‘Mokgoši Wa Bona O Tšwetše Lefaseng Ka Moka’
‘Mokgoši Wa Bona O Tšwetše Lefaseng Ka Moka’
“Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa.”—MATEO 28:19.
1, 2. (a) Ke thomo efe yeo Jesu a ilego a e nea barutiwa ba gagwe? (b) Ke ka baka la’ng Bakriste ba lekgolong la pele la nywaga ba ile ba kgona go fihlelela mo gontši gakaakaa?
PEJANA ga ge a ka rotogela legodimong, Jesu o ile a nea barutiwa ba gagwe thomo. O ile a ba botša gore: “Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa.” (Mateo 28:19) Wo e be e le modiro o mogolo gakaakang!
2 Nagana feela! Ka Pentekoste ya 33 C.E., barutiwa ba ka bago 120 ba ile ba amogela go tšhollwa ga moya o mokgethwa gomme ba thoma go phethagatša thomo yeo ka go botša ba bangwe gore Jesu e be e le Mesia yo e lego kgale a holofeditšwe, yoo ka yena go ka hwetšwago phološo. (Ditiro 2:1-36) Sehlopha se senyenyane gakaakaa se be se ka fihlelela bjang batho ba “dithšaba ka moka”? Go ya ka pono ya batho go be go sa kgonege, eupša “xo Modimo ké mo xo kxônêxaxo tšohle.” (Mateo 19:26) Bakriste ba pele ba be ba thekgwa ke moya o mokgethwa wa Jehofa, gomme ba be ba e-na le maikwelo a go akgofa ga nako. (Sakaria 4:6; 2 Timotheo 4:2) Ke ka baka leo ka nywaga-some e sego kae feela, moapostola Paulo a ilego a kgona go bolela gore ditaba tše dibotse di be di tsebaditšwe go “babopya bohle ba tlase xa lexodimo.”—Ba-Kolose 1:23.
3. Ke’ng seo se ilego sa šira “mabêlê” a Bokriste bjo bo sekilego gore a se bonagale?
3 Borapedi bja therešo bo ile bja tšwela pele bo phatlalala go theoša le karolo e kgolo ya ngwaga-kgolo wa mathomo. Lega go le bjalo, Jesu o porofetile gore go tla tla nako yeo Sathane a tlago go bjala “mefoka” gomme “mabêlê” a Bokriste bja therešo a tla širwa ka nywaga-kgolo e mentši go fihlela nakong ya puno. Seo se ile sa direga ka morago ga lehu la baapostola.—Mateo 13:24-39.
Koketšego e Diregago ka Lebelo Lehono
4, 5. Go thoma ka 1919, ke modiro ofe woo Bakriste ba tloditšwego ba ilego ba thoma go o dira, gomme ke ka baka la’ng seo se ile sa tšweletša tlhohlo e kgolo?
4 Ka 1919, e be e le nako ya gore mabele a Bokriste bjo bo sekilego a aroganywe le mefoka. Bakriste ba tloditšwego ba be ba tseba gore thomo e kgolo ya Jesu e be e sa dutše e šoma. Ba be ba dumela ka mo go tiilego gore ba be ba phela “mehleng ya bofêlô” gomme ba be ba lemoga boporofeta bja Jesu bjo bo rego: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (2 Timotheo 3:1; Mateo 24:14, NW) Ee, ba be ba tseba gore go be go e na le modiro o mogolo woo o bego o sa dutše o swanetše go dirwa.
5 Lega go le bjalo, ka go swana le barutiwa ka 33 C.E., bona Bakriste bao ba tloditšwego ba ile ba lebeletšana le tlhohlo e kgolo. E be e le ba dikete tše sego kae feela bao ba bego ba le dinageng tše sego kae. Ba be ba ka kgona bjang go bolela ditaba tše dibotse “lefaseng ka moka leo go agilwego go lona”? Gopola gore badudi ba lefaseng ba be ba oketšegile mohlomongwe go tloga go ba dimilione tše 300 nakong ya bo-Kesara, go ya go mo e nyakilego go ba ba dimilione tše dikete tše pedi ka morago ga ntwa ya pele ya lefase. Le gona, ba tla tšwela pele ba oketšega ka lebelo go theoša le ngwaga-kgolo wa bo-20.
