Kamoo Re Bontšhago Lerato La Rena Go Modimo

GO HLAGOLELA lerato go Modimo ga se feela go ithuta ka yena. Ka ge bahlanka ba Modimo lefaseng ka bophara ba ka hlatsela seo, lerato la therešo go Modimo le gola ge motho a tlwaelana le semelo sa gagwe, gomme le matlafala kudu ge motho a tlwaelana le seo a se ratago, seo a se hloilego le seo a se thabelago gotee le dinyakwa tša gagwe.

Ka lerato, Jehofa o re neile Lentšu la gagwe e lego Beibele, yeo a ikutollago ka go yona. Ka go yona re bala kamoo Jehofa a ilego a swaragana le maemo a fapa-fapanego ka gona. Go swana le ge lengwalo le le tšwago go motho yo re mo ratago le re thabiša kudu, le Beibele ka mo go swanago e a re thabiša ge re dutše re bona dipego tša semelo sa Jehofa di utollwa.

Lega go le bjalo, bjalo ka ge ka dinako tše dingwe re lemoga bodireding bja rena bja phatlalatša, go ithuta ka Modimo ga se ka mehla go dirago gore motho a mo rate. Jesu o ile a botša ba-Juda ba itšego ba mehleng ya gagwe bao ba bego ba se na tebogo gore: “Latišang mangwalong, ka xobane lena Le re Le na le bophelô byo bo sa felexo ka ôna; . . . fêla se ke se lemoxilexo, ké xe mo xo lena xò se na leratô la Modimo.” (Johane 5:39, 42) Ba bangwe ba fetša nywaga e mentši ba ithuta ka ditiro tša Jehofa tše lerato eupša ga ba mo rate. Ka baka la’ng? Ka gobane ba palelwa ke go naganišiša ka morero wa seo ba ithutago sona. Ka mo go fapanego, batho ba dimilione bao ba botegago bao re ithutago Beibele le bona ba lemoga gore lerato la bona go Modimo le tšwela pele go gola. Ka baka la’ng? Ka gobane, ka go swana le ge rena re dirile, ba latela mohlala wa Asafa. Ka tsela efe?

Naganišiša ka Tsela e Nago le Tebogo

Asafa o ile a ikemišetša go hlagolela lerato go Jehofa ka pelong ya gagwe. O ngwadile gore: “Ke re ke fepeletše pelo ya-ka; . . . Ke xopola ’tirô  tša Morêna. Ruri, ke xopola mehlôlô y’axo ya boxolo-xolo. Ke êlêlwa ditirô tša xaxo ka moka; ke akanya tše Wêna O di dirilexo.” (Psalme 77:6, 11, 12) Lerato go Modimo le tla gola ka pelong ya motho yo a naganišišago ka ditsela tša Jehofa go etša ge mopsalme a dirile.

Go oketša moo, go gopola diphihlelo tšeo re di thabetšego ge re be re hlankela Jehofa go matlafatša tswalano ya rena le yena. Moapostola Paulo o boletše gore re “badirišani” ba Modimo, gomme tswalano yeo e ka golago gare ga badirišani ke ya bohlokwa kudu. (1 Ba-Korinthe 3:9) Ge re bontšha lerato la rena go Jehofa, o a le thabela, gomme le thabiša pelo ya gagwe. (Diema 27:11) Ka gona, ge re kgopela thušo ya Jehofa gomme a re thuša go rarolla mathata, re a tseba gore o na le rena gomme lerato la rena go yena le a matlafala.

Tswalano gare ga batho ba babedi e gola ge ba dutše ba botšana maikwelo a bona. Ka mo go swanago, ge re botša Jehofa lebaka leo ka lona re ineetšego go yena, lerato la rena go yena le a matlafala. Re tla ikhwetša re naganišiša ka mantšu a Jesu a rego: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka, le ka matla a xaxo ka moka.” (Mareka 12:30) Re ka dira’ng e le gore re kgonthišege gore re tla tšwela pele re rata Jehofa ka pelo ya rena ka moka, moya wa rena ka moka, tlhaologanyo ya rena ka moka le ka matla a rena ka moka?

Go Rata Jehofa ka Pelo ya Rena ka Moka

Mangwalo a bolela ka pelo ya seswantšhetšo, e lego motho wa ka gare—dikganyogo tša rena, boemo bja kgopolo le maikwelo. Ka gona go rata Jehofa ka pelo ya rena ka moka go bolela gore re kganyoga go kgahliša Modimo go feta selo le ge e le sefe. (Psalme 86:11) Re bontšha gore re na le lerato le bjalo ka go dira gore semelo sa rena se amogelege go yena. Re katanela go ekiša Modimo ka go ‘hloya bobe gomme ra kgomarela bolo.’—Ba-Roma 12:9.

Lerato la rena go Modimo le kgoma maikwelo a rena ka selo se sengwe le se sengwe. Ka mohlala, re ka hwetša mošomo wa rena e le o kgahlišago goba e le o nyakago nako e ntši, eupša na mo ke moo pelo ya rena e lego gona? Aowa. Ka ge re rata Jehofa ka pelo ya rena ka moka, selo sa pele ke gore re badiredi ba Modimo. Ka mo go swanago, re nyaka go thabiša batswadi ba rena, molekane wa rena wa lenyalo gotee le mothwadi wa rena, eupša re hlatsela lerato la rena la go rata Jehofa ka pelo ka moka ka go nyaka go mo kgahliša go feta bohle. Go feta moo, o swanelwa ke go tla pele ka pelong ya rena.—Mateo 6:24; 10:37.

