“Hlabana Thlabanô E Botse ya Tumêlô”

NA O ka akanya mohlabani le ge e le ofe yoo nakong ya ntwa a bego a ka se thabe ge a laelwa gore: “O swanetše go boela gae gore o fetše nako le mosadi wa gago le lapa la gago”?

Mohlabani wa mehleng ya Kgoši Dafida wa Isiraele o ile a newa taelo e bjalo. Uria wa mo-Hethe o ile a newa taelo ke kgoši ka boyona gomme ya mo kgothaletša go boela gae. Lega go le bjalo, Uria o ile a gana go boela ngwakong wa gagwe. Ge a be a botšišwa mabapi le mokgwa wa gagwe o sa tlwaelegago, Uria o ile a araba ka gore areka ya kgwerano, yeo e emelago go ba gona ga Modimo, e be e le lefelong la ntwa gotee le madira a Isiraele. O ile a botšiša gore: “Afa nna nka ya ngwakong wa-ka, ka ja ka nwa ka robala le mosadi wa-ka?” Go Uria, se e be e le se se sa kwagalego nakong ye e thata gakaalo.—2 Samuele 11:8-11.

Boitshwaro bja Uria bo rotoša dipotšišo tša bohlokwa, ka ge le rena re phela nakong ya ntwa. Mo nakong ye go lwewa ntwa e fapanego le ntwa le ge e le efe yeo e kilego ya lwewa ke ditšhaba tša lefase. Ntwa ye e dira gore dintwa tše pedi tša lefase di bonagale e se tša bohlokwa ge di bapetšwa le yona, gomme wena o tšea karolo ntweng ye. Kotsi ke e kgolo, gomme lenaba ke le matla. Ntweng ye, ga go thunywe dithunya, ga go betšwe dipomo, eupša mokgwa wa go hlasela ntweng ke wo o tseneletšego ka mo go swanago.

Pele o ka tsena ntweng ye, o swanetše go tseba ge e ba go e tsenela e le mo go swanetšego le gore o lwela  eng. Na ntwa ye ke yeo e swanetšego maiteko? Morero wa ntwa ye ya moswana-noši o hlaloswa ke moapostola Paulo ka lengwalong la gagwe le le yago go Timotheo leo le rego: “Hlabana thlabanô e botse ya tumêlô.” Ee, ntweng ye ga o šireletše sebo eupša o swanetše go šireletša “tumêlô”—e lego therešo ka moka ya Bokriste yeo e utolotšwego ka Beibeleng. Go molaleng gore o swanetše go ba le “tumêlô” e tiilego e le gore o e lwele gomme o fenye ntweng.—1 Timotheo 6:12.

Mohlabani yo bohlale o katanela go tseba lenaba la gagwe. Ntweng ye, lenaba le na le nywaga e mentši ya phihlelo maanong a ntwa, gomme le swere dithušo gotee le dibetša tše matla. Le gona le na le matla a fetago a batho. Le bogale, le šoro e bile ga le botege; lenaba le ke Sathane. (1 Petro 5:8) Dibetša tša kgonthe gotee le maano a batho le boradia bja bona ga di na mohola ntweng ya malebana le lenaba le. (2 Ba-Korinthe 10:4) O ka diriša’ng go lwa ntweng ye?

Sebetša se segolo ke “thšoša ya Môya e lexo Lentšu la Modimo.” (Ba-Efeso 6:17) Moapostola Paulo o bontšha kamoo le šomago ka katlego ka gona ka gore: “Lentšu la Modimo ké le le phelaxo, ké le matla; ka boxale le phala thšoša efe le efe ya maxale a mabedi; xomme le phololetša la bá la aroxanya pelo le môya, le malokololô le môkô; ’me le tseba xo fênyêka diakanyô le kxopolô tša pelo.” (Ba-Hebere 4:11, 12) Sebetša se bogale kudu, se se lebanyago gakaalo, seo se kgonago go phuleletša dikgopolong tša ka gare le maikemišetšong a motho ka kgonthe se swanetše go dirišwa ka bokgoni le ka tlhokomelo.

