Dikholofetšo Tšeo o ka di Botago

MOPOROFETA wa Modimo Mika o be a tseba gore gantši dikholofetšo e ka ba tšeo di sa botwego. Mehleng ya gagwe, gaešita le bagwera ba kgaufsi-ufsi ba be ba ka se holofelwe ka mehla gore ba tla phethagatša dikholofetšo tša bona. Ka gona Mika o lemošitše ka gore: “O se kê wa bôta weno. O se holofêlê moxwêra wa xaxo. Leta mojakô wa molomo w’axo, xe O na le eo O lalaxo O mo xokaretše.”—Mika 7:5.

Na Mika o ile a dumelela boemo bjo bjo bo nyamišago bo mo dira gore a belaele dikholofetšo ka moka? Aowa! O ile a bontšha kholofelo e feletšego dikholofetšong tšeo di dirilwego ke Modimo wa gagwe e lego Jehofa. Mika o ngwadile gore: “Xe e le nna, ke lebeletše Morêna ke dula kè letetše Modimo Mo-mphološi.”—Mika 7:7.

Ke ka baka la’ng Mika a be a e-na le kholofelo e bjalo? Ka gobane o be a tseba gore Jehofa ka mehla o phethagatša dikholofetšo tša gagwe. Dilo ka moka tšeo Modimo a ilego a di holofetša bo-rakgolokhukhu ba Mika di ile tša phethagala e le ka kgonthe. (Mika 7:20) Go botega ga Jehofa nakong e  fetilego go ile gwa nea Mika mabaka ka moka a go dumela gore O be a tla phethagatša dikholofetšo tša Gagwe nakong e tlago.

“Xa xo na le Setee se se Hlokexilexo”

Ka mohlala, Mika o be a tseba gore Jehofa o lokolotše ba-Isiraele bokgobeng bja kua Egipita. (Mika 7:15) Jošua, yo a ilego a bona go lokollwa moo, o ile a kgothaletša ba-Isiraele-gotee le yena gore ba bote dikholofetšo tšohle tša Modimo. Motheong ofe? Jošua o ile a ba gopotša gore: “Lena a nkè Le lemoxeng ka pelo ka moka le ka môya ka moka, xe xo sa ka xwa hlaela le setee sa tše botse tše Morêna Modimo wa lena a Le boletšexo ka tšôna; ka moka di tšweletše; xa xo na le setee se se hlokexilexo.”—Jošua 23:14.

Ba-Isiraele ba be ba tseba gabotse gore Jehofa o ba diretše dilo tše di kgahlišago. O phethagaditše kholofetšo ya gagwe go rakgolokhukhu wa bona Aborahama ya gore bana ba gagwe ba be ba tla lekana le dinaledi ka palo le gore ba be ba tla tšea naga ya Kanana. Jehofa gape o boditše Aborahama gore ditlogolo tša gagwe di be di tla tlaišwa ka nywaga e 400 eupša di be di tla boela Kanana ka “ba leloko la bonê.” Tše ka moka di ile tša direga.—Genesi 15:5-16; Ekisodo 3:6-8.

Ba-Isiraele ba be ba amogetšwe gabotse kua Egipita mehleng ya morwa wa Jakobo e lego Josefa. Ba-Egipita ka morago ba ile ba ba gapeletša ka sehlogo gore ba dire modiro wa makgoba, eupša go etša ge Modimo a be a holofeditše, nakong ya meloko e mene yeo e bego e latelelana go tloga nakong ya ge ba be ba fihla Egipita, ditlogolo tše tša Aborahama di ile tša lokollwa bokgobeng bja Egipita. *

Ka godimo ga nywaga e 40 yeo e latetšego, ba-Isiraele ba ile ba ba le bohlatse bjo bo oketšegilego bja gore Jehofa ka mehla o phethagatša dikholofetšo tša gagwe. Ge ba-Amaleke ba be ba thoma go hlasela ba-Isiraele ka ntle le lebaka, Modimo o ile a lwela batho ba gagwe gomme a ba šireletša. O ile a kgotsofatša dinyakwa tša bona ka moka tša nama leetong la nywaga e 40 lešokeng gomme mafelelong a ba nea Naga ya Kholofetšo gore ba dule go yona. Ge Jošua a be a dutše a hlahlobišiša histori ya tsela ya Jehofa ya go dirišana le ditlogolo tše tša Aborahama, o ile a bolela ka kgodišego gore: “Xa xo a’ hlaêla le setee sa tše botse ka moka tše Morêna a di boditšexo ba sethšaba sa Isiraele; ka moka di be di tšweletše.”—Jošua 21:45.

