Phihlelo

Go Thabela Botho bja Jehofa bjo Lerato le Tlhokomelo ya Gagwe

KA GE GO ANEGA FAY KING

Batswadi ba-ka e be e le batho bao ba nago le botho, eupša ka go swana le ba bangwe ba bantši kudu, ba be ba se na taba le bodumedi le gatee. Mma o be a tlwaetše go bolela gore: “Go swanetše go ba go e na le Modimo, ge e ba go se bjalo ke mang yo a dirilego matšoba, gomme ke mang yo a dirilego dihlare?” Eupša go be go felela fao.

TATE o hwile ka 1939 ge ke be ke e-na le nywaga e 11, gomme ke be ke dula le mma kua Stockport, yeo e lego ka borwa bja Manchester, Engelane. Ka dinako tšohle ke be ke nyaka go tseba mo go oketšegilego ka Mmopi e bile ke be ke hlompha Beibele, gaešita le ge ke be ke sa tsebe selo ka yona. Ka gona ke ile ka dira phetho ya go ya Kerekeng ya Engelane go yo kwa seo e bego e se ruta.

Ditirelo tša kereke di be di sa bolele selo go nna, eupša ge go be go balwa Diebangedi, mantšu a Jesu ka tsela e itšego a ile a nkgodiša gore Beibele e swanetše go ba e le ya therešo. Ge ke lebelela morago, go a makatša gore ga se ka ka ka ipalela Beibele. Gaešita le ka morago ga ge mogwera wa lapa a nneile “Testamente e Mpsha” ka phetolelo ya mehleng yeno, ga se ka ka ka ipha nako ya go e bala.

Go phulega ga Ntwa ya Korea ka 1950 go ile gwa tloga go ntira gore ke nagane. Na ntwa ye e tla aparetša, go etša kamoo Ntwa ya II ya Lefase e ilego ya dira ka gona? Ge e ba e apareditše, ke be ke tla latela bjang taelo ya Jesu ya gore ke rate manaba a-ka? Lega go le bjalo, na ke be ke tla fo ema ka lebelela batho ba šwahlela naga ya gešo gomme ka se dire selo go ba thibela? Ge e ba nka dira bjalo, ka ntle le pelaelo ke be ke tla ba ke tšhabela boikarabelo bja-ka. Gaešita le ge ke be ke gakanegile, ke ile ka dula ke kgodišegile gore dikarabo tša dipotšišo tša-ka ka moka di be di le ka Beibeleng, gaešita le ge ke be ke sa tsebe gore ke tla di hwetša bjang goba gore ke tla di hwetša kae.

 Go Tsoma Therešo Kua Australia

Ka 1954 nna le mma re ile ra dira phetho ya go hudugela Australia, moo mogolo’a-ka e lego Jean, a bego a dula gona. Ka morago ga nywaga e sego kae, Jean o ile a mpotša gore o kgopetše Dihlatse tša Jehofa gore di nketele ka gobane o be a tseba gore ke be ke kgahlegela Beibele le gore ke be ke tsena kereke. O be a nyaka go tseba seo ke bego ke se nagana ka tšona. O ile a mpotša ka kgodišego gore: “Ga ke tsebe ge e ba ditlhaloso tša bona e le tše di nepagetšego goba go se bjalo, lega go le bjalo bonyenyane ba na le ditlhaloso, e lego seo dikereke di se nago sona.”

Bill le Linda Schneider, e lego banyalani bao ba bego ba nketela, e be e le banyalani ba thabilego kudu. Ba be ba le nywageng ya bona ya bo-60 gomme ba bile Dihlatse ka nywaga e mentši. Ba ile ba šoma seteišeneng sa radio seo se bego se dirišwa ke Dihlatse tša Jehofa kua Adelaide, gomme ge modiro wa boboledi o be o thibetšwe kua Australia nakong ya Ntwa ya II ya Lefase, ba ile ba ingwadiša e le baebangedi ba nako e tletšego. Lega go le bjalo, le ge Bill le Linda ba be ba nthuša kudu, ke be ke sa dutše ke hlahloba madumedi a fapanego.

Mošomi-gotee le nna o ile a nkiša sebokeng sa moebangedi Billy Graham, seo ka morago ga sona ba bangwe ba rena ba ilego ba kopana le moruti yoo a ilego a re dumelela gore re ka botšiša dipotšišo. Ke ile ka botšiša potšišo yeo e bego e sa dutše e ntshwenya ya gore: “O ka ba bjang Mokriste gomme wa rata manaba a gago ge o e-ya ntweng go yo a bolaya?” Sehlopha ka moka kapejana se ile sa arabela ka legoa—go bonagala potšišo yeo e be e ba tshwenya ka moka! Mafelelong, moruti o ile a re: “Ga ke tsebe karabo ya potšišo yeo. Ke sa dutše ke nagana ka yona.”

