Jehofa O Re Nea Dinyakwa Tša Rena Tša Letšatši Le Letšatši
Jehofa O Re Nea Dinyakwa Tša Rena Tša Letšatši Le Letšatši
“Lesang xo hlohlwa ke tšôna. Xobane . . . Tata-weno wa maxodimong ó tseba xobane le lena Le phela ka tšôna.”—LUKA 12:29, 30.
1. Jehofa o hlokomela bjang diphoofolo?
NA O kile wa bogela thaga goba nonyana e nngwe e itšego e thobola mo go bonagalago e fo ba ditšhila feela? Mohlomongwe o ile wa ipotšiša gore e ka hwetša eng sa go ja ka go thobola mmung. Thutong ya gagwe ya Thabeng, Jesu o ile a bontšha gore re ka hwetša thuto go tšwa tseleng yeo ka yona Jehofa a hlokomelago dinonyana. O itše: “Lebêlêlang dinonyana tša sebakeng xa di byale, xa di bune, xa di kxobêlele dišexong; ’me Tata-weno ó a di otla. Afa lena xa Le di fetiše xa-xolo?” (Mateo 6:26) Jehofa o nea dibopiwa tša gagwe ka moka dijo ka ditsela tše di kgahlišago.—Psalme 104:14, 21; 147:9.
2, 3. Ke dithuto dife tša moya tšeo re ka di hwetšago ntlheng ya gore Jesu o re rutile gore re rapelele bogobe bja rena bja ka mehla?
2 Ka gona, ke ka baka la’ng thapelong ya gagwe ya mohlala Jesu a ile a akaretša kgopelo e rego: “Re fê lehono boxôbê bya rena bya ka mehla”? (Mateo 6:11) Go ka hwetšwa dithuto tšeo di nago le morero kgopelong ye e bonolo. Sa pele, e re gopotša gore Jehofa ke Monei yo Mogolo. (Psalme 145:15, 16) Batho ba ka bjala le go hlagola, eupša ke Modimo a nnoši a ka medišago dilo, moyeng le nameng. (1 Ba-Korinthe 3:7) Seo re se jago le go se nwa ke mpho e tšwago go Modimo. (Ditiro 14:17) Go mo kgopela gore a re nee dinyakwa tša rena tša letšatši le letšatši go mmontšha gore ga re tšeele ditokišetšo tše bjalo fase. Ke therešo gore kgopelo e bjalo ga e re imolle boikarabelong bja rena bja go šoma ge e ba re kgona go dira bjalo.—Ba-Efeso 4:28; 2 Ba-Thesalonika 3:10.
3 Sa bobedi, go kgopela ga rena ‘bogobe bja ka mehla’ go bontšha gore ga se ra swanela go tshwenyega ka mo go feteletšego ka bokamoso. Jesu o ile a oketša ka gore: “Ké xôna lesang xo belaêla la re: Re tlo ja’ng? Re tlo nwa’ng? Re tlo apara’ng? Tšeo ka moka ké tše badithšaba ba di tsomaxo ka kudu. Xe e le Tataweno wa maxodimong ó tseba xobane le lena tšeo ka moka Le phela ka tšôna. Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka. Ké xôna, Le se kê la belaêlêla tša ka moswana, xobane la ka moswana le tlo ipelaêlêla tša lôna.” (Mateo 6:31-34) Go rapelela ‘bogobe bja ka mehla’ go bea mohlala wa go phela maphelo a bonolo a ‘borapedi le go kgolwa ka tše re nago le tšona.’—1 Timotheo 6:6-8.
