Bokriste bja Therešo bo a Ata

BODIREDI bja Jesu Kriste bo ile bja kgoma lefase ka tsela e kgolo lekgolong la pele la nywaga. Molaetša wa gagwe e be e le o matlafatšago, o sedimošago le o tutuetšago ka tsela yeo e ilego ya makatša batho. Ba bantši ba bao ba ilego ba mo kwa a bolela ba ile ba kgongwa kudu ke mantšu a gagwe.—Mateo 7:28, 29.

Jesu ka ntle le poifo o ile a gana go tšea karolo ditshepedišong tšeo di gatelelago tša bodumedi le tša bopolitiki tša mehleng ya gagwe eupša o ile a itira yo a batamelegago go batho bao ba tlwaelegilego. (Mateo 11:25-30) O ile a dumela phatlalatša gore go na le tutuetšo e apareditšego ya meoya e mebe lefaseng gomme a bontšha matla a gagwe ao a a neilwego ke Modimo godimo ga yona. (Mateo 4:2-11, 24; Johane 14:30) Jesu ka bokgwari o ile a hlabiša seetša sa tswalano ya motheo ya magareng ga tlaišego le sebe, gomme ka lerato o ile a šupa go Mmušo wa Modimo e le wona o tlago go tliša kimollo ya sa ruri. (Mareka 2:1-12; Luka 11:2, 17-23) O ile a tloša gatee ya ba moka seširo sa lefsifsi seo ka nako e telele se bego se širile semelo sa kgonthe sa Tatagwe, gomme a dira gore leina la Modimo le tsebje ke bohle bao ba bego ba e-na le kgahlego ya go ba le tswalano ya motho ka noši le Yena.—Johane 17:6, 26.

Ka gona, ga go makatše gore go sa šetšwe tlaišo e tseneletšego ya bodumedi le ya bopolitiki, barutiwa ba Jesu ba ile ba phatlalatša molaetša wa gagwe o matla ka lebelo. Ka nywaga e 30 feela goba go feta moo, diphuthego tša Bokriste tše mafolofolo di ile tša hlongwa kua Afrika, Asia le Yuropa. (Ba-Kolose 1:23) Ditherešo tše bonolo tšeo Jesu a di rutilego di ile tša bonegela dipelo tša baikokobetši, e lego batho ba dipelo tše di lokilego Mmušong wa Roma ka moka.—Ba-Efeso 1:17, 18.

Lega go le bjalo, ke bjang barutiwa ba ba bafsa bao ba tšwago ditlogong tše di fapanego gakaakaa tša boiphedišo, setšo, maleme le bodumedi ba bego ba ka bokana gotee e le ka kgonthe ‘tumelong e tee,’ go etša ge moapostola Paulo a be a e bitša bjalo? (Ba-Efeso 4:5) Ke’ng seo se bego se tla ba boloka ba ‘bolela se tee’ e le gore ba se ke ba arogana? (1 Ba-Korinthe 1:10) Ka baka la go se be boteeng mo gogolo gare ga bao ba ipolelago gore ke Bakriste lehono, re swanetše go hlahloba seo Jesu ka boyena a se rutilego.

Motheo Bakeng sa Botee bja Bokriste

Ge a be a sekišwa pele ga Pontio Pilato, Jesu o ile a hlaola motheo bakeng sa botee bja Bokriste. O itše: “Ké se ke se tswáletšwexo; ke tletše sôna lefaseng xore ke bê hlatse ya therešô. Xomme mang le mang e lexo wa therešô ó kwa Lentšu la-ka.” (Johane 18:37) Ka gona, go amogela dithuto tša Jesu gotee le Lentšu ka moka leo le buduletšwego la Modimo, e lego Beibele, go na le  tutuetšo e matla yeo e kopanyago barutiwa ba therešo ba Kriste.—1 Ba-Korinthe 4:6; 2 Timotheo 3:16, 17.