Go sa dutše go le bjalo, thuto ya-ka ya Beibele le Bill le Linda e be e dutše e tšwela pele, gomme ke ile ka kolobetšwa ka September 1958. Ke ile ka dira phetho ya go latela mohlala wa bahlahli ba-ka, ka gona ka August ngwageng o latetšego, ke ile ka ingwadiša ke le mmulamadibogo wa ka mehla, e lego moebangedi wa nako e tletšego. Dikgweding tše seswai ka morago ke ile ka laletšwa go tlatša palo ya babulamadibogo ba kgethegilego. Ke be ke thabile kudu gakaakang ge ke e-kwa gore mogolo’a-ka e lego Jean le yena o tšwetše pele dithutong tša gagwe e bile o kolobeditšwe!

Sebaka se Ile sa Bulega

Ke be ke hlankela go e nngwe ya diphuthego tša Sydney e bile ke swara dithuto tše mmalwa tša legae tša Beibele. Ka letšatši le lengwe ke ile ka gahlana le moruti yo a bego a rotše modiro wa Kereke ya Engelane gomme ka mmotšiša ka seo kereke e bego e se bolela mabapi le bofelo bja lefase. Gaešita le ge a mpoditše gore o rutile thuto ya kereke ka nywaga e 50, ke ile ka makatšwa ke karabo ya gagwe e rego: “Ke swanetše go ipha nako ya go nyakišiša mabapi le seo ka gobane ga ke tsebe Beibele gabotse go etša kamoo Dihlatse tša Jehofa di e tsebago ka gona.”

Kapejana ka morago ga se, go ile gwa ba le kgopelo ya gore baithapi ba yo hlankela kua Pakistan. Ke ile ka dira kgopelo, ke sa tsebe gore basadi bao ba sa nyalwago ba be ba sa romelwe moo, ka gobane go be go romelwa feela banna bao ba sa nyalago goba banyalani. Go bonagala kgopelo ya-ka e ile ya romelwa ntlong-kgolo ya rena kua Brooklyn ka gobane go se go ye kae ke ile ka amogela lengwalo leo le bego le mpotša gore go be go e-na le sekgoba kua Bombay (yeo ga bjale e bitšwago Mumbai), India, ge e ba ke tla rata go se amogela. E be e le ka 1962. Ke ile ka dira bjalo gomme ka dula Bombay ka dikgwedi tše 18 pele ga ge nka hudugela Allahabad.

Go se go ye kae ke ile ka ikemišetša go ithuta se-Hindi. Leleme le la se-India ka kakaretšo ga le feto-fetoge bobedi mopeletong le mmiletšong, ka gona ga go thata kudu go kgona go le bolela. Lega go le bjalo, gantši e be e le mo go ferekanyago ge beng ba dintlo ba be ba nkgopela gore ke bolele ka Seisemane go e na le gore ke leke go bolela polelo ya bona!  Eupša naga ye yeo ke sa tšwago go abelwa go yona e be e e-na le ditlhohlo tše di kgahlišago le tše di tutuetšago, gomme ke ile ka thabela segwera sa Dihlatse-gotee le nna tše tšwago Australia.

Ge ke be ke sa le mofsa, ke be ke nagana ka lenyalo, eupša nakong ya ge ke be ke kolobetšwa, ke be ke swaregile kudu ka go hlankela Jehofa gore nka nagana ka mo go oketšegilego ka lona. Lega go le bjalo, mo nakong ye ke be ke thoma go ikwa ke nyaka molekane bophelong. Ge e le gabotse ke be ke sa nyake go tlogela kabelo ya-ka ya nageng e šele, ka gona ke ile ka rapela Jehofa mabapi le se gomme ka lebala ka sona.

Tšhegofatšo e sa Letelwago

Edwin Skinner e be e le molebeledi wa modiro lekaleng la India ka nako yeo. O be a ile a ba sehlopheng sa bo-seswai sa Sekolo sa Beibele sa Watchtower sa Gilead ka 1946 gotee le bana babo rena ba bangwe ba botegago, go akaretša le Harold King le Stanley Jones, bao ba bego ba abetšwe go ya China. * Ka 1958, Harold le Stanley ba ile ba golegwa kgolegong ya bodula-noši ka baka la modiro wa bona wa boboledi kua Shanghai. Ge Harold a be a lokollwa ka 1963, Edwin o ile a mo ngwalela. Harold o ile a araba lengwalo ka morago ga ge a boetše Hong Kong go tšwa maetong a gagwe a go ya United States le Brithania gomme a bolela gore o be a kganyoga go nyala. O ile a botša Edwin gore o rapetše mabapi le se ge a be a le kgolegong, gomme o ile a botšiša Edwin ge e ba go be go e na le Hlatse ye a e tsebago yeo e bego e tla ba mosadi yo a swanetšego.