Dijo tša Moya tša Letšatši le Letšatši
4. Ke ditiragalo dife bophelong bja Jesu le bja ba-Isiraele tšeo di gatelelago bohlokwa bja go ja dijo tša moya?
4 Go rapelela ga rena bogobe bja rena bja ka mehla go swanetše go re gopotša ka go nyakega ga dijo tša moya tša letšatši le letšatši. Gaešita le ge ka morago ga go ikona ka lebaka le letelele a be a swere ke tlala kudu, Jesu o ile a ganetša teko ya Sathane ya gore a fetoše mafsika gore e be bogobe ka gore: “Xo ngwadilwe xore motho xa a phele ka boxôbê fêla; ó phela ka mantšu ohle a a tšwaxo molomong wa Modimo.” (Mateo 4:4) Jesu mo o ile a tsopola moporofeta Moše, yoo a ilego a botša ba-Isiraele gore: “[Jehofa] a Xo kokobetša, a Xo kwiša tlala, a Xo leša Mana ye O bexo O sa e tsebe, ye le bô-tata-weno ba bexo ba sa e tsebe xore a Xo lemošê xore motho xa a phele ka boxôbê fêla; ka xobane motho ó phela ka ohle ma-tšwa-molomong wa Morêna.” (Doiteronomio 8:3) Tsela yeo ka yona Jehofa a ilego a nea ba-Isiraele manna ga se ya ba nea feela dijo tša nama eupša e ba rutile gape le dithuto tša moya. Thuto e nngwe ke gore, ba be ba swanetše go “tôpa ka mehla se se lekanexo ’tšatši letee.” Ge e ba ba be ba topile tše di fetago tša letšatši letee, mašaledi a be a thoma go nkga le go tšwa diboko. (Ekisodo 16:4, 20) Lega go le bjalo, se se be se sa direge ka letšatši la bo-tshelela ge ba be ba swanetše go kgoboketša tša matšatši a mabedi e le gore ba kgotsofatše dinyakwa tša bona bakeng sa Sabatha. (Ekisodo 16:5, 23, 24) Ka gona manna a ile a gatelela ka menaganong ya bona gore ba be ba swanetše go kwa le gore maphelo a bona a be a sa ithekga ka bogobe feela eupša a be a ithekgile le ka “mantšu ohle a a tšwaxo molomong wa Modimo.”
5. Jehofa o re nea bjang dijo tša moya tša letšatši le letšatši?
5 Le rena ka mo go swanago re swanetše go iphepa letšatši le letšatši ka dijo tša moya tšeo di newago ke Jehofa ka Morwa wa gagwe. Bakeng sa se, Jesu o kgethile “molaki e a bôtêxaxo yo bohlale” e le gore a nee “dijô ka lebaka la xôna” bakeng sa ba lapa la tumelo. (Mateo 24:45) Sehlopha seo sa molaki e a botegago ga se nee feela dijo tša moya ka dithušo tša go ithuta Beibele ka boati eupša gape se re kgothaletša go bala mmalo wa Beibele letšatši le letšatši. (Jošua 1:8; Psalme 1:1-3) Ka go swana le Jesu, le rena re ka hwetša dijo tša moya ka gore letšatši le letšatši re dire boiteko bja go ithuta ka thato ya Jehofa le go e dira.—Johane 4:34.
Go Lebalelwa Dibe
6. Ke melato efe yeo re swanetšego go kgopela tebalelo bakeng sa yona, gomme ke maemong afe moo Jehofa a ikemišeditšego go e phumola?
6 Kgopelo e latelago thapelong ya mohlala ke e rego: “Re lebalêlê melato ya rena byalo ka xe re lebalêla ba ba naxo le melato xo rena.” (Mateo 6:12) Jesu mo o be a sa bolele ka melato ya tšhelete. O be a naganne ka go lebalelwa ga dibe tša rena. Ka pegong ya Luka ya thapelo ya mohlala, kgopelo ye e balega ka gore: “Re lebalêlê melato [“dibe tša,” NW] ya rena, xobane le rena re lebalêla ba ba naxo le melato xo rena.” (Luka 11:4) Ka gona, ge re dira sebe go bjalo ka ge eka re ba le molato go Jehofa. Eupša Modimo wa rena yo lerato o ikemišeditše go ‘phumola’ goba go tloša molato woo ge e ba re tloga re itshola e le ka kgonthe, ra ‘sokologa’ gomme ra mo kgopela tshwarelo motheong wa tumelo sehlabelong sa Kriste sa topollo.—Ditiro 3:19; 10:43; 1 Timotheo 2:5, 6.
