Neang Modimo Letago E Sego Motho

DIKGWEDING tše di sa tšwago go feta, barati ba toka go dikologa lefase ba ile ba ithuta kamoo ba ka neago Modimo letago nakong ya ge ba bokane Dikopanong tša Selete tša Dihlatse tša Jehofa tša “Neang Modimo Letago.” Anke re boeletšeng lenaneo le le rutago leo le ilego la newa moo.

Lenaneo leo le theilwego Beibeleng le ile la tšea matšatši a mararo ka go latelana go bontši bja bao ba bego ba le dikopanong tša selete gomme la tšea matšatši a mane go bao ba ilego ba kgona go ba gona dikopanong tše di kgethegilego tša ditšhaba-tšhaba. Bao ba bego ba le gona ba kwele palo-moka ya dikarolo tša Mangwalo tše 30 go akaretša le dipolelo tšeo di ilego tša godiša tebogo ya go leboga dilo tša moya, diphihlelo tšeo di ba matlafaditšego tumelo, dipontšho tšeo di ilego tša gatelela go dirišwa ga melao ya motheo ya Beibele ka mo go šomago gotee le terama ya moaparo o feletšego yeo e bontšhitšego ditlhohlo tšeo Bakriste ba lekgolong la pele la nywaga ba ilego ba lebeletšana le tšona. Ge e ba o bile gona go e nngwe ya dikopano tše, ke ka baka la’ng o sa boeletše dintlha tša gago ge o dutše o bala sehlogo se? Re kgodišegile gore go dira bjalo go tla go gopotša dikgopotšo tše di rategago tša monyanya o humilego wa moya gomme gwa buša gwa ba mo go rutago.

Sehlogo sa Letšatši la Pele: “E a Swanetšwexo ke Letaxô . . . ke Wene [Jehofa]”

Ka morago ga kopelo ya go bula le thapelo, seboledi sa pele se ile sa amogela ka borutho bohle bao ba bego ba le gona ka polelo yeo e bego e lebišitše tlhokomelo lebakeng le legolo la kopano ka sehlogo se se rego: “Re Kopane Bakeng sa go Nea Modimo Letago.” Se tsopola go tšwa go Kutollo 4:11, seboledi se ile sa gatelela sehlogo sa kopano ka kakaretšo. Se ile sa leba tabeng ka go hlalosa seo se bolelwago ke go nea Modimo letago. Se diriša lengwalo la Psalme, se ile sa gatelela gore go nea Modimo letago go akaretša “borapedi,” “tumišo” le “tebogo.”—Psalme 95:6; 100:4, 5; 111:1, 2.

Karolo e latetšego e be e e-na le sehlogo se se rego: “Ba Lehlogonolo ke Bao ba Neago Modimo Letago.” Seboledi se ile sa bolela mantšu a ao a kgahlišago. Ka ge go e-na le Dihlatse tša Jehofa tše di fetago dimilione tše tshela dinageng tše 234 go dikologa lefase, go ka bolelwa gore di nea Jehofa letago bošego le mosegare. (Kutollo 7:15) Dipoledišano le bana babo rena le dikgaetšedi ba mmalwa ba Bakriste bao ba lego mohuteng o itšego wa tirelo ya nako e tletšego e bile tšeo di kgahlišago karolong ye le tšeo di ilego tša ruthetša dipelo tša batheetši.

Polelo e latelago e bile e rego: “Tlholo e Tsebatša Letago la Modimo.” Gaešita le ge a homotše, magodimo a tlhago a bonagatša bogolo bja Modimo gomme a re thuša go godiša go leboga ga  rena tlhokomelo ya gagwe e lerato. Se se ile sa hlaloswa gabotse ka tatelano.—Jesaya 40:26.

Tlaišo, kganetšo, ditutuetšo tša lefase le ditshekamelo tša sebe di hlohla potego ya Bakriste ba therešo. Ka baka leo, polelo e rego: “Sepela ka go Botega” e ile ya goga tlhokomelo ya batheetši. Go ahla-ahlwa ga Psalme 26 temana ka temana go ile gwa latela gomme ka morago gwa latela dipoledišano le Hlatse yeo e sa lego sekolong yeo e ilego ya ema ka go tia boitshwarong bjo bobotse le e nngwe yeo e ilego ya fetša nako e ntši kudu boithabišong bjo bo belaetšago eupša e ilego ya gata megato ya go lokiša bothata.

