamoo re ka neago Modimo letago ka gona. O itše: “Se Tate a tl’o xo rêtwa ka sôna, ké xe Le enya dienywa tše ntši, Lè e-ba barutiwa ba-ka.” (Johane 15:8) Re enywa bjang dienywa tše dintši? Sa pele, ka go tšea karolo ka moya ka moka go boleleng ‘ditaba tše dibotse tša mmušo’ gomme ka go rialo ra tlatšana le dibopiwa ka moka go ‘boleleng’ ka ‘dika tše di sa bonwego’ tša Modimo. (Mateo 24:14, bapiša le NW; Ba-Roma 1:20.) Go feta moo, ka tsela ye ka moka ga rena re tšea karolo—ka go lebanya goba ka go se lebanye—go direng barutiwa ba bafsa bao ba opelago ka go hlaboša kopelo ya go tumiša Jehofa Modimo. Sa bobedi, re hlagolela dienywa tšeo di tšweleditšwego ka go rena ke moya o mokgethwa le go katanela go ekiša dika tše di phagamego tša Jehofa Modimo. (Ba-Galatia 5:22, 23; Ba-Efeso 5:1; Ba-Kolose 3:10) Ka baka la se, boitshwaro bja rena bja letšatši le letšatši bo nea Modimo letago.
‘Lefaseng ka Moka’
5. Hlalosa kamoo Paulo a ilego a gatelela boikarabelo bja Bakriste bja go nea Modimo letago ka go boledišana le ba bangwe ka tumelo ya bona.
5 Paulo lengwalong la gagwe le le yago go ba-Roma o ile a gatelela boikarabelo bja Bakriste bja go nea Modimo letago ka go boledišana le ba bangwe ka tumelo ya bona. Molaetša o mogolo wa puku ya ba-Roma ke wa gore ke feela bao ba bontšhago tumelo go Jesu Kriste bao ba tla phološwago. Go kgaolo 10 ya lengwalo la gagwe, Paulo o bontšhitše gore ba-Juda ba tlhago ba mehleng ya gagwe ba be ba sa dutše ba leka go fihlelela boemo bja go loka ka go latela Molao wa Moše, mola e le gore “Kriste [e bile] Yena phetšô ya Molaô.” Ka baka leo, Paulo o re: “Xe O ipolêla ka molomo wa re: Jesu ké Yêna Morêna! wa r’yalo Ò dumêla ka pelo xore Modimo ó mo tsošitše bahung, xôna O tlo phološwa.” Go tloga ka nako yeo go ya pele, go be go dutše go sa “hlaolwe Mo-Juda xoba Mo-Gerika. Morêna wa bohle ké o tee, e a humilexo wa xo kxôna xo nea bohle ba ba mmitšaxo. Xobane xo thwe: Ba xo tlo phološwa ké ba ba bitšaxo ’ina la Morêna.”—Ba-Roma 10:4, 9-13.
6. Paulo o ile a diriša bjang Psalme 19:4?
6 Ke moka Paulo o botšiša ka mo go kwagalago gore: “Ba tlo bitša bya’ng xe ba sešo ba Mo dumêla? Ba tlo dumêla bya’ng xe ba sešo ba Mo kwa? Ba tlo kwa bya’ng, xe xo se sexoeledi?” (Ba-Roma 10:14) Paulo o bolela ka Isiraele gore: “Ba xo kwa ditaba tše botse e be e se bohle.” Ke ka baka la’ng Isiraele e se ya ka ya kwa? Go se arabele ga yona e be e le ka baka la go hloka tumelo, e sego ka baka la go se hwetše sebaka. Paulo o bontšha se ka go tsopola Psalme 19:4 gomme a e diriša modirong wa boboledi wa Bokriste go e-na le go e diriša go bohlatse bjo bo homotšego bja tlholo. O re: “Kxowane ya tšôna e tšwetše lefase ka moka, le kwa mafelelong a lôna xo kwala polêlô ya tšôna.” (Ba-Roma 10:16, 18) Ee, bjalo ka ge tlholo yeo e sa phelego e nea Jehofa letago, Bakriste ba lekgolong la pele la nywaga ba ile ba bolela ditaba tše dibotse tša phološo kae le kae gomme ka go rialo ba tumiša Modimo ‘lefaseng ka moka.’ Lengwalong la gagwe le le yago go ba-Kolose, Paulo gape o ile a hlalosa kamoo ditaba tše dibotse di bego di phatlaletše ka gona. O ile a bolela gore ditaba tše dibotse di be di boletšwe go “babopya bohle ba tlase xa lexodimo.”—Ba-Kolose 1:23.
