Dipotšišo tše Tšwago go Babadi

Ke maemo afe ao a ilego a dira gore Juda a be le dikopano tša botona le botshadi le mosadi yoo a bego a nagana gore ke seotswa, go etša ge go boletšwe go Genesi 38:15, 16?

Le ge Juda a ile a ba le dikopano tša botona le botshadi le mosadi yo a bego a nagana gore ke seotswa, ge e le gabotse e be e se seotswa. Go ya ka Genesi kgaolo 38, se ke seo se ilego sa direga.

Pele ga ge morwa wa Juda wa leitšibolo a ka ba le barwa le ge e le bafe le mosadi wa gagwe e lego Thamara, o ile a bolawa ka gobane “Morêna ó bone . . . e le motho e mobe.” (Genesi 38:7) Ka nako yeo, mokgwa wa gore mosadi a nyalwe ke ngwanabo monna wa gagwe o be o dirišwa. Se se be se nyaka gore ge monna a hwile a se na mojabohwa, ngwanabo o be a swanetše go nyala mohlologadi gore a kgone go ba le mojabohwa. Eupša morwa wa Juda wa bobedi e lego Onane, o ile a gana go phetha boikarabelo bja gagwe. Ka go rialo, o ile a hwa e le ka baka la kahlolo e tšwago go Modimo. Ka gona Juda o ile a bušetša ngwetši ya gagwe Thamara lapeng la tatagwe go ba go fihla ge morwa wa Juda wa boraro e lego Sela a godile ka mo go lekanego gore a mo nyale. Lega go le bjalo, ge nywaga e dutše e e-ya, Juda o ile a se ke a nyadiša Sela le Thamara. Ka gona ka morago ga ge Juda a hwetšwe ke mosadi, Thamara o ile a loga leano la go hwetša mojabohwa ka Juda, e lego mo-Isiraele yoo e bego e le ratswal’agwe. O ile a dira se ka go itira eka ke seotswa sa tempeleng gomme a dula tseleng yeo a bego a tseba gore Juda o tlo feta go yona.

Ka ge a be a sa lemoge gore ke Thamara, Juda o ile a ba le dikopano tša botona le botshadi le yena. Bakeng sa moputso wa gagwe, ka bohlale o ile a ikhweletša dilo tša Juda tša motho ka noši gomme ka tšona o ile a kgona go hlatsela ka morago gore ke yena a mo imišitšego. Ge therešo e be e utollwa, Juda ga se a ka a mmea molato eupša o ile a bolela ka boikokobetšo gore: “O mphentše; molato ké xe nna kè sa ka ka mo tšeiša Sela morwa wa-ka.” Le gona ka mo go swanetšego kudu, o ile “a se kê a hlwa a mo tseba.”—Genesi 38:26.

Juda o be a fošitše ka gore a se nee Thamara morwa wa gagwe e lego Sela go etša ge a be a holofeditše. Le gona o bile le dikopano tša botona le botshadi le mosadi yo a bego a nagana gore ke seotswa sa tempeleng. Se se be se sa dumelelane le morero wa Modimo, wa gore monna a be le dikopano tša botona le botshadi feela tokišetšong ya lenyalo. (Genesi 2:24) Lega go le bjalo, ge e le gabotse, Juda ga se a ka a ba le dikopano tša botona le botshadi le seotswa. Eupša, ka go se tsebe o ile a tšeela morwa wa gagwe Sela legato ka go dira seo Sela a ka bego a se dirile ge a be a ile a nyala mosadi wa ngwanabo gomme ka go rialo Juda a ba tatago ngwana ka molao.

Ge e le Thamara, seo a se dirilego e be e se se gobogilego. Bana ba gagwe ba mafahla ba be ba sa lebelelwe e le bana bao ba hweditšwego ka bootswa. Ge Boase wa Betlehema a be a nyala Ruthe wa mo-Moaba yo e bego e le mosadi wa ngwanabo, bagolo ba Betlehema ba ile ba bolela gabotse ka morwa wa Thamara e lego Pheretse, ba botša Boase gore: “A lapa la xaxo le etšê la Pheretse yo Juda a mmelexetšwexo ke Thamara; xo bê byalo ka bana, ba Morêna a tl’o xo Xo nea ka mosadi é.” (Ruthe 4:12) Pheretse le yena o lokeleditšwe gare ga bo-rakgolokhukhu ba Jesu Kriste.—Mateo 1:1-3; Luka 3:23-33.