Ke ka Baka La’ng Dihlatse tša Jehofa di Dula di go Etela?

LEFASENG ka bophara, go phegelela ga Dihlatse tša Jehofa ge di dutše di dira bodiredi bja ntlo le ntlo ke mo go tsebjago kudu. Batho ba bangwe ba ipotšiša gore ke ka baka la eng Dihlatse di dula di ba etela, kudu-kudu ge e ba nakong e fetilego ba bontšhitše kgahlego e nyenyane molaetšeng wa Dihlatse. Mangwalo a mabedi a tšwago Russia a hlalosa lebaka.

Masha, e lego ngwanenyana wa nywaga e 19 wa kua Khabarovsk o dumela ka gore: “Go bolela therešo, nakong e fetilego ke be ke leka sohle seo nka se kgonago go phema Dihlatse tša Jehofa.” Lega go le bjalo, ka morago ga go bala dikopi tše sego kae tša dimakasine tše di gatišitšwego ke Dihlatse, o ile a fetola boemo bja gagwe bja kgopolo. Masha o ngwala gore: “Seo ke se badilego ke se se kgahlišago kudu le se se sedimošago, eupša sa bohlokwa kudu se go dira gore o lebelele lefase ka leihlo le lengwe. Ganyenyane-ganyenyane ke ile ka thoma go kwešiša lebaka leo ka lona batho ba nago le morero bophelong.”

Svetlana yo a tšwago motseng o mogolo wa Ussuriysk mo e ka bago dikhilomithara tše 80 ka borwa bja Vladivostok o ngwala gore: “Ke sa tšwa go thoma go bala Morokami le Phafoga! Dimakasine tše di nyakega kudu mehleng ye ya rena. Ke thabela dihlogo tša tšona ka moka. Ke tše di kgahlišago, tše di nago le tsebišo e holago le tše di sedimošago. Ke a leboga! Ke le leboga kudu ge le le gona lefaseng le, le go dira mošomo wo o botho le wa bohlokwa.”

Dihlatse tša Jehofa lefaseng ka bophara di tšeela godimo potšišo e šišinyago kgopolo ya moapostola Paulo e rego: “[Batho] ba tlo kwa bya’ng, xe xo se sexoeledi?” (Ba-Roma 10:14) Ke ka baka la’ng mo nakong e tlago o sa iphe metsotso e sego kae gore o theetše ge Dihlatse di go etela? Le wena o ka thabela molaetša wo o kgothatšago wo o hwetšwago ka Lentšung la Modimo e lego Beibele.