Polelo ya thwadi e rego: “Dipono tša Letago tša Boporofeta di re Hlohleletša go Tšwela Pele!” e ile ya phetha lenaneo la mesong. Seboledi se ile sa tsopola mehlala ya moporofeta Daniele le ya moapostola Johane le moapostola Petro e le bao tumelo ya bona e ilego ya matlafatšwa ke dipono tša letago tša boporofeta ka go dumelelana le go thewa gotee le go šoma ga Mmušo wa Modimo ka Mesia. Mabapi le motho le ge e le ofe yo a ka bago a lebetše bohlatse bjo bo kwagalago bja go bontšha gore re mehleng ya bofelo, seboledi se itše: “Re holofela ka pelo ka moka gore ba bjalo ba tla tsepamišetša dikgopolo tša bona gape therešong ya go ba gona ga Kriste letagong la Mmušo gomme ba tla thušwa go tsošološa matla a moya gape.”

Lenaneo la thapama le ile la thoma ka polelo e nago le sehlogo se se rego: “Letago la Jehofa le Utolletšwe Baikokobetši.” Seboledi se ile sa bontšha kamoo Jehofa a beago mohlala wa boikokobetšo gaešita le ge e le Motho yo a phagamego kudu legohleng. (Psalme 18:35) Jehofa o rata bao ba ikokobeditšego e le ka kgonthe, eupša o ganana le bao ba ipontšhago e le baikokobetši ge feela ba dirišana le dithaka tša bona goba bao ba ba phagametšego eupša ba swara bao ba lego ka tlase ga bona makgwakgwa.—Psalme 138:6.

Se se latetšego, boporofeta bja Beibele bo ile bja ahla-ahlwa tšhiedišanong yeo e bego e gatelela dikarolo tše di fapa-fapanego tša sehlogo se se rego: “Boporofeta bja Amosi—Molaetša wa Bjona Bakeng sa Mehla ya Rena.” Se bolela ka mohlala wa Amosi, seboledi sa pele se ile sa lebiša tlhokomelo boikarabelong bjo re nago le bjona bja go lemoša batho ka kahlolo ya Jehofa e tlago. Sehlogo sa polelo ya sona se be se re: “Bolelang Lentšu la Modimo ka Sebete.” Seboledi sa bobedi se ile sa rotoša potšišo e rego: “Na Jehofa o tla ka a fediša bokgopo le tlaišego lefaseng le?” Sehlogo sa sona se se rego: “Kahlolo ya Modimo go ba Kgopo,” se ile sa bontšha gore kahlolo ya Modimo ke e swanelago ka mehla, ke e sa phemegego le gona ke e kgethago. Seboledi sa mafelelo tšhiedišanong se ile sa lebiša tlhokomelo sehlogong se se rego: “Jehofa o Hlahloba Pelo.” Bao ba fišegelago go thabiša Jehofa ba tla kwa mantšu ao a lego go Amosi 5:15 a rego: “Hlôyang tše mpe, Le ratê tše botse.”

Dino tše di tagago, tše bjalo ka beine yeo e thabišago pelo di ka dirišwa gampe. Polelong ya sona e rego: “Phema Moreo wa go Diriša Dino-tagi Gampe,” seboledi se ile sa lokeletša dikotsi tša nama le tša moya mabapi le go diriša dino-tagi ka mo go feteletšego, gaešita le ge motho a fo tšea mahlo a tšhipa. Se ile sa nea molao wa motheo wo o hlahlago o rego: Ka ge tekanyo ya bjala bjo bo nwewago e fapana go ya ka batho, tekanyo le ge e le efe yeo e fokodišago ‘bohlale bja gago bjo bo šomago le matla a go nagana’ ke e ntši kudu bakeng sa gago ka noši.—Diema 3:21, 22, bapiša le NW.