O swanetše go ba o tseba gore madira a ka ba a e-na le dibetša tšeo di tšwetšego pele kudu, eupša dibetša tšeo ga di na mohola ge bahlabani ba se na bokgoni bja go di diriša. Le wena ka mo go swanago o nyaka tlhahlo ya go diriša tšhoša ya gago ka katlego. Ka mo go thabišago, o ka hwetša tlwaetšo go bahlabani bao ba nago le phihlelo e ntši. Jesu o biditše bahlabani ba ba go tlwaetša ba bangwe gore ke “molaki e a bôtêxaxo yo bohlale,” gomme ba neilwe boikarabelo bja go aba dijo tša moya ka nako, goba go nea tlhahlo go balatedi ba gagwe. (Mateo 24:45) O ka lemoga sehlopha se sa molaki ka go hlahloba dithuto tša sona tše mafolofolo gotee le ditemošo tša sona tšeo di lego nakong tša mabapi le makatika a lenaba. Bohlatse bo bontšha gore se bopilwe ke ditho tšeo di tloditšwego ka moya tša phuthego ya Bokriste ya Dihlatse tša Jehofa.—Kutollo 14:1.

Sehlopha se sa molaki se dirile mo gontši go feta go fo hlahla. Se bontšhitše moya wa moapostola Paulo, yo a ngwaletšego phuthego ya Thesalonika gore: “Se re bexo rè na nasô, rè le makxatheng a lena ké bonôlô bya mma xo bana xe a amuša ngwana wa xaxwe. Ka thloloxêlô e kaakaa re be re re re Le neê tšohle, e sexo Ebangedi yeo ya Modimo fêla, re bê re re re Le neê le bophelô bya rena; xobane Lè le baratiwa ba rena.” (1 Ba-Thesalonika 2:7, 8) Ke boikarabelo bja mohlabani yo mongwe le yo mongwe wa Mokriste go diriša tlhahlo e lerato yeo e newago.

Ditlhamo tše di Feletšego

Ditlhamo tše di feletšego tša seswantšhetšo di a hwetšagala bakeng sa tšhireletšego ya gago. O tla hwetša lelokelelo la ditlhamo tše go Ba-Efeso 6:13-18. Mohlabani yo a lego šedi a ka se ke a ipea kotsing ge e ba se sengwe sa ditlhamo tša gagwe tša moya se se gona goba se nyaka go lokišwa.

Mokriste o nyaka ditlhamo tša gagwe ka moka tša go itšhireletša, eupša kotse e kgolo ya tumelo ke ya bohlokwa ka mo go kgethegilego. Ke ka baka leo Paulo a ngwadilego gore: “Xa-xolo-xolo Le swarê kôtsê ya tumêlô, ye Le kxônaxo xo tima mesêbê e thšumaxo ya yêna e mobe ka yôna.”—Ba-Efeso 6:16.

Kotse ye e kgolo, yeo e ka kgonago go khupetša mmele ka moka, e emela tekanyo ya tumelo. O swanetše go ba le tumelo e tiilego tlhahlong ya Jehofa, gomme o dumele ka ntle le pelaelo gore dikholofetšo tša gagwe ka moka di tla phethagala. O swanetše go nagana eka dikholofetšo  tšeo di šetše di phethagetše. O se ke wa ba le pelaelo le gatee ya gore tshepedišo ka moka ya lefase la Sathane e tla fedišwa go se go ye kae, gore lefase le tla fetolwa paradeise, gotee le gore batho bao ba botegelago Modimo ka go se kwanantšhe ba tla bušetšwa phethegong.—Jesaya 33:24; 35:1, 2; Kutollo 19:17-21.

Lega go le bjalo, ntweng ye e sa tlwaelegago yeo e lwewago mo nakong ye, o nyaka selo se sengwe se se oketšegilego—o nyaka mogwera. Nakong ya ntwa, ditlemo tša kgaufsi tša segwera di thongwa ge bahlabani-gotee ba kgothatšana le go šireletšana, gaešita le go phološana lehung ka dinako tše dingwe. Ka ge segwera e le sa bohlokwa, gore o phologe ntweng ye, ga go na segwera se sengwe seo o se nyakago ge e se sa Jehofa ka boyena. Ke ka baka leo Paulo a phethago lelokelelo la gagwe la dilo tšeo di bopago ditlhamo tša moya ka mantšu a: “Le bê barapedi ba xo tliša dithapêlô tšohle le ’kxopêlô tšohle ka mabaka ohle ka Môya.”—Ba-Efeso 6:18.

Re rata go ba le mogwera wa kgaufsi. Re dira maiteko a go fetša nako le yena. Ka go bolela le Jehofa ka mehla ka thapelo, e ba wa kgonthe go rena go etša mogwera yo a botegago. Morutiwa Jakobo o re kgothatša ka gore: “Batamêlang Modimo, le Yêna a Le batamêlê.”—Jakobo 4:8.