Ke therešo gore barutiwa ba Jesu ba be ba tla ba le dipelaelo tše tšwago pelong goba go se kwane magareng ga bona ka dinako tše dingwe. Ke’ng seo se bego se tla ba thuša? Jesu o itše: “Mohla xò tlile Môya wa therešô, ó tlo Le sepediša tsela ya therešô-moka; xobane a ka se kê a bolêla tša xaxwe. O tlo bolêla se a se kwilexo, a tlo Le tsebiša tše di tl’o xo tla.” (Johane 16:12, 13) Ka gona, moya o mokgethwa wa Modimo o be o tla thuša barutiwa ba therešo ba Jesu go kwešiša therešo go etša ge e be e utollwa ke Modimo ka mo go tšwelago pele. Le gona, moya woo o be o tla tšweletša dienywa tše bjalo ka lerato, lethabo le khutšo, tšeo ka morago di bego di tla kgothaletša botee gare ga bona.—Ditiro 15:28; Ba-Galatia 5:22, 23.

Jesu ga se a ka a dumelela diphapano le go se kwane gare ga barutiwa ba gagwe; goba go ba dumelela gore ba hlatholle ditherešo tša Modimo lefsa e le go di dumelelanya le metlwae ya setšo goba setšo sa bodumedi sa bao ba bego ba tla gahlana le bona. Go e na le moo, bošegong bja gagwe bja mafelelo le bona, o ile a rapela ka phišego gore: “Xa ke kxopêlêle bôná fêla; ke kxopêlêla le bao ba xo tlo dumêla ka Lentšu la bôná. Xore bohle e bê batee, byalo ka xe Wene Tate Ò le xo Nna, le Nna kè le xo Wene. E bê batee ka rena xore lefase le tlê le dumêlê xore ké Wene O nthomilexo.” (Johane 17:20, 21) Ka gona, botee bja kgonthe moyeng le therešong e be e tla ba leswao leo le hlaolago barutiwa ba Kriste go tloga mathomong go ba go fihla mehleng ya rena. (Johane 4:23, 24) Lega go le bjalo, lehono dikereke ga di boteeng, eupša di arogane. Ke ka baka la’ng seo se le bjalo?

Lebaka Leo ka lona Dikereke di Aroganego

Tlhaloso e lebanyago ya go fapana mo gogolo gakaakaa ga ditumelo le metlwae gare ga bao ba ipitšago gore ke Bakriste lehono ke gore ga se ba kgomarela dithuto tša Jesu. Mongwadi yo mongwe o itše: “Go etša nakong e fetilego, lehono bao ba sa tšwago go ba Bakriste ba na le tshekamelo ya go amogela go tšwa Beibeleng selo le ge e le sefe seo se dumelelanago le dinyakwa tša bona—gomme ba hlokomologa selo le ge e le sefe seo se sa dumelelanego le ditšo tša bodumedi bja bona bja setlogo.” Se se swana tlwaa le seo Jesu le baapostola ba gagwe ba ilego ba bolela e sa le pele gore se be se tla direga.

Ka mohlala, ge a le tlase ga pudulelo moapostola Paulo o ile a ngwalela molebeledi-gotee le yena e lego Timotheo gore: “Xo tlo tla lebaka le ba ka se kexo ba kxôna xo theetša thutô ye e phedilexo; ba tlo ikxobêla baruti ka xo ya le dikxanyoxô tša bôná, ka xo rata xo kwiša ditsêbê bose. Xobane ditsêbê tša bôná di tlo hlala therešô; ba tlo boêla dinonwaneng.” Na Bakriste ka moka ba be ba tla forwa? Aowa. Paulo o tšwetše pele ka gore: “Xe e le wene, phafoxêla tšohle; kxôtlêlêla mabothata, O dirê modirô wa sexoeledi, O bê mohlanka ka botlalô.” (2 Timotheo 4:3-5; Luka 21:8; Ditiro 20:29, 30; 2 Petro 2:1-3) Timotheo le Bakriste ba bangwe ba botegago ba ile ba phela ka go dumelelana le keletšo yeo e buduletšwego.