6. Go phatlalatšwa ga ditaba tše dibotse go be go šetše go tšwetše pele gakaaka’ng ka bo-1930?
6 Lega go le bjalo, ka go swana le bana babo bona ba lekgolong la pele la nywaga, bahlanka ba Jehofa ba tloditšwego ba ile ba thoma modiro wo o bego o le ka pele ga bona ka tumelo e feletšego go Jehofa, gomme moya wa gagwe o be o e-na le bona. Magareng ga bo-1930, baebangedi ba ka bago 56 000 ba be ba tsebaditše therešo ya Beibele dinageng tše 115. Go be go šetše go dirilwe modiro o mogolo kudu, eupša go be go sa šetše o mogolo-golo.
7. (a) Bakriste ba tloditšwego ba ile ba lebeletšana le tlhohlo efe e mpsha? (b) Modiro wa go kgoboketša o ile wa tšwela pele bjang go fihla lehono ka thekgo ya “dinku tše dingwê”?
7 Ka nako yeo, kwešišo e tseneletšego ya go tsebja ga “lešaba le lexolo” leo go boletšwego ka lona go Kutollo 7:9 e ile ya tšweletša tlhohlo e mpsha, le gona e ile ya nea Bakriste bao ba šomago ka thata kholofetšo ya thušo. Palo yeo e sa bolelwago ya lešaba la “dinku tše dingwê,” badumedi bao ba nago le kholofelo ya lefaseng, e be e swanetše go kgoboketšwa ‘go tšwa ditšhabeng ka moka, melokong ka moka le malemeng ka moka.’ (Johane 10:16) Ba ba be ba tla ‘hlankela Jehofa mosegare le bošego.’ (Kutollo 7:15) Se se bolela gore ba be ba tla thuša modirong wa boboledi le wa go ruta. (Jesaya 61:5) Mafelelong, Bakriste ba tloditšwego ba ile ba thabišwa ke go bona palo ya baebangedi e oketšega ka dikete tše masome ke moka e e ba ka dimilione. Ngwageng wa 2003, tlhora e mpsha ya ba 6 429 351 e ile ya tšea karolo modirong wa boboledi—bontši bja bona ke ba lešaba le legolo. * Bakriste ba tloditšwego ba thabela thušo ye, gomme dinku tše dingwe di thabela tokelo ya go thekga bana babo tšona ba tloditšwego.—Mateo 25:34-40.
8. Dihlatse tša Jehofa di ile tša arabela bjang dikgateletšong tše kgolo tšeo di ilego tša ba gona nakong ya ntwa ya bobedi ya lefase?
8 Ge sehlopha sa mabele se be se bonala gape, Sathane o ile a tsoša ntwa e šoro malebana le sona. (Kutollo 12:17) O ile a arabela bjang ge lešaba le legolo le be le thoma go tšwelela? O ile a arabela ka kgalefo e šoro! Na re ka belaela gore o be a ikarabela ka tlhaselo ya lefaseng ka bophara ya borapedi bja therešo yeo e bilego gona nakong ya ntwa ya bobedi ya lefase? Bakriste ba ile ba ba ka tlase ga kgateletšego e kgolo go tšwa mahlokoreng ka bobedi ao a bego a lwantšhana. Bana babo rena ba bantši ba rategago le dikgaetšedi ba ile ba lebeletšana le diteko tše šoro, ba bangwe ba hwela tumelo ya bona. Lega go le bjalo, ba ile ba dumelelana le mantšu a mopsalme a rego: “Xe Modimo à na le nna, ke fadiša ’ntšu la xaxwe. Xe Modimo à na le nna, ke a holofêla, xa ke šie; motho ó ntira’ng?” (Psalme 56:4; Mateo 10:28) Bakriste ba tloditšwego le dinku tše dingwe, ba ile ba ema ba tiile ba le gotee ba matlafaditšwe ke moya wa Jehofa. (2 Ba-Korinthe 4:7) Ka baka la seo, “lentšu la Modimo la ênêla.” (Ditiro 6:7) Ka 1939, ge ntwa e be e thoma, Bakriste ba botegago ba 72 475 ba ile ba bega go tšea ga bona karolo modirong wa boboledi. Lega go le bjalo, pego e sa felelago bakeng sa 1945, ngwaga woo ntwa e fedilego ka wona, e utolotše gore Dihlatse tše mafolofolo tše 156 299 di be di phatlalatša ditaba tše dibotse. A go fenywa mo go kaakang ga Sathane!