Ka ge re phela dinakong tše di hlobaetšago, sehlogo se se latetšego se se rego: “Jehofa, ‘Sebo sa Rena Dinakong tša Tlalelo’” se itlhatsetše e le se homotšago. Re ka thušwa ke thapelo, moya o mokgethwa le Bakriste-gotee le rena gore re kgotlelele.

Polelo ya mafelelo ya letšatši e rego: “‘Naga e Botse’—Mohlala wa Seo Paradeise e Tlago go ba Sona,” e ile ya phetha ka semaka se se thabišago go bohle—kgatišo e mpsha yeo e tletšego ka mebapa e mentši ya Beibele! E na le sehlogo se se rego Bonang Naga e Botse.

Sehlogo sa Letšatši la Bobedi: “Tsebatšang Letago la Gagwe Gare ga Ditšhaba”

Ka morago ga go ahla-ahlwa ga temana ya letšatši, go ile gwa latela tšhiedišano ya bobedi ya kopano ka sehlogo se se rego: “Bonagatšang Letago la Jehofa Bjalo ka Diipone.” Karolo ya pele e ile ya hlalosa ka botlalo taba e rego: “Ka go Phatlalatša Ditaba tše Dibotse Kae le Kae” gomme ya akaretša le ditiragatšo tša diphihlelo tša kgonthe tša tirelo ya tšhemo. Polelo ya bobedi e ile ya akaretša pontšho ya leeto la go boela ge seboledi se be se ahla-ahla sehlogo se se rego: “Ka go Tloša  Seširo Mahlong a Bao ba Foufaditšwego.” Karolo ya mafelelo e nago le sehlogo se se rego: “Ka go Dira Bjalo ka mo go Tletšego Bodireding bja Rena,” e be e tletše ka dipoledišano tše di kgahlišago tšeo di akaretšago diphihlelo tša tšhemo.

Karolo e latetšego ya lenaneo e be e e-na le sehlogo se se rego: “Ba Hloilwe Ntle le Lebaka.” E ile ya akaretša dipoledišano tše di kgothatšago tša batho bao ba botegago bao ka matla a Modimo ba ilego ba kgomarela potego ya bona ka tlase ga kganetšo.

Tiragalo e kgolo ya kopano yeo e bego e letetšwe ka tlhologelo ke polelo ya kolobetšo yeo e ilego ya latelwa ke go inwa ka meetseng ka mo go feletšego ga barutwana ka moka bao ba swanelegago. Go kolobetšwa ka meetseng go bontšha go ineela ga motho ka mo go feletšego go Jehofa. Ka baka leo, sehlogo sa taba e be e le se se swanetšego kudu: “Go Phelela Boineelo bja Rena go Tlišetša Modimo Letago.”

 Lenaneo la thapama le ile la thoma ka polelo e kgothaleditšego go itlhahloba e rego: “Go Hlagolela Pono e Swanago le ya Kriste Mabapi le Bophagamo.” Seboledi se ile sa phagamiša ntlha ye e kgahlišago: Bophagamo bo Tlišwa ke go Ekiša Boikokobetšo bja Kriste. Ka baka leo, Mokriste ga se a swanela go tsoma boikarabelo e le gore a kgotsofatše tlhologelo ya motho ka noši. O swanetše go ipotšiša gore, ‘Na ke ikemišeditše go dira mediro e holago yeo e ka no se lemogegego gabonolo?’

Na o fela o ikwa o lapile? Karabo e molaleng. Polelo e nago le sehlogo se se rego: “Ba Lapile Eupša ga ba Lesetše” e ile ya thabelwa ke bohle. Dipoledišano le bao e bilego Dihlatse ka nako e telele di bontšhitše gore Jehofa a ka re ‘fa go tielela ka moya wa gagwe.’—Ba-Efeso 3:16.

Ga re belegwe re e-na le seka sa go nea ka seatla se se bulegilego eupša seo se swanetše go ithutwa. Ntlha ye e bohlokwa e ile ya gatelelwa karolong e rego: “‘E-bang Bao ba Ratago go Nea, le Abelane le ba Bangwe.’” Go ile gwa rotošwa potšišo ye yeo e hlohlago kgopolo: “Na re ikemišeditše go diriša metsotso e itšego ya letšatši la rena re e-na le bana babo rena le dikgaetšedi bao ba tšofetšego, bao ba babjago, bao ba gateletšegilego goba bao ba lewago ke bodutu?”