7. Ke ka baka la’ng letšatši le lengwe le le lengwe re swanetše go rapelela go lebalelwa?
7 Ka lehlakoreng le lengwe, re dira sebe ge re foša pakane ya ditekanyetšo tša Jehofa tša go loka. Ka baka la sebe sa leabela, ka moka ga rena re foša ka mantšu, ka ditiro le ka dilo tšeo re di naganago goba re palelwa ke go dira seo re swanetšego go se dira. (Mmoledi 7:20; Ba-Roma 3:23; Jakobo 3:2; 4:17) Ka gona, go sa šetšwe gore re lemoga gore re dirile sebe letšatšing leo goba go se bjalo, re swanetše go akaretša kgopelo ya go lebalelwa dibe tša rena dithapelong tša rena tša letšatši le letšatši.—Psalme 19:12; 40:12.
8. Go rapelela tebalelo go swanetše go re tutueletša gore re dire’ng, gomme ka mafelelo afe ao a holago?
8 Go rapelela go lebalelwa go swanetše go latelwa ke go itlhahloba ka potego, go itshola le go ipolela moo go theilwego go beng le tumelo matleng a topollo a madi a Kriste ao a tšholotšwego. (1 Johane 1:7-9) E le gore re hlatsele go ba ga kgonthe ga dithapelo tša rena, re swanetše go thekga dikgopelo tša rena tša go lebalelwa ka “medirô e swanêlaxo thsokoloxô.” (Ditiro 26:20) Ke moka re ka ba le tumelo go ikemišetšeng ga Jehofa go lebalela dibe tša rena. (Psalme 86:5; 103:8-14) Mafelelo ke khutšo ya monagano yeo e sa bapišwego, “khutšô ya Modimo, ye e fetaxo thlaoloxanyô yohle,” yeo ka morago e tlago go ‘boloka dipelo tša rena le dikgopolo tša rena go Kriste Jesu.’ (Ba-Filipi 4:7) Eupša thapelo ya Jesu ya mohlala e re ruta se se oketšegilego mabapi le seo re swanetšego go se dira e le gore re lebalelwe dibe tša rena.
E le Gore re Lebalelwe, re Swanetše go Lebalela
9, 10. (a) Jesu o ile a tlaleletša ka mantšu afe thapelong ya mohlala, gomme se se ile sa gatelela’ng? (b) Jesu o ile a oketša ka go swantšha bjang go nyakega ga gore re lebalele?
9 Ka mo go kgahlišago, kgopelo e rego “re lebalêlê melato ya rena byalo ka xe re lebalêla ba ba naxo le melato xo rena,” ke yona karolo e nnoši ya thapelo ya mohlala yeo Jesu a ilego a e hlalosa. Ka morago ga go phetha thapelo, o okeditše ka gore: “Xobane xe Le lebalêla batho dikaroxô tša bôná, xôna Tata-weno wa maxodimong, le lena ó tlo Le lebalêla. Fêla, xe Le sa lebalele batho dikaroxô tša bôna, Tata-weno le lena a ka se Le lebalele dikaroxô tša lena.” (Mateo 6:14, 15) Ka gona, Jesu o ile a bolela ka mo go kwagalago gore go lebalelwa ga rena ke Jehofa go ithekgile ka go ikemišetša ga rena go lebalela ba bangwe.—Mareka 11:25.