Makatika a Lenaba

Ka dinako tše dingwe, go lwa le lefase le go ka swana le go sepela tšhemong yeo e bjetšwego dithuthupi. Tlhaselo e ka tšwelela ka lehlakoreng le ge e le lefe, gomme lenaba le leka go go swara o sa itebetše. Lega go le bjalo, kgodišega gore Jehofa o go neile tšhireletšego ka moka yeo o e nyakago.—1 Ba-Korinthe 10:13.

Lenaba le ka matlafatša boiteko bja lona bjo bošoro ka go hlasela ditherešo tša Beibele tšeo e lego motheo wa tumelo ya gago. Bahlanogi ba ka diriša mantšu a goketšago, bofora le tsela e kgopamego ya go nea mabaka e le go leka go go fenya. Eupša bahlanogi ga ba go kganyogele tše botse. Diema 11:9 e re: “Sehlôlá se senya sa xasô ka molomo; moloki ó pholoxa ka se a se tsebaxo.”

E be e tla ba phošo go nagana gore o swanetše go theetša bahlanogi goba go bala dipuku tša bona e le gore o kgone go ganetša dipolelo tša bona. Tsela ya bona e kgopamego le yeo e nago le mpholo ya go nea mabaka e ka go gobatša moyeng gomme ya šilafatša tumelo ya gago go etša lephera leo le kekago ka lebelo. (2 Timotheo 2:16, 17) Go e na le moo, ekiša karabelo ya Modimo go bahlanogi. Jobo o boletše ka Jehofa gore: ‘Pele ga gagwe ga go batamele moikaketši.’—Jobo 13:16.

Lenaba le ka leka go diriša leano le le fapanego, leo le atlegago ka tekanyo e itšego. Ge e ba madira ao a lego mogwantong a ka goketšwa gore a tšwe molokelokeng go yo phegelela go hloka molao le boitshwaro bjo bo gobogilego, gona se se ka baka tšharakano.

Boithabišo bja lefase, bjo bo swanago le difilimi gotee le dipontšho tša thelebišene tšeo di bontšhago boitshwaro bjo bo gobogilego le mmino o sa lokago, ke molaba o atlegago. Ba bangwe ba bolela gore ba ka bogela dipontšho tše di gobogilego goba go bala dipuku tša boitshwaro bjo bo gobogilego ka ntle le gore di ba kgome. Eupša motho yo mongwe yo ka mehla a bego a bogela difilimi tša dikopano tša botona le botshadi tšeo di lego molaleng o ile a dumela ka go lebanya  gore: “Le ka mohla ga o lebale dipontšho tšeo, ge o dutše o nagana ka tšona ka mo go oketšegilego ke mo o ikhwetšago o nyaka go dira seo o se bonego . . . Paesekopo e go dira gore o nagane gore o tloga o hlaelwa ke selo se sengwe.” Na ke ga mohola go ipea kotsing ya go gobatšwa ke tlhaselo ye e sa lemogegego?

Sebetša se sengwe seo se lego dibetšeng tša lenaba ke molaba wa go rata dilo tše di bonagalago. Go ka ba thata go lemoga kotsi ye ka gobane ka moka ga rena re na le dinyakwa tša dilo tše di bonagalago. Re nyaka legae, dijo le diaparo, gomme ga se phošo go ba le dilo tše dibotse. Kotsi e letše ponong ya motho ka noši. Tšhelete e ka ba ya bohlokwa kudu go feta dilo tša moya. Re ka fetoga barati ba tšhelete. Re swanetše go ikgopotša ka go lekanyetšwa ga mahumo. Ke a nakwana, mola mahumo a moya e le a sa ruri.—Mateo 6:19, 20.

Ge e ba boikemišetšo bja madira bo fokola, kgonagalo ya gore a ka fenya e a fokotšega. “X’O nôlêxa môkô mohla wa tlalêlô, xôna matla ’axo xa se a selô.” (Diema 24:10) Go nyama ke sebetša seo Sathane a se dirišitšego ka katlego. Go apara ‘go holofela phološo e le kuane’ go tla go thuša go lwa le go nyama. (1 Ba-Thesalonika 5:8) Leka go boloka kholofelo ya gago e tiile go etša ya Aborahama. Ge a be a kgopelwa go neela Isaka e lego morwa wa gagwe a nnoši gore e be sehlabelo, Aborahama ga se a ka a dika-dika. O be a dumela gore Modimo o tla phethagatša kholofetšo ya Gagwe ya go šegofatša ditšhaba ka moka ka ngwana wa gagwe le gore Modimo o be a tla kgona go tsoša Isaka bahung ge e ba go nyakega e le gore a kgone go phethagatša seo a se holofeditšego.—Ba-Hebere 11:17-19.