Dihlatse tše di Fišegago
7. Go ya ka Jesu, Bakriste ba na le boikarabelo bofe?
7 Mohlomongwe Paulo o ngwadile lengwalo la gagwe le le yago go ba-Kolose nywaga e ka bago e 27 ka morago ga lehu la Jesu Kriste. Modiro wa boboledi o ka ba o ile wa phatlalala go fihla Kolose bjang ka nako yeo e kopana gakaakaa? Se se ile sa direga ka gobane Bakriste ba lekgolong la pele la nywaga ba be ba fišega, gomme Jehofa o ile a šegofatša phišego ya bona. Jesu o be a boletše e sa le pele gore balatedi ba gagwe e tla ba baboledi ba mafolofolo ge a be a re: “Ebangedi e swanetše xo kwatšwa pele dithšabeng ka moka.” (Mareka 13:10) Boporofeteng bjoo, Jesu o ile a tlaleletša ka taelo yeo e begilwego ditemaneng tša mafelelo tša Ebangedi ya Mateo tšeo di rego: “Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna. Xomme tsebang, ke na le lena ka mehla xo fihla bofelong bya lefase.” (Mateo 28:19, 20) Kapejana ka morago ga go rotogela ga Jesu legodimong, balatedi ba gagwe ba ile ba thoma go phethagatša mantšu ao.
8, 9. Go ya ka Ditiro, Bakriste ba ile ba arabela bjang ditaelong tša Jesu?
8 Ka morago ga go tšhollwa ga moya o mokgethwa ka Pentekoste ya 33 C.E., selo sa mathomo seo balatedi ba botegago ka go se kwanantšhe ba Jesu ba ilego ba se dira e bile go ya modirong wa boboledi, ba botša mašaba a kua Jerusalema ka “matete a Modimo.” Modiro wa bona wa boboledi e bile o atlegilego kudu, gomme go ile gwa kolobetšwa “ba e nyakilexo xo ba ba dikete tše tharo.” Barutiwa ba ile ba tšwela pele ba tumiša Modimo phatlalatša le ka phišego, gomme gwa ba le mafelelo a mabotse.—Ditiro 2:4, 11, 41, 46, 47.
9 Go se go ye kae mediro ya Bakriste bao e ile ya lemogwa ke baetapele ba bodumedi. Ba befedišitšwe ke go bolela ka go se pepetletše ga Petro le Johane, ba ile ba laela baapostola ba ba babedi gore ba kgaotše go bolela. Baapostola ba ile ba araba ka gore: “Xa re kxône xo lesa xo bolêla tše re di bonexo le tše re di kwilexo.” Ka morago ga go tšhošetšwa le go lokollwa, Petro le Johane ba ile ba boela go bana babo bona, gomme ka moka ga bona ba ile ba rapela Jehofa ba le gotee. Ka sebete ba ile ba kgopela Jehofa gore: “Bahlanka ba xaxo O ba fê mafolofolo ruri, ba bolêlê ’ntšu la xaxo [ka sebete, NW].”—Ditiro 4:13, 20, 29.
