‘Sebopego Sa Lefase Le Se A Fetoga’

“Ke rata xo botša lena bana bešo, xore lebaka ké la pitlaxanô.”—1 BA-KORINTHE 7:29.

1, 2. Ke diphetogo dife tšeo o di bonego bophelong bja gago?

OBONE diphetogo dife bophelong bja gago? Na o ka laodiša tše dingwe tša tšona? Ka mohlala, go na le tšwelopele yeo e dirilwego go tša thutamahlale ya kalafo. Ka baka la nyakišišo yeo e dirilwego tabeng yeo, palo-gare ya nywaga ya bophelo dinageng tše dingwe e oketšegile go tloga go nywaga ya ka tlase ga e 50 mathomong a ngwaga-kgolo wa bo-20 go ya go nywaga ya-ka godimo ga e 70 lehono! Le gona, nagana gape ka ditsela tšeo ka tšona re hotšwego ke go dirišwa ka mo go swanetšego ga radio, thelebišene, megala ya cellular le metšhene ya fax. Selo se sengwe gape seo se sa swanelago go tšeelwa fase ke megato ya tšwelopele yeo e tšerwego go tša thuto, dinamelweng le ditshwanelong tša batho, tšeo ka moka ga tšona di kaonefaditšego bophelo bja ba dimilione.

² Ke therešo gore ga se diphetogo ka moka tšeo e bilego tše di holago. Ga go kgonege go hlokomologa ditla-morago tšeo di nolago moko tša go oketšega ga ditekanyo tša bosenyi, go phuhlama ga ditekanyetšo tša boitshwaro, go oketšega ga go dirišwa gampe ga dihlare-tagi, go phagama ka lebelo ga ditekanyo tša tlhalo, go hlatloga ga ditheko le go oketšega ga kotsi ya botšhošetši. Go ba gona, ga go na pelaelo gore o tla dumelelana le seo moapostola Paulo a se ngwadilego kgale ge a be a re: “Sebopêxô sa lefase leno se a lôba [“fetoga,” NW].”—1 Ba-Korinthe 7:31.

3. Paulo o be a bolela’ng ge a be a ngwala gore “sebopego sa lefase le se a fetoga”?

³ Ge Paulo a be a bolela mantšu ao, o be a swantšha lefase le sefala. Batšea-karolo ba ba lego sefaleng seo—batho bao ba tumilego ba tša dipolitiki, ba bodumedi le ba setšo—ba a tšwelela, ba bapale dikarolo tša bona, ke moka ba tloge sefaleng e le gore ba bangwe ba tsene. Se se tšwetše pele ka nywaga-kgolo e mentši. Dinakong tše di fetilego, lešika la dikgoši le be le ka buša ka nywaga-some—gaešita le ka nywaga-kgolo—gomme diphetogo  di be di direga ka go nanya. Ga go bjalo lehono, moo histori e ka fetogago ka go ponya ga leihlo ge moetapele yo mogolo a bolawa! Ee, dinakong tše tše di sa tsepamago, ga re tsebe gore go tla direga’ng ka moso.

4. (a) Bakriste ba swanetše go ba le pono efe e leka-lekanego mabapi le ditiragalo tša lefase? (b) Ke mabaka afe a mabedi a bohlatse bjo bo kgodišago ao ga bjale re tlago go a ahla-ahla?

⁴ Ge e ba lefase e le sefala gomme baetapele ba lona e le batšea-karolo, gona Bakriste ke babogedi. * Lega go le bjalo, ka ge e “se ba lefase,” ga ba itshwenye kudu ka seo se diregago goba gaešita le ka go tseba batšea-karolo. (Johane 17:16) Go e na le moo, ba lebelela ka phišego maswao ao a bontšhago gore terama e fihla mafelelong a yona—mafelelo a boifišago—ka gobane ba a tseba gore tshepedišo ye ya dilo e swanetše go fela pele ga ge Jehofa a tliša lefase le lefsa la go loka leo e lego kgale le letetšwe. * Ka go rialo anke re hlahlobeng mabaka a mabedi a bohlatse bjo bo bontšhago gore re phela nakong ya bofelo le gore lefase le lefsa le kgaufsi. Mabaka a ke (1) tatelano ya mabaka a ka Beibeleng le (2) maemo a lefase ao a phuhlamago.—Mateo 24:21; 2 Petro 3:13.