O se ke wa Langwa Ntweng

Ba bangwe bao ba lwelego ka sebete ka nako e telele ba ka ba ba thoma go lapa gomme ka go rialo ga ba sa lwa ka mafolofolo a swanago le a pele. Mohlala wa Uria, yo go boletšwego ka yena mathomong a sehlogo se, o ka thuša bohle bao ba tšeago karolo ntweng gore ba kgomarele pono e nepagetšego. Bahlabani-gotee le rena ba bantši ba Bakriste ba swanetše go kgotlelela mathata, ba lebeletšane le dikotsi goba ba bolawa ke phefo goba tlala. Go etša Uria, ga re nyake go nagana ka manobonobo ka moka ao re ka a thabelago gona bjale goba go ineela kganyogong ya go phela bophelo bja boiketlo. Re nyaka go tšwela pele re le madireng a Jehofa a lefase ka bophara a bahlabani bao ba botegago le go tšwela pele re e-lwa go fihlela re thabela ditšhegofatšo tše di kgahlišago tšeo di re letetšego.—Ba-Hebere 10:32-34.

Go be go tla ba kotsi go tlogela go phakgama, mohlomongwe ka go nagana gore tlhaselo ya mafelelo e sa dutše e le kgole le go tla. Mohlala wa Kgoši Dafida o gatelela kotsi ye. Ka lebaka le itšego o be a se gotee le madira a gagwe ntweng. Ka baka leo, Dafida o ile a dira sebe se segolo seo  se ilego sa mmakela tlalelo le tlaišego bophelong bja gagwe ka moka.—2 Samuele 12:10-14.

Na ke mo go swanetšego maiteko go tsena ntweng ye, go lebeletšana le mathata a ntwa, go kgotlelela dikwero le go tlogela maipshino a belaetšago a lefase? Bao ba tšwelago pele ba e-lwa ka katlego ba tla dumela gore seo lefase le se neago se ka bonagala e le se se kgahlišago, go swana le tšhipi e phadimago, eupša wa re ge o e lebeledišiša, wa bona e se na mohola. (Ba-Filipi 3:8) Go feta moo, gantši maipshino ao a feleletša ka bohloko le go nyama.

Mokriste yo a lego ntweng ye ya moya o thabela segwera sa kgaufsi le bagwera ba kgonthe, letswalo le le hlwekilego le kholofelo e kgahlišago. Bakriste bao ba tloditšwego ka moya ba lebeletše pele bophelong bja go se hwe bja legodimong le Kriste Jesu. (1 Ba-Korinthe 15:54) Bahlabani ba bantši ba Bakriste ba lebeletše pele bophelong bjo bo phethagetšego bja batho lefaseng la paradeise. Ka kgonthe meputso e bjalo ke yeo e swanetšego ke boikgafo le ge e le bofe. Le gona ka go fapana le dintwa tša lefase, mafelelo a rena ntweng ye ke ao a kgonthišeditšwego ge feela re ka dula re botega. (Ba-Hebere 11:1) Lega go le bjalo, mafelelo a tshepedišo ye yeo e lego ka tlase ga taolo ya Sathane ke go fedišwa ka mo go feletšego.—2 Petro 3:10.

Ge o dutše o e-lwa ntweng ye, gopola mantšu a Jesu a rego: “Betang dipelo, xobane lefase le fentšwe ke Nna.” (Johane 16:33) O fentše lefase ka go dula a le mafolofolo le ka go kgomarela potego ka tlase ga diteko. Le rena re ka dira se se swanago.

[Ntlhakgolo go letlakala 27]

Ga go thunywe dithunya, ga go betšwe dipomo, eupša mokgwa wa go hlasela ntweng ke wo o tseneletšego ka mo go swanago

[Ntlhakgolo go letlakala 30]

Mafelelo a rena ntweng ye ke ao a kgonthišeditšwego ge feela re ka dula re botega

[Seswantšho go letlakala 26]

Kuane ya phološo e tla re thuša go lwa le go nyama

Diriša kotse e kgolo ya tumelo go tima “mesêbê e thšumaxo” ya Sathane

[Seswantšho go letlakala 28]

“Batamêlang Modimo, le Yêna a Le batamêlê”

[Seswantšho go letlakala 29]

Re swanetše go ba le tumelo go phethagatšweng ga dikholofetšo tša Modimo