10 Tiragalong e nngwe, Jesu o ile a nea seswantšho se se bontšhago go nyakega ga gore re lebalele ge e ba re letetše gore Jehofa a re lebalele. O ile a bolela ka kgoši yeo ka botho e ilego ya phumola sekoloto se segolo seo mohlanka a bego a e kolota sona. Ka morago kgoši e ile ya otla mohlanka yo o šoro ge a be a ganne go phumola sekoloto se senyenyane kudu sa mohlanka-gotee le yena. Jesu o ile a phetha seswantšho sa gagwe ka gore: “Le Tate wa maxodimong ó tlo Le dira ka mokxwa woo xe Le sa lebalele, xe motho a sa lebalele ngwan’abô dithšitô tša xaxwe ka pelo.” (Mateo 18:23-35) Thuto e molaleng: Molato wa sebe woo Jehofa a o lebaletšego yo mongwe le yo mongwe wa rena ke o mogolo kudu go feta phošo le ge e le efe yeo motho le ge e le mang a ka bago a re diretše yona. Go feta moo, Jehofa o re lebalela letšatši le letšatši. Ka gona, ka ntle le pelaelo re ka lebalela ba bangwe melato yeo ka dinako tše dingwe ba re direlago yona.
11. Ke keletšo efe yeo e neilwego ke moapostola Paulo yeo re tlago go e latela ge e ba re letetše gore Jehofa a re lebalele, gomme ka mafelelo afe a mabotse?
11 Moapostola Paulo o ngwadile gore: “Le be ba botho, e mongwe le e mongwe, le gaugelane, le lebalelane bjalo ka ge Modimo le yena a le lebaletše mo go Kriste.” (Ba-Efeso 4:32, PK) Go lebalelana go godiša khutšo gare ga Bakriste. Paulo o kgothaditše ka mo go tšwelago pele gore: “Lè le bahlaolwa ba Modimo, Lè le bakxêthwa le baratiwa, aparang kxauxêlô le botho le boikokobetšô le bolêta le xo se fêle pelo. Le fêlê Lè rwalana; Le lebalêlanê xe xo na le e a naxo le taba le e mongwê; bo-ka Kriste xe a Le lebaletše, le lena Le dirê ka mokxwa woo. Se sexolo mo xo tšeo ka moka ké xore Le aparê leratô, yôna tlêmô ya botlalô.” (Ba-Kolose 3:12-14) Tše ka moka di hwetšwa thapelong yeo Jesu a re rutilego yona ge a be a re: “Re lebalêlê melato ya rena byalo ka xe re lebalêla ba ba naxo le melato xo rena.”
Go Šireletšwa ge re Lekwa
12, 13. (a) Ke’ng seo se ka se bolelwego ke kgopelo ya pele ga ya mafelelo yeo e boletšwego thapelong ya mohlala? (b) Moleki yo mogolo ke mang, le gona ke’ng seo se bolelwago ke thapelo ya rena ya gore re se išwe melekong?
12 Kgopelo ya pele ga ya mafelelo thapelong ya Jesu ya mohlala ke e rego: “O se re išê molekong.” (Mateo 6:13) Na Jesu o be a bolela gore re swanetše go kgopela Jehofa gore a se ke a re leka? Se e ka se be therešo, ka gobane morutiwa Jakobo o ile a budulelwa go ngwala gore: “Xo se kê xwa ba le e a rexo xe a lekwa, a re: ke lekwa ke Modimo; xobane Modimo xa a lekwe ke bobe; ’me le Yêna xa a leke motho.” (Jakobo 1:13) Go oketša moo, mopsalme o ngwadile gore: “Xe Wene Morêna Ò latiša molato, xôna xo ka êma mang?” (Psalme 130:3) Jehofa ga a letele ka phagahlo phošo e nngwe le e nngwe yeo re e dirago, le gona o tloga a sa leke go re kgopa gore re wele phošong. Ka gona, karolo ye ya thapelo ya mohlala e bolela’ng?
13 Sathane Diabolo ke yena a lekago go re kgopa gore re wele phošong, go re dira gore re wele maanong a boradia gaešita le go re metša. (Ba-Efeso 6:11) Ke Moleki yo mogolo. (1 Ba-Thesalonika 3:5) Ka go rapelela gore re se išwe melekong, re kgopela Jehofa gore a se ke a re dumelela go wa ge re lekwa. Re mo kgopela gore a re thuše gore re se ke ra “foraforetšwa ke Sathane,” re se ke ra ineela ditekong. (2 Ba-Korinthe 2:11) Re rapelela gore re dule ‘moo re phemelwago ke Yo-godimo-dimo,’ re hwetše tšhireletšo ya moya yeo e newago bao ba lemogago bogoši bja Jehofa dilong ka moka tšeo ba di dirago.—Psalme 91:1-3.