Sehlogo se se rego: “Phafogela ‘Lentšu la ba Šele’” se ile sa goga tlhokomelo ya batheetši. Polelo ye e ile ya swantšha balatedi ba Jesu le dinku tšeo di theetšago feela lentšu la gagwe bjalo ka “modiša yo boló” le tšeo di sa theetšego “lentšu la ba šele” bjalo ka ge le bolelwa ke baemedi ba setšhaba bao ba tutuetšwago ke Diabolo.—Johane 10:5, 14, 27.

Sehlopha sa baopedi se swanetše go opela ka kwano e le gore se kwagale. Barapedi ba therešo go dikologa lefase e swanetše go ba batee e le gore ba nee Modimo letago. Ka gona, polelo e rego: “Neang Modimo Letago ‘ka Molomo o Tee’” e ile ya nea tlhahlo e holago mabapi le kamoo ka moka ga rena re ka bolelago ‘leleme letee le le sekilego’ gomme re hlankele Jehofa “re bapelane ka magetla.”—Tsefanya 3:9, NW.

Batswadi, kudu-kudu bao ba nago le bana ba banyenyane, ba ile ba thabišwa kudu ke polelo ya mafelelo ya letšatši e rego: “Bana ba Rena—Bohwa bjo Bohlokwa.” Go ile gwa lokollwa kgatišo e mpsha ya matlakala a 256 yeo e ilego ya makatša batheetši ka mo go kgahlišago. Ithute go Morutiši yo Mogolo ke puku yeo e tlago go thuša batswadi go fetša nako e putsago moyeng le bana ba bona bao e lego mpho e tšwago go Modimo.

Sehlogo sa Letšatši la Boraro: “Dirang Dilo Tšohle Bakeng sa Letago la Modimo”

Letšatši la mafelelo la kopano le ile la thoma ka dikgopotšo tša temana ya letšatši ditabeng tša moya. Karolo ya mathomo ya lenaneo la letšatši e ile ya lebiša tlhokomelo e tseneletšego thulaganyong ya lapa. Polelo ya mathomo e rego: “Batswadi, Matlafatšang Malapa a Lena,” e ile ya lokišetša menagano ya batheetši. Ka morago ga go boeletša boikarabelo bja batswadi bja go hlokomela lapa ka dilo tše di bonagalago, seboledi se ile sa bontšha gore boikarabelo bjo bogolo  bja batswadi ke go hlokomela bana ba bona moyeng.

Seboledi se se latetšego se ile sa boledišana le bana gomme sa ahla-ahla sehlogo se se rego: “Kamoo Bafsa ba Tumišago Jehofa ka Gona.” Se boletše gore bafsa ba swana le “phoka” ka gobane ke ba bantši e bile phišego ya bona bofseng e a lapološa. Batho ba bagolo ba thabela go šoma le bona tirelong ya Jehofa. (Psalme 110:3) Karolo ye e ile ya akaretša dipoledišano tše di kgahlišago le bafsa bao ba beago mohlala.

Ka mehla diterama tša Beibele tša moaparo o feletšego ke ditiragalo tše di kgahlišago tša dikopano tša selete gomme le mo kopanong ye go bile bjalo. Terama e rego: “Go Nea Bohlatse ka Sebete go sa Šetšwe Kganetšo” e ile ya swantšha balatedi ba Jesu ba lekgolong la pele la nywaga. E be e se feela e kgahlišago eupša sa bohlokwa kudu ke gore e be e ruta. Polelo yeo e nago le sehlogo se se rego: “Tsebatšang Ditaba tše Dibotse ‘ka go se Kgaotše,’” yeo e ilego ya latela terama e ile ya gatelela dintlha tše dikgolo tša terama.