Mafelelong Selo Seo se sa Kwešišwego se a Hlaloswa!

5. “Mabaka a ba-ntlê” ke eng, gomme ke ka baka la’ng a tanya kgahlego ya rena?

⁵ Tatelano ya mabaka ke thuto ya tswalano magareng ga nako le ditiragalo. Jesu o boletše ka nako yeo ka yona baetapele ba lefase e tla bago batšea-karolo ba dithwadi ba sa šitišwe ke Mmušo wa Modimo. Jesu o ile a bitša nako yeo gore ke “mabaka a ba-ntlê.” (Luka 21:24) Mafelelong a ‘mabaka ao a ba-ntle,’ Mmušo wa Modimo wa legodimong o tla buša, ka Jesu e le Mmuši wa wona yo a swanetšego. Mathomong, Jesu o tla buša “xare xa manaba [a gagwe].” (Psalme 110:2) Ke moka, go ya ka Daniele 2:44, Mmušo o tla ‘pšhatla le go fediša’ mebušo ka moka ya batho, gomme o tla ema go iša ka mo go sa felego.

6. “Mabaka a ba-ntlê” a thomile neng, a tšere nako e kae, gomme a fedile neng?

⁶ “Mabaka a ba-ntlê” a tlo fela neng gomme pušo ya Mmušo wa Modimo e tla thoma neng? Karabo yeo e ilego ya ‘utwa gwa ba gwa tla lebaka la bofelo,’ e akaretša tatelano ya mabaka a ka Beibeleng. (Daniele 12:9) Ge “lebaka” leo le dutše le batamela, Jehofa o ile a gata megato ya go utollela sehlopha se ikokobeditšego sa barutwana ba Beibele karabo. Ka thušo ya moya wa Modimo, ba ile ba kwešiša gore “mabaka a ba-ntlê” a thomile ka phedišo ya Jerusalema ka 607 B.C.E., le gore “mabaka” ao e be e le a botelele bja nywaga e 2 520. Go tšwa go se, ba ile ba balela gore 1914 e ile ya swaya bofelo bja “mabaka a ba-ntlê.” Le gona ba ile ba lemoga gore 1914 e be e le mathomo a bofelo bja tshepedišo ye ya dilo. Ka ge o le morutwana wa Beibele, na o ka hlalosa go tšwa ka Mangwalong kamoo ngwaga wa 1914 o balelwago ka gona? *

7. Ke mangwalo afe ao a re thušago go tseba mathomo, botelele le go fela ga mabaka a šupago ao go boletšwego ka ona ka pukung ya Daniele?

⁷ Selo se sengwe seo se hlabišago seetša se utilwe ka pukung ya Daniele. Ka ge Jehofa a ile a diriša Kgoši Nebukadinetsara wa Babele go fediša Jerusalema mathomong a “mabaka a ba-ntlê” ka 607 B.C.E., O ile a utolla ka mmuši yoo gore ditšhaba di tla tšwela pele di ipuša ka ntle le go tsena ga Modimo ditaba gare ka tekanyo ya lebaka la mabaka a šupago a seswantšhetšo. (Hesekiele 21:26, 27; Daniele 4:16, 23-25) Mabaka ao a šupago ke a botelele bjo bo kaaka’ng? Go ya ka Kutollo 11:2, 3 le 12:6, 14, mabaka a mararo le seripa ke a botelele bja matšatši a 1 260. Ka gona, mabaka a šupago a swanetše go ba a botelele bjoo gabedi goba matšatši a 2 520. Na go felela fao? Aowa, ka gobane Jehofa o ile a nea moporofeta Hesekiele yo a phetšego mehleng ya Daniele molao wa go hlalosa seswantšhetšo se ka gore: “Kè Xo beetše letšatši letee ’bakeng sa ngwaxa o tee.” (Hesekiele 4:6) Ka go rialo, mabaka a šupago e tla ba a botelele bja nywaga e  2 520. Re diriša 607 B.C.E. e le nako ya go thoma gomme nywaga e 2 520 e le botelele, re ka phetha ka gore mabaka a ba-ntle a be a tlo fela ka 1914.