14. Moapostola Paulo o re kgonthišetša bjang gore le ka mohla Jehofa a ka se ke a re lahla ge e ba re nyaka thušo go Yena ge re lekwa?
14 Re ka kgonthišega gore ge e ba yeo e le kganyogo ya rena e tšwago pelong, yeo e bontšhwago dithapelong tša rena le ditirong tša rena, le ka mohla Jehofa a ka se ke a re lahla. Moapostola Paulo o re kgonthišetša gore: “Xa L’ešo la hlohlwa ke molekô o kaxo pala batho. Modimo ke Mmotexi; a ka se kê a lesa la lekwa ka tše di kaxo Le palêla; xotee le molekô ó tlo fêla a bea sebaka sa xo tlo efoxa, xore Le kxônê xo kxôtlêlêla.”—1 Ba-Korinthe 10:13.
“Re Phološe go yo Mobe”
15. Ke ka baka la’ng e le gabohlokwa go feta le ge e le neng pele gore re rapelele go phološwa go yo mobe?
15 Go ya ka mengwalo ya seatla yeo e ka botwago ya Mangwalo a Bakriste a Segerika, thapelo ya Jesu ya mohlala e felela ka mantšu a rego: “O re phološe go yo mobe.” * (Mateo 6:13, NW) Go šireletšwa go Diabolo go bohlokwa kudu nakong ye ya bofelo. Sathane le batemona ba gagwe ba lwa le mašaledi a batlotšwa, ‘ao a gomaretšego melao ya Modimo, ao a nago le bohlatse bja Jesu Kriste,’ gotee le bagwera ba ona ba “lešaba le lexolo.” (Kutollo 7:9; 12:9, 17) Moapostola Petro o eleditše Bakriste gore: “Le phafoxê le phakxamê, xobane Diabolo lenaba la lena ó Le dikoloxa bo-ka tau e bôpaxo; ó nyaka yo a kaxo mo metša. Lwang le yêna Lè tiile tumelong.” (1 Petro 5:8, 9) Sathane a ka rata go kgaotša modiro wa rena wa go nea bohlatse, le gona a diriša baemedi ba gagwe ba mo lefaseng—e ka ba ba bodumedi, ba kgwebo goba ba dipolitiki—o leka go re tšhošetša. Lega go le bjalo, ge e ba re ema re tiile, Jehofa o tla re phološa. Morutiwa Jakobo o ngwadile gore: “Lobang-xê Le bušwê ke Modimo; Le lwê le Diabolo, ’me ó tlo Le thšaba.”—Jakobo 4:7.
16. Jehofa o na le thušo efe yeo e hwetšagalago bakeng sa go thuša bahlanka ba gagwe bao ba lekwago?
16 Jehofa o ile a dumelela gore Morwa wa gagwe a lekwe. Eupša ka morago ga ge Jesu a ganeditše Diabolo ka go diriša Lentšu la Modimo e le tšhireletšo, Jehofa o ile a mo romela barongwa gore ba mo matlafatše. (Mateo 4:1-11) Ka mo go swanago, Jehofa o diriša barongwa ba gagwe go re thuša ge e ba re rapela ka tumelo gomme re mo dira setšhabelo sa rena. (Psalme 34:7; 91:9-11) Moapostola Petro o ngwadile gore: “Ké mo xo bônalaxo xore Modimo, ba ba mmoifaxo ó ba hlakodiša melekong; bakxôpô ó ba bolokêla kôtlô ya ’tšatši la kahlolô.”—2 Petro 2:9.