10. Ke kganetšo efe yeo e ilego ya thoma go ipontšha, gomme Bakriste ba therešo ba ile ba arabela bjang?
10 Thapelo yeo e be e dumelelana le thato ya Jehofa, bjalo ka ge go ile gwa bonagala ka moragonyana. Baapostola ba ile ba golegwa ke moka ka mohlolo ba ile ba lokollwa ke morongwa. Morongwa o ile a ba botša gore: “Yang Le ême Ntlong-kxêthwa, Le botšê sethšaba mantšu a bophelô bjó.” (Ditiro 5:18-20) Ka baka la ge baapostola ba ile ba kwa, Jehofa o ile a tšwela pele go ba šegofatša. Ka go rialo, “ba se kxaotše xo hlwa bà ruta Ntlong-kxêthwa le mo malapeng, bà fêla ba kwatša Ebangedi ya xore Jesu ké Yêna Kriste.” (Ditiro 5:42) Ka mo go kwagalago, kganetšo e šoro ga se ya ka ya kgona go dira balatedi ba Jesu gore ba kgaotše go nea Modimo letago phatlalatša.
11. Bakriste ba lekgolong la pele la nywaga ba be ba e-na le boemo bofe bja kgopolo ka modiro wa boboledi?
11 Go se go ye kae Stefano o ile a golegwa gomme a kgatlwa ka mafsika go fihlela a e-hwa. Polao ya gagwe e ile ya tsoša tlaišo e šoro kua Jerusalema, gomme barutiwa ka moka ka ntle le baapostola ba ile ba gapeletšega go phatlalala. Na ba ile ba nolwa moko ke tlaišo ye? Le gatee-tee. Re bala gore: “Ba ba xašantšwexo ba na ba sepela le naxa, ba bolêla Lentšu la Ebangedi.” (Ditiro 8:1, 4) Phišego yeo ya go tsebatša letago la Modimo e ile ya bonwa leboelela. Go Ditiro kgaolo 9, re bala gore Mofarisei Saulo wa Tareso, ge a be a e-ya Damaseko go ya go thoma tlaišo ya go tlaiša barutiwa ba Jesu fao, o ile a bona pono ya Jesu gomme a foufatšwa. Kua Damaseko, Anania o ile a foufolla Saulo ka mohlolo. Ke selo sefe sa pele seo Saulo—yoo ka morago a ilego a tsebja e le moapostola Paulo—a ilego a se dira? Pego e re: “E sa le semetseng a thôma xo êma diphuthexong, a ruta a re: Jesu ké Yêna Morwa-Modimo.” (Mongwalo o sekamego ke wa rena.)—Ditiro 9:20.
Yo Mongwe le yo Mongwe o Ile a Tšea Karolo Boboleding
12, 13. (a) Go ya ka bo-radihistori, ke’ng seo se bego se lemogega ka phuthego ya pele ya Bokriste? (b) Puku ya Ditiro le mantšu a Paulo di dumelelana bjang le mantšu a bo-radihistori?
12 Ke mo go tsebjago gabotse gore yo mongwe le yo mongwe phuthegong ya pele ya Bokriste o ile a tšea karolo modirong wa boboledi. Philip Schaff o ngwala ka Bakriste ba mehleng yeo gore: “Phuthego e nngwe le e nngwe e be e e-na le morero wa go dira modiro wa bodiredi, gomme modumedi yo mongwe le yo mongwe wa Mokriste e be e le modiredi.” (History of the Christian Church) W. S. Williams o re: “Bohlatse bja kakaretšo ke bja gore Bakriste ka moka Kerekeng ya pele, kudu-kudu bao ba bego ba e-na le mpho ya go tutuetša [dimpho tša moya], ba be ba bolela ebangedi.” (The Glorious Ministry of the Laity) Le gona o gatelela gore: “Le ka mohla Jesu Kriste o be a sa rerela gore boboledi e be feela tokelo ya batho ba itšego ba ba nago le maemo a itšego a bodiredi.” Gaešita le Celsus, lenaba la bogologolo la Bokriste, o ngwadile gore: “Batho bao ba šomago ka wulu, badiri goba balokiši ba dieta, bašogi ba matlalo le batho ba sa rutegago gotee le bao e lego batho feela e be e le baboledi ba fišegago ba ebangedi.”
