Letswalo le le Botegago

GE Charles yo e lego mošomi wa yunibesithing ya Kenya ka letšatši le lengwe a sepela go tšwa mošomong go ya gae, o ile a timelelwa ke mogala wa cellular. Kua Kenya, megala ye e sa dutše e le letsaka la go bitša tšhelete ya godimo kudu.

Charles o re: “Ke be ke sa letela gore motho le ge e le mang a ka o buša.” Lega go le bjalo, matšatši a sego kae ka morago, o ile a makatšwa ke go amogela mogala wo o tšwago ofising ya lekala ya Dihlatse tša Jehofa kua Kenya. O be a sa kgolwe seo a bego a se kwa, ge a be a kgopelwa gore a tle a tlo tšea mogala wa gagwe wa cellular! Go bonagala modiredi wa nako e tletšego wa Dihlatse tša Jehofa yo a bego a sepela ka senamelwa setee le Charles a be a topile mogala woo. Ka maiteko a go leka go hwetša mong wa wona, modiredi o ile a tliša mogala ofising ya lekala, gomme bašomi ba baithapi ba moo mafelelong ba ile ba hwetša Charles ka go mo nyaka ka nomoro ye e bego e tšwelela mo mogaleng.

Charles ka lengwalong le a le ngwaletšego ofisi ya lekala o re: “Ke leboga kudu maiteko a lena a go ikopanya le nna go sa šetšwe mathata ao le ilego la lebeletšana le wona. Ke tloga ke leboga ditho tša mokgatlo wa lena tšeo di hweditšego mogala woo wa cellular, le go nnyaka e le gore di mpušetše wona. Ga go bonolo go hwetša motho yo a botegago lehono, eupša ke mo go kgothatšago gore re sa na le ba mmalwa bao ba ipontšhago e le Dihlatse tša therešo tša Jehofa Modimo.”

Dihlatse tša Jehofa gohle di tsebja ka potego ya tšona. Di ekiša moapostola Paulo yo a itšego: “Re holofetše ka xo kwa matswalô a rena à rotše, ka xe re ratile xo Ya ka tsela e botse dilong tšohle.” (Ba-Hebere 13:18; 1 Ba-Korinthe 11:1) Di lemoga gore boitshwaro bjo bo bjalo bo tlišetša Jehofa Modimo letago, go etša ge Jesu a itše: “Sa lena seetša a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.”—Mateo 5:16.