“Modimo . . . Xa A Dule Nywakong Ye E Axilwexo Ka diatla”

GA GO pelaelo gore moapostola Paulo o be a tlwaelane le ditempele tša Athena, ka ge ditempele tše di be di hwetšwa metseng e mentši e megolo yeo a bego a e etela maetong a gagwe a boromiwa. Go ya ka Encyclopædia Britannica, Athena e be e tsebja e le modimogadi e sego wa ntwa le bohlale feela eupša gape e le wa “maano a bokgoni bja go tšweletša khutšo ka mo go tlwaelegilego.”

Tempele e tsebegago kudu ya Athena e be e bitšwa Parthenon, e agilwego Athene, e lego motse-mogolo woo o reeletšwego ka modimogadi. Ka ge e be e lebelelwa e le e nngwe ya ditempele tše kgolo tša lefase la bogologolo, Parthenon e be e e-na le sehlwa-seeme sa Athena seo se bego se dirilwe ka gauta le lenaka la tlou sa bophagamo bja dimithara tše 12. Ge Paulo a be a etela Athene, tempele ye ya mmabole o mošweu e be e dutše e le pontšho e tumilego ya motse-mogolo mo e ka bago ka nywaga e 500.

Ge a be a bolela a lebeletše Parthenon, Paulo o ile a ruta sehlopha sa ba-Athene ka ‘Modimo yo a sa dulego nywakong ye e agilwego ka diatla.’ (Ditiro 17:23, 24) Mohlomongwe bogolo bja ditempele tša Athena goba bobotse bja medimo ya tšona ya diswantšho bo ile bja dira gore Athena a bonagale a kgahliša kudu go batheetši ba bangwe ba Paulo go feta Modimo yo a sa bonagalego yo ba sa mo tsebego. Lega go le bjalo, bjalo ka ge Paulo a bontšhitše, ga se ra swanela go nagana gore Mmopi wa batho “a ka swana le sedirwa sa xauta xoba silifêra, sa xo bopya ke makxônê ka bohlale bya motho.”—Ditiro 17:29.

Medimo le medimogadi e swanago le Athena—yeo go ba ga yona le letago go bego go ithekgile ka ditempele le dihlwa-di-eme—e tlile ya ba ya feta. Sehlwa-seeme sa Athena se nyameletše go Parthenon lekgolong la bohlano la nywaga C.E., gomme go šetše feela mašaledi a ditempele tša gagwe tše sego kae. Ke bomang lehono bao ba lebelelago go Athena bakeng sa bohlale le tlhahlo?

Ke mo go fapanego gakaakang ka Jehofa “Modimo Ra-mabaka” yo a sa kago a bonwa ke motho. (Ba-Roma 16:26; 1 Johane 4:12) Barwa ba Kora ba ngwadile gore: “Modimo yó ké Yêna Modimo wa rena wa mehleng le neng le neng; ó tlo re sepediša xo ya xo ile.” (Psalme 48:14) Tsela e nngwe ya go thabela tlhahlo ya Jehofa Modimo ke ka go ithuta Lentšu la gagwe e lego Beibele, le ka go diriša keletšo ya gagwe bophelong bja rena.