13 Go nepagala ga mantšu ao go bonwa pegong ya histori ya Ditiro. Ka Pentekoste ya 33 C.E., ka morago ga go tšhollwa ga moya o mokgethwa, barutiwa ka moka, banna le basadi, ba ile ba tsebatša matete a Modimo phatlalatša. Ka morago ga tlaišo yeo e ilego ya latela polao ya Stefano, Bakriste ka moka bao ba bego ba phatlaletše gohle ba ile ba phatlalatša ditaba tše dibotse kgole le kgaufsi. Nywaga e ka bago e 28 ka morago, Paulo o be a ngwalela Bakriste ba ba-Hebere ka moka, e sego feela sehlopha se senyenyane sa baruti, ge a be a re: “Ké xôna a re ipexeng xo Modimo ka sedimo sa thêtô, e lexo sôna seenywa sa melomo ye e ipolêlaxo ka Leina la xaxwe.” (Ba-Hebere 13:15) Ge a be a hlalosa pono ya gagwe ka noši mabapi le modiro wa boboledi, Paulo o itše: “Xobane xe ke ruta Ebangedi, xa ke dirêle xo tumišwa; ke kwa kè xapeletšwa; ’me nka ba yo madi-mabe xe nka lesa xo bolêla Ebangedi.” (1 Ba-Korinthe 9:16) Go molaleng gore Bakriste ka moka ba botegago ba lekgolong la pele la nywaga ba ile ba ikwa ka tsela yeo.
14. Tswalano ke efe magareng ga tumelo le modiro wa boboledi?
14 Ka kgonthe, Mokriste wa therešo o swanetše go tšea karolo modirong wa boboledi ka gobane o sepedišana le tumelo. Paulo o itše: “Motho ó dumêla ka pelo a tseb’o lokafala; ó ipolêla ka molomo a tseb’o phološwa.” (Ba-Roma 10:10) Na ke sehlopha se senyenyane feela ka phuthegong—go swana le sehlopha sa baruti—seo se bontšhago tumelo gomme ka go rialo se na le boikarabelo bja go dira modiro wa boboledi? Ga go bjalo le gatee! Bakriste ka moka ba therešo ba hlagolela tumelo e phelago go Morena Jesu Kriste gomme ba tutueletšega go bolela phatlalatša ka tumelo yeo go ba bangwe. Ge e ba go se bjalo, tumelo ya bona e hwile. (Jakobo 2:26) Ka lebaka la ge Bakriste ka moka bao ba botegago ka go se kwanantšhe ba lekgolong la pele la nywaga la Mehleng ya rena e Tlwaetšwego ba ile ba bontšha tumelo ka tsela ye, legoa le legolo la tumišo le ile la kwewa leineng la Jehofa.
15, 16. Nea mehlala e bontšhago gore modiro wa boboledi o ile wa tšwela pele go sa šetšwe mathata.
15 Lekgolong la pele la nywaga, Jehofa o ile a šegofatša batho ba gagwe ka kgolo go sa šetšwe mathata ao a bego a le ka gare le ka ntle ga phuthego. Ka mohlala, Ditiro kgaolo ya botshelela e bega ka go se kwane magareng ga basokologi ba ba bolelago se-Hebere le bao ba bolelago Segerika. Bothata bjo bo ile bja rarollwa ke baapostola. Ka baka leo, re bala gore: “Lentšu la Modimo la ênêla, palô ya barutiwa ya ba e kxolo-kxolo motseng wa Jerusalêma. Le lešaba le lentši la baperisita la bušwa ke tumêlô.”—Ditiro 6:7.