Aga Kholofelo Dikholofetšong tša Modimo

O ka aga bjang kholofelo dikholofetšong tša Jehofa, go etša ge Mika le Jošua ba ile ba dira? Ge e le gabotse, o aga bjang kholofelo bathong ba bangwe? Ka go ba tseba ka mo go tseneletšego ka mo go ka kgonegago. Ka mohlala, o ka bona kamoo ba botegago ka gona ka go lemoga gore ba leka ka potego go phethagatša tšohle tšeo ba di holofeditšego. Ge tsebo ya gago ka batho ba bjalo e dutše e gola, o tšwela pele go aga kholofelo ya gago go bona. O ka dira se se swanago ge e le mabapi le go aga kholofelo dikholofetšong tša Modimo.

Tsela e nngwe yeo o ka dirago se ka gona ke ka go naganišiša ka tlholo le melao yeo e e laolago. Bo-rathutamahlale ba bota melao ye, e bjalo ka e laolago tsela yeo ka yona sele e tee ya motho e ikarolago le go ikatiša e le gore e tšweletše disele tše dibilione tšeo di bopago mmele  wa gago. Ge e le gabotse, melao e laolago tsela yeo dilo gotee le matla di šomago ka gona legohleng ka moka e swanetše go ba e hlamilwe ke Mohlami wa melao yo a botegago ka mo go feletšego. Ka kgonthe o ka bota dikholofetšo tša gagwe, go etša ge o bota melao yeo e laolago tlholo ya gagwe.—Psalme 139:14-16; Jesaya 40:26; Ba-Hebere 3:4.

Ka moporofeta Jesaya, yo a phetšego mehleng ya Mika, Jehofa o ile a diriša go ba gona ka mehla ga dihla le modikologo wo o makatšago wa meetse go bontšha go botega ga lentšu la gagwe. Dipula di be di ena ngwaga ka ngwaga. Di be di nošetša mmu gomme di dira gore batho ba kgone go bjala dipeu tša bona le go buna ditšweletšwa. Tabeng ye, Jehofa o itše: “Bo-ka pula le leswêla dì e-tšwa lexodimong, ’me di se hlwê di boêla xôna, ya ba tša xo nošetša lefase xore le hloxišê dibyalo, di melê, di fê mobyadi peu, le moji boxôbê,—le Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phetha se ke le rometšexo sôna.”—Jesaya 55:10, 11.

Dikholofetšo Tšeo di ka Botwago tša Paradeise

Go hlahloba tlholo go ka aga kholofelo go Mmopi, eupša go nyakega mo go gontši ge e ba o nyaka go ithuta ka dikholofetšo tšeo di bopago karolo ya ‘lentšu leo le tšwago molomong wa gagwe.’ Gore o tsebe ka dikholofetšo tše e le gore o kgone go di bota, o swanetše go hlahloba pego ya Mangwalo yeo e buduletšwego ke Modimo ya morero wa Gagwe ka lefase le ditirišano tša gagwe le batho.—2 Timotheo 3:14-17.

Moporofeta Mika o be a e-na le kholofelo dikholofetšong tša Jehofa. Wena o na le pego e ntši e hwetšagalago yeo e buduletšwego ke Modimo go feta yeo Mika a bego a e-na le yona. Ge o dutše o bala Beibele gomme o naganišiša ka yona, le wena o ka aga kholofelo go phethagatšweng ga dikholofetšo tša Modimo. Dikholofetšo tše ga di akaretše feela ditlogolo tša Aborahama tša tlhago eupša di akaretša batho ka moka. Jehofa o holofeditše mopatriareka yo yo a boifago Modimo gore: “Dithšaba ka moka tša lefase di tlo šexofala ka peu ya xaxo, ka ’baka la xobane O kwele lentšu la-ka.” (Genesi 22:18) Karolo e bohlokwa kudu ya “peu”, goba ngwana, ya Aborahama ke Mesia e lego Jesu Kriste.—Ba-Galatia 3:16.

