Khomotšo Bakeng sa Bao ba Tlaišegago

NAKONG e fetilego, ge banna le basadi bao ba botegago ba be ba tlaišega, ba ile ba rapela Modimo ka go tšwa pelong gore a ba nee tlhahlo. Lega go le bjalo, gape ba ile ba gata mogato wa pele wa go fokotša tlaišego, bjalo ka go diriša bohlale bakeng sa go tšhabela bagateletši. Ka mohlala, go ithekga ka Jehofa mo go sepedišanago le boiteko bja motho ka noši go ile gwa dira gore Dafida a kgone go kgotlelela tlaišego ya gagwe. Go thwe’ng ka rena lehono?

Ge o lebeletšane le tlaišego, ka ntle le pelaelo o gata mogato wa pele wa go rarolla bothata bja gago. Ka mohlala, ge e ba o ikhwetša o se na mošomo, na ga o dire boiteko bja go hwetša mošomo o swanelegago woo o tlago go phediša wena gotee le lapa la gago? (1 Timotheo 5:8) Goba ge e ba o babja mmeleng, na ga o nyake thušo e swanetšego ya tša kalafo? Ke mo go kgahlišago gore Jesu, yo a bego a e-na le matla a tšwago go Modimo a go fodiša mehuta ka moka ya malwetši, o ile a dumela gore “ba-lla-ngaka . . . ké balwetši.” (Mateo 9:12) Lega go le bjalo, ga se ka mehla mathata a gago a ka tlošwago; o ka swanelwa ke go tšwela pele o a kgotlelela go fihla bokgoleng bjo itšego.

Ke ka baka la’ng o sa botše Jehofa Modimo taba ye ka thapelo? Ka mohlala, ge re nyaka mošomo, go ithekga ka Modimo ka thapelo go tla re thuša go gana teko le ge e le efe ya go amogela mošomo wo o thulanago le melao ya motheo ya Beibele. Le gona re tla phema gore megabaru goba lerato la go rata tšhelete di re ‘aroše tumelong’. (1 Timotheo 6:10) Ka kgonthe, ge re dira diphetho tša bohlokwa mabapi le mošomo goba lapa goba ditaba tšeo di lego mabapi le maphelo, re ka latela keletšo ya Dafida e rego: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.”—Psalme 55:22.

Le gona thapelo e tšwago pelong e tla re thuša go dula re leka-lekane monaganong e le gore tlaišego ya rena e se ke ya re imela. Ka ge e be e le Mokriste wa kgonthe, moapostola Paulo o ile a ngwala gore: “Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô.” Thapelo e tšwago pelong e ka re homotša bjang? “Khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” (Ba-Filipi 4:6, 7) Khutšo ya Modimo e  ‘feta tlhaologanyo yohle.’ Ka gona, e ka re tsepamiša ge re imelwa ke maikwelo ao a gateletšago. E tla ‘boloka dipelo le dikgopolo tša rena,’ ka go rialo ya re thuša go phema go dira dilo ka lepotla-potla goba ka tsela e sego ya bohlale, e lego seo se ka oketšago tlaišego ya rena.

Le gona thapelo e ka dira phapano tseleng yeo boemo bo ka feleletšago bo le ka gona. Ge moapostola Paulo a be a e ba mogolegwa kua Roma, ka boikokobetšo o ile a kgopela Bakriste-gotee le yena gore ba mo rapelele. Ke ka baka la’ng Paulo a ile a dira kgopelo ye? O ile a ba ngwalela gore: “Ke Le rapêla xa-xoloxolo xore Le dirê byalo, xore ke bušetšwê xo lena ka pelá.” (Ba-Hebere 13:19) Ka mantšu a mangwe, Paulo o be a tseba gore go kwa ga Jehofa dithapelo tšeo di phegelelago tša badumedi-gotee le yena mohlomongwe go ka dira phapano mabapi le gore o tla lokollwa neng.—Filemone 22.

Na thapelo e tla fetoša ditla-morago tša tlaišego ya rena? Mohlomongwe e ka dira bjalo. Lega go le bjalo, re swanetše go lemoga gore Jehofa Modimo a ka fo se arabe dithapelo tša rena ka tsela yeo re bego re ka rata ka gona. Paulo o rapetše ka makga a mmalwa mabapi le “phatša nameng” ya gagwe, mohlomongwe bothata bja mmeleng. Lega go le bjalo, go e na le gore a tloše tlaišego yeo, Modimo o ile a botša Paulo gore: “Kxauxêlô ya-ka a e Xo lekanê, xobane matla a-ka a iphêtha phokolong.”—2 Ba-Korinthe 12:7-9.

Ka gona, tlaišego ya rena e ka fo se tloge gatee-tee. Lega go le bjalo, re tla ba le sebaka sa go hlatsela go ithekga ga rena ka Tatago rena wa legodimong. (Jakobo 1:2-4) Kgonthišegang gore gaešita le ge Jehofa Modimo a sa tloše tlaišego, a ka “fêla a bea sebaka sa xo tlo efoxa, xore [re] kxônê xo kxôtlêlêla.” (1 Ba-Korinthe 10:13) Ke mo go lemogegago gore Jehofa o bitšwa “Modimo wa khomotšô yohle, E a re homotšaxo mahlokong a rena ohle.” (2 Ba-Korinthe 1:3, 4) Modimo a ka re nea seo re se nyakago bakeng sa gore re kgotlelele, le gona re na le kholofelo ya bophelo bjo bo sa felego.

Lentšu la Modimo e lego Beibele le holofetša gore Jehofa “ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna.” (Kutollo 21:3, 4) Na lefase leo le se nago tlaišego le kwagala e le toro feela? Le ka kwagala bjalo ge e ba o be o dutše o tlwaetše go phela ka mathata. Lega go le bjalo, go lokologa poifong le mathateng ke seo Modimo a se holofeditšego, gomme ka ntle le pelaelo morero wa gagwe o tla atlega.—Jesaya 55:10, 11.

[Caption on page 9]

Go tloga manyaming go ya kimologong