9. Ke dikolo dife tše difsa tšeo di ilego tša tsebatšwa nakong ya Ntwa ya II ya Lefase?
9 Ka mo go lego molaleng, tlhaka-tlhakano ya ntwa ya bobedi ya lefase ga se ya ka ya dira gore bahlanka ba Jehofa ba belaele gore modiro wa boboledi o tla phethwa. Ka kgonthe, ka 1943, ge ntwa e be e gaketše, go ile gwa tsebatšwa dikolo tše pedi tše difsa. Se sengwe seo ga bjale se bitšwago Sekolo sa Bodiredi sa Pušo ya Modimo, se be se swanetše go swarwa diphuthegong ka moka bakeng sa go tlwaetša Dihlatse e le motho ka o tee ka o tee go bolela le go dira barutiwa. Se sengwe e lego Sekolo sa Beibele sa Watchtower sa Gilead, e be e le sa go tlwaetša baromiwa bao ba bego ba tla tšwetša pele modiro wa boboledi dinageng di šele. Ee, ge mafelelong ntwa e fedile, Bakriste ba therešo ba be ba loketše modiro o oketšegilego.
10. Phišego ya batho ba Jehofa e ile ya bonwa bjang ngwageng wa 2003?
10 Le gona ba be ba dirile modiro o mobotse gakaakang! Ka ge ba tlwaeditšwe Sekolong sa Bodiredi sa Pušo ya Modimo, bohle—ba banyenyane le ba bagolo, batswadi le bana, gaešita le ba ba tšofetšego—ba tšere karolo e bile ba ile ba tšwela pele ba tšea karolo go phethagatšeng thomo e kgolo ya Jesu. (Psalme 148:12, 13; Joele 2:28, 29) Ngwageng wa 2003, ka kakaretšo kgwedi e nngwe le e nngwe batho ba 825 185 ba ile ba bontšha maikwelo a bona a go akgofa ga nako ka go tšea karolo tirelong ya bobulamadibogo, ka nakwana goba ka mehla. Wona ngwageng woo, Dihlatse tša Jehofa di feditše diiri tše 1 234 796 477 di boledišana le ba bangwe ka ditaba tše dibotse tša Mmušo. Ka kgonthe Jehofa o thabela phišego ya batho ba gagwe!
Dinageng di Šele
11, 12. Ke mehlala efe yeo e bontšhago pego e botse ya baromiwa?
11 Go theoša le nywaga, dialoga tša Gilead gomme morago bjale le dialoga tša Sekolo sa Tlwaetšo ya Bodiredi di tšweleditše pego e kgahlišago kudu. Ka mohlala, kua Brazil go be go e-na le bagoeledi ba ka tlase ga ba 400 ge baromiwa ba mathomo ba be ba fihla ka 1945. Ba le baromiwa bao ba ilego ba ba latela ba šomile ka thata gotee le bana babo bona ba fišegago ba Brazil, gomme Jehofa o šegofaditše maiteko a bona kudu. Ke mo go thabišago gakaakang go motho le ge e le mang yoo a gopolago nywaga yeo ya mathomong go bona gore Brazil e begile tlhora e mpsha ya ba 607 362 ka 2003!