Kua India batho ba bantši ba nyakelwa balekane, gomme Edwin ka mehla o be a kgopelwa gore a dire dithulaganyo tše bjalo, eupša gantši o be a kgetha go se di dire. Ka gona o ile a fetišetša lengwalo la Harold go Ruth McKay, yoo monna wa gagwe, e lego Homer, e bego e le molebeledi wa mosepedi. Mafelelong, Ruth o ile a nngwalela bakeng sa go mpotša gore moromiwa yo a bilego therešong ka nywaga e mentši o be a nyaka mosadi, gomme a botšiša ge e ba ke be ke tla kgahlegela go mo ngwalela. Ga se a ka a mpotša gore ngwanabo rena yoo ke mang goba selo le ge e le sefe se oketšegilego ka yena.

Ge e le gabotse, ga go na motho yo a bego a tseba ka thapelo ya-ka ya go nyaka molekane, ge e se Jehofa feela, gomme karabelo ya-ka mathomong e be e le go gana kgopolo ye. Lega go le bjalo, ge ke dutše ke nagana ka yona ka mo go oketšegilego, ke moo ke ilego ka fihlelela phetho ya gore ga se gantši Jehofa a arabago dithapelo tša rena ka tsela yeo re ka bago re nagana gore o tla di araba ka yona. Ka gona ke ile ka ngwalela Ruth gomme ka mmotša gore ge feela ke be ke sa gapeletšege go nyalana le yena, gona o be a ka kgopela ngwanabo rena gore a ngwale gape. Lengwalo la bobedi leo le tšwago go Harold King le be le ngwaletšwe nna.

Diswantšho tša Harold le phihlelo ya gagwe di be di tšwelela ka dikuranteng le ka dimakasineng tše di fapa-fapanego tšeo di bego di bega ka go lokollwa ga gagwe kgolegong ya China. Mo nakong  ye, o be a tsebja gabotse go dikologa lefase, eupša seo se ilego sa nkgahla e be e le pego ya gagwe ya go botega tirelong ya pušo ya Modimo. Ka gona re ile ra ngwalelana ka dikgwedi tše hlano, ke moka ke ile ka ya Hong Kong. Re ile ra nyalana ka October 5, 1965.

Bobedi bja rena re be re nyaka go tsena lenyalong le go dula tirelong ya nako e tletšego, gomme ge re dutše re gola, re ile ra ikwa re nyaka molekane go feta selo le ge e le sefe. Ke ile ka rata Harold kudu, gomme ge ke dutše ke bona mokgwa o botho le wa go naganela wo ka wona a bego a dirišana le batho gotee le mathata ao a bego a rotoga a mabapi le tirelo ya rena, ke ile ka mo hlompha ka mo go tseneletšego. Ka nywaga e 27 re ile ra thabela lenyalo le le thabišago kudu gomme ra amogela ditšhegofatšo tše dintši tše tšwago seatleng sa Jehofa.

Ma-China ke batho bao ba šomago ka thata, gomme ke ba rata kudu-kudu. Kua Hong Kong leleme leo le bolelwago ke se-Cantonese, e lego mmolelwana wa se-China wo o nago le digalo tše dintši goba medumo go feta se-Mandarin gomme ka go rialo go thata go o tseba. Nna le Harold re ile ra thoma bophelo bja rena bja lenyalo legaeng la baromiwa ofising ya lekala ya Dihlatse tša Jehofa, ke moka re ile ra hlankela dikabelong tša dikarolong tše di fapa-fapanego tša tikologong ye. Ee, re be re thabile kudu, eupša ka 1976 boemo bja-ka bja tša maphelo bo ile bja tliša mathata a magolo.

 Go Lebeletšana le mathata a tša Maphelo

Ke be ke dutše ke e-tšwa madi o šoro ka dikgwedi tše sego kae, gomme tekanyo ya-ka ya madi e be e theogetše tlase kudu. Ke be ke swanetše go buiwa, eupša dingaka tša sepetlele di ile tša mpotša gore di be di ka se dire modiro wa go buwa ka ntle le madi ka gobane ge e ba di be di ka o dira, gona ke be ke tla hwa ke bolawa ke kgateletšo ya tlase ya madi. Ka letšatši le lengwe ge dingaka di be di boledišana ka boemo bja-ka, baoki ba ile ba leka go ntira gore ke fetole mogopolo, ba bolela gore ga ke na tshwanelo ya go bapala ka bophelo bja-ka. Go be go e-na le mediro e 12 ya go buwa yeo e bego e lokeleditšwe bakeng sa letšatši leo, gomme e lesome ya yona e be e le ya go ntšhwa ga dimpa, eupša ke ile ka lemoga gore basadi ba baimana ba be ba sa botšwe selo mabapi le go bolaya bana ba bona.

