Go Sekamela Bodumeding le Boemo bja Gago bjo Bobotse bja tša Maphelo

O SWANETŠE go ba o fetša nako ya gago e ntši o hlokomela boemo bja gago bja tša maphelo. Letšatši le lengwe le le lengwe, o ka fetša diiri tše di ka fihlago go tše seswai o robetše, diiri tše mmalwa o apea le go ja, gomme diiri tše seswai goba go feta moo o šoma bakeng sa go lefelela lefelo la go robala le dijo. Ge e ba o ka babja, o swanetše go ba o fetša nako le tšhelete bakeng sa go yo bona ngaka goba go fufutša dihlare tša setšo. O a hlwekiša, o a hlapa, gomme o ka ba wa itšhidulla ka mehla, tše ka moka ka morero wa go fihlelela boemo bjo bobotse bja tša maphelo.

Lega go le bjalo, go boloka boemo bjo bobotse bja tša maphelo go akaretša seo se fetago go fo hlokomela dinyakwa tša gago tša nama. Go na le selo se sengwe seo se kgathago tema e kgolo boemong bja gago bjo bobotse bja tša maphelo. Dinyakišišo tša tša kalafo di bontšhitše gore boemo bja gago bja tša maphelo bo tswalana kgaufsi-ufsi le go sekamela ga gago bodumeding—go sekamela ga gago bodumeding goba go se dire bjalo.

Tswalano ya Kgaufsi-ufsi

Moprofesara Hedley G. Peach wa Yunibesithing ya Melbourne, kua Australia o re: “Dihlogo tša nyakišišo ya mathomo-thomo tabeng ye di hweditše go e-na le tswalano ya kgaufsi-ufsi magareng ga go sekamela kudu bodumeding le mafelelo a kaone a tša maphelo.” Ge e hlalosa ka dinyakišišo tše, The Medical Journal of Australia (MJA) e re: “Le gona boemo bja go ba bao ba sekametšego bodumeding bo tswalanywa le . . . kgateletšo ya tlase ya madi, cholesterol ya tlase . . . gaešita le go se hlaselwe gabonolo ke kankere ya lela le legolo.”

 Ka mo go swanago, kua United States, nyakišišo ya 2002 ya batho ba 6 545 yeo e ilego ya swarwa ke Yunibesithi ya California, kua Berkeley, e utollotše gore “batho bao ba bego ba e-ya ditirelong tša bodumedi gatee ka beke ba be ba phela lebaka le letelele ge ba bapetšwa le bao ba bego ba e-ya ka go rothela goba ba sa ye le ka mohla.” Doug Oman, e lego mongwadi yo a etelelago nyakišišo ye pele le mohlahli kua Sekolong sa tša Maphelo sa Batho bohle sa Yunibesithing ya California ya Berkeley, o itše: “Re utollotše phapano ye gaešita le ka morago ga go ela hloko dilo tše swanago le ditswalano tša tša leago le mekgwa ya tša maphelo, e akaretšago go kgoga le go itšhidulla.”

Ge e bontšha mehola e mengwe go bao ba nago le pono ya go sekamela bodumeding ka bophelo, MJA e re: “Dinyakišišo tša Australia di utollotše go swarelela mo gogolo ga manyalo, go dirišwa mo gonyenyane ga dino-tagi le go dirišwa mo gonyenyane ga dihlare-tagi tše sego molaong, dipalo tša tlasana tša go ipolaya le go ba le kgopolo e mpe kudu ka go ipolaya, go se belaele kudu le kgateletšego ya tlase gotee le go se be le boithati gare ga badumedi.” Go oketša moo, BMJ (yeo pele e bego e bitšwa ka botlalo gore ke The British Medical Journal) e bega gore: “Batho bao ba ipolelago gore ba na le ditumelo tše di tiilego tša bodumedi ba bonagala ba fetiša manyami a bona kapela kudu le ka mo go feletšego ka morago ga lehu la motho yo ba tswalanego le yena kgaufsi go feta batho bao ba se nago ditumelo tša bodumedi.”

Go na le dikgopolo tše di fapa-fapanego mabapi le seo go sekamela e le ka kgonthe bodumeding e lego sona. Lega go le bjalo, boemo bja gago bja go sekamela bodumeding bo kgoma boemo bja gago bja tša maphelo le bja monagano. Bohlatse bjo bo dumelelana le seo Jesu Kriste a se boletšego mo e nyakilego go ba nywaga e 2 000 e fetilego. O itše: “Go thabile bao ba lemogago dinyakwa tša bona tša moya.” (Mateo 5:3, NW) Ka ge boemo bja gago bja tša maphelo le lethabo la gago di tutuetšwa ke boemo bja gago bja go sekamela bodumeding, ke mo go kwagalago go botšiša gore: ‘Ke kae moo nka hwetšago tlhahlo e botegago ya moya? Le gona go ba motho yo a sekametšego bodumeding go akaretša’ng?