12 Ela hloko naga ya Japane. Pele ga ntwa ya bobedi ya lefase, go be go e-na le baboledi ba Mmušo ba ka bago lekgolo nageng yeo. Nakong ya ntwa, tlaišo e šoro e ile ya fokotša palo ya bona gomme ge ntwa e fela, go be go šetše Dihlatse tše sego kae tšeo di bego di sa dutše di phela moyeng le nameng. (Diema 14:32) Babotegi bao ba sego kae bao ba lemogegago ka ntle le pelaelo ba be ba thabile ge ka 1949 ba be ba amogela baromiwa ba mathomo ba 13 bao ba tlwaeditšwego Gilead, gomme kapejana baromiwa ba ile ba rata bana babo bona ba ma-Japane bao ba fišegago le bao ba nago le kamogelo ya baeng. Nywaga ya ka godimo ga e 50 ka morago, ngwageng wa 2003, Japane e begile tlhora ya bagoeledi ba 217 508! Ka kgonthe Jehofa o šegofaditše batho ba gagwe ka mo go humilego nageng yeo. Go na le dipego tše di swanago go tšwa dinageng tše dingwe tše dintši. Bao ba kgonago go bolela dinageng di šele ba ile ba kgatha tema e kgolo go phatlalatšeng ditaba tše dibotse, moo e lego gore ka 2003 di be di kwelwe dinageng, dihlaka-hlakeng le ditikologong tše 235 lefaseng ka bophara. Ee, lešaba le legolo le tšwa ‘ditšhabeng ka moka.’
“Ba . . . Meloko ka Moka, le Merafô ka Moka, le Maleme ka Moka”
13, 14. Ke ka tsela efe Jehofa a ilego a bontšha mohola wa go bolela ditaba tše dibotse ka “maleme ka moka”?
13 Mohlolo wa mathomo wo o begilwego ka morago ga ge barutiwa ba tloditšwe ka moya o mokgethwa ka Pentekoste ya 33 C.E. e bile wa go bolela ga bona ka maleme le mašaba ao a bego a bokane moo. Ka moka bao ba ilego ba ba kwa ba ka ba ba be ba bolela leleme la ditšhaba-tšhaba, mohlomongwe Segerika. Ka ge e be e le “banna ba ba boifaxo Modimo,” mohlomongwe ba be ba kgona le go kwešiša ditirelo tša Sehebere tempeleng. Eupša kgahlego ya bona e ile ya tanywa e le ka kgonthe ge ba be ba e-kwa ditaba tše dibotse ka leleme le ba le antšego.—Ditiro 2:5, 7-12.
14 Ka mo go swanago lehono, go dirišwa maleme a mantši modirong wa boboledi. Lešaba le legolo le ile la porofetwa gore le ka se tšwe feela ditšhabeng eupša le tla tšwa gape le ‘melokong, merafong le malemeng.’ Ka go dumelelana le se, Jehofa o ile a porofeta ka Tsakaria gore: “Banna ba lesome ba mebolêlô ya mehuta-huta ba tlo swara monna wa Mo-Juda ka kobô, ba re: A nkê re yê le lena, ka xobane re kwile xore Modimo ó na le lena.” (Sakaria 8:23, mongwalo o sekamego ke wa rena.) Gaešita le ge Dihlatse tša Jehofa di se sa na mpho ya go bolela ka maleme, di tseba bohlokwa bja go ruta ka maleme ao batho ba a kwešišago.
15, 16. Baromiwa le ba bangwe ba ile ba swaragana bjang le tlhohlo ya go bolela ka maleme a lefelong leo?