16 Ka morago, go ile gwa tsoga dithulano tša dipolitiki magareng ga Kgoši Heroda Agaripa wa Judea le batho ba Tiro le Sidone. Badudi ba metseng yeo ba ile ba dira dikgopelo tša khutšo tšeo di ilego tša mo godiša, gomme Heroda o ile a arabela ka gore a bolele le setšhaba. Lešaba leo le bokanego le ile la thoma go goeletša ka gore: “Leo ké Lentšu la Modimo; xa se la motho.” Ka go ponya ga leihlo, morongwa wa Jehofa o ile a otla Heroda Agaripa gomme o ile a hwa ‘ka ge a se a fetišetša theto go Modimo.’ (Ditiro 12:20-23) E bile mo go nyamišago gakaakang go bao ba bego ba botile babuši ba batho! (Psalme 146:3, 4) Lega go le bjalo, Bakriste ba ile ba tšwela pele ba nea Jehofa letago. Mafelelong, “lentšu la Modimo, lôna la tšwêlêla pele la ênêla,” go sa šetšwe go se tsepame mo go bjalo ga tša dipolitiki.—Ditiro 12:24.
Boemo bja Gona Bjale le bja Nakong e Fetilego
17. Palo e golago ya batho e ile ya tsenya letsogo bakeng sa go dira’ng lekgolong la pele la nywaga?
17 Ee, phuthego ya lefaseng ka bophara ya Bokriste ya lekgolong la pele la nywaga e be e dirilwe ka batumiši ba fišegago le ba mafolofolo ba Jehofa Modimo. Bakriste ka moka bao ba botegago ka go se kwanantšhe ba ile ba tšea karolo go phatlalatšeng ditaba tše dibotse. Ba bangwe ba ile ba kopana le bao ba thabelago, gomme bjalo ka ge Jesu a boletše, ba ile ba ba ruta go kwa dilo tšohle tše a di laetšego. (Mateo 28:19, 20) Mafelelo e bile gore phuthego e ile ya gola, gomme batho ba oketšegilego ba ile ba tlatša Kgoši Dafida wa bogologolo go tumišeng Jehofa. Ka moka ba ile ba boeletša mantšu a buduletšwego ao a rego: “Ke Xo leboxa ka pelo ka moka, Modimo Mong’a-ka; nka se kxaotše xo rêta leina la xaxo. Xobane botho byo O ntiraxo ka byôna ké byo boxolo.”—Psalme 86:12, 13.
18. (a) Ke dilo dife tše di fapanego tše di lemogwago magareng ga phuthego ya Bokriste ya lekgolong la pele la nywaga le Bojakane lehono? (b) Ke’ng seo se tlago go ahla-ahlwa sehlogong se se latelago?
18 Ka baka la se, mantšu a moprofesara wa thutatumelo e lego Allison A. Trites ke ao a šišinyago kgopolo. Ge a be a bapetša Bojakane bja mehleng yeno le Bokriste bja lekgolong la pele la nywaga o itše: “Lehono dikereke gantši di gola ka tlhago (ge bana ba malapa a ka kerekeng ba dira boipolelo bja tumelo) goba ka kgolo ya go fetišetšwa (ge motho yo mofsa a fetoša bodumedi bja gagwe go tšwa kerekeng e nngwe ya lefelong leo). Lega go le bjalo, go Ditiro go bolelwa ka kgolo ya go sokologa, ka gobane phuthego e be e le gona e thoma modiro wa yona.” Na se se bolela gore Bokriste bja therešo ga bo sa gola ka tsela yeo Jesu a itšego bo swanetše go gola ka yona? Ga go bjalo le gatee. Bakriste ba therešo lehono ba swana gabotse le Bakriste ba lekgolong la pele la nywaga ka go ba le phišego go tumišeng Modimo phatlalatša. Re tla bona se sehlogong se se latelago.
[Dipotšišo tša Thuto]
[Caption on page 8]
Courtesy of Anglo-Australian Observatory, photograph by David Malin
[Caption on page 9]
Ka mehla magodimo a hlatsela letago la Jehofa
[Caption on page 10]
Modiro wa boboledi o tswalana kgaufsi le thapelo
Na o ka Hlalosa?
• Re nea Modimo letago ka ditsela dife?
• Paulo o ile a diriša bjang Psalme 19:4?
• Tswalano ke efe magareng ga tumelo le modiro wa boboledi?
• Ke’ng seo se bego se lemogega ka phuthego ya Bokriste ya lekgolong la pele la nywaga?