“Lebaka la Bofêlô” le Kgonthišeditšwe

8. Ke bohlatse bofe bjoo o ka bo šupago bja go bontšha gore maemo a lefase a mpefetše ga e sa le go tloga ka 1914?

⁸ Ditiragalo tša lefase go tloga ka 1914 go ya pele di kgonthišetša gore kwešišo ye e lego ka mo godimo yeo e theilwego tatelanong ya mabaka a ka Beibeleng e nepagetše. Jesu ka noši o boletše gore “bofêlô bya mabaka ano” bo tla bonwa ka dintwa, ditlala le mauba a malwetši. (Mateo 24:3-8; Kutollo 6:2-8) Ka ntle le pelaelo seo se bile bjalo ga e sa le go tloga ka 1914. Moapostola Paulo o ile a tlaleletša tabeng ye, a bolela gore go tla ba le phapano yeo e bonagalago mekgweng yeo batho ba tlago go swarana ka yona. Tlhaloso ya gagwe ya mabapi le diphetogo tšeo ka moka ga rena re di bonego e be e opile kgomo lenaka.—2 Timotheo 3:1-5.

9. Babogedi ba re’ng mabapi le maemo a lefase ga e sa le go tloga ka 1914?

⁹ Na ‘sebopego sa lefase le’ se tloga se fetogile kudu ga e sa le go tloga ka 1914? Moprofesara Robert Wohl o boletše ka pukung ya The Generation of 1914 gore: “Bao ba phologilego ntwa le ka mohla ba ka se kgaotše go dumela gore lefase le lengwe le ile la fela gomme le lengwe la thoma ka August 1914.” Ge a kgonthišetša se, Dr. Jorge A. Costa e Silva, bjalo ka mohlahli wa bophelo bjo bobotse bja monagano wa Mokgatlo wa Lefase wa Maphelo o ngwadile gore: “Re phela nakong ya diphetogo tšeo di diregago ka lebelo kudu, tšeo mafelelong di bakago pelaelo le kgateletšego ka tekanyo yeo e sa kago ya bonwa historing ya batho.” Na seo e bile phihlelo ya gago ka noši?

10. Beibele e re hlabišetša seetša bjang mabapi le sebaki sa maemo a lefase ao a mpefetšego ga e sa le go tloga ka 1914?

¹⁰ Ke mang yoo e lego sesenyi se se eteletšego pele maemo ao a mpefalago a lefase? Kutollo 12:7-9 e utolla sesenyi se ka gore: “Kwa lexodimong xwa tsoxa ntwa ya xe Mikaele [Jesu Kriste] le Barongwa ba xaxwe bà e-lwa le Nôxa [Sathane Diabolo], ’me Nôxa è e-lwa è na le Barongwa ba yôna. Nôxa ya se kê ya fenya; kwa lexodimong xwa se kê xwa hlwa xò e-ba le madulô a yôna. Nôxa e kxolo yeo ya rakwa; . . . motimetši wa lefase ka moka la batho.” Ka gona Sathane Diabolo ke yena a nago le molato wa go baka mathata, gomme go rakwa ga gagwe legodimong ka 1914 go be go bolela gore go be go tla ba le ‘madimabe go bao ba agilego mo lefaseng le lewatleng, ka gobane Diabolo a theogetše go bona a tuka bogale kudu, a tseba ge a šaletšwe ke lebakanyana feela.’—Kutollo 12:10, 12.