Ka Jesu Kriste, Jehofa o tla kgonthišetša gore ditšhegofatšo di tšhologela go batho ba kwago. Le gona ke’ng seo Modimo a holofeditšego go se dira mehleng ya rena? Mika 4:1, 2 e araba ka mantšu a a boporofeta gore: “Bofelong bya mabaka thaba ya Ntlo ya Modimo e tlo ba e thekxilwe xodimo xa dithaba, è beilwe xodimo xa meboto; ’me dithšaba di tlo thšoloxêla mo xo yôna. Merafô-rafô e tlo ya xôna è re: A re yeng re rotoxêlê thabeng ya Morêna, Ngwakong wa Modimo wa Jakobo, a re rutê ’tsela tš’axwe.”

Bao ba ithutago ka ditsela tša Jehofa ba “tšea dithšoša ba rula mexoma ka tšôna, ba tšea marumô ba rula maxwêtla ka ôna.” Ditshekamelo le ge e le dife tša ntwa di a fela. Go se go ye kae lefase le tla tlala ka batho ba lokilego, gomme go ka se be le yo a tla ba tšhošago. (Mika 4:3, 4) Ee, Lentšu la Modimo le holofetša gore ka tlase ga pušo ya Mmušo yeo e lego diatleng tša Jesu Kriste, Jehofa o tla fediša batlaiši ka moka lefaseng.—Jesaya 11:6-9; Daniele 2:44; Kutollo 11:18.

Gaešita le bao ba ilego ba tlaišega gotee le bao ba hwilego ka baka la go rabela ga batho malebana le Modimo ba tla tsošwa ka tebelelo ya go phela ka mo go sa felego lefaseng. (Johane 5:28, 29) Sathane le batemona ba gagwe, e lego bahlohleletši ba bobe, ba tla ba ba  se sa le gona, gomme mafelelo a sebe sa Adama a tla fedišwa ka sehlabelo sa Jesu sa topollo. (Mateo 20:28; Ba-Roma 3:23, 24; 5:12; 6:23; Kutollo 20:1-3) Le gona boemo bja batho ba kwago e tla ba e le bofe? Ka kgonthe, ba tla ba ba šegofaditšwe ka bophelo bjo bo sa felego boemong bjo phethagetšego bja tša maphelo lefaseng la paradeise!—Psalme 37:10, 11; Luka 23:43; Kutollo 21:3-5.

A dikholofetšo tše dibotse gakaakang! Eupša na o ka di bota? Ee, o ka di bota. Tše ga se dikholofetšo tša batho bao ba ka bago ba e-na le maikemišetšo a mabotse eupša ba se na matla a go di phethagatša. Ke dikholofetšo tša Modimo yo Matla-ohle, yoo a ka se kego a bolela maaka le yoo ‘a sa diegišego tše a di boletšego.’ (2 Petro 3:9; Ba-Hebere 6:13-18) O ka ba le kholofelo e feletšego dikholofetšong tšeo di lego ka Beibeleng, ka gobane Mothopo wa tšona ke “Morêna Modimo-mmotexi.”—Psalme 31:5.

[Mengwalo ya ka tlase]

[Ntlhakgolo go letlakala 6]

“[Ga] xwa hlaela le setee sa tše botse tše Morêna Modimo wa lena a Le boletšexo ka tšôna.”—JOŠUA 23:14.

[Caption on page 4]

Jehofa o ile a phethagatša dikholofetšo tša gagwe go ba-Isiraele Lewatleng le Lehwibidu gotee le lešokeng

[Caption on page 7]

Jehofa o ile a phethagatša kholofetšo ya gagwe go Aborahama. Peu ya gagwe e lego Jesu Kriste, e tla tlišetša batho ditšhegofatšo