15 Ke therešo gore lehono go na le maleme a sego kae ao a dirišwago kudu, a bjalo ka Seisemane, Sefora le Sepaniši. Lega go le bjalo, bao ba tlogetšego magae a bona go yo hlankela dinageng tše dingwe ba leka go ithuta maleme a lefelong leo bakeng sa go dira gore ditaba tše dibotse di hwetšagale ka mo go oketšegilego go bao ba ‘sekametšego ka mo go swanetšego bophelong bjo bo sa felego.’ (Ditiro 13:48, bapiša le NW.) Seo se ka ba thata. Ge bana babo rena ba setšhabeng sa kua Pacific Borwa sa Tuvalu ba be ba nyaka dikgatišo ka polelo ya gabo bona, yo mongwe wa baromiwa o ile a amogela tlhohlo yeo. Ka ge go be go se na pukuntšu yeo e bego e hwetšagala, o ile a thoma go hlama tlotlontšu ya mantšu a Setuvalu. Ge nako e dutše e tšwela pele, go ile gwa gatišwa puku ya O ka Phela ka mo go sa Felego Paradeiseng mo Lefaseng * ka leleme la Setuvalu. Ge baromiwa ba be ba fihla kua Curaçao, go be go se na dipuku tša Beibele e bile go se na pukuntšu ka leleme la lefelong leo e lego Sepapiamento. Le gona go be go e na le go se kwane mo gogolo mabapi le kamoo leleme le le swanetšego go ngwalwa ka gona. Lega go le bjalo, nywageng e mebedi feela ya go fihla ga baromiwa ba mathomo, go ile gwa gatišwa pampišana ya mathomo ya Bokriste ya Beibele ka leleme leo. Lehono, Sepapiamento ke le lengwe la maleme a 133 ao Morokami o gatišwago sammaletee le wa Seisemane ka wona.
16 Kua Namibia baromiwa ba pele ga se ba ka ba hwetša Hlatse ya lefelong leo bakeng sa go ba thuša go fetolela. Go feta moo, leleme le lengwe la lefelong leo e lego se-Nama, le be le se na mantšu bakeng sa dikgopolo tšeo di bego di tlwaetšwe go dirišwa tše bjalo ka “go phethega.” Moromiwa o bega gore: “Gantši ke be ke diriša barutiši bao ba bego ba ithuta Beibele gore ba fetolele. Ka ge ba be ba e-na le tsebo e nyenyane ka therešo, ke ile ka swanela ke go dula le bona bakeng sa go kgonthišetša gore lefoko le lengwe le le lengwe le be le nepagetše.” Lega go le bjalo, mafelelong pampišana ya Bophelo Lefaseng le Lefsa e ile ya fetolelwa ka maleme a mane a Namibia. Lehono, Morokami o gatišwa ka mehla ka Sekwanyama le Sendonga.
17, 18. Ke ditlhohlo dife tše go swaraganwego le tšona kua Mexico le dinageng tše dingwe?
17 Kua Mexico, leleme leo le bolelwago kudu ke Sepaniši. Lega go le bjalo, pele ga ge ma-Sepania a fihla, go be go bolelwa maleme a mantši fao, gomme a mantši a sa dutše a dirišwa. Ka baka leo, dipuku tša Dihlatse tša Jehofa gona bjale di tšweletšwa ka maleme a šupago a Mexico gotee le ka Polelo ya Diatla ya Mexico. Tirelo ya Mmušo ya Semaya e bile kgatišo ya mathomo ya go ba le letšatši-kgwedi ka polelo ya se-India sa Amerika. Ka kgonthe, ma-Maya, ma-Aztec le ba bangwe ba dikete tše mmalwa ba gare ga bagoeledi ba Mmušo ba 572 530 kua Mexico.