Kamoo Modiko wa Mafelelo o tla Bapalwago ka Gona

11. Sathane o diriša mekgwa efe bakeng sa go aroša “lefase ka moka la batho”? (b) Moapostola Paulo o ile a lebiša tlhokomelo boitekong bofe bjo bo kgethegilego bja Sathane?

¹¹ Ka ge a lemoga gore bofelo bja gagwe bo kgaufsi, ga e sa le go tloga ka 1914 Sathane o be a dutše a matlafatša maiteko a gagwe a go aroša “lefase ka moka la batho.” Ka ge ka mehla e le motimetši yo mogolo, Sathane o šoma a le ka  kua ga seširo, a bea baetapele ba lefase le bahlami ba mekgwa e fapa-fapanego sefaleng e le bona ba kgathago tema e kgolo. (2 Timotheo 3:13; 1 Johane 5:19) E nngwe ya dipakane tša gagwe ke go fora batho gore ba nagane gore tsela ya gagwe ya go buša e ka ba tlišetša khutšo ya kgonthe. Ka kakaretšo, phatlalatšo ya gagwe ya maaka e atlegile, ka gobane batho ba dula ba e-na le kholofelo go sa šetšwe bohlatse bjo bogolo bja gore maemo a a mpefala. Moapostola Paulo o ile a bolela e sa le pele gore pejana ga ge tshepedišo ye ya dilo e ka fedišwa, go tla ba le boipolelo bjo bo lemogegago bja phatlalatšo ya maaka ya Sathane. O ngwadile gore: “Xe xo tlo thwe: Xo khutšô! Xo iketlilwe! ké mo ba tl’o xo wêlwa xodimo ke thsenyêxô byalo ka moima xe a wêlwa ke lešôkô.”—1 Ba-Thesalonika 5:3; Kutollo 16:13.

12. Go bile le maiteko afe a tšwelago pele a go tliša khutšo mehleng ya rena?

¹² Nywageng ya morago bjale, bo-radipolitiki gantši ba dirišitše polelwana “Xo khutšô! Xo iketlilwe” ge ba hlalosa maano a fapa-fapanego a batho. E bile ba ile ba bitša 1986 gore ke Ngwaga wa Ditšhaba-tšhaba wa Khutšo, gaešita le ge ngwaga woo o sa ka wa phelela leina la wona. Na maiteko a bjalo a baetapele ba lefase a emela go phethagala mo go feletšego ga 1 Ba-Thesalonika 5:3, goba Paulo o be a šupa go tiragalo e itšego yeo e tla diregago ka tekanyo e kgolo moo lefase ka moka le tlago go e bona?

13. Ge Paulo a be a bolela e sa le pele ka kgoeletšo ya “Xo khutšô! Xo iketlilwe,” o ile a bapiša phedišo yeo e tlago go latela le eng, gomme re ka ithuta’ng go se?

¹³ Ka ge diporofeto tša Beibele gantši di kwešišwa ka mo go feletšego feela ka morago ga ge di phethagetše goba ge di tšwela pele di phethagala, re tla swanelwa ke go leta gomme re tle re bone. Lega go le bjalo, ke mo go tsošago kgahlego gore Paulo o ile a bapiša phedišo e tlago kapejana yeo e latelwago ke kgoeletšo ya gore “Xo khutšô! Xo iketlilwe” le lešoko la mosadi wa moimana. Ka tekanyo ya lebaka la dikgwedi tše ka bago senyane, mma yo a ithwelego o lemoga ka mo go oketšegilego gore ngwana yo a mo imilego o a gola. A ka kgona go kwa go betha ga pelo ya ngwana goba go kwa mosepelo wa gagwe ka popelong. A ka ba a mo raga. Gantši maswao a ba molaleng ka mo go oketšegilego go ba go fihlela ge ka letšatši le lengwe, a e-kwa bohloko bjo bogolo, lešoko, leo le bontšhago gore tiragalo yeo e lego kgale e holofetšwe—go belegwa ga ngwana—e fihlile. Lega go le bjalo, tsela le ge e le efe yeo ka yona kgoeletšo ya “Xo khutšô! Xo iketlilwe” e ka phethagatšwago ka yona, e tla lebiša tiragalong ya kapejana, e bohloko eupša yeo mafelelong e tla bago e thabišago—go fedišwa ga bokgopo le go thoma ga tshepedišo ya lefase le lefsa.