Go Rata Jehofa ka Moya wa Rena ka Moka

Ka Mangwalong lentšu “môya” ge e le gabotse le šupa go rena ka noši gotee le bophelo bjo re nago le bjona. Ka gona go rata Jehofa ka moya ka moka go bolela  gore re diriša bophelo bja rena go mo tumiša gotee le go hlatsela lerato la rena go yena.

Ke therešo gore go ka ba go e na le dilo tše dingwe tšeo re di ratago bophelong, tše bjalo ka go ithuta mošomo, go hlokomela kgwebo goba go godiša bana. Eupša ka nako e swanago, re bontšha lerato la rena la go rata Jehofa ka pelo ka moka ka go dira dilo ka tsela ya gagwe le ka go bea dilo tše dingwe maemong a tšona a swanetšego maphelong a rena, ka go rialo re ‘tsoma mmušo pele le toko ya wona.’ (Mateo 6:33) Le gona borapedi bja moya ka moka bo bolela go ba bao ba fišegago. Re bontšha Jehofa gore re a mo rata ka go bolela molaetša wa Mmušo ka phišego, ka go nea ditlhaloso tše di agago dibokeng goba ka go thuša bana babo rena le dikgaetšedi ba Bakriste. Dilong ka moka, re dula re le bao ba “diraxo thatô ya Modimo ka pelo e rataxo [“ka moya ka moka,” NW].”—Ba-Efeso 6:6.

Jesu o ile a bontšha lerato la go rata Modimo ka moya ka moka ka go ikgafa. O ile a bea thato ya Modimo pele gomme dinyakwa tša gagwe ka noši tša tla ka morago. Jesu o re laleditše gore re latele mohlala wa gagwe. O itše: “Xe motho a rata xo nthšala moraxo, a ikxafê, a rwalê [kota ya gagwe ya tlhokofatšo, NW], ’me a ntatêlê.” (Mateo 16:24, 25) Go ikgafa go bolela go dira boineelo. Go bolela gore re rata Modimo kudu moo e lego gore re ikgafela yena, go swana le ge mehleng ya Beibele mo-Isiraele a be a rata mong wa gagwe kudu moo a bego a ikgafela yena go ba lekgoba la gagwe sa ruri. (Doiteronomio 15:16, 17) Go neela maphelo a rena go Jehofa ke bohlatse bjo bo kgodišago bja gore re a mo rata.

Go Rata Jehofa ka Tlhaologanyo ya Rena ka Moka

Go rata Jehofa ka tlhaologanyo ya rena ka moka go bolela gore re dira boiteko bjo bongwe le bjo bongwe bjo bo nyakegago e le gore re kwešiše semelo sa Jehofa, merero le dinyakwa tša gagwe. (Johane 17:3; Ditiro 17:11) Re bontšha lerato la rena go Jehofa ka go diriša bokgoni bja rena ka moka bja monagano bakeng sa go thuša ba bangwe gore le bona ba rate Jehofa le ka go kaonefatša bokgoni bja rena bja go ruta. Moapostola Petro o kgothaleditše gore: “Itlemeng mathêka kxopolong ya lena.” (1 Petro 1:13) Le gona, re dira boiteko bja go bontšha go kgahlegela ga rena ba bangwe, kudu-kudu bahlanka-gotee le rena ba Modimo. Re lemoga maemo a bona gomme re bona ge theto e swanetše goba ge khomotšo e nyakega.

Re bontšha Jehofa gore re mo rata ka tlhaologanyo ya rena ka moka ka go ikokobeletša yena ka tlhaologanyo. Re leka go bona dilo ka tsela yeo a di bonago ka yona, re mo ela hloko ge re dira diphetho gomme re kgodišegile gore tsela ya gagwe ke e kaone. (Diema 3:5, 6; Jesaya 55:9; Ba-Filipi 2:3-7) Eupša ge re tšwela pele go bontšha lerato la rena go Modimo, re ka diriša matla a rena bjang?

Go Rata Jehofa ka Matla a Rena ka Moka

Bafsa ba bantši ka phuthegong ya Bokriste ba diriša matla a bona go tumiša Jehofa. (Diema 20:29; Mmoledi 12:1) Tsela e nngwe yeo ka yona bafsa ba bantši ba Bakriste ba bontšhago gore ba rata Jehofa ka matla a bona ka moka ke ka go tšea karolo tirelong ya bobulamadibogo, e lego bodiredi bja nako e tletšego. Bo-mma ba bantši ba tšea karolo bodireding bjo ge bana ba bona ba le sekolong. Bagolo bao ba botegago bao ba dirago maeto a bodiši go tlaleletša go hlokomeleng katlego ya malapa a bona ba bontšha gore ba rata Jehofa ka matla a bona ka moka. (2 Ba-Korinthe 12:15) Jehofa o nea bao ba mo holofelago matla, e le gore ba ka bontšha lerato la bona ka go mo tumiša, ba diriša matla le ge e le afe ao ba nago le ona.—Jesaya 40:29; Ba-Hebere 6:11, 12.

Lerato le tla gola ge e ba le hlagolelwa ka mo go nepagetšego. Ka gona, re tšwela pele re ipha nako ya go naganišiša. Re gopola seo Jehofa a re diretšego sona le lebaka leo a swanelwago ke boineelo bja rena. Ka ge re le bana ba Adama ba sa phethagalago, le ka mohla re ka se ke ra swanelwa ke “tše Modimo a di lokišeditšexo ba ba mo rataxo,” eupša re ka bontšha gore re rata Jehofa ka moya wa rena ka moka. Anke re tšweleng pele go dira bjalo!—1 Ba-Korinthe 2:9.

[Caption on page 20]

Re bontšha lerato la rena go Modimo ka ditiro