Bohle bao ba bego ba le gona ba be ba fagahletše karolo e kgahlišago kudu ya lenaneo la Sontaga, e lego polelo ya phatlalatša e rego: “Ke Bomang Bao ba Neago Modimo Letago Lehono?” Seboledi se ile sa nea bohlatse bjo bo lego molaleng mabapi le kamoo mekgatlo ya tša thutamahlale le ya bodumedi ka kakaretšo e sa kago ya nea Modimo letago. Ke feela batho bao ba bitšwago ka leina la gagwe, bao ba bolelago le go ruta therešo ka Jehofa, bao lehono ba neago leina la gagwe letago e le ka kgonthe.

Polelo ya phatlalatša e ile ya latelwa ke kakaretšo ya thuto ya makasine wa Morokami ya beke yeo. Ke moka go ile gwa latela polelo ya go phetha e rego: “‘Tšwelang Pele le Enywa Dienywa tše Dintši’ Bakeng sa go Tlišetša Jehofa Letago.” Seboledi se ile sa tšweletša dintlha tše lesome tša setlamo gore di amogelwe ke bohle bao ba bego ba le gona. Di ile tša lebišwa kudu tabeng ya ditsela tše di fapa-fapanego tšeo ka tšona letago le ka newago Jehofa yo e lego Mmopi. Mogoo o kopanetšwego wa “Ee” o ile wa kwagala dikopanong ka moka go dikologa lefase.

Ka baka leo, kopano e ile ya phethwa go dutše go duma sehlogo sa “Neang Modimo Letago” ka ditsebeng tša bohle bao ba bego ba le gona. Le gona, anke ka thušo ya moya wa Jehofa le karolo e bonagalago ya mokgatlo wa gagwe re ikemišetše ka mehla go nea Modimo letago e sego motho.

[Lepokisi/Diswantšho go letlakala 23]

Dikopano tša Ditšhaba-tšhaba

Dikopano tša ditšhaba-tšhaba tša matšatši a mane di ile tša swarwa Afrika, Asia, Australia, Yuropa le Amerika Leboa gotee le Amerika Borwa. Dihlatse tšeo di kgethilwego go tšwa lefaseng ka bophara di ile tša laletšwa go ba baemedi dipokanong tše. Ka tsela ye go bile le “go kgothatšana” magareng ga baeng le bao ba ba amogetšego. (Ba-Roma 1:12, NW) Bao e lego kgale ba tsebana ba ile ba mpshafatša go tsebana ga bona gomme ba bangwe ba thoma go tsebana. Tiragalo e kgethegilego ya dikopano tša ditšhaba-tšhaba e be e le karolo ya lenaneo e nago le sehlogo se se rego: “Dipego go tšwa Mafaseng a Mangwe.”

[Lepokisi/Diswantšho go letlakala 25]

Dikgatišo tše Difsa Tšeo di Neago Modimo Letago

Go ile gwa lokollwa dikgatišo tše pedi tše difsa Dikopanong tša Selete tša “Neang Modimo Letago.” Puku ya mebapa ya Beibele ya Bonang Naga e Botse e na le letlakala la ka ntle le le swarelelago le matlakala a 36 a mebapa gotee le diswantšho tša mafelo a Beibele. Letlakala le lengwe le le lengwe le ka mmala o tletšego gomme le na le mebapa ya mebušo ya Asiria, Babele, ba-Meda le ba-Peresia, Gerika le Roma. Go na le mebapa e mengwe yeo e akaretšago bodiredi bja Jesu le go ata ga Bokriste.

Ithute go Morutiši yo Mogolo ke puku ya matlakala a 256 yeo e nago le mo e ka bago diswantšho tše 230. Dinako tše dintši tše di thabišago di ka fetšwa le bana ka go fo bogela diswantšho le go araba dipotšišo tšeo di hlohlago kgopolo tše di hwetšagalago pukung. Kgatišo ye e mpsha e rulaganyeditšwe go lwantšha ditlhaselo tšeo Sathane a di lebišago baneng ba rena, tšeo maikemišetšo a tšona e lego go senya boitshwaro bja bona.

[Caption on page 23]

Baromiwa ba ile ba bolela diphihlelo tšeo di matlafatšago tumelo

[Caption on page 24]

Kolobetšo e be e le tiragalo e bohlokwa dikopanong tša “Neang Modimo Letago”

[Caption on page 24]

Diterama tša Beibele di thabelwa ke bana le batho ba bagolo