Dipotšišo tše Tšwago go Babadi

Ka ge ba-Lefi ba be ba se na bohwa bja naga Isiraeleng ya bogologolo, Hanamiele wa mo-Lefi o be a ka rekišetša bjang ngwana wa rangwane’agwe wa mo-Lefi e lego Jeremia tšhemo, bjalo ka ge go bontšhitšwe go Jeremia 32:7?

Jehofa o ile a botša Arone mabapi le ba-Lefi gore: “O ka se kê wa ba le naxa ye e tl’o xo ba ya xaxo le seabêlwa mo xo bôná [ba-Isiraele].” (Numeri 18:20) Lega go le bjalo, ba-Lefi ba be ba abetšwe metse e 48 gotee le mafulo a bona, go phatlalala le Naga ya Kholofetšo. Motse wa gabo Jeremia e be e le wa Anathothe, o mongwe wa metse yeo e bego e abetšwe “barwa ba Arone moperisita.”—Jošua 21:13-19; Numeri 35:1-8; 1 Koronika 6:54, 60.

Go Lefitiko 25:32-34, re hwetša gore Jehofa o ile a nea ditaelo tše lebanyago mabapi le ‘tshwanelo ya go rekolla’ naga yeo e bego e le ya ba-Lefi. Go molaleng gore malapa a ba-Lefi a be a tla ba le ditshwanelo tša bohwa bja naga mabapi le go e laola, go e diriša gotee le go rekiša dikarolo tše itšego tša naga tšeo ba bego ba di abetšwe. Ka mo go kwagalago tšeo di be di tla akaretša go reka le go rekolla naga. * Ka dibopego tše dintši, ba-Lefi ba be ba e-na le naga gotee le go e diriša ka ditsela tše di swanago le ba-Isiraele ba meloko e mengwe.

Ka ntle le pelaelo, go ba le naga e bjalo ya ba-Lefi go be go fetišetšwa e le bohwa bja lapa. Lega go le bjalo, ge e le mabapi le ‘tshwanelo ya go rekolla,’ kgwebo e be e dumeletšwe gare ga ba-Lefi feela. Le gona, go bonagala go reka le go rekolla naga go be go šoma feela nageng yeo e bego e le ka gare ga metse, ka ge “naxa ya mafulô ye e bapetšexo le metse ya bôna” e be e se ya swanela go rekišwa ka gobane e be e le “ya bôná neng le neng.”—Lefitiko 25:32, 34.

Ka gona go molaleng gore tšhemo yeo Jeremia a ilego a e rekolla go Hanamiele e be e le ya mohuta woo o bego o ka fetišwa ka go rekollwa. E ka be e be e le ka gare ga motse. Jehofa ka noši o ile a kgonthišetša gore “thšemo” ye go bolelwago ka yona mo e be e le ya Hanamiele le gore Jeremia o be a e-na le ‘tshwanelo ya go e rekolla.’ (Jeremia 32:6, 7) Jehofa o ile a diriša mokgwa wo ka tsela ya seswantšhetšo e le gore a gatelele kholofetšo ya gagwe ya gore ba-Isiraele ba be ba tla boela ba hwetša gape bohwa bja bona bja naga ka morago ga lebaka la go ba bothopša kua Babele.—Jeremia 32:13-15.

Ga go na leswao la gore Hanamiele o be a hweditše naga yeo ya Anathothe ka tsela e sa swanelago. Ga go na selo seo se bontšhago gore o ile a tshela molao wa Jehofa ka go laletša Jeremia gore a reke tšhemo ye kua Anathothe goba gore Jeremia o ile a diriša tshwanelo ya gagwe ka mo go sa swanelago ya go rekolla ka go reka tšhemo ye.—Jeremia 32:8-15.

[Mengwalo ya ka tlase]