14. Ditiragalo tša nakong e tlago di tla direga ka tatelano efe, gomme tša lebiša mafelelong afe?

¹⁴ Phedišo e tlago e tla ba e šiišago bakeng sa Bakriste ba botegago bao ba tla bego ba bogetše. Sa pele, dikgoši tša lefase (karolo ya dipolitiki ya mokgatlo wa Sathane) di tla hlasela bathekgi ba Babele yo Mogolo (karolo ya bodumedi) gomme di tla ba fediša. (Kutollo 17:1, 15-18) Ka gona, ka go fetoga ga ditiragalo mo go makatšago, mmušo wa Sathane o tla arogana, lehlakore le lengwe la lwantšhana le le lengwe, gomme Sathane a ka se be le matla a go thibela seo. (Mateo 12:25, 26) Jehofa o tla tsenya ka dipelong tša dikgoši tša lefase gore di ‘dire se yena a se naganago,’ e lego go tloša manaba a gagwe a bodumedi lefaseng. Ka morago ga ge bodumedi bja maaka bo fedišitšwe, Jesu Kriste o tla eta pele madira a gagwe a legodimong phenyong e feletšego ya karolo yeo e šetšego ya mokgatlo wa Sathane—mekgatlo ya tša kgwebo le ya dipolitiki. Mafelelong, Sathane ka noši o tla thibelwa. Tiragalong yeo, seširo se tla wa, gomme terama yeo e lego kgale e bapalwa e tla fihla mafelelong.—Kutollo 16:14-16; 19:11-21; 20:1-3.

15, 16. Kgopotšo ya gore “lebaka ké la pitlaxanô” e swanetše go kgoma bjang maphelo a rena?

¹⁵ Dilo tše ka moka di tla direga neng? Ga re tsebe letšatši goba iri. (Mateo 24:36) Lega go le bjalo, re a tseba gore “lebaka ké la pitlaxanô.” (1 Ba-Korinthe 7:29) Ka gona, ke gabohlokwa gore re diriše nako yeo e šetšego ka bohlale. Bjang? Bjalo ka ge moapostola Paulo a hlalosa, re swanetše go ‘thakanela sebaka se sebotse’ bakeng sa dilo tša bohlokwa kudu go e na le go dira dilo tšeo di sego bohlokwa gomme re dire gore letšatši le lengwe le le lengwe e be la  bohlokwa. Ka baka la’ng? “Xobane mehla yeno ké e mebe.” Le gona ge re “hlatha se Modimo a se rataxo” ka rena, re ka se senye nako e nyenyane ya bohlokwa yeo e šetšego.—Ba-Efeso 5:15-17; 1 Petro 4:1-4.

¹⁶ Re swanetše go kgomega bjang re le motho ka noši ka ge re tseba gore tshepedišo ka moka ya dilo ya lefase e letetšwe ke phedišo? Moapostola Petro o ngwadile bakeng sa go re hola ge a be a re: “Byalo xe dilô tše e le tša xo tlo xašanywa, xo swanetše ruri-ruri xe Le le ba xo swara ka tsela e kxêthwa ya borapedi.” (2 Petro 3:11) Ka kgonthe wo ke mohuta wa batho bao re swanetšego go ba bona! Ka go dumelelana le keletšo e bohlale ya Petro, re swanetše (1) go dula re phafogetše boitshwaro bja rena e le gore re kgonthišege gore ke bjo bokgethwa le (2) go kgonthišetša gore ditiro tša rena tša phišego tirelong ya Jehofa ka mehla di bontšha lerato la rena le le tseneletšego la go mo rata.