18 Morago bjale, ba dimilione ba tšhabetše dinageng di šele e le bafaladi, goba ba hudugile ka mabaka a tša boiphedišo. Ka baka la seo, dinaga tše dintši gona bjale di na le mašemo a magolo a leleme le šele ka lekga la mathomo. Dihlatse tša Jehofa di amogetše tlhohlo ye. Ka mohlala, kua Italy go na le diphuthego le dihlopha ka maleme a 22 ka ntle le Setaliana. E le go thuša bana babo rena go bolela le batho bao ba bolelago maleme a mangwe, morago bjale go ile gwa rulaganywa diklase tša go ruta maleme a 16 go akaretša le Polelo ya Diatla ya Setaliana. Dinageng tše dingwe tše ntši, Dihlatse tša Jehofa di dira maiteko a swanago bakeng sa go fihlelela badudi ba bantši ba bafaladi. Ee, ka thušo ya Jehofa, lešaba le legolo le tšwa dihlopheng tša maleme a mantši-ntši e le ka kgonthe.
‘Lefaseng ka Moka’
19, 20. Ke mantšu afe a Paulo ao a phethagalago ka tsela e makatšago lehono? Hlalosa.
19 Lekgolong la pele la nywaga, moapostola Paulo o ngwadile gore: “A fa ga ba ešo ba le kwa? Ee ruri, ‘tumo [mokgoši, NW] ya bona e tšwetše lefaseng ka moka, gomme dipolelo tša bona di fihlile mafelelong a dilete.’” (Ba-Roma 10:18, PK) Ge e ba seo e be e le therešo lekgolong la pele la nywaga, ke sa therešo kudu gakaakang mehleng ya rena! Ba dimilione—mohlomongwe go feta nakong le ge e le efe e nngwe e fetilego historing—ba re: “A nkê ke rêtê Morêna mehla yohle, ’me molomo wa-ka o dulê ò na le sefela s’axwe.”—Psalme 34:1.
20 Go feta moo, modiro ga o fokotšege. Palo ya bagoeledi ba Mmušo e tšwela pele e oketšega. Nako e oketšegilego kudu e dirišwa modirong wa boboledi. Go dirwa maeto a go boela a dimilione e bile go swarwa dithuto tša Beibele tše dikete tše makgolo. Le gona go tšwela pele go e ba le ba bangwe bao ba thabelago. Ngwagola, tlhora e mpsha ya ba 16 097 622 e bile gona go binweng ga Segopotšo sa lehu la Jesu. Ka mo go lego molaleng, go sa dutše go e na le modiro o montši woo o swanetšego go dirwa. Anke re tšweleng pele re ekiša potego e tiilego ya bana babo rena bao ba ilego ba kgotlelela tlaišo e šoro. Le gona anke re bontšheng phišego ya bana babo rena ka moka bao ga e sa le go tloga ka 1919 ba ilego ba ineela tirelong ya Jehofa. Anke ka moka ga rena re tšwele pele re arabela kopelong ya mopsalme e rego: “Tšohle tše di bušaxo môya di rêtê Morena. Haleluya!”—Psalme 150:6.
[Mengwalo ya ka tlase]
^ ser. 7 Bona pego ya ngwaga le ngwaga go matlakala 18 go ya go 21 a makasine wo.
^ ser. 15 E gatišitšwe ke Dihlatse tša Jehofa.
[Dipotšišo tša Thuto]
Na o ka Hlalosa?
• Ke modiro ofe woo bana babo rena ba ilego ba thoma go o dira ka 1919, gomme ke ka baka la’ng e be e le tlhohlo?
• Ke bomang bao ba ilego ba bokanywa bakeng sa go thekga modiro wa boboledi?
• Ke pego efe yeo baromiwa le ba bangwe bao ba hlankelago dinageng di šele ba ilego ba e bokanya?
• Ke bohlatse bofe bjo o ka bo tsopolago bakeng sa go bontšha gore Jehofa o šegofatša modiro wa batho ba gagwe lehono?
[Caption on page 14]
Explosion: U.S. Navy photo; others: U.S. Coast Guard photo
[Caption on page 15]
Tlhaka-tlhakano ya ntwa ya bobedi ya lefase ga se ya ka ya dira gore Bakriste ba belaele gore ditaba tše dibotse di tla bolelwa
[Caption on page 17]
Lešaba le legolo le tla tšwa melokong le malemeng ka moka