“O Mongwe Wa Mediro E Megolo Kudu Wa Boentšineare”

GE TEMPELE ya Jehofa e be e agwa kua Jerusalema nakong ya pušo ya Kgoši Salomo nywageng e ka bago 3 000 e fetilego, mogopo o kgahlišago wa koporo o ile wa dirwa gomme wa bewa ka ntle ga matseno a tempele. O be o imela ditone tša ka godimo ga tše 30 gomme o be o swara dilithara tše ka bago 40 000 tša meetse. Mogopo wo o mogolo o be o bitšwa mogopo o mogolo wa mphiri o tšholotšwego. (1 Dikxoši 7:23-26) Albert Zuidhof, yo e bego e le mohlankedi wa tša thekinolotši Lekgotleng la Nyakišišo ya Setšhaba la Canada, o bolela ka go Biblical Archeologist gore: “Ka ntle le pelaelo e bile o mongwe wa mediro e megolo kudu wa boentšineare wo o kilego wa dirwa setšhabeng sa ba-Hebere.”

Mogopo wo o be o agilwe bjang? Beibele e re: “Kxoši e di dirile [ditlabakelo tša koporo] ka kwa lešing la noka ya Jorodane.” (1 Dikxoši 7:45, 46) Zuidhof o re: “Modiro wa go bopa o ka ba o be o swana le mokgwa wo o sa dutšego o dirišwa bakeng sa go dira ditšhipi tše dikgolo tša go lla tša bronze.” O a hlalosa: “Ge e le gabotse se se be se tla akaretša foromo ya moti ya mogopo woo o lebeledišitšwego tlase godimo ga lebato leo le bego le omišitšwe ka mo go feletšego. . . . Ka morago ga gore se se phethwe, babopi ba be ba swanelwa ke go bopa foromo ya ka ntle godimo ga foromo yeo e bego e dirilwe ka moti gomme ba o tlogele gore o ome. Mogato wa mafelelo o be o tla ba wa gore ba tološe moti gomme go tšhelwe seela sa bronze ka molongwaneng wa foromo.”

Bogolo bjo bo makatšago le boima bja mogopo di be di nyaka gore go be le bokgoni bjo bogolo ge o agwa. Bokagare bja wona le bokantle bja foromo di be di swanetše go feta kgateletšong ya ditone tše 30 tša koporo e tološitšwego, gomme modiro wa go bopa o be o swanetše go dirwa ka mogato o tee o tšwelago pele e le gore go se be le go palega goba diphošo. Se mohlomongwe se be se nyaka gore go be le mello e megolo yeo e bego e lokeleditšwe kgaufsi le kgaufsi bakeng sa go tšhelwa ga tšhipi e tološitšwego ka foromong. A modiro o mogolo gakaakang!

Thapelong ya gagwe ya go kgakolwa ga tempele, Kgoši Salomo o ile a nea Jehofa Modimo tumišo bakeng sa modiro ka moka wa tempele, ka go bolela gore: “O be O di boletše ka molomo; ’me lehono ši-di, O di phethile ka seatla sa xaxo.”—1 Dikxoši 8:24.