Phološo e Feletšego e Kgaufsi
17. Ka go re ruta thapelo ya mohlala, Jesu o ile a bea dilo bjang maemong a tšona a swanetšego?
17 Thapelong ya mohlala, Jesu o bea dilo maemong a tšona a swanetšego. Selo seo re tshwenyegilego kudu ka sona e swanetše go ba taba ya go kgethagatšwa ga leina la Jehofa le legolo le le lekgethwa. Ka ge sedirišwa sa go phetha se e le Mmušo wa Mesia, re rapelela Mmušo gore o tle o tlo fediša dipušo goba mebušo ka moka ya batho ba sa phethagalago, le go kgonthišetša gore thato ya Modimo e dirwa ka botlalo mo lefaseng bjalo ka legodimong. Kholofelo ya rena ya bophelo bjo bo sa felego lefaseng la paradeise e ithekgile ka go kgethagatšwa ga leina la Jehofa le go lemogwa ga bogoši bja gagwe legohleng ka moka. Ka morago ga go rapelela dilo tše tše bohlokwa kudu, re ka rapelela dinyakwa tša rena tša letšatši le letšatši, go lebalelwa dibe tša rena le go phološwa melekong le makatikeng a yo mobe, Sathane Diabolo.
18, 19. Thapelo ya Jesu ya mohlala e re thuša bjang go dula re phafogile le go dira gore kholofelo ya rena e ‘tie go fihla bofelong’?
18 Go lopollwa ga rena ka mo go feletšego go yo mobe le tshepedišong ya gagwe e gobogilego ya dilo go a batamela. Sathane o lemoga gabotse gore o na le “lebakanyana” feela gore a bontšhe ‘bogale bja gagwe bjo bogolo’ lefaseng, ka mo go kgethegilego go bahlanka ba Jehofa bao ba botegago. (Kutollo 12:12, 17) Pontšhong e bopaganego ya “bofêlô bya mabaka ano,” Jesu o ile a bolela e sa le pele ditiragalo tše di kgahlišago, tšeo tše dingwe tša tšona di sa dutšego di sa e-tla. (Mateo 24:3, 29-31) Ge re bona tše di direga, kholofelo ya rena ya go phološwa e tla phadima. Jesu o itše: “E re xe tšeo di thôma xo dirêxa, Le inamoloxê, Le tsošê dihlôxô tša lena, ka xobane xo tlo ba xò batamêla topollô ya lena.”—Luka 21:25-28.
19 Thapelo ya Jesu e kopana ya mohlala yeo a e rutilego barutiwa ba gagwe e re nea tlhahlo e kwagalago ya mabapi le seo re swanetšego go se akaretša dithapelong tša rena ge bofelo bo dutše bo batamela. Anke re duleng re kgodišegile gore Jehofa o tla tšwela pele a re nea dinyakwa tša rena tša letšatši le letšatši go ba go fihla bofelong, bobedi tša moya le tša nama. Go phafogela ga rena thapelo go tla dira gore re kgone go “swara ra tiiša se re thomilexo xo ba sôna, xe re r’yalo xo fihla bofelong.”—Ba-Hebere 3:14; 1 Petro 4:7.
[Mengwalo ya ka tlase]
^ ser. 15 Dibeibele tše dingwe tša kgale, tše bjalo ka Beibele ya Sepedi, di ruma Thapelo ya Morena ka seo se tsebjago e le doxology (mokgwa o rulagantšwego wa go tumiša Modimo) yeo e rego: “Mmušô ké wa xaxo, le matla, le tumišô, ka xo sa felexo. Amene.” The Jerome Biblical Commentary e re: “Doxology . . . ga e hwetšwe ka [mengwalong ya seatla] yeo e botwago kudu.”
[Dipotšišo tša Thuto]
[Caption on page 13]
Lydekker
[Caption on page 15]
Re swanetše go lebalela ba bangwe ge e ba re tla lebalelwa
E le go Boeletša
• Ke dilo dife tšeo di bolelwago ke kgopelo ya ‘bogobe bja ka mehla’?
• Hlalosa kgopelo yeo e rego “re lebalêlê melato ya rena byalo ka xe re lebalêla ba ba naxo le melato xo rena.”
• Go kgopela Jehofa gore a se re iše melekong go bolela’ng?
• Ke ka baka la’ng re swanetše go kgopela Jehofa gore a “re phološe go yo mobe”?