Bakriste ba Therešo ba sa Dutše ba le Boteeng

Go etša Timotheo, Bakriste ba therešo lehono ba sa dutše ba phafogile ka go gana tsela ya batho ya go nea mabaka le ka go amogela feela taelo ya Mangwalo dithutong tša bona tša bodumedi. (Ba-Kolose 2:8; 1 Johane 4:1) E le go ekiša Bakriste ba lekgolong la pele la nywaga, Dihlatse tša Jehofa di phethagatša bodiredi bja tšona dinageng tša ka godimo ga tše 230, gomme di išetša batho gohle molaetša wa Jesu wa mathomong, e lego ditaba tše dibotse tša Mmušo. Ela hloko ditsela tše nne tšeo ka tšona di ekišago Jesu di le boteeng le go bontšha Bokriste bja therešo go sa šetšwe moo di dulago gona.

Ditumelo tša tšona di theilwe Lentšung la Modimo. (Johane 17:17) Moruti wa kereke ya kua Belgium o ngwadile mabapi le tšona gore: “Selo se sengwe seo re ka ithutago sona go tšona [Dihlatse tša Jehofa] ke go ikemišetša ga tšona go theetša Lentšu la Modimo le sebete sa tšona sa go nea bohlatse ka lona.”

Di lebelela go Mmušo wa Modimo e le wona kimollo mathateng a lefase ka bophara. (Luka 8:1) Kua Barranquilla, Colombia, Hlatse e ile ya bolela le Antonio, e lego mothekgi yo matla  wa mokgatlo wa bopolitiki. Hlatse ga se ya ka ya tšea lehlakore la gagwe goba go bolelela dikgopolo tše dingwe tša bopolitiki. Go e na le moo, e ile ya ithapela go swara thuto ya Beibele le Antonio le dikgaetšedi tša gagwe ka ntle le tefo. Go se go ye kae, Antonio o ile a lemoga gore Mmušo wa Modimo e tloga e le wona kholofelo e nnoši bakeng sa batho ba diilago kua Colombia le lefaseng ka bophara.

Di hlompha leina la Modimo. (Mateo 6:9) Ge Dihlatse tša Jehofa di be di gahlana ka lekga la pele le Maria yo e lego Mokatholika yo a dulago kua Australia, o ile a dumelela Dihlatse gore di mmontšhe leina la Modimo ka Beibeleng. O ile a arabela bjang? “Ge ke be ke bona leina la Modimo ka lekga la pele ka Beibeleng, ke ile ka lla. Ke be ke kgomilwe kudu ke tsebo ya gore ge e le gabotse nka kgona go tseba le go diriša leina la Modimo ka boyena.” Maria o ile a tšwela pela a ithuta Beibele, gomme ka lekga la pele bophelong bja gagwe, o ile a tseba Jehofa e le motho a ba a kgona le go aga tswalano ya sa ruri le yena.

Di kopantšwe ke lerato. (Johane 13:34, 35) Kuranta ya kua Canada ya The Ladysmith-Chemainus Chronicle e hlalositše gore: “Go sa šetšwe gore o na le ditumelo tša bodumedi goba ga o na le tšona, o swanetše go reta Dihlatse tša Jehofa tše 4 500 tšeo di ilego tša šoma bošego le mosegare bekeng e fetilego le seripa bakeng sa go aga Holo ya Kopano ya disekwere-mithara tše 2 300 kua Cassidy . . . Go dira se ka lethabo ka ntle le dingangišano, go se kwane goba go inyakela botumo ke leswao la Bokriste bja therešo.”

Ka gona ela hloko bohlatse bjo. Ge bo-rathutatumelo ba Bojakane, baromiwa le bao ba tsenago kereke ba tšwela pele ba katana le thulano yeo e bonagalago e le kgaufsi le go thoma ya ngangišano ka dikerekeng tša bona, Bokriste bja therešo bo a ata lefaseng ka bophara. Ka kgonthe, Bakriste ba therešo ba phethagatša bodiredi bja bona bjoo ba bo neilwego bja go bolela le go ruta Lentšu la Modimo. (Mateo 24:14; 28:19, 20) Ge e ba o le gare ga bao ba ‘llago ba hlokofetše’ ka baka la makgapha ao a diregago mo nakong ye e bile o tshwenyegile ka go se be boteeng ga madumedi a Bojakane, re go laletša gore o tlatše Dihlatse tša Jehofa borapeding bjo bo lego boteeng bja Bokriste bja Modimo a nnoši wa therešo e lego Jehofa.—Hesekiele 9:4; Jesaya 2:2-4.