17. Bakriste ba botegago ba swanetše go dula ba itišitše malebana le mereo efe ya Sathane?

¹⁷ Lerato la go rata Modimo le tla re thibela go kgomarela lefase le ka baka la dikgoketšo tša lona. Ka baka la seo se boloketšwego tshepedišo ya gona bjale ya dilo, go kotsi gore re tanywe ke letago le matsaka a tsela ya lefase ya bophelo ya go phelela lethabo. Gaešita le ge re phela e bile re šoma lefaseng, re swanetše go ela hloko keletšo e bohlale ya gore re se ke ra diriša lefase ka botlalo. (1 Ba-Korinthe 7:31) Ge e le gabotse, re swanetše go dira sohle seo re ka se kgonago gore re itiše malebana le go arošwa ke phatlalatšo ya maaka ya lefase. Lefase le le ka se atlege go nyakeng ditharollo bakeng sa mathata a lona. Le ka se tšwele pele le ikemetše go iša ka mo go sa felego. Ke ka baka la’ng re ka kgonthišega gakaakaa? Ka gobane Lentšu la Modimo le le buduletšwego le bolela bjalo: “Lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”—1 Johane 2:17.

Tše Kaone di sa E-tla!

18, 19. Ke diphetogo dife tšeo o lebeletšego pele go di bona lefaseng le lefsa, gomme ke ka baka la’ng se e tla ba seo se bego se swanetše go letwa?

¹⁸ Kgaufsinyana Jehofa o tla fediša Sathane le bathekgi ba gagwe. Ka morago ga moo, ka tšhegofatšo ya Modimo, baphologi bao ba botegago ba bofelo bja tshepedišo ye ya dilo ba tla thoma go šoma bakeng sa go dira diphetogo tšeo di tlago go ba gona ka mo go sa felego. Ntwa e ka se sa senya lefase; Modimo o tla ‘fediša dintwa go fihla mafelelong a lefase.’ (Psalme 46:9) Go e na le gore go be le tlhaelelo ya dijo, “xo tlo ba le mohora wa mabêlêʹ mo naxeng.” (Psalme 72:16) Go ka se sa ba le dikgolego, diteišene tša maphodisa, malwetši ao a fetišetšwago ka dikopano tša botona le botshadi, bagwebi ba dihlare-tagi bao ba nago le matla a go dira bjalo, dikgoro-tsheko tša tlhalo, megato ya molao ya gore motho a se sa ba le selo gotee le botšhošetši.—Psalme 37:29; Jesaya 33:24; Kutollo 21:3-5.

¹⁹ Go ka se sa ba le selo ka mabitleng a kgopotšo, gomme ba dimilione bao ba tsošitšwego—batho ba oketšegilego—ba tla tla lefaseng. E tla ba mo go thabišago kudu gakaakang ge moloko o mongwe o kopanywa gape le o mongwe gotee le ge baratiwa bao e lego kgale ba arogane ba gokarelana ka borutho le ka go tšwa pelong! Mafelelong, yo mongwe le yo mongwe yo a phelago o tla rapela Jehofa. (Kutollo 5:13) Ge diphetogo di feletše, seširo se tla utolla paradeise ya lefaseng ka bophara. O tla ikwa bjang ge o lebeledišiša lefase? Ka ntle le pelaelo o tla tutueletšega go bolela gore, ‘Ke ile ka letela se ka nako e telele, eupša e be e le seo se swanetšego go letwa!’

[Mengwalo ya ka tlase]

[Dipotšišo tša Thuto]

[Caption on page 20]

Mafelelong—selo seo se sa kwešišwego se a hlaloswa!

O tla Araba Bjang?

• Mantšu a moapostola Paulo a gore ‘sebopego sa lefase le se a fetoga’ a itlhatsetše bjang e le a therešo mehleng ya rena?

• Tatelano ya mabaka a ka Beibeleng e šupa bjang bofelo bja “mabaka a ba-ntlê”?

• Maemo a fetogago a lefase a kgonthišetša bjang gore 1914 e swaya mathomo a “lebaka la bofêlô”?

• Ntlha ya gore “lebaka ké la pitlaxanô” e swanetše go re kgoma bjang?