Mafelelong, Harold o ile a ngwala lengwalo la go lokolla ba sepetlele boikarabelong le ge e le bofe ge e ba ke be nka hwa, gomme dingaka di ile tša dumela go dira modiro wo o bego o swanetše wa go buwa. Ke ile ka išwa phapošing ya go buwela gomme ka itokišeletša selo sa go hwiša bogogoma. Lega go le bjalo, motsotsong wa mafelelo, ngaka ya go hwiša bogogoma e ile ya gana go tšwela pele, gomme ba sepetlele ba ile ba swanelwa ke go ntokolla.

Ke moka re ile ra ikopanya le ngaka ya sepetlele ya malwetši a basadi. Ge e lemoga go ba kotsi ga boemo bja-ka, e ile ya ithapela go dira modiro wa go buwa ka tšhelete ya tlase—ge feela re be re ka se botše motho le ge e le ofe gore e re lefišitše bokae. E ile ya dira modiro wa go buwa ka katlego—le gona ka ntle le go diriša madi le ge e le afe le gatee. Botho bja Jehofa bjo lerato le tlhokomelo ya gagwe di ile tša bonagala gabotse kudu go nna le Harold mo nakong ye.

Ka 1992, Harold o ile a swarwa ke bolwetši bjo bo bolayago. Re ile ra hudugela ofising ya lekala gomme bobedi bja rena re ile ra hlokomelwa moo ka lerato. Monna wa-ka yo a rategago o ile a fetša tsela ya gagwe mo lefaseng ka 1993 a e-na le nywaga e 81.

Go Boela Engelane

Ke be ke thabela go ba setho sa lapa la Bethele ya Hong Kong, eupša ke ile ka hwetša go le thata ka mo go oketšegago go lebeletšana ka katlego le phišo le monola wa moo. Ka baka la boemo bja-ka bja tša maphelo, go ile gwa tla lengwalo leo ke bego ke sa le letela go tšwa ntlong-kgolo ya Brooklyn, leo le bego le botšiša ge e ba ke be ke tla rata go hudugela lekaleng leo le bego le e-na le mafelo a mantši a tša kalafo. Ka gona ka ngwaga wa 2000, ke ile ka boela Engelane gomme ka tlatša lapa la Bethele kua London. Ye e ile ya ipontšha e le tokišetšo e lerato gakaakang! Ke ile ka amogelwa ka borutho, gomme ke ile ka thabela kudu dikabelo tše di fapa-fapanego tša mošomo, tšeo di bego di akaretša go thuša go hlokomela bokgobapuku bja lapa la Bethele gotee le dipuku tša bjona tše 2 000.

Le gona ke kopanela le phuthego ya ma-China yeo e kopanelago kua London, lega go le bjalo dilo di fetogile mo. Lehono, bontši bja batho bo tšwa nageng-kgolo ya China, e sego Hong Kong. Ba bolela se-Mandarin, gomme seo se tliša tlhohlo e mpsha modirong wa boboledi. Nageng ka moka go na le dipego tše dintši tše di kgahlišago tša dithuto tša Beibele tšeo di swarwago le diithuti tše di tšwago China tšeo di tšwetšago dithuto tša tšona pele ka morago ga sekolo se se phagamego. Di šoma ka thata gomme di thabela therešo ya Beibele yeo di ithutago yona. Ke mo go thabišago go di thuša.

Legaeng la-ka le lefsa leo le homotšego, gantši ke nagana ka bophelo bja-ka bjo bo thabišago le go tšwela pele ke makatšwa ke botho bja Jehofa bjo lerato. Bo tsenelela dilong tšohle tšeo di lego mabapi le morero wa gagwe, gomme tlhokomelo ya gagwe bakeng sa bahlanka ba gagwe e le motho ka o tee ka o tee e tloga e le molaleng. Ke na le mabaka ka moka a go leboga tlhokomelo ya gagwe ka moka e lerato go nna.—1 Petro 5:6, 7.

[Mengwalo ya ka tlase]

[Seswantšho go letlakala 24]

Go hlankela kua India

[Diswantšho go letlakala 25]

Harold King ka 1963 le go hlankela kua China ka bo-1950

[Diswantšho go letlakala 26]

Letšatši la rena la lenyalo kua Hong Kong, ka October 5, 1965

[Seswantšho go letlakala 26]

Re e na le ditho tša Bethele ya Hong Kong, ba ga Liang mo magareng, gomme ba